Ukulondoloza Umanyano LobuKristu Kwimicimbi Yezoshishino
“Yabonani! Hayi indlela ekukuhle nekumnandi ngayo ukuba abazalwana bahlalisane kunye ngomanyano!”—INDUMISO 133:1, NW.
1. Kutheni le nto umanyano lwamaKristu lunqweneleka kangaka nje?
NGENENE ‘kuhle yaye kumnandi ngabazalwana abangamaKristu ukuba bahlalisane kunye ngomanyano,’ ngokukodwa namhlanje xa kukho ukungamanyani okungaka ehlabathini. Xa umanyano lokwenyaniso lwesamele, luba yinto entle, luphumela kwiqhina elisondeleyo lothando lobuzalwana phakathi kwabantu, lubangela ukuba kubekho uvuyo xa omnye ekunye nomnye. Kwelinye icala, ukungamanyani kubi yaye kuphumela ekucaphukeni, kwintiyo nasekungavisisanini phakathi kwezinxulumani.
2. Imbono yethu eqhelekileyo ngemigaqo yeBhayibhile ifanele ilukhulise njani umanyano lobuzalwana kwanakwimicimbi yezoshishino?
2 Xa amaKristu ebandakanyeka nabanye abakhonzi bakaYehova kwezoshishino, imbono yawo eqhelekileyo ngemigaqo yeBhayibhile ifanele ikhulise umanyano lwawo lobuzalwana. Omnye umveleli okwibandla lamaNgqina kaYehova oku ukuchaza ngale ndlela: “Njengokuba ihlabathi liya lingathembeki ngokungathembeki, kuyahlaziya ukusebenza namaKristu angoowenu athobela umgaqo. Akuyomfuneko ukuba ‘sizilinde’ mzuzwana ngamnye. Izinxulumani ezicocekileyo nezithembekileyo zezoshishino ziya zinqaba ngokunqaba kule nkqubo. Hayi indlela ekumnandi ngayo ukusebenza nabantu abanyanisekileyo abangatshayiyo okanye basebenzise intetho engcolileyo, abantu abanokuzeyisa, abangashukunyiswa ngokuyintloko kukubawela izinto eziphathekayo!”
3. (a) Yiyiphi eminye imicimbi yezoshishino ethi ibandakanye amakholwa angoowethu? (b) Yiyiphi imigaqo emele ikhokele imicimbi engoshishino?
3 Yiyiphi eminye imicimbi yezoshishino enokubandakanya amakholwa angoowenu? Omnye kulapho amaKristu amabini okanye angaphezulu efikelela kwisigqibo sokungenelela ishishini njengamaqabane. Omnye kulapho omnye engumqeshi yaye omnye engumqeshwa. Yaye enye imeko kulapho umKristu enikela imveliso okanye inkonzo kwelinye ikholwa. Nakuyiphi na imicimbi enjalo engoshishino, imigaqo yokunyaniseka neyengqibelelo ebhalwe kwiLizwi likaYehova eliphefumlelweyo imele ikhokele amanyathelo awo. Ngale ndlela umanyano lobuzalwana novuyo lokusebenza kunye luyakhuliswa.—1 Korinte 10:31.
4. Yiyiphi ingozi ekhoyo kumaKristu aseshishinini?
4 Noko ke, kubakho ingozi yokuba abanye basengasilela ukugcina imbono ephakamileyo yamaKristu. Basengaqalisa ukucinga gqitha ngezilangazelelo ezizezabo. (Filipi 2:4) Imali isengaba yinto ebaluleke ngakumbi kunomanyano lwamaKristu. Kodwa ukuzingca eshishinini kunokonakalisa ulwalamano lobuzalwana nolwalamano lukabani noYehova. Asinakufuna ukuba oko kwenzeke kuthi!—Yohane 13:34, 35; Hebhere 13:5; 1 Timoti 3:2, 3; 1 Yohane 3:16; 4:20, 21.
Ukubaluleka Kwesivumelwano Esicwangcisiweyo
5. Amava ka-Abraham xa wayethenga umhlaba akubonisa njani ukuxabiseka kwesivumelwano esicwangcisiweyo?
5 Ukukunceda uthintele ukuqondana phosakeleyo kwezoshishino, qwalasela indlela uAbraham awasithenga ngayo isiqwenga somhlaba. “Wamlinganisela uEfron isilivere leyo, abethethe ngayo ezindlebeni zoonyana bakaHeti, amakhulu omane eeshekele zesilivere evunywayo ngumrhwebi. Yaqiniseka ke intsimi kaEfron eseMakapela . . . Yaba yinzuzo kuAbraham emehlweni oonyana bakaHeti, kubo bonke abangenayo ngesango lomzi wakhe.” Esi sasingesosivumelwano senziwa ngasese. Sasisisivumelwano esicwangcisiweyo nesaqinisekiswa phambi kwamangqina. Akuzange kuqondwe phosakeleyo oko kwakuthengiwe nexabiso elichanileyo ekwakuthengwe ngalo.—Genesis 23:2-4, 14-18.
6. AmaKristu anokuyicwangcisa njani imibandela ebalulekileyo yentengiselwano?
6 Ngokufanayo, kububulumko ngamaKristu ukuba ayicwangcise imicimbi ebalulekileyo yentengiselwano. Ukuba intengiselwano iquka ukuthengiswa kwento, abathengiselanayo banokubhala phantsi oko kuthengiswayo, ixabiso lako, indlela yokuhlawula, ixesha nendlela enokuthunyelwa ngayo, nezinye iimeko ekuvunyelenwe ngazo. Ukuba oku kuquka inkonzo emele yenziwe, abavumelanayo basengabhala phantsi umsebenzi ekufuneka wenziwe, ixesha ekufuneka ugqitywe ngalo, ixabiso lawo neminye imibandela. Eli phepha lobungqina lifanele libhalwe umhla lize lityobelwe, yaye umbhalo walo ufanele ugcinwe ngabo bobabini abavumelanayo. Isivumelwano esibhaliweyo esinjalo sibaluleke ngokukhethekileyo ekumanyaneni kushishino. Sinceda amacala omabini ukuba aluqonde ngokucacileyo ulwalamano lwawo yaye siyawanceda ukuba aphile ngokuvisisana nesiluleko sikaYesu: “Ilizwi lenu ke malibe nguewe, ewe; nguhayi, hayi.” (Mateyu 5:37) Kwimicimbi entsonkothe ngakumbi, kusengacebiseka ukuba kufunwe uncedo lwengcali yokubhala isivumelwano esibhaliweyo.
7. (a) Yintoni enye emele iqwalaselwe mayela nezivumelwano ezibhaliweyo? (b) AmaKristu afanele aqhube imicimbi yezoshishino ngawuphi umoya?
7 Ekucwangciseni izivumelwano ezibhaliweyo, abavumelanayo bafanele bangacingi nje ngosukelo lwabo kuphela kodwa kwanangemiphumo enokubakho, enjengendlela yokuphelisa eli lungiselelo kwisiganeko esinokubangela kube yimfuneko ukwenza oko. (IMizekeliso 21:5) Yonke imicimbi yezoshishino inobungozi obuthile, yaye akukho phepha lobungqina linokuhlanganisa zonke iimeko ezisenokuphakama. Ukuba iimeko ziyaguquka, kusengafuneka ukuba isivumelwano silungiswe okanye kuthethathethwane ngokutsha. Ekuhambeni kwexesha kusenokude kubonakale emntwini ukuba uye wazibophelela ngeshishini ngokungebobulumko yaye kusenokufuneka ukuba azikhuphe kulo ngendlela ebekekileyo. Noko ke, oku akufanele nje kube licebo lokuphepha imbopheleleko yokuhlawula amatyala abangelwe kukuba nenkcitho okanye kukuyilawula kwakhe kakubi imicimbi. Lo mbandela kufuneka uxutyushwe ukuze kubonwe ukuba esi sivumelwano sinokupheliswa na nokuba luluphi uzinziso lwemali ekufuneka lwenziwe, ukuba lukho. Noko ke, ngokuqinisekileyo umntu onesazela uya kwenza konke anokukwenza ngokufanelekileyo ukuze ahlonele iimfanelo zesivumelwano, nokuba umele alutshintshe uhlobo lwakhe lobomi kangangexesha elithile. (2 Tesalonika 3:12) Ukuba umKristu ufuna ukuhamba ngokungenakusoleka yaye eqhelisela ubulungisa, uya kuzama ukuphumeza iimfanelo zakhe kwisivumelwano nakubeni oko ingekuko oko akulangazelela kunene, kodwa uya kukwenza oku ukuze ahlale ekholisekile kuYehova. “[Ufunga], angajiki, nokuba kubi kuye.” (INdumiso 15:1-4) Kuzo zonke iinkqubo ezinjalo, abakhonzi bakaYehova kufuneka bavumele ukuba ‘zonke izinto zabo zenziwe ngothando.’—1 Korinte 16:14.
8. Kutheni kukuhle nje ukubala iindleko ngaphambi kokungenela umcimbi wezoshishino?
8 Ngenxa yoku, ngaphambi kokungenela umcimbi wezoshishino, kulungile ukubala iindleko. (Luka 14:28-30) Bambi basenokuntyumpantyumpeka kwimicimbi yezorhwebo benethemba kodwa batshone bangaveli nangonwele. Ngokomzekelo, bambi baye banemvo yokuba inzuzo efunyanwa ngabaqeshi babo ngeyiba yeyabo ukuba bebenokuba neshishini labo elifana nelo. Kodwa abaqondi ukuba ukuphatha ishishini akulula kweli hlabathi lokhuphiswano olunzima. Nyaka ngamnye amashumi amawaka eentlobo zamashishini ayatshona ehlabathini jikelele. Ngaloo ndlela, emva kokudana ngokukrakra edaniswa zezorhwebo, amaKristu amaninzi aye ancedwa kukuba ngabaqeshwa kwakhona efumana umvuzo osisigxina.
Ukuhlonela Imicimbi Yezoshishino
9. Ziziphi ezinye zeendlela anokuthi amaKristu abonakalise ngazo ukuhlonelana emsebenzini?
9 “Mayela nembeko le, phangelanani,” atsho njalo amaRoma 12:10. Abaqeshwa abangamaKristu abakwenzayo oku abayi kuzama ukuxhaphaza umqeshi wabo ngenxa yokuba eliNgqina elinguwabo, besamkela isimo sengqondo sehlabathi sokuba ekubeni umqeshi enako, ufanele akunyamezele ukusilela kwabaqeshwa bakhe. Kunoko, baya kubonakalisa intlonelo kumqeshi wabo ngesimo sabo sengqondo nangomsebenzi wabo wokukhuthala. (1 Timoti 6:2) Nabo, abaqeshi abangamaKristu bebengabonakalisa intlonelo kubaqeshwa abangamaNgqina angoowabo ngendlela abathetha nabaqhubana ngayo nabo. Umqeshi umele angaze azive engaphezulu kwekholwa elinguwabo elimsebenzelayo kodwa ufanele akhumbule ukuba bobabini bangamakhoboka kaYehova, belingana emehlweni Akhe. (Efese 6:9) Kwakhona, umqeshi nomqeshwa bafanele bahlale besikhumbula esi siluleko sikumaGalati 6:10: “Masisebenze okulungileyo kubo bonke, ngokukodwa ke kwabendlu yokholo.”
10. Intobeko inceda njani ekubonakaliseni ukuhlonelana?
10 Akunzima ukubonakalisa intlonelo xa ukuzithoba kwesamele. Ngokomzekelo, umdala othobekileyo webandla lamaKristu akayi kukufumanisa kunzima ukuzithoba kulwalathiso lomKristu onguwabo oseshishinini ongenamalungelo afana nawakhe ebandleni. Ngokunjalo, umqeshi othobekileyo akayi kukufumanisa kunzima ukuzithoba kumqeshwa wakhe, ongumdala, kwimisebenzi yasebandleni. Ukuzithoba nako kuya kubanceda bobabini ukuba bangagxeki gqitha okanye omnye alindele ukuba omnye abe ngofezekileyo, ekubeni “bonile bonke, basilelela eluzukweni lukaThixo.”—Roma 3:23; 12:3.
