Angabantu Abavuyayo—Abangelwa Yintoni?
AMAKRISTU okwenyaniso namhlanje angabantu abavuyayo. Okusibangela sivuye kukuba sikhonza uYehova, “uThixo owonwabileyo.” (1 Timoti 1:11, NW) Usixhasa ngomoya wakhe, ibe isiqhamo saloo moya luvuyo.—Galati 5:22.
Olo phawu lovuyo lwendele ngolo hlobo luyanyamezela luze luyixhathise ingcinezelo. Ngokomzekelo, uYesu Kristu wanyanzelelwa ukuba anyamezele intlungu yokubethelelwa emthini nehlazo lokubulawa njengomnyelisi. Kanti, “ngenxa yovuyo olwalubekwe phambi kwakhe, wawunyamezela umnqamlezo.” (Hebhere 12:2) UYesu wayesazi ukuba ngaphambi kwakhe wayenamathuba azukileyo namalungelo anokuthanani nenkonzo yakhe kuYehova. Ukuzikis’ ingqondo kula malungelo exesha elizayo kwamnceda walondoloza uvuyo lwakhe phezu kwako nje ukubandezeleka.
UYesu ukwafuna abafundi bakhe bavuye. Wathi: “Ezi zinto ndizithethile kuni, ukuze uvuyo lwam luhlale kuni, luthi novuyo lwenu luzaliseke.” (Yohane 15:11) Oku kuye kwangqineka kunjalo kumaNgqina kaYehova namhlanje. Sinezizathu ezininzi ezisenze sangabantu abavuyayo. Siyayazi inyaniso, ethe yasikhulula kumakhamandela eenkolo zobugqwirha nezonqulo lobuxoki. (Yohane 8:32) Kwakhona, siyazi ukuba siphi na kumsinga wamaxesha ibe siyavuya ngenxa yethemba losindiso eliza kuzalisekiswa kungekudala. (Luka 21:28) Kwakhona sikhuselwe kwiingxaki ezininzi—ekukho kuzo izifo ezidluliselwa ngeentlobano zesini—ezijongene nabo bangayisebenzisiyo imigaqo yokuziphatha okuhle esekelwe eBhayibhileni. Sinandipha olona lwalamano luhle nabantu abanomdla ekwenzeni ukuthanda kukaYehova. Ewe, sinandipha elo lungelo lizukileyo lokuba nesabelo ekushumayeleni iindaba ezilungileyo zoBukumkani nelokwenza abafundi abo babumvu.—Mateyu 24:14; 28:19, 20.
Kodwa ngoxa oku kusenzeka kumaNgqina kaYehova ngokuyintlanganisela, kuthekani ngawe njengomntu ngamnye? Kutheni le nto kunokuthiwa unesizathu esikubangela uvuye kunye nabo bonke abantu bakaYehova?
Ukufumana Uvuyo Kumsebenzi Wokushumayela
Bambi bakufumanisa kunzima ukwenza umsebenzi wokushumayela kwindlu ngendlu. Mhlawumbi baba nemvakalelo yoloyiko ekuthetheni nabantu abangabaziyo nokuqalis’ incoko. Okanye basenokuziva nje bengafanelekanga xa kufuneka befundise abanye. Ngaba maxa wambi uvakalelwa ngaloo ndlela? Ukuba unjalo, unokulufumana njani uvuyo kumsebenzi wokushumayela?
Okokuqala, zigcine unesimo sengqondo esifanelekileyo. Abantu abaninzi bekuya kubabangel’ imincili ukusebenzela uthile owaziwayo okanye umpolitiki odumileyo. Kodwa olunjani lona uvuyo esimele silufumane ngenxa yokusetyenziswa ‘nguKumkani wawo amaphakade,’ uYehova uThixo ngokwakhe!—1 Timoti 1:17.
Kwakhona, khumbula ukuba, lo ngumsebenzi ongasayi kuze uphindwe. Khawucinge ngaloo nto! Zizithunywa zezulu ngokwazo ezikhokela zize zalathise amaKristu apha emhlabeni kwimigudu yawo yokufumana abantu ababumvu. (ISityhilelo 14:6) Ngaba oku akuyivuyisi intliziyo yakho?
Ukufumana Uvuyo Kulwando LoBukumkani
Esinye isizathu sokuba nesimo sengqondo esifanelekileyo ngomsebenzi wokushumayela ngumphumo omhle onawo. IBhayibhile yawuxela kwangaphambili isithi: “Omncinanana uya kuba liwaka, noweyeleyo abe luhlanga olunamandla. Mna, Yehova, ndiya kukukhawulezisa oko ngexesha lako oko.” (Isaya 60:22) Eli dinga likaYehova liye lazaliseka kumaxesha akutshanje. Ngokomzekelo, ebudeni bonyaka wenkonzo we-1986, ama-225 868 abhaptizwa efuzisela uzahlulelo lwawo lomphefumlo uphela kuYehova uThixo. Kwakukho ulwando lwe-6,9 ekhulwini kwinani elingumlinganiselo wabo baye banesabelo ekusasazeni iinyaniso zeBhayibhile kwabanye.
Akuthandabuzeki ukuba olu lwando luyabonakala kwibandla okulo okanye kwisiphaluka okuso. Abasebatsha beza kwiintlanganiso baze benze neenguqulelo ezifunekayo kubomi babo khon’ ukuze bakwazi ukukhonza uThixo. Ngaba ke oku akwalathi kwisibakala sokuba umsebenzi wokushumayela unentsikelelo kaYehova? Ukuba nesabelo kolu lwando ngaloo ndlela kunokuba ngunobangela wovuyo olukhulu kuwe. Kuyinyaniso ukuba, usenokuba akukhange ufundisise nothile ukusa kwinqanaba lokuba abhaptizwe. Kodwa asinakufuna ukuzukiswa ngenxa yokuba sifake uthile enyanisweni. ‘NguThixo ohlumisayo,’ watsho njalo uPawulos. (1 Korinte 3:6-9) Onke amalungu ebandla anesabelo ekuncedeni abasebatsha. Njani? Ngokubakho kwiintlanganiso, agqabaze, ebabulisa ngobubele abasebatsha, aze aziphathe ngendlela eya kwenza inyaniso ibe nomtsalane.
Phofu ke, unokufumana uvuyo olukhulu ukuba uye wanesabelo esingqalileyo ngakumbi kumsebenzi wokushumayela kwindlu ngendlu nowokuqhuba izifundo zeBhayibhile. Kunyaka odluleyo, ngokomlinganiselo kwaