Ngaba Unengqiqo KaKristu?
“Wanga ke uThixo wonyamezelo novuselelo anganinika ukucinga nto-nye phakathi kwenu, ngokukaKristu Yesu.”—ROMA 15:5.
1. Ukuba umntu uthi ungumKristu, yiyiphi imibuzo efuna impendulo?
ABANTU abangaphezu kweshumi lamawaka ezigidi ehlabathini jikelele kuthiwa bangamaKristu. Kuthetha ukuthini oku? Kuthetha ukuba, ubuncinane ngegama, bayakholelwa kuYesu Kristu yaye bathi bangabalandeli, okanye abafundi bakhe. (Mateyu 10:24, 25) Kodwa yintoni efunekayo ukuze ulandele umzekelo kaKristu okanye umzekelo wakhe wobomi? Ngokucacileyo, kufuneka umazi. Ngaba ungulowo umazi ngokwenene uYesu waseNazarete? Ngaba unembono ecacileyo ngohlobo lomntu awayelulo ngoxa wayelapha emhlabeni? Okanye ngaba uyayazi indlela awasabela ngayo ebantwini ababekwiimeko ezahlukeneyo? Ngaba ‘unengqiqo kaKristu’?—1 Korinte 2:16; Efese 4:13.
2, 3. Sinokuyazi njani ingqiqo kaKristu?
2 Sisenokumazi njani ubani owaphila phantse kwiminyaka engamawaka amabini eyadlulayo nobomi bakhe basekuhleni awabuphila iminyaka nje emithathu enesiqingatha? Kwimeko kaYesu kukho amabali angobomi amane anokuthenjwa anceda ukuba sibe nomfanekiso-ngqondweni wohlobo lomntu awayelulo. Ngokuzifunda ngenyameko ezo ngxelo zine zeVangeli, sikwanokubona uhlobo lokucinga olwashukumisa izenzo zakhe. Ngenxa yoko, ukuze ube ngumKristu wokwenyaniso kunokuba ubizwe nje ngegama, yintoni efunekayo? UYesu wayivakalisa ngale ndlela: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3; 2 Petros 3:18.
3 Ngaloo ndlela, onke amaKristu afanele amazi aze amqonde nzulu uBawo, uYehova, nobomi neemfundiso zoNyana, uKristu Yesu. Ukuzibiza kukabani njengengqina likaYehova elingumKristu akwanele. Ukuze sibe nengqiqo kaKristu, simele iingqondo zethu sizizalise rhoqo ngokuqonda ubomi nomzekelo kaYesu. Oko kuthetha ukuba kufuneka sibe nofundisiso lweZibhalo oluthe rhoqo nolokwenene ngamancedo okufundisisa iBhayibhile anceda ukucacisa intsingiselo nomongo. Kukwafuna ukuba sibe nesimo sengqondo esifanelekileyo ukuze sibe nokuyiqonda size siyamkele indima kaKristu kwiinjongo zikaThixo.—Yohane 5:39-47; Mateyu 24:45-47.
Wayengumntu Owayeneemvakalelo
4. UYesu wayeluhlobo olunjani lomntu?
4 UYesu, umntu owayesempilweni nowayekhuthele, wabufeza ubulungiseleli bakhe ngoxa wayesaqalisa iminyaka yakhe yama-30. (Luka 3:23) Kodwa wayeluhlobo olunjani lomntu? Ngaba wayenesidima ngokugqithiseleyo okanye wayengophakamileyo? Ngokwahlukileyo koko, ekubeni wayengumYuda waseMbindi Mpuma, wayebonakalisa iimvakalelo. Wayengengomntu oneentloni okanye osisimumu. Wazibonakalisa ekuhleni iimvakalelo zokuba ngumntu ukususela elusizini nakwimfesane kuse ekucaphukeni nasekubeni nomsindo wobulungisa.—Marko 6:34; Mateyu 23:13-36.
