Nyaniseka Ezintweni Zonke

“Sikholosekile kukuthi sinesazela esilungileyo, singa ezintweni zonke singahamba kakuhle [ngokunyanisekileyo, NW].”—HEBHERE 13:18.

1, 2. (a) Kwenzeke ntoni kuphawu lokunyaniseka kweli xesha lethu? (b) Ziziphi iintlobo zabantu ezibandakanyekileyo koku kunganyaniseki?

ABANTU asebekhulile banokulikhumbula ixesha laxa, kwiindawo ezininzi, abantu babengazitshixi izindlu zabo. Babengacingi ngokuba izinto zabanye okanye ukubaqhatha. Ukuba babeboleke imali, babeziva benyanzelekile ukuba bayibuyise. Yaye ilizwi labo lalingabangeli nkathazo. Kuyinyaniso ukuba, kwakukho ukunganyaniseki, kodwa kwakungabalaselanga konke konke. Noko ke, namhlanje ukuba, ukuxoka nokuqhatha zizinto eziqhelekileyo ehlabathini lonke. Yaye izenzo ezininzi zokunganyaniseki zivela kubantu ekuthiwa bahloniphekile abahlala nabasebenza kamnandi, benxiba kakuhle, besenokuba ngabahamba icawa nabazigqala njengabemi abalungileyo. Eneneni, ukunganyaniseki kuye kwaduma kakubi phakathi kwamagosa karhulumente nawezoshishino.

² EUnited States nyaka ngamnye kubikwa iintlobo zolwaphulo-mthetho olukhulu ezibandakanya ukunganyaniseki ezingaphezu kwezigidi ezili-11. Ibe, ukusilela ukubika yonke imali yerhafu kufikelela ngaphezu kwama-640 amawaka ezigidi zeerandi nyaka ngamnye. KwisiXeko saseNew York malunga nabantu abalikhulu lamawaka bayakuphepha ukuyihlawula imali kuloliwe ohamba ngaphantsi komhlaba—mihla le. Igosa lathi ukuba bonke aba bantu baqhathayo bebebanjwa, “iinkundla bezingagcinwa zixakekile kangangeenyanga eziliqela.” EJapan uhlolisiso lwabantu abahlawula irhafu lwatyhila ukuba abangama-95 ekhulwini baqhatha ekuhlawuleni irhafu, kuquka ama-92 ekhulwini amagqwetha. Kwinyanga nje enye abantu abangaphezu kwe-16 000 babanjwa bekhwela ngaphandle kokuhlawula koololiwe.

3. Kuye kwabalasela ngakumbi njani ukunganyaniseki emtshatweni?

³ Ukunganyaniseki kuye kwanda nakubomi babantu abatshatileyo. Kwiminyaka ethile eyadlulayo uhlolisiso lwatyhila ukuba ama-30 ekhulwini abafazi baseMerika “babandakanyeka kwisini esingaphandle komtshato.” Kuhlolisiso olungakumbi lwakutshanje lwabafazi abatshatileyo abangaphezu kwekhulu lamawaka, abangama-50 ekhulwini bavuma ukuba “bakhe bakrexeza, ubuncinane kanye.” Umakhi-mkhanya wathi mhlawumbi “ama-90 ekhulwini amadoda atshatileyo” ayaqhatha ngendlela efanayo.

Kuyinxalenye ‘Yemihla Yokugqibela’

4. Kutheni le nto ukwanda kokunganyaniseki kungasothusi nje?

⁴ Ayibamangalisi abakhonzi bakaYehova into yokuba ukunganyaniseki kube kuye kwanda. Bayazi ukuba oku kuyinxalenye yomqondiso wale “mihla yokugqibela.” ILizwi likaThixo laxela kwangaphambili ukuba kwixesha lethu abantu babeya kuba ‘ngabazithandayo, abathandi bemali, abanganyanisekanga, abangenakuzeyisa, abangenakuthanda kulunga, benokumila kokuhlonela uThixo ukanti bewakhanyela amandla ako, yaye behambela phambili ebubini.’ (2 Timoti 3:1-5, 13) Igqiza leengcaphephe lavuma ukuba, “ngokwandileyo,” abantu ehlabathini “bayibekela bucala imilinganiselo yesithethe yokulungileyo nokubi yaye bayasicinezela isazela.”

