Inkonzo Yobuvulindlela Yaphembelela Ubomi Bam
Ngokubaliswa nguArthur Gustavsson
PHEZULU kwezo ntaba zeHimalaya ezigqunywe likhephu, inyaniso efumaneka kwiLizwi likaThixo iBhayibhile yafikelela kubazali bam, uFred noAmanda Gustavsson. Kwakungowe-1903, yaye ngexesha endandikwisibeleko sikama. Yintoni eyayisenziwa ngabazali bam phezulu apho, kude lee kwilizwe lakowabo iSweden?
Ngonyaka we-1880 bafuduka besuka eSweden basinga eUnited States. Bobabini babe nokholo olomeleleyo kuThixo. Bathelela iScandinavian Mission Alliance eChicago. Ngemva kwethuba loqeqesho, bathunyelwa ngaphandle njengabavangeli eBaltistan, ngoku ekumntla ophezulu wePakistan. Noko ke, kungekudala bakufumamisa kunzima gqitha ukuguqula amaSilamsi bawafake kwiimfundiso zeNgqobhoko. Bona ngokwabo baqalisa ukuthandabuza ukuba uThixo ngokwenene unokuba ngokhohlakele ngolo hlobo ukuba agwebe abo bantu banothando nabanobubele ngokubohlwaya ngonaphakade kwisihogo somlilo ukuba babengaguquki. Babengaqondi ukuba iingqondo zabo zazilungiselelwa okuthile okulunge ngakumbi.
Emva kwexesha elithile bafumana incwadi evela kwisihlobo eUnited States eyathi yakuguqula ngokupheleleyo ukucinga kwabo. Yayiyethi The Divine Plan of the Ages, ebhalwe nguCharles T. Russell, ngoko owayengumongameli weWatch Tower Society ngelo xesha. Bayifunda, kwaza kwaba ngathi kususwe inwebu kumehlo abo. Babona ngokucacileyo ukuba umvuzo wesono kukufa, kungeyiyo intuthumbo kanaphakade. (Roma 6:23) Ngoku babenesigidimi esikhuthazayo sethemba kubantu—sokuba uBukumkani bukaThixo buya kuguqula lo mhlaba ube yiparadisi.
Inguqulelo Kuthumo Lobuvangeli
Kwakumalunga neli xesha endathi ndazaIwa eShigar eBaltistan. Kamva nje kancinane udade wethu uMirjam wazalwa. Abazali bam bagqiba kwelokuba babekufuna ukusebenza phantsi kolwalathiso lweWatch Tower Society ukuze bavakalise inyaniso entsha abathi bayifumana. Phofu ke, iimeko zabanyanzelela ukuba babuyele emva eSweden ngowe-1908. Apho eGӧteborg baqalis’ ukushumayela ‘iindaba ezilungileyo zoBukumkani’ njengabahambisi beencwadi zonqulo, njengoko abalungiseleli bexesha elizeleyo ngoko babesaziwa njalo. (Mateyu 24:14) Ebudeni beminyaka elishumi yokuqala, bagubungela sonke isixeko amatyeli amathathu kubulungiseleli babo bendlu ngendlu. Abantu abaninzi bayamkela inyaniso.
Ndikhumbula uNkosk. Hanna Gunnarsson owathi wacaphuka kakhulu xa ubawo wathi iBhayibhile ayikufundisi ukuba umntu unomphefumlo ongafiyo. Wadanduluka wathi: “Ukuba asinamphefumlo ungafiyo, makube akukho njongo ebomini!” Ubawo wancuma ngobubele waza wamnika incwadana ethi What Say the Scriptures About Hell? Kamva waba liNgqina, kunye neentombi zakhe. Eso siganeko sandifundisa ukuba ungaze uyekelele—kungakhathaliseki okusenokuthethwa ngabantu.
Xa ndandineminyaka elishumi ubudala, uMzalwan’ uRutherford weza eGöteborg ezokunikela intetho yesidlangalala ethi “Baphi Abafi?” Ebudeni bentetho yakhe, wathi wayenokumnika i-1 000 leedola (R2 500) nabani na kubaphulaphuli owayenokungqina ukuba umntu unomphefumlo ongafiyo. Akukho mntu walwamkelayo olu celomngeni.