5. UYesu wasabela njani akuva ngokufa kukaLazaro’
5 Ngokomzekelo, uYesu wasabela njani xa wafumana uMarta noMariya belila ngenxa yokulahlekelwa ngumnakwabo uLazaro? Ingxelo kaYohane isixelela oku: “Wafutheka, wakhathazeka,” yaye “walila.” (Yohane 11:33-36) Wavakalelwa ngendlela ezavakalelwa ngayo ezi zihlobo zazisondele kuye. Wayengenazintloni ukulila kunye nabo. Nangona ‘wayenguNyana kaThixo,’ wabonakalisa kanye iimvakalelo zokuba ngumntu. (Yohane 1:34) Hayi indlela ekumele ukuba uMarta noMariya kwabachukumisa ngayo oko!—Thelekisa uLuka 19:41-44.
6. Kutheni le nto uYesu wayengelogwala ngenxa yokuba walila?
6 Noko ke, bambi namhlanje banokugqiba ngelokuba uYesu wayeligwala ngenxa yokuba walila ekuhleni nabo bafazi. Enyanisweni, umbhali wamaKatolika uHilaire Belloc wambiza uYesu ngokuthi “ligwala.” Ngaba oko kuyinyaniso? Ngaba uYesu wayeluhlobo lomntu oligwala oludla ngokuboniswa kwiincwadi zeNgqobhoko? Hayi, iinyembezi azingomqondiso wobuthathaka ngokuyimfuneko. Kunjengokuba omnye ulindixesha wezamayeza wakuvakalisayo oku esithi: “Ukuthintela ukuyibonakalisa ngokufanelekileyo imvakalelo yovelwano akukho ngqiqweni yaye kuyingozi . . . Ukubonakalisa imvakalelo yovelwano, ngokukodwa ukulila, kulolunye uphawu ngokuqhelekileyo olulolobuntu.”—Thelekisa eyesi-2 kaSamuweli 13:36-38; Yohane 11:35.
7. Ziziphi iindlela umzekelo wobuntu bukaYesu onokusinceda ngazo thina namhlanje?
7 Iindlela uYesu awasabela ngazo ekubandezelekeni ngokwenyaniso zazizezomntu yaye zizezobuntu. Zisinceda ukuba sizifanise naye nengqiqo yakhe. Asilandeli nje isiqu esithile esingengomntu nesiyintsomi kodwa kunoko silandela umzekelo ofezekileyo womntu owathunyelwa nguThixo, “uNyana woThixo ophilileyo.” (Mateyu 16:16; Yohane 3:16, 17; 6:68, 69) Onjani umzekelo kuwo onke amaKristu namhlanje, ingakumbi abadala abangamaKristu, ngokufuthi abamele bathuthuzele baze babonakalise uvelwano ngamaxesha okulahlekelwa nokucinezeleka! Ewe, ukuba nengqiqo nentliziyo kaKristu kwizihlandlo ezinjalo kunokubangela umahluko omkhulu.—1 Tesalonika 2:7, 8.
Wayengumntu Owayezimisele Ukuphumeza Isenzo
8. UYesu wayibonakalisa njani inkuthalo nenyathelo lokungafihlisi?
8 UYesu wakwazibonisa njengomntu owayeneenkolelo zenkalipho nezenzo ezinamandla. Ngokomzekelo, kumatyeli amabini ngamandla wabakhuphela ngaphandle kwetempile ababethengisa izilwanyana nabananisi bemali. (Marko 11:15-17; Yohane 2:13-17) Kwakhona akukho nto yamthintelayo ekubhenceni ekuhleni uhanahaniso lwababhali nabaFarisi ababezibiza bengamalungisa. Ekukuchaseni kwakhe ngokuzimisela oko, walumkisa wathi: “Yeha, nina babhali, baFarisi, bahanahanisindini! Ngokuba nifana namangcwaba aqatywe ifutha, athi abonakale emahle okunene ngaphandle, kanti ngaphakathi azele ngamathambo abafileyo nokungcola konke.” Ngokuqinisekileyo, kwakungekho bugwala apha!—Mateyu 23:27, 28; Luka 13:14-17.