11. AmaKristu anokukubonakalisa njani ukusebenzisa ingqiqo kwimicimbi yezoshishino?
11 IBhayibhile ikwayalela oku: “Ukuthantamisa kwenu makwazeke kubantu bonke.” (Filipi 4:5) Bekungayi kuba sengqiqweni ngomKristu ukulindela ukuncedwa ngokukhethekileyo okanye umsebenzi ongaphezulu okanye ukusoloko ehlawula ixabiso eliphantsi kuba nje esebenza nekholwa elinguwabo. UmKristu akafanele alindele, njengelungelo lakhe, ixesha lokungabikho emsebenzini okanye amanye amalungelo, anjengokusebenzisa oomatshini okanye iinqwelo-mafutha, kuba umqeshi wakhe elikholwa elinguwabo. Amancedo, umsebenzi ongaphezulu, ukuhlawula ixabiso eliphantsi, okanye ixesha lokungaphangeli lisenokubakho kodwa alifanele lifunwe ngesinyanzelo. Ukulindela izinto okungekho ngqiqweni kunokubangela intiyo phakathi kwamaKristu, kusonakalisa ulwalamano lwawo.—IMizekeliso 18:19.
12. Ngokubhekisele ekunikeleni ubungqina boBukumkani, yintoni efanele inyanyekelwe kwindawo yomsebenzi?
12 Ngoxa amaKrsitu efuna ukwazisa iindaba ezilungileyo zoBukumkani bukaThixo kwabangakholwayo, emsebenzini afanele akulumkele ukuba oko kunikela ubungqina ngoBukumkani kwenziwe ngexesha elifanelekileyo. (INtshumayeli 3:1, 7) Ukuba kwenziwa ebudeni beeyure zokusebenza, kufanele ukuba kube kuvunyelwe ngumqeshi. Kungenjalo umqeshi usenokukucaphukela oko, yaye oku kunokuzisa ugculelo kuYehova nakubantu Bakhe. (1 Timoti 6:1) Kukho ezinye izihlandlo, njengasebudeni besidlo sasemini okanye amathuba okuphumla emini, xa bunokunikelwa ngazo ubungqina obunjalo. Kwakhona, apho kukho amaNgqina aliqela asebenza khona, ebengenakuthanda ukuchitha ixesha exoxa ngemibandela yolawulo lobuthixo xa ebefanele ukuba ayasebenza.
Ukulumkela lintshukumisa Zokungenela Ishishini
13. UPawulos nabantu ababethi bamamkelele endlwini yabo eKorinte babewujonga njani umsebenzi wabo wokuziphilisa?
13 Ngoxa wayeseKorinte, umpostile uPawulos wangenela umcimbi wezoshishino namaKristu awayemamkelele ekhayeni lawo, uAkwila noPrisila. (IZenzo 18:1-3) Basebenza ukuze balungiselele iimfuneko zobomi, kodwa oko kwakukwindawo yesibini kwinjongo yabo ephambili—ukuhambisela phambili unqulo lukaYehova. Ngokuqinisekileyo babengenakutyholwa kuthiwe ‘babesiba kukuhlonela uThixo ukusekeleza inzuzo [yokuphathekayo].’ (1 Timoti 6:5) Bobathathu basikelelwa ngokutyebileyo nguYehova yaye kuthethwa kakuhle ngabo eBhayibhileni.—Roma 16:3-5.
14. (a) Kutheni le nto kukuhle nje ukuhlolisisa iintshukumisa ngaphambi kokungenela ishishini? (b) AmaNgqina amathathu ayicombulula njani ingxaki yawo?
14 Ngokuzihlolisisa ngenyameko iintshukumisa ngaphambi kokungenela inkqubo yezoshishino, umKristu unokuphepha iinzima ezininzi. Ngokomzekelo, omnye umKristu usenokufuna ixesha elingakumbi ukuze ahambisele phambili izilangazelelo zoBukumkani, ngoxa iqabane lakhe lisengafuna ukuphucula uhlobo lwalo lobomi. Omnye usenokunqwenela nje ukulondoloza imali ukuze andise ishishini, kodwa omnye ulungele ukuhlawula iirhafu ezinkulu aze angalandisi ishishini ukuze aphephe ukubandakanyeka kakhulu eshishinini. Kwelinye ilizwe, amaNgqina kaYehova amathathu awayekwazizalamane aqhuba kunye ishishini. Kodwa ekuhambeni kwexesha iimbono zawo zahlukahlukana ngokomlinganiselo ngamnye afuna ukuzibandakanya ngawo eshishinini. Isicombululo sawo saba sisigqibo sawo omathathu sokuba awahlule amashishini aze ke abahlulahlule nabathengi bawo. Ngale ndlela alondoloza ulwalamano lwawo lokomoya kwanolwentsapho. Ayethobele isiluleko seBhayibhile ‘sokusukela izinto zoxolo, nezinto zokwakhana.’—Roma 14:19.
