Phakathi Kwabantu BakaThixo
AMAZWI kaKumkani uDavide, abhalwe kwiNdumiso,indinyana 2-4, aquka esi simemo sifudumeleyo sibhekiswa kubo bonke abantu abathanda inkululeko yokwenyaniso: “Vumani kuThixo, libetheleni uhadi igama lakhe; menzeleni umendo ophakamileyo, ulokhwela ecanda ezinkqantosini, ogama lakhe linguYehova; nidlamke phambi kwakhe.” Liliphi ilungelo elikhulu ngakumbi elinokubakho elidlula elokudlamka phambi koThixo wethu? (Isaya 12:2, 3) Ukutyhubela unyaka we-1986, uYehova uye wawazimasa ngokumangalisayo amangqina akhe njengokuba eye aqhubeka evakalisa inkululeko kwizizwe zomhlaba.
Amaphepha alandelayo anikela ushwankathelo lomsebenzi wazwenibanzi wamaNgqina kaYehova ebudeni bowe-1986. Onjani yena unobangela wokugcoba! Njengokuba amanani ebonisa, incopho yenani lamaNgqina akhutheleyo kumazwe angama-208 afaka ingxelo iye yakhula ukuya kwizi-3 229 022, ulwando lwe-6,8 ekhulwini ebudeni bonyaka. Inani lababhaptizwayo lalingama-225 868.
Ukukhumbuza Ukufa KukaYesu
Uziwo kwintlanganiso eyintloko yonyaka, iSikhumbuzo sokufa kukaYesu, lwakhula ubuncinane ukuya kwizi-8 160 597, nangona ezinye iingxelo zingazange zifunyanwe ngenxa yeemeko zehlabathi eziya zisiba maxongo. Inani labathabathayo kwimifuziselo yeSikhumbuzo lihle laya kutsho kuma-8 927 njengokuba abathanjisiweyo asebekhulile beyigqibile inkonzo yabo yasemhlabeni.—ISityhilelo 2:10.
Abaninzi kwabo babehlanganisene ngenxa yokuthobela umyalelo kaYesu babonakalisa inkalipho engumzekelo. (1 Korinte 11:23-26; Yohane 16:33) Kwilizwe laseAfrika apho umsebenzi kaYehova ubhangisiweyo khona, ibandla lalihlanganisene kwikhaya lodade ukuze lenze iSikhumbuzo. Kwimizuzu nje esibhozo iqalile intetho, amagunya asekuhlaleni afika ukuza kubamba abazalwana. Abayalela ukuba bayinqumamise loo ntlanganiso. Ngobubele kodwa ngokuqina abazalwana bema ngelithi babemele basihlonele esi Sikhumbuzo sokufa kukaYesu okulidini. Emva kokuqiqa nabakwantsasana nokwenza isicelo kubo, bavunyelwa ukuba baqhubeke ngoxa amagosa ephulaphule. Le ntlanganiso yaqukunjelwa ngoxolo, yaye bathi ke bonke babanjwa. Emva kokuncinwa, abahlanu babanjwa. Bahlala entolongweni okwexesha elithile kodwa ke bathi bakhululwa, bonwabile kuba baye bakwazi ukusigcina iSidlo SeNkosi Sangokuhlwa!—1 Yohane 5:3, 4.
ENigeria, apho inani lamaNgqina liye lenyuka laya kutsho kwi-128 461, eSikhumbuzweni kwakuze abangama-394 370—olona ziwo luphakamileyo lwakha lwakho. Enye intlanganiso yeSikhumbuzo yayiqhutyelwa kwisiza ekwakhiwa kuso iBheteli entsha elgieduma, yaye ababelapho babengaphezu kwama700—phantse idolophana yonke yasekuhlaleni!
Nantsi ingxelo ephuma eMexico: “Naphi na apho sihamba khona kweli lizwe, abavakalisi basuke bazaliswa lihlombe, yaye lonke ilizwe libonakala ngathi litshiswa ngumlilo wenyaniso. Inyaniso iyabagubungela abazalwana, yaye ubomi babo busekelwe yinyaniso. Zonke iintsapho ziyangena enyanisweni. Umlinganiselo omhle wabantu abafundisisayo uyaqalisa ukuya kwiintlanganiso kwangaxeshanye. Oku kuyabanceda ukuba benze inkqubela ekhawulezileyo.” IMexico yabika uziwo IweSikhumbuzo olungama-838 467. NgoAgasti, abavakalisi boBukumkani abali-198 003 abakwelo lizwe babeqhuba izifundo zeBhayibhile ezingama-327 664 emakhayeni abantu. Elinjani lona ithemba abanalo lolwando oluqhubekayo!
Ulwando Olungakumbi Ehlabathini Lonke
Ngaphakathi kumazwe eNgqobhoko kuvela iingxelo ezifanayo zolwando. I-Itali yafikelela incopho entsha yabavakalisi abali-139 570 ngoAgasti, yaye abangama-301 009 babekho kwisikhumbuzo seSidlo SeNkosi Sangokuhlwa. Eneneni amaNgqina kaYehova ‘avumela ukukhanya kwawo kukhanye phambi kwabantu.’ (Mateyu 5:16) Ngokomzekelo: “Udade wayefaka imali kumatshini wamatikiti kuduladula xa omnye umntu amqhelileyo wamxelela ukuba kwakungeyomfuneko ukuba ahlawulele itikiti njengokuba wayeza kuhla kwangoko. Lo dade wamcacisela ukuba kwakuyinto elungileyo ukuhlawula itikiti, kwanokuba wayeza kuhla kwangoko. Emva koko, umhlobo wakhe wehla kuduladula. Ngelo xesha, umqhubi woduladula waguqukela kudade waza wathi: ‘Ngaba ulelinye lamaNgqina kaYehova?’ Waphendula ngelithi lo dade, ‘Ewe, kutheni ubuza loo nto nje?’ ‘Ndive incoko yenu ebingokuhlawula itikiti likaduladula, yaye ndiyazi ukuba amaNgqina kaYehova aphakathi kwabantu abambalwa gqitha abenjenjalo nabanyanisekileyo ezintweni zonke.’ Kwiinyanga ezimbalwa kamva, enye indoda yaya kudade entlanganisweni yaza yathi, ‘Ngaba uyandazi? Ndingulaa mqhubi kaduladula wayethetha nawe ngokuhlawulela itikiti. Njengoko ndandondele ihambo yakho, ndagqiba kwelokuba ndifundisise iBhayibhile namaNgqina kaYehova.’”
IBritani yaba nencopho ye-107 767 kubavakalisi boBukumkani, kuquka lo mzalwana usandul’ ukubhaptizwa: “UGeorge ngoku uneminyaka engama-84 ubudala. Emva kweminyaka engama-50 engumshumayeli ongabekwanga zandla kwicawa yasekuhlaleni, wazuza ulwazi Iwenyaniso. Ekuqaleni, ekupheleni nje kwesifundo sakhe seBhayibhile sekhaya, wayeye angxame ukusinga kwelinye igumbi esiya kutshaya umdiza. Wayeyingedle yecuba kangangeminyaka engama-70. Kodwa emva kokufundisisa isahluko 26 sencwadi ethi Unokuphila Ngonaphakade KwiParadisi Esemhlabeni, akazange abuye atshaye kwakhona. UGeorge ngoku sele enethuba elingaphezu konyaka ebhaptiziwe yaye unenzondelelo gqitha kwinkonzo yasentsimini, exelela abanye ngeentsikelelo uYehova aya kuzizisa kwinkqubo yakhe entsha yezinto.”
INtshona Jamani ibika incopho yabavakalasi abali-118 645. Kukwakho namawakawaka amaNgqina athembekileyo ‘avumela ukuba ukukhanya kwawo kukhanye’ kwiRiphabliki yoLawulo-melo yaseJamani eselumelwaneni. EJamani abakhulileyo abathembekileyo bayakwala ukubeka phantsi “ikrele lomoya.” (Efese 6:16, 17) Elinye ibandla libika oku: “Sinodade oneminyaka eli-103 ubudala ukanti uhlala yedwa. Abadala balungiselela ukuba iqela loodade abasixhenxe ukuya kwabasibhozo litshintshisane ngokumnyamekela veki nganye. Ngoku sele kuyiminyaka emithathu okanye emine bekwenza oku. Oonontlalo-ntle, abahlawulwa ngulo mmandla, bayeza ukuza kumhlamba nokumtshintsha impahla. Kodwa xa begula okanye besekhefini, oodade bethu bayawenza lo msebenzi. Obu bungqina bothando nokuzincama kobuKristu kuye kwaba bubungqina obuhle kwabangaphandle. Udade wethu one-103 leminyaka ubudala uphaphile ngokwasengqondweni yaye oonontlalo-ntle ubajonga ‘njengentsimi’ yakhe. Ubashumayeza ngokunenzondelelo ngoxa bemhlamba yaye ubanika noncwadi.” Enyanisweni, “isithsaba sokuhomba zizimvi, sifunyanwa endleleni yobulungisa.”—IMizekeliso 16:31.
Noko ke, isimemo sokudumisa uYehova siya kubantu babo bonke ubudala—“umlisela kwanomthinjana, amadoda amakhulu kunye nabafana.” Uninzi lwabantu abaselula ‘lukhumbula uMdali walo ngemihla yobutsha balo.’ (INdumiso 148:12; INtshumayeli 12:1) EBrazil, apho kwakukho incopho entsha ebalaseleyo yabavakalisi abali-196 948, iWatch Tower Society yafumana ileta ephuma kwidolophu esemaphandleni apho abazalwana ababini abaselula babenikela khona ubungqina kangangeenyanga ezithile. Ngokuyinxenye yayifundeka ngolu hlobo: “Ndithanda ukunincoma ngenxa yabantu abaselula abalungileyo eninabo kunqulo lwenu. Ndingumfundisi-ntsapho yaye ndiqhubana nolutsha, yaye ndiyazi ukuba alusaziphathi ngendlela obelufudula luziphatha ngayo. Ulutsha lwenu ngenene lungumzekelo. Luyabahlonela abantu abakhulu kunalo, luchubekile yaye lunxiba ngokunesidima. Yaye hayi indlela oluyazi ngayo iBhayibhile yalo! Ngokwenyaniso olo lunqulo! Ndilusizi nje kuba kuye kwafuneka bemkile.” lintsapho zabazalwana bethu ngoku ngokusisigxina zifudukela kweminye yale mimandla ikwanti ukuze zinyamekele abo banomdla.
Yiyiphi inkqubela inyaniso eyenzayo kwimimandla engeyoyabuKristu? IThe Wall Street Journal kaJulayi 9, 1986, yapapasha inqaku elide elaliphantsi komxholo othi Umhlaba Ongumqwebedu—AbangamaKristu Bahlwayela Imbewu EJapan Kodwa Akukho Nto Ikhulayo.” Umvangeli weCawa Emanyeneyo kaKristu wachazwa njengothi, “Akukho ndlela obuya kuthi ngenene bumile ngayo ubuKristu eJapan,” yaye nomfundisi waseFranciscan njengothi, “Usuku lomvangeli ophuma kwilizwe lasemzini oseJapan luphelile.” Bobabini babu lalekela ilize kangangeminyaka engaphezu kwama-30. Inqaku lathi: “Abantu abangamaKristu bangaphantsi kwesi-1 ekhulwini labemi, yaye phezu kwako nje ukubulaleka kwabavangeli, umlinganiselo uyehla.” Injalo ke imeko kwiinkonzo zeNgqobhoko! Kodwa kuthekani ngamaNgqina kaYehova, afundisa ubuKristu obunyulu kwelo lizwe? Kwiinyanga ezingama-92 ezadlulayo ngokulandelelana, aye anda kwinani lawo labalungiseleli abakhutheleyo ukusa kwincopho ye-113 062 (kuquka umlinganiselo ‘woovulindlela’ abangama-46 390 nyanga nganye). EJapan kuqhutywa izifundo zeBhayibhile zamakhaya ezili-146 316 nabantu abasandul’ ukuba nomdla. Ngokuqinisekileyo esi sisandulela solwando oluzukileyo olungakumbi. Apha, sibona inzaliseko ephilileyo kaIsaya 65:13, 14.
Inkalo Yobuvulindlela
Kuthekani ngeyona ndawo ixakeke kakhulu ngulo msebenzi mkhulu kangaka—iUnited States of America? Apho kwakukho incopho yabavakalisi boBukumkani abangama-744 919. Kodwa ngaba ‘abavangeli basemazweni basemakhaya’ abanjalo bafuneka ngokwenene? Enyanisweni bayafuneka, njengoko ulwaphulo-mthetho, iziyobisi, ukuziphatha kakubi, izifo nokonakala zisanda ngomlinganiselo ongakumbi kunalowo wamazwe abahedeni. Abantu abanqwenela izinto ezintle bafuna intuthuzelo nethemba, yaye amaNgqina kaYehova anesigidimi esinjalo. (Isaya 61:1, 2; Mateyu 24:14) EUnited States, ebudeni bowe-1986, aba balungiseleli banikela iiyure ezili-146 673 490 ekuvakaliseni iindaba ezilungileyo zoBukumkani. Oku kuthetha ulwando lwe-12,6 ekhulwini, okanye iiyure ezingakumbi ezili-16 449 229 ngaphezu konyaka odluleyo. Elo xesha lachithwa ngokunenzuzo, njengokuba kwasasazwa iincwadi ezizizi-6 138 938, nto leyo ebonisa uphuculo lwe-23,2 ekhulwini kunonyaka odluleyo. NgoAprili kuphela, kwahanjiswa iincwadi ezingaphezu kwezili-1 000 000 ezicacisa ngethemba lokwenyaniso loxolo nonqabiseko.
Enye yezona mbalasane zichwayitisayo kwingxelo yaseUnited States lulwando kwinkonzo yobuvulindlela. NgoAprili kwakukho incopho yoovulindlela abathe ngxi abangama-45 786, ulwando lwama-23 ekhulwini ngaphezu konyaka odluleyo. Xa udibanisa elo nani nomlinganiselo woovulindlela babancedani abangama-43 369 nomlinganiselo woovulindlela abakhethekileyo abangama-279, kuthetha ukuba nyanga nganye abantu abaphantse babe ngama-90 000 bebevakalisa jikelele uBukumkani bukaThixo kumsebenzi wobuvulindlela. Aba ngabantu abaselula kwanabakhulileyo abathi ngobulumko basebenzise ixesha labo ekudumiseni uYehova.
Ukunikela Ubungqina Obucokisekileyo
Ekufundiseni ekuhleni nakwizindlu ngezindlu, umpostile uPawulos ‘wayeqononondisa [wayenikela ubungqina obucokisekileyo, NW]’ ngeendaba ezilungileyo. (IZenzo 20:20, 21) Ubungqina obufanayo buyanikelwa kwimimandla emininzi namhlanje. Ngokomzekelo, nantsi ingxelo evela eGuadeloupe: “Ngasekupheleni konyaka wenkonzo, mvakalisi ngamnye wayejongene nabantu abangama-72. Akuyomfuneko ukuba side sithi sibaninzi kulo lonke ilizwe! Enyanisweni, kwiindawo ezininzi, siya kummandla omnye iveki neveki. Bambi banokuthi ngokuqinisekileyo abantu bayadinwa kukusibona, okanye kungunobangela wokudimazeka ukuba kwintsimi enye iveki emva kwenye. Kodwa ngokwahlukileyo koko, okukhona siwusebenza ummandla, kokukhona umdla uvuka. Buphi ke ubungqina boko? Kaloku, bukwincopho ka-Aprili odluleyo yezifundo zeBhayibhile zamakhaya ebezingama-7 136 ezaqhutywa ngabavakalisi bethu abangama-4 558! Kutshanje iphephancwadi lalinalo mxholo uphambili: ‘AmaNgqina KaYehova—Ookumkani Bokuya Kwindlu Ngendlu’! Oko sikujonga njengembeko. Ebudeni bonyaka wenkonzo, abazalwana noodade abatsha abangama-458 babhaptizwa.” Ukuqina novuyo olubonakaliswa ekusebenzeni kwethu intsimi yethu ngokuphindaphindiweyo, ukubazi nokuba ngabahlobo babantu, ngothando kudiliza umkhethe wabo—oku kunokukhokelela ekufumaneni abaninzi ababumvu.
UYehova ubasikelela ngokutyebileyo abakhonzi bakhe kwilizwe laseAfrika apho umsebenzi ubhangisiweyo yaye nemfazwe yamakhaya ibhuqa khona. Kwelo lizwe uninzi lwabazalwana bethu lubandezelekile ngaphaya kwezitshixo, yaye wambi amaNgqina aselula aye abulawa. Kanti, uAprili wayenengxelo ebalaseleyo, kwakukho iincopho ezilishumi. Inani elitsha labavakalisi lilulwando lwama-29 ekhulwini ngaphezu konyaka odluleyo. Enjani yona inzondelelo aba bazalwana bathandekayo abayibonakalisayo! Umlinganiselo weeyure ngoAprili wawungaphezu kwe-18 kumvakalisi ngamnye, yaye owezifundo zeBhayibhile wawusisi-2,6 kumvakalisi ngamnye.
Isigidimi esifihlakeleyo esafunyanwa yiofisi yesebe enyamekela lo mmandla sikwanele ukudlulisa iingcamango ezithile ngeemeko ezikhoyo. Sifundeka ngolu hlobo: “Ubushushu buyaqhubeka busigqatsa. Umgudu ofunekayo ukuz’ uhambahambe uze ubone uthile ububungqina bokuba sineliza lobushushu. Kodwa siyazi ukuba senziwe ngendlela yokuba sizivisisanise nabo nabuphi na ubushushu kwanayo nayiphi na imekobume. Phezu kwayo nje nantoni na, siyanyamezela yaye sinethemba lokuba sophumelela.” Enjani yona ingqibelelo!
Abagcini bengqibelelo abangabanye babumba intlangano yabagcini bengqibelelo. Intlangano yazwenibanzi yamangqina kaYehova azizi-3 229 022 ikoko kanye! Akhangele phambili ekusindeni ‘kwimbandezelo enkulu’ esondelayo nokuba nesabelo kumsebenzi ozukileyo wokuguqula umhlaba ube yiparadisi, phantsi koBukumkani bukaKristu. (ISityhilelo 7:14; 21:3, 4; Isaya 65:17, 21-23, 25) Adlamkile ngenxa yendlela uYehova awusikelela ngayo ngoku umsebenzi wawo wenzondelelo, enoba ashumayela ilizwi “ngamathuba alungileyo” okanye ‘axakileyo.’ (2 Timoti 4:2) Amaphepha alandelayo abonisa indlela aye awuthobela ngayo umxholo wawo wonyaka we-1986: “Hamba uye kushumayela ubukumkani bukaThixo.”—Luka 9:60.
[Ibhokisi/Umfanekiso okwiphepha 7]
Ezinye Zeembalasane Zengxelo YamaNgqina kaYehova Yazwenibanzi
Ulwando:
Incopho yabavakalisi: 3 229 022 6.8%
Umlinganiselo weenyanga ngeenyanga koovulindlela: 391 294 21.2%
Isimbuku seeyure zokushumayela: 680 837 042 15.3%
Umlinganiselo weenyanga ngeenyanga kwizifundo zeBhayibhile: 2 726 252 14.6%
Isimbuku esabhaptizwayo kowe-1986: 225 868 19%
[Itshati ekwiphepha 10-13]
INGXELO YONYAKA WENKONZO WE-1986 YAMANGQINA KAYEHOVA ZWENIBANZI
(Jonga umqulu)
[Imifanekiso ekwiphepha 8, 9]
UKUNIKELA UBUNGQINA “EKUHLENI NAKWIZINDLU NGEZINDLU” “NASEKUPHELENI KOMHLABA”
EDavao KwiPhilippines
EVenice eItaly
ECastle Combe eNgilani
EGålå eNorway
EKowloon eHong Kong
ETaipei eTaiwan
EQueenstown eNew Zealand
EBolgatanga eGhana
EParis eFransi
EQuetzaltenango eGuatemala
EKerala eIndia
EBanff Khanada