9, 10. (a) Kutheni uYesu engazange one ngokubonakalisa ukucaphuka? (b) Umzekelo kaKristu ufanele umchaphazele njani umdala ongumKristu?
9 Ngaba ukucaphuka kukaYesu kwakububungqina bokuswela ukuzeyisa? UPetros, owayesisinxulumani esisondeleyo sikaYesu ebudeni bobulungiseleli bakhe, uthi: “Ongenzanga sono.” (1 Petros 2:22) Umpostile uPawulos wabhala oku: “Kuba asinambingeleli mkhulu ungenako ukuvelana nezilwelwe zethu; ke, sinowahendwayo ngeento zonke, ngokokufana nathi, engenasono.” (Hebhere 4:15) Kukho umahluko phakathi kokucaphuka okulawulwa bubulungisa nomsindo ongalawulwayo.—Thelekisa IMizekeliso 14:17; Efese 4:26.
10 Ngoko ke, ngoxa umdala ongumKristu, ngokomzekelo, ebengayi kuba ‘ngoqumba msinya,’ ngokuqinisekileyo ufanele abe namandla alungileyo okukwazi ‘ukubakhalimela ukuze badane abo baphikayo,’ ade ‘abohlwaye kabukhali’ ukuba kuyimfuneko. Umele akufanelekele ‘ukohlwaya, ukukhalimela nokuvuselela.’ (Tito 1:7-13; 2 Timoti 4:1, 2) Iimeko ezithile zikwanokuxhokonxa ukucaphuka kwakhe okunobulungisa, ingakumbi ukuba ubona isisongelo esicacileyo kumanyano, kubumoya, okanye kucoceko lokuziphatha kwebandla. Njengokuba uPawulos watshoyo, maxa wambi ‘bamele bavingcwe imilomo’ ‘abathethi bezinto ezingento nabakhohlisi’ abathi ‘izindlu ziphela bazibhukuqe, befundisa izinto ezingafanelekileyo ngenxa yenzuzo embi.’ Kwiimeko ezinjalo, ukuba nengqiqo kaKristu kuya kubanceda abadala ukuba babe ngabangafihlisiyo, balungelelane baze babe ngabenza isigqibo.—Bona eyoku-1 yabaseKorinte 5:1-5; ISityhilelo 2:20-23; 3:19.
11. Yiyiphi imibuzo enxulumene nendlela esifanele simxelise ngayo uKristu?
11 Ebudeni bohambo lwakhe ukutyhubela iGalili, elaseSamariya nelakwaYuda, uYesu wadibana nazo zonke iintlobo zabantu—amadoda, abafazi, abantwana, abagulayo nabo babemjonga njengotshaba lwabo. Waqhubana njani nezi ntlobo zabantu? Ngaba wayengozidlayo yaye ephakamile kwabanye, okanye ngaba wayengeneka? Ngaba wayenovelwano ngeengxaki nezilingo zabantu? Ngaba wayengaxoleli okanye wayenenceba? Iimpendulo kule mibuzo zinxulumene nendlela esifanele simxelise ngayo uKristu kwizenzo nakwiindlela esisabela ngazo imihla ngemihla.—Roma 15:5; Filipi 2:5.
Wayesabela Njani UYesu Ebantwaneni?