15. Kutheni le nto simele sizilinde ngokukhethekileyo iintshukumisa zethu ngokuphathelele nemali?
15 Kufanele kusetyenziswe inyameko ekhethekileyo ekulumkeleni kukabani intshukumisa yakhe ngokuphathelele imali. IBhayibhile isiqinisekisa ngelithi, “Indoda enyanisekileyo ineentsikelelo ezininzi; ke yena ongxamayo ukuba sisityebi, akabi msulwa.” (IMizekeliso 28:20) ‘Ngokungxama ukuba sisityebi,’ umKristu unokungayiboni eyona nto ixabiseke gqitha—ubuzalwana bakhe bobuKristu. Oku kunokubangela ukungamanyani ebandleni, njengoko abanye besenokukucaphukela ukubeka kwakhe imali phambi kwezilangazelelo zoBukumkani. Ngaloo ndlela iBhayibhile ilumkisa ngelithi: “Ke abo banga bangaba zizityebi, beyela ekuhendweni, nasesibatheni, nasezinkanukweni ezininzi ezibubudenge ezenzakalisayo; zona zibatshonisayo abantu ekonakaleni, nasekutshabalaleni. Kuba ukuthanda imali yingcambu yeento zonke ezimbi: abathe abathile, ngokuzolulela kuko, balahlekana nokholo, bazibhodloza ngobuhlungu obuninzi.”—1 Timoti 6:9, 10.
16. Imele iqhutywe njani yonke imicimbi yezoshishino?
16 Enye indlela “ukuthanda imali” okunokumlahlekisa ngayo umKristu kungokumhendela ukungenela ishishini elithile elingafanelekanga okanye elokunganyaniseki okucacileyo. Xa amaKristu angoowabo edibene nomntu onjalo, oko kunokuphumela kukungamanyani. Yaye izinto ezinjalo zonakalisa ulwalamano lukabani noYehova. Ukuze imicimbi yezoshishino ihambe ngokutyibilikayo, kubalulekile ukuhlala sikhumbula ukuba ukuqhatha eshishinini ‘kuyinto elisikizi kuYehova.’ (IMizekeliso 11:1; 20:23) Kunoko, amaKristu afuna ukukwazi ukuthi, kanye njengokuba umpostile uPawulos watshoyo: “Sikholosekile ukuthi sinesazela esilungileyo, singa ezintweni zonke singahamba kakuhle [ngokunyanisekileyo, NW].”—Hebhere 13:18.
Ukucombulula Iingxaki Zeshishini
17. Zinokuconjululwa njani ezinye iingxaki ezincinane zeshishini?
17 Nakuwuphi na umcimbi wezoshishino ophakathi kwabazalwana, iingxaki zinokuphakama. Ezinye zeengxaki ezincinane zinokuconjululwa nje ngokusebenzisa umgaqo okweyoku-1 kaPetros 4:8, othi: “Ngaphezu kweento zonke ke, yibani nothandano olunyamekileyo, ngokuba uthando luya kugubungela inkitha yezono.” Ukuba iingxaki azinakuconjululwa ngaloo ndlela, azifanele zivunyelwe ukuba zikhule zize zibe mbi ngakumbi. Oku kunokuphumela kwilahleko yokuhlonelana nokuphela kwemvisiswano. Ngokufuthi isicombululo sixhomekeke kuthethathethwano lobubele nolucacileyo, ngaphambi kokuba imeko iye isiba mbi ngakumbi. ILizwi likaThixo lisiluleka ukuba sizinzise ukungavisisani ngokukhawuleza.—Mateyu 5:23-25; Efese 4:26, 27.