5. Kwenzeka ntoni xa imeko efana naleyo yomhla wethu yabakhoyo kubukumkani bamandulo bezizwe ezilishumi zakwaSirayeli?

⁵ Imeko esehlabathini namhlanje imbi ngakumbi kunokuba yayinjalo kanye ngaphambi kokuba uYehova aphumeze umgwebo wakhe kubukumkani bamandulo bezizwe ezilishumi zakwaSirayeli. Ebalisa ngelo xesha uHoseya 4:1-3 uthi: “UYehova ubambene nabemi belizwe eli; ngokuba kungekho nyaniso, kungekho nceba, kungekho kwazi uThixo kweli lizwe. Kukushwabula, nokuxoka, nokuncinitha, nokuba, nokukrexeza; bagqobhozile, igazi liphathele kwigazi. Ngenxa yoko ilizwe lenza isijwili, zithokombisile zonke izinto ezimi kulo.” Umgwebo kaYehova oqatha waphunyezwa ngowama-740 B.C.E. xa wavumela iAsiriya ukuba ibhukuqe uSirayeli nekomkhulu lakhe laseSamariya ize ise abemi balo ekuthinjweni.

6. Kutheni le nto uThixo eya kuphumeza umgwebo phezu kwale nkqubo ikhoyo, yaye loo mgwebo uqiniseke kangakanani?

⁶ Ngokufanayo, uYehova uye ‘wabambana’ neli hlabathi linganyanisekanga. IZibhalo zenza kucace ukuba ligwetywe ngokuqatha nguYehova yaye liya ‘kuthokombisa’ entshabalalweni. “Lona izulu langoku, nawo umhlaba lo, kwangelo lizwi ezo zinto ziqwetyelwe, zigcinelwe, umlilo, kuse kwimini yomgwebo nentshabalalo yabantu abangahloneli Thixo.” (2 Petros 3:7) Ukuzalisekiswa koku kuqiniseke gqitha kangangokuba iLizwi likaThixo lithetha ngako ngokungathi sele kwenzekile lisithi: “Yabonani, yeza iNkosi namawakawaka abangcwele bayo, ukuba ibagwebe bonke, ibohlwaye bonke abangahloneli Thixo kubo, ngenxa yemisebenzi yabo yonke yokungahloneli Thixo, abayenze bengahloneli Thixo.”—Yuda 14, 15.

7. De uYehova aphelise eli hlabathi lonakeleyo, luluphi ucelomngeni olujongene nabakhonzi bakhe?

⁷ Noko ke, de uThixo aliphelise eli hlabathi linganyanisekanga, abakhonzi bakhe kufuneka baphile kulo. AmaKristu ‘asehlabathini,’ nangona, njengokuba uYesu watshoyo, ‘engengawo awehlabathi.’ (Yohane 17:11-14) Ngaloo ndlela, mihla le abizelwa ukuba enze izigqibo ngokokuziphatha ezibandakanya ukunyaniseka. Oku kuquka iimeko ezisemsebenzini, esikolweni, entsatsheni, okanye xa enabahlobo. Kulo lonke ucelomngeni olujongene nesazela sabo esiqeqeshwe ngeBhayibhile, abakhonzi bakaYehova bafuna ukuvakalelwa njengokuba umpostile uPawulos wavakalelwayo xa wathi: “Sikholosekile kukuthi sinesazela esilungileyo, singa ezintweni zonke singahamba kakuhle [ngokunyanisekileyo, NW].”—Hebhere 13:18.

‘Akuyonkqubo Nje Eyeyona Ilungileyo’

8. Kutheni le nto ukunyaniseka kuyeyona nkqubo yabakhonzi bakaYehova?

⁸ Kuye kwathiwa esiNgesini ‘ukunyaniseka yeyona nkqubo ilungileyo,’ nto leyo ethetha ukuba ukunyaniseka kuzisa imiphumo esebenzisekayo. Kodwa kumaKristu, lo mbandela udlulela ngaphaya koko. Kuwo, ukunyaniseka kuphela kwenkqubo yawo. Njengabakhonzi bakaYehova, anyanzelekile ukuba angaxelisi ukunganyaniseki kweli hlabathi ligwetyiweyo—nangaso nasiphi na isizathu. Kunoko, amele aphumeze yonke imisebenzi yawo ngokuvisisana nemithetho kaThixo. Yaye imithetho yakhe ayiguqukanga kule nkalo.

9. UMthetho kaYehova kuSirayeli wamandulo walugxininisa njani uphawu lokunyaniseka?

⁹ Ngokomzekelo, kuSirayeli wamandulo uYehova wathi: “Uze ungakrexezi. Uze ungebi. Uze ungangqini ubungqina obubuxoki ngommelwane wakho. Uze [unganqweneli] . . . nanye into eyeyommelwane wakho.” (Eksodus 20:14-17)) Ngokufanayo, iLevitikus 19:11, 12 ithi: “Ize ningebi; ize ningakhanyeli into niyazi; ize ningaxokisani. Ize ningalifungi igama lam nixoka; ungalihlambeli igama loThixo wakho: ndinguYehova.”

10. UbuKristu bulugxininisa njani uphawu lokunyaniseka?

¹⁰ Imithetho enjalo iye yamiselwa kwakhona kumaKristu. Ngaloo ndlela, iLizwi likaThixo lithi: “Anazi na, ukuba abangemalungisa abayi kubudla ilifa ubukumkani bukaThixo? Musani ukulahlekiswa; abenza umbulo, nabakhonzi bezithixo, nabakrexezi, nezifebe, namadoda alalanayo, namasela, namabawa, namanxila, nabatshabhisi, nabaphangi, abayi kubudla ilifa ubukumkani bukaThixo”; ibe nabo ‘babenzayo ubuxoki’ abayi kubudla ilifa. (1 Korinte 6:9, 10; ISityhilelo 22:15) Bonke abafuna ukuphila kwinkqubo entsha kaThixo bamele babonakalise iimpawu zakhe, olunye lwazo olukukuba ‘uThixo akanakuxoka.’ (Tito 1:2; Hebhere 6:18) Ukunganyaniseki kuvela kuSathana, ‘onguyise wamaxoki.’—Yohane 8:44.

11, 12. (a) Kutheni le nto sifanele sifunde ukunyaniseka ngoku? (b) Kutheni le nto siziva sinqabisekile nje kwintlangano kaThixo ebonakalayo?

¹¹ Ekubeni ‘ubulungisa boma’ ‘kumhlaba omtsha’ othenjiswe nguThixo, “baya kufunda ubulungisa abemi belimiweyo.” (2 Petros 3:13; Isaya 26:9) Kungenxa yeso sizathu le nto abo banethemba lokuba ngabemi bomhlaba oyiParadisi abalinani elikhula ngokukhawulezileyo ngoku ‘befundiswa ngeendlela zikaYehova,’ kuquka naleyo yokunyaniseka. (Isaya 2:3, 4) Ngaloo ndlela, iLizwi likaThixo lisiluleka ngokuthi: “Musani ukuxokisana, nizihlubile nje umntu omdala, kunye nezenzo zakhe.” (Kolose 3:9) Kwakhona lithi: “Lowo ubayo makangabi seba; kanye ke makabulaleke esebenza okulungileyo ngezandla zakhe, ukuze abe nako ukwabela osweleyo.”—Efese 4:28.

¹² Ngoko abakhonzi bakaYehova bamele banyaniseke ezintweni zonke. Ekubeni leyo iyindlela ekuya kufuneka ukuba ubani ahambe ngayo kwinkqubo entsha, yindlela abantu bakaThixo abamele bayilandele ngoku. Yaye olunjani uyolo ekululo ukunxulumana nebutho lezizwe ngezizwe lezigidi zabantu abahlakulela uphawu lokunyaniseka! Hayi indlela esiziva sinqabiseke ngayo kule paradisi yokomoya eveliswe ngumoya oyingcwele onamandla kaThixo, “awamnika abo bamvayo yena uThixo.” (IZenzo 5:32) Khawuthelekise oko nomoya ombi owesameleyo kweli hlabathi lilawulwa ‘nguthixo weli phakade,’ uSathana uMtyholi.—2 Korinte 4:4; Galati 5:19-24.

Ukunyaniseka Kuyaphawulwa Ngabanye

13, 14. Baye bathini abanye ngokunyaniseka kwabantu bakaYehova?

¹³ Uphawu lokunyaniseka lwabantu bakaThixo ngokufuthi luyaphawulwa ngabanye. Ngokomzekelo, iphephandaba lesiTaliyane iIl Piccolo lapapasha ileta eyayivela komnye wabafundi balo eyayisithi: “Ndinqwenela ukuthi maz’ enethole kwinenekazi eliye lazichaza njengeNgqina likaYehova neliye lanikela ubungqina bokunyaniseka okungumzekelo ngokubuyisela kum, lisebenzisa eli phephandaba, intywenka yemali endayilahlayo.” EUnited States, iThe Indianapolis Star yabhala ngesibini esingamaNgqina esafumana i-R10 260 saza salibuyisela kumninilo. Eli phephandaba lathi esi sibini “asizange sithandabuze ngento ekwakufuneka siyenzile.” Kwakutheni ukuze singathandabuzi? Sathi: “Sasingenakuyigcina kuthi. SingamaNgqina kaYehova.”

¹⁴ Xa iNgqina eliseMissouri lafumana ama-R24 360 laza lawasa kwelinye ipolisa, iphephandaba elithile lacaphula igosa njengelalisithi: “Inqabe gqitha into yokuba ubani esakufumana imali engako ayibuyise. Akukho namnye endinokumkhumbula owakhe wayenza loo nto ngaphambili. Ngenene kwakubambis’ ongezantsi.” Eli nqaku layikhankanya into yokuba iNgqina “alizange liyicinge into yokuba liyigcine kulo le mali.” Igosa eliyintloko lathi iNgqina “liye lalenza laphinda lanenkolelo yokuba basekho abantu abathile abanyanisekileyo phakathi koluntu.” INgqina laphendula ngokuthi: “Thina njengeqela labantu sinebhongo ngokunyaniseka kwethu kwiinkalo zonke.”

15, 16. Ngawaphi amava abonisa ukuba ukunyaniseka kuyaphawulwa ngabanye nakwizinto ezincinane?

¹⁵ Akukho kwizinto ezinkulu kuphela esimele sinyaniseke kuzo. Ukunyaniseka kuyafuneka nakwizinto ezincinane. (Luka 16:10) Ngokomzekelo, xa intsapho engamaNgqina yayihlala kwihotele yaseFlorida, unyana wayo ngempazamo wathabatha isingxobo somqamelo, esibhidanisa nevesti yakhe. Le ntsapho yasithumela ngeposi ehotele, yaye umphathi wehotele wayibhalela esithi: “Sithanda ukunibulela gqitha ngenxa yokunyaniseka kwenu. Ngoxa ukubuyisela kwenu isingxobo sethu somqamelo kusenokwenzeka ukuba ngokuqhelekileyo ibisisenzo semihla ngemihla kuni, kuthi ibiyinto ekufuneka siyincomile.” Ngokufanayo, xa isibini esingamaNgqina sathi ngempazamo sathabatha usiba lokubhala kwihotele yaseGeorgia saza ke salubuyisela, umphathi wasibhalela esithi: “Ndiyanibulela ngokuchitha ixesha nibuyisela usiba lokubhala enaluthabatha ngempazamo nalufaka kwizinto zenu. Kuyahlaziya ukufumana amazwi anjengalawo niwabhalileyo evela kubantu abanyanisekileyo nabanenkathalo abalolo hlobo!”

¹⁶ Inkwenkwe eliNgqina ekwibanga lesithathu yayidlala ibaseball esikolweni. Kulo mdlalo yayisele ikufuphi ukuba ifike emngxunyeni, kodwa yayisazi ukuba ayizang’ ifike phambi kwebhola. Abadlali abangakwicala layo bazama ukuthi yayifike ngaphambi kwebhola. Kodwa ke ilungu leqela ababedlala nalo lathi yayinye kuphela indlela eqinisekileyo yokufumana inyaniso. Lathi: “Buzani yena ukuba ufike phambi kwayo na okanye emva kwayo. UliNgqina, yaye amaNgqina akaxoki.” Ihambo entle yale nkwenkwe kwimicimbi yamihla le yayiphawulwe ngabanye. Enyanisweni, ngokuphila ngokuvisisana nemilinganiselo kaThixo, “nasemilonyeni yeentsana” kunokuphuma indumiso eya kuYehova.—Mateyu 21:16.

17, 18. Nguwuphi umphumo omhle imigaqo kaYehova emayela nokunyaniseka eye yanawo kubantu abantliziyo zilungileyo?

¹⁷ ENigeria, indoda yeNgqina yayikuchase gqitha ukuya kwalo kwindibano yesiphaluka. Ngoko yalilandela yaza yazama ukubangela isiphithiphithi. Emva kocwangciso, le ndoda yathi: “Ngoku ndiza kunivavanya maNgqinandini.” Xa kwakungekho bani ukhangeleyo, yakhupha imali epokothweni yayo, yayifaka uphawu, yayishwabanisa yaza yayiwisa phantsi emhlabeni. Kamva, yathi yayilahlekelwe yimali yayo. Noko ke, yaxelelwa ukuba ingazikhathazi kuba yayiya kufumaneka. Yabuyela kwindawo eyayiwise kuyo imali, kodwa yayingasekho. “Heke,” yatsho, “Ndinifumene nina bantundini baqhathayo!” Yathi ke yaxelelwa ukuba imali yayingenakuba lapho kodwa yayinokuba ithatyathiwe yasiwa kwiSebe Lezilahlekileyo Zafunyanwa. Ngenene imali enolo phawu yayikwelo sebe yaye yabuyiselwa kuyo. La mava ayikhuthaza ukuba ikuhlolisise oko umfazi wayo wayekukholelwa, yaye namhlanje ilelinye lamaNgqina kaYehova.