12. Abafundi noYesu basabela njani ebantwaneni ngesinye isihlandlo?
12 Sifumana ingxelo entle kakhulu engendlela uYesu awasabela ngayo ebantwaneni kuMarko isahluko 10, indinyana 13-16. Ufundeka ngolu hlobo: “Baye bezisa abantwana kuye ukuze abachukumise; basuka abafundi babakhalimela abo babazisayo.” Le ngxelo ayisichazi isizathu sokuba abafundi benze ngolu hlobo. Oko kwenzeka ngonyaka wama-33 C.E., yaye uYesu wayesendleleni evela eGalili ehamba ngendlela yasePereya esiya koko kwakuya kuba bubulungiseleli bakhe bokugqibela basekuhleni eYerusalem nakwiindawo eziyingqongileyo. Mhlawumbi bacinga ukuba uYesu wayebaluleke gqitha okanye wayexakeke gqitha ukuba azixhalabise ngabantwana kwelo thuba. Kanti, ngaba yena wabonisa ukuba wayexakeke gqitha? “Ke kaloku ekubonile oku uYesu, wacaphuka, wathi kubo [abafundi], Bavumeleni abantwana beze kum, ningabaleli: ngokuba ubukumkani bukaThixo bubobabo banjalo . . . Waza wabawola, wazibeka izandla phezu kwabo, wamana ebasikelela.”
13. Abantu basabela njani kuYesu?
13 Yintoni enye oku okusifundisa yona ngengqiqo kaKristu? Kusibonisa ukuqina kwakhe kubafundi bakhe abanxaxhayo nesimo sakhe sengqondo sokuba nobuntu kwabancinane. Wayiqonda into eyashukumisela abazali ukuba bazise abantwana babo kuye. Babefuna ukuba abachukumise aze abasikelele abantwana babo. Yaye oko kusixelela ntoni ngoYesu? Kusixelela ukuba abantu babengamoyiki. Wayethandeka, yaye abantu babekufuna ukuba naye. Nabantwana babeziva bekhululekile xa ekho—ibe naye wayekhululekile xa kukho abantwana. Ngaba abantu, kuquka nabantwana, bayakhululeka xa ukho?—Marko 1:40-42; Mateyu 20:29-34.
14. Ngokubhekisele ekubeni ngongenekayo, ngoobani ngokukhethekileyo abafanele balandele umzekelo kaYesu?
14 UYesu wabonakalisa uthando nobubele obufudumeleyo. (Marko 9:36, 37) Wayefumaneka yaye engeneka. Njengomlandeli kaKristu, ngaba unengqiqo yakhe kule nkalo? Abaveleli abangamaKristu kwizithili, kwiziphaluka, kumabandla nakwiiofisi zesebe zeWatch Tower Society ehlabathini jikelele benza kakuhle ukuzibuza oku: Ngaba ndingumntu ofuna kuviwe ngaye nongaguquguqukiyo? Okanye ngaba abanye, kwanabantwana, ndibenza bazive bekhululekile xa benam? Ngaba ngokwenyaniso ndiyangeneka?—IMizekeliso 12:18; INtshumayeli 7:8.
Iinkqubano ZikaYesu Nabafazi
15, 16. UYesu wayahluke njani kwamanye amaYuda ekuqhubaneni kwakhe nabafazi?
15 Njengabadala, abakhonzi nabazalwana kwibandla lamaKristu, ngaba sinengqiqo kaKristu xa siqhubana noodade bethu abangamaKristu nabafazi ngokubanzi? UKristu, owayelisoka, wasabela njani phantsi kweemeko ezazisahlukahlukana njengokuba wayedibana nabafazi bomhla wakhe?