18. Unokwenza ntoni umKristu ukuba ukholelwa kwelokuba uye woniwa ngokunzulu eshishinini ngumKristu onguwabo?
18 Noko ke, xa ekholelwa kwelokuba umKristu uye woniwa ngokunzulu likholwa elinguwabo eshishinini, amanyathelo andlalwe kuMateyu 18:15-17 afanele alandelwe ngenyameko. Inyathelo lokuqala okanye amabini afanele awucombulule umbandela. Ukuba akawucombululi, inyathelo lesithathu belingaba lelabadala abamiselweyo ukuba bawuhlole lo mbandela. Ukuba oku kunokuthi kwenzeke, abadala bebengabadimaza gqitha abazalwana ababandakanyekileyo ekubeni bamangalelane. Ukumangalela ikholwa elinguwenu bekungathetha ukuba, njengokuba uPawulos watshoyo, “seninciphile ke kanye.” Wongezelela ngokuthi: “Yini na ukuba ningathi kanye nivume ukoniwa? Yini na ukuba ningathi kanye nivume ukulunyukiswa?” (1 Korinte 6:1-8) Kulunge ngakumbi ukulahlekelwa yimali kunokuzisa ugculelo kwigama likaYehova nasebandleni nokonakalisa umanyano lwethu ngokusa ikholwa enkundleni. Kakade ke, nakubeni inyathelo lasenkundleni lingathatyathwanga, uhlobo oluthile lwenyathelo lebandla lusengayimfuneko ukuba kubandakanyeke ukunganyaniseki.
19. Yiyiphi imizekelo ebalaseleyo eseBhayibhileni abadala abanokwalatha kuyo xa beluleka ngokuphathelele iingxaki zeshishini?
19 Xa kululekwa abo banobunzima kwezoshishino, abadala banokubalathisela kumzekelo wokungazingci owamiselwa nguAbraham xa ulwalamano lwakhe noLote lwalusengozini. UAbraham, nangona wayengomdala, ngobubele wamvumela uLote ukuba akhethe umhlaba kuqala kunokubeka engozini ubuhlobo babo. (Genesis 13:5-11) Abadala bakwanokwalatha kumzekelo omhle kaZakeyu. Wayekulungele ukuncama isiqingatha sezinto anazo kumahlwempu yaye kwesinye isiqingatha abuyisele ngokuphindwe kane oko wayekuthabathe ebantwini ngezityholo zobuxoki.—Luka 19:1-10; bona kwaneyoku-1 yabaseKorinte 10:24.
20, 21. Yintoni efanele ihlale ikhunjulwa ngomsebenzi wokuziphilisa?
20 Hayi indlela ekuba kuhle ngayo xa amaKristu ezinzise iingxaki zeshishini ngempumelelo ngokulandela ngenyameko isiluleko seBhayibhile! Ngale ndlela ahlala emanyene naxa ishishini litshona. Oko kuya kuba ngumphumo omhle xa eyona nto siyikhumbula gqitha engqondweni ngamaxa onke ikukuba, kumaKristu, umsebenzi wokuziphilisa ukwindawo yesibini kwizilangazelelo zoBukumkani nakumanyano lobuzalwana. Kwakhona kuba kuhle xa izilangazelelo zoshishino zinokuhlengahlengiswa ukuze kubekho ixesha elingakumbi lezinto ezibaluleke ngakumbi ezihlobene nomsebenzi woBukumkani.—Mateyu 6:33; thelekisa amaFilipi 1:9, 10.
21 Ngaloo ndlela, eyona nto ibaluleke ngenene kubomi bethu lulwalamano lwethu noYehova nobuzalwana bethu bobuKristu. (Mateyu 22:36-39) Asiyi kuze sifune ukuba olu lwalamano lonakaliswe ziimpembelelo zeli hlabathi okanye yimicimbi yezoshishino, kuba ayikho ngokupheleleyo into enokuthelekiswa nolwalamano lwethu noYehova okanye ngobuhle ifane nobuzalwana bethu bomanyano!
Imibuzo Yempinda
◻ Ukuthobela iLizwi likaThixo kulukhullsa njani ulwalamano eshishinini?
◻ Kutheni le nto kububulumko nje ukucwangcisa iintengiselwano ezibalulekileyo?
◻ AmaKristu anokukubonakalisa njani ukuhlonelana emsebenzini?
◻ Kutheni le nto sifanele sihlolisise iintshukumisa zethu ngeshishini?
◻ Sisiphi isimo sengqondo esifanele sibonakaliswe ekucombululeni iingxaki zeshishini?
[Umfanekiso okwiphepha 16]
UAbraham wakuqinisekisa ukuthengwa komhlaba ngesivumelwano esicwangcisiweyo noEfron
[Umfanekiso okwiphepha 18]
Ukusebenza ukuze balungiselele iimfuno zobomi kwakungabalulekanga kangako kuPawulos, uAkwila noPrisila