¹⁸ Kwileta eyabhalelwa ikomkhulu lehlabathi lamaNgqina kaYehova eNew York, umfazi ongeloNgqina wathi wayefuna ukubalisa ngesiganeko esenzeka kwintwazana yakhe esikolweni. Le ntwazana yakhe ngaminazana ithile yabelwa umkhala wehashe odl’ imali. Kwiminyaka emibini kamva, le ntwazana yafumana ileta eyayisithi: “Lili Othandekayo, Nangu umkhala wakho owebiwa kuwe kwiminyaka emibini edluleyo. Ndim owawuthabathayo, kodwa ngoku ndilelinye lamaNgqina kaYehova, yaye isazela sam esitsha asiyi kundivumela ukuba ndiwugcine kum. Ndibuhlungu ngenyaniso ngenxa yoko. Khawundixolele.” Ewe, abo banqwenela ukukhonza uYehova bamele bahlakulele ‘isazela esilungileyo, njengoko singa ezintweni zonke singahamba ngokunyanisekileyo.’—Hebhere 13:18.

Ukugcina Intlangano Icocekile

19. (a) Ukuba umKristu wenza isenzo sokunganyaniseki, umele enze ntoni? (b) Ukuba abambaIwa phakathi kwethu bayazingisa kwizenzo zokunganyanseki, kokwenzeka ntoni kubo, ibe ngoba?

¹⁹ Ukuba umkhonzi kaThixo ngempazamo wenza isenzo sokunganyaniseki, ke umele akhawulezise ukwenza ulungiso kamsinya nje ukuba akuqonde oko okanye kuziswe engqalelweni yakhe. Yaye ukuba abantu abambalwa phakathi kwethu baphelelwa luxabiso ngemigaqo yeBhayibhile baze bazingise kuqheliselo lokunganyaniseki, abayi kuvunyelwa ukuba bangcolise abantu bakaThixo. Baya kushenxiswa ebudlelaneni. (1 Korinte 5:11-13) Koku sinokuthembela ngoncedo lwasezulwini, kuba uYesu waxela kwangaphambili esithi: “UNyana woMntu uya kuthuma izithunywa zakhe, zize zibuthe, zikhuphe ebukumkanini bakhe, zonke izikhubekiso, nabo benza okuchasene nomthetho . . . Aya kwandula ke amalungisa ukubengezela njengelanga ebukumkanini boYise wawo.”—Mateyu 13:41-43.

20, 21. (a) Kutheni le nto ngenkoloseko sinokumemela abalulamileyo ukuza kunqula uYehova kunye nathi? (b) Yiyiphi inkalo yokunyaniseka eya kuxutyushwa kwinqaku elilandelayo?

²⁰ Ngaloo ndlela, intlangano kaYehova igcinwa icocekile. Ngenxa yoko, ‘iyabengezela’ njengomlilo obaswe entabeni kubantu abantliziyo zinyanisekileyo. Kungenxa yeso sizathu le nto ngenkoloseko sisithi kubantu abalulamileyo bomhlaba: “Hambani, sinyuke siye entabeni kaYehova [indawo ephakanyisiweyo okanye indawo yonqulo oluyinyaniso] . . . asiyalele iindlela zakhe, sihambe ngomendo wakhe.”—Mika 4:2.

²¹ Ekubeni abakhonzi bakaYehova bemele baqhelisele ukunyaniseka ezintweni zonke, kakade ke, oku bekungaquka iinkqubano zabo zoshishino namanye amaNgqina. Nalapha, ucelomngeni lokunyaniseka lunokuphakama. Ziziphi ezinye izinto ezibandakanyekileyo kolu celomngeni? Sinokuqhubana njani nalo? Inqaku elilandelayo liza kuxubusha le nkalo yokunyaniseka.

Imibuzo Yempinda

◻ Kwenzeke ntoni kuphawu lokunyaniseka kwixesha lethu? Kutheni?

◻ Lithini iLizwi likaThixo ngemfuneko yophawu lokunyaniseka?

◻ Kutheni le nto simelesihlakulele ukunyaniseka kwanangaphambi kwenkqubo entsha?

◻ Ngawaphi amava abonisa ukuxabiseka kophawu lokunyaniseka?

◻ Sisiphi isiqinisekiso esikhoyo sokuba ukunyaniseka kuya kulondolozwa phakathi kwethu?

[Umfanekiso okwiphepha 13]

Kanye ngoku, abo banethemba lokuba ngabemi benkqubo entsha kaThixo bafundiswa kwindlela kaYehova yokunyaniseka