16 Kwelo butho lamaYuda elalibalasele ngamadoda, uYesu wayengumfundisi ongaqhelekanga kuba wayekuvuma ukuthetha nabafazi, kwanabafazi ababengengomaYuda. (Yohane 4:7-30) Ngokomzekelo, xa wayetyelela elinye ikhaya kummandla weeNtlanga waseTire naseTsidon, umfazi ongumGrike wamcela ukuba ancede intombi yakhe eyayiphethwe ziidemon. Ngokuqhelekileyo, umYuda obambelele kwisithethe ngewayengazange amncede lo mfazi. Kodwa uYesu waphulaphula waza wavavanya ukholo lwakhe, esithi: “Khawuyeke kuhluthe abantwana [abangamaYuda] kuqala; kuba akukuhle ukusithabatha isonka sabantwana, siphoswe ezinjaneni [ezingabeeNtlanga].” Ngaba intetho kaYesu yayiyileyo yawuphelisayo lo mcimbi? Ngaba wathintela ingxubusho ebhekele phaya? Ngokucacileyo akunjalo, kuba ngobuchule lo mfazi waphendula wathi: “Ewe, Nkosi; kuba nazo iinjana phantsi kwetafile zidla kwiimvuthuluka zabantwana.” UYesu wachukumiseka, waza wayiphilisa intombi yakhe.—Marko 7:24-30.
17. Sinokufunda ntoni ngendlela uYesu awaqhubana ngayo nomfazi othile owayengumoni?
17 UYesu waba nengqondo evulekileyo ngabafazi yaye akazange abagwebe ngokwembonakalo yangaphandle. (Mateyu 22:16) Ngesinye isihlandlo, xa wayesidla kwindlu yabaFarisi, wamvumela umoni owayesaziwa, ekunokwenzeka ukuba wayelihenyukazi, ukuba ahlambe iinyawo zakhe aze azithambise ngeoli. Ngezenzo zakhe lo moni wabonakalisa isimo sengqondo senguquko kwikhondo lakhe lesono. (Luka 7:36-50) UYesu akazange amgqale njengongabalulekanga aze amgxothe ngokumgweba ngogwebo oluquka konke ngenxa yokuba wayeziphethe kakubi. (Bona kwanoYohane 4:7-30.) Wamxolela “ngokuba wathanda kakhulu.” Oko kubonisa ntoni ngengqiqo kaKristu? Wayenovelwano yaye eyiqonda imeko yaloo mfazi. Ngaba thina asinakwenjenjalo ebandleni nakubulungiseleli bethu?—Luka 19:1-10; Roma 14:10-13; 1 Korinte 6:9-11.
Iinkqubano ZikaYesu Nabafundi Bakhe
18. (a) Abanye babaphatha njani abo basebenza phantsi kwabo? (b) UYesu wabaphatha njani abafundi bakhe nabanye? (Marko 6:54-56)
18 Maxa wambi abantu abanegunya baziva besongelwa ngabantu ababalawulayo. Ngendlela ephantsi bayakuthintela oko banoluvo lokuba kulukhuphiswano. Ikratshi liba yinto ebalaseleyo. Bayakhawuleza ukubagxeka baze bangakhawulezi ukubancoma abo basebenza phantsi kwabo. Ukuvakalisa kwabo ukugxeka akusihloneli isidima sobuqu sabanye. Kodwa kuthekani ngoYesu—wabaphatha njani abo babephantsi kwakhe, abafundi bakhe? Ngaba wabenza ukuba bazive bengabancinane, abangafanelekanga, okanye abazizidenge? Okanye, kunoko, ngaba baziva bekhululekile ekusebenzeni noYesu?—Thelekisa uMateyu 11:28-30; 25:14-23.
19. UYohane 13:1-17 usifundisa ntoni ngoYesu?
19 Kule nkalo, esinye sezifundo ezibalaseleyo uYesu awazifundisa abafundi bakhe sifunyanwa kuYohane isahluko 13. Sicebisa ukuba ufunde indinyana 1 kuse kweye-17. Ngaloo mihla iindlela zazinothuli, yaye kwakulisiko ukuba isicaka sihlambe iinyawo zeendwendwe. UYesu wawenza ngokwakhe loo msebenzi uphantsi. Luluphi uphawu awalubalaselisayo ngokuhlamba iinyawo zabafundi bakhe? Wabanika isifundo esiluncedo solokuthobeka. Apha yintoni esiyifundayo ngengqiqo kaKristu? Amazwi kaYesu anikela impendulo: “Akukho mkhonzi umkhulu kunenkosi yakhe, namthunywa umkhulu kunalowo umthumileyo. Ukuba niyazazi ezi zinto, ninoyolo ukuba nithi nizenze.”—Yohane 13:16, 17.
20. Luluphi uhlolisiso lobuqu esinokulusebenzisa ukuze sibone ukuba sinengqiqo kaKristu?
20 Ngaba sinengqiqo kaKristu kule nkalo? Ngaba siyakuvuma ukwenza imisebenzi edelekileyo nephantsi ekhaya nasebandleni? Okanye ngaba sifuna ukwenza kuphela ezo zinto zibonakala “zizezibalulekileyo” okanye eziya kusenza sibonakale “singabakhethekileyo”? Ngaba siyakuvuma ukuba nenxaxheba maxa wambi kumsebenzi othob’ isidima wokushumayela iindaba ezilungileyo kwindlu ngendlu? Okanye ngaba kuphela sifuna ukuba sinikwe izabelo eqongeni kwiHolo yoBukumkani? Ngenene, ukuba nengqiqo kaKristu kuya kusigcina sithobekile yaye singeneka, kwananjengokuba uYesu wayenjalo.—Roma 12:3.
21. UYesu wayibonakalisa njani imvakalelo yobudlelane kubapostile bakhe? Kwisihlwele?
21 Ngesinye isihlandlo, emva kwephulo elikhethekileyo lokushumayela, uYesu wabonisa ulwazelelelo olukhulu ngabapostile. Nangona wayefezekile, uYesu wayengalindelanga ukuba abanye bagqibelele. Ekupheleni kwephulo lokushumayela, akazange azingise ngelokuba ngokukhawuleza abapostile mababuyele ekushumayeleni kwabo baze benze ngokulunge ngokude kwangakumbi. Wayenovelwano ngokufuna kwabo ukuphumla yaye wabakhokelela kwindawo engenamntu ukuba babe bodwa. Kodwa xa isihlwele sabalandelayo, ngaba uYesu wacaphuka waza wangabi namonde? Hayi, kuba ingxelo isixelela ukuba “wasikwa yimfesane ngabo.”—Marko 6:30-34.
22. Yintoni eya kusinceda ngokubhekele phaya ukuze siyiqonde ingqiqo kaKristu?
22 Sinomzekelo omhle ngolo hlobo, ngaba iyamangalisa into yokuba inkoliso yabapostile ibe yayingabalandeli bakaKristu abathembekileyo? Ngokuqinisekileyo uPetros wachukunyiswa zizinto awazifundayo ekunxulumaneni ngokusondeleyo noYesu. Kunokwenzeka ukuba wanika uMarko inkcazelo eninzi ukwenzela ingxelo yakhe yeVangeli. Yaye ngokuthe ngcembe kodwa ngokuqinisekileyo uPetros wazilungelelanisa nengqiqo kaKristu. Ukuhlolisisa incwadi yakhe yokuqala kuya kusinceda ukuba silandele umzekelo kaKristu ngokusondeleyo.—Mateyu 16:15-17, 21-23.
Uyakhumbula Na?
◻ Sinokuba nayo njani ingqiqo kaKristu?
◻ UYesu wayeluhlobo olunjani lomntu?
◻ UYesu wasabela njani ebantwaneni? Kubafazi?
◻ Yintoni esiyifundayo ngendlela uYesu awaqhubana ngayo nabafundi bakhe?
[Umfanekiso okwiphepha 10]
UYesu wayenemfesane yaye akazange azifihle iimvakalelo zakhe
[Umfanekiso okwiphepha 12]
UYesu wayengumntu owenza izinto ngenkalipho
[Umfanekiso okwiphepha 15]
UYesu wamisela umzekelo obalaseleyo wokuthobeka