Umoya Wobuvulindlela Entsatsheni
Ngenxa yomzekelo omhle wabazali bam, ngokukhawuleza ndazaliswa ngumoya wobuvulindlela. Ndaqalis’ ukuba nesabelo kubulungiseleli ndiselula. UBawo wandiyalela ukuba ndinikele izimemo ezibhengeza iintetho zesidlangalala. Ndakunandipha oku ndaza ndaba namava angaqhelekanga. Ngenye imini ndatyelela umfundisi-ntsapho wam ukuba ndimmemele kwintetho. Walichasa ngamandla eli phepha lesimemo. Ndothuka kakhulu kangokuba ndakhubeka ndaza ndawa phantsi kwizinyuko. Yaba sisifundo esi kum—kwandifundisa ukuba ndiqine. Abantu abasoloko beyile nto besingathanda ukuba babe yiyo.
Ikhaya lethu laba njengekhaya loovulindlela, ngamnye ezinikele esenza kangangoko anako emsebenzini. Mna nodade wethu uMirjam sasikuqonda ukubaluleka komsebenzi wokushumayela owawusenziwa nguBawo noMama. Ngoko ke, thina sasisoloko sicoca umzi wonke emva kokuba sifika ekhaya sivela esikolweni.
Kwiminyaka eli-16 ubudala ndazahlulela ukuba ndenze ukuthanda kukaYehova ndaza ndabhaptizwa ngowe-1919 kwindibano eyayiseӦrebro. Kunyaka olandelayo ndamenyelwa ukuya kusebenza nebathwana labazalwana abasibhozo ababexakekile kwiofisi yesebe yeWatch Tower Society eSweden. Loo minyaka yokusebenza kwisebe yabeka isiseko sobomi obuqeqeshekileyo nobulungelelene kakuhle kwinkonzo kaYehova.
Owe-1914—Unyaka Ongenakulibaleka
Kangangeminyaka emininzi ngaphambi kowe-1914, abaFundi BeBhayibhile, njengoko sasibizwa njalo ngelo xesha babekhangele phambili kulo nyaka njengento ethile ekhethekileyo. Ekubeni wawuphawulwe kwisiprofeto seBhayibhile, sasilindele iziganeko ezingaqhelekanga. Ndinokuwukhumbula kakuhle umhla wangeCawa, ngoAgasti 2, 1914. Ubawo wayeqhuba intlanganiso eGöteborg xa seva ngaphandle umthengisi wamaphephandaba edanduluka esithi: “Ungquzulwano lwehlabathi luqalile!” Abazalwana ababeseholweni baqalis’ ukuyana ngamehlo. Zimbi zezinto esasizivakalisa ngowe-1914 zaziqalis’ ukuzaliseka.
Kwakhona unyaka we-1914 wathetha okuthile kuJohan Severin Petersson. Umsakwabo uIda ngaphambili wayemshiyele iincwadi ezintathu ezabhalwa nguMzalwan’ uRussell. Wayecinga ukuba zaziyingozi, ngoko wazitshisa. UIda wayiva le nto, ngelizingisayo, wamboleka ezintathu kwakhona. Ngeli xesha wazitshixela kude kwidrowa.
Kwandula ke kwafika iMfazwe Enkulu yowe-1914. UJohan wayevile ukuba ezi ncwadi zazithetha ngaloo nyaka. Ebangelwa kukufun’ ukwazi, wayivula idrowa, wazikhupha ezo ncwadi waza wazifunda. Kwatsho kwasa ngenyaniso yeBhayibhile, waza naye waba ngumFundi weBhayibhile. Wabhaptizwa ngowe-1917, yaye intombi yakhe uRosa yalandela umzekelo wakhe ngowe-1918. Ngowe-1928 yaba ngumfazi wam othandekayo neqabane lobomi kwinkonzo kaYehova.
Endleleni Neendaba Ezilungileyo
Xa ndatshatayo, ndayishiya iofisi yesebe, saza mna noRosa sachithela iholide yethu yasemva komtshato kubuvulindlela! Ebudeni benyanga yethu yokuqala yobomi bomtshato, sahambisa imibhalo engama-4 000 yencwadana ethi Freedom for the Peoples.
Ngemva kweenyanga nje ezimbalwa, ndabuzwa ukuba ndandingakunikel’ ingqalelo na ukuhambahamba njengomalathisi wenkonzo wommandla, namhlanje owaziwa njengomveleli wesiphaluka. Kwakuza kuthetha ukutyelela amabandla ukutyhubela iSweden yaye kamva neNorway. Ngezo mini kwakungekho malungiselelo okuhamba nomfazi wakho kula matyelelo. Kwakufuneka ndingabikho ekhaya kangangeeveki ezintandathu okanye ezisixhenxe sihlandlo ngasinye, nexesha lokuphumla leentsuku ezimbalwa phakathi kohambo ngalunye. Sasikulungele ukuzincama yaye sakwenza oko kangangeminyaka eli-14.
Wayesenza ntoni uRosa ebudeni beli thuba? Wayenguvulindlela nomsakwethu eHälsingborg, eSweden. Kwakufuneka bahambe kakhulu ngebhayisekile ngezo mini ukuze bagubungele ummandla obanzi. Kodwa makhe alibalise ngokwakhe elo bali.
“Ukuba nguvulindlela kwiminyaka yee-1930 kwakwahluke kakhulu ekukhonzeni namhla. Mna noMirjam sasidla ngokuqesha igumbi elincinane kangangeveki enye okanye ezimbini njengoko sasifuduka ukusuka komnye ummandla ukuya komnye. Ngoko sasifuduka nawo wonke umthwalo wethu siwulayishe kwiibhayisekile zethu—iimpahla, iimbiza neebhokisi zeencwadi. Yayingumbono omkhulu!
“Kwakungasoloko kulula ukufumana iindawo zokuhlala. Ngenye imini, emva kokusebenza ngokwahlukeneyo, mna noMirjam sadibana malunga nentsimbi yesibhozo ngokuhlwa.
“Sasiqhubeka sihamba ngeebhayisekile ukuya kwifama elandelayo apho sabona khona izibane. Ngoko sasiwazi lo mzi. Sathi sapheleIwa lithemba. Abantu balapho babechase kakhulu xa sasibatyelele ngaphambili. Ebuthandabuza, uMirjam waya ngasemnyango waza wacela indawo yokuhlala. Into eyasimangalisayo neyasenza saziva sikhululekile, inenekazi lathi masingene ngaphakathi size sihlale phantsi. Emva kwexeshana samenyelwa kwelona gumbi lihle, apho itafile yayilungiselelwe ngesidlo esikhulu. Kwakunzima ukuba sikukholelwe esasikubona! Emva kokuba sazibetha zabomvu ezethu, sasiwa kwigumbi lokulala apho oomandlalo bethu babendlalwe ngezingayiwayo. Sema nematha ngenxa yokuguquka kwesimo sengqondo.
“Ngentsasa elandelayo sanikwa isidlo sakusasa. Xa sasifuna ukuhlawula, bayala imali yethu. Sababuza enoba sasingabanika na incwadi ebizwa ngokuba yiDeliverance njengesipho. Bathi, ‘Ewe, siyayifuna loo ncwadi. Ummelwane wethu usixelele ukuba niye namnika enye xa benihleli naye. Usixelele indlela ayinandiphe ngayo.’
“Loo mava asifundisa ukuba akunakuze wazi ukuba iya kuzala nkomo ni impapasho enye oyihambisileyo yoncwadi lweBhayibhile.”
Ukubambelela Kwinkonzo Yobuvulindlela
Ngowe-1942 umsebenzi wokuhambahamba wathi nqum okwexeshana, ngoko mna noRosa sakwazi ukubuyela kubuvulindlela kwakhona. Kamva uyise wagula, saza sabushiya ubulungiseleli bethu bexesha elizeleyo saya kumnyamekela. Noko ke, ngokukhawuleza nje ukuba zivume iimeko, sabuyela kumsebenzi wethu othandekayo—inkonzo yexesha elizeleyo. Savakalelwa kukuba sasibuyele kwindawo yethu elungileyo. Ekubuyeleni kwethu ekhaya emva komsebenzi onzima wosuku lokushumayela, sasidla ngokuthi: “Inkonzo yobuvulindlela ikufanele konke ukuzincama nomgudu obandakanyekileyo.”
Kangangeminyaka emininzi ngoku besingoovulindlela kwindawo engasentshona yeSweden, sisebenza neBandla laseSvenljunga lamaNgqina kaYehova. Ngenxa yokuba sesikhulile ngeminyaka, asisenawo loo mandla ezo mini zobutsha, kodwa sivuyiswa kukukwazi ukuqhubeka nobuvulindlela. Ngoku mna ndigqibe ama-55 eminyaka kwinkonzo yexesha elizeleyo ibe yena umfazi wam unama-48. Noko ke, asikhumbuli ezo zinto kuphela, nakubeni zisenza sizive sonwabile. Kungakhathaliseki ukuba ukhule kangakanani, umele usoloko ukhangele phambili. Kungumnqweno wethu onyanisekileyo ukuba sihambe ngokuthembekileyo nangokuthozama noThixo wethu, uYehova, size ekugqibeleni sifumane iintsikelelo ezingummangaliso zoBukumkani bakhe esiye sashumayela ngazo kwinkonzo yexesha elizeleyo kangangeminyaka emininzi kangaka.—Mika 6:8.
[Umfanekiso okwiphepha 26]
Mna nomfazi wam siye sasebenza kunye kwinkonzo kaYehova kangangeminyaka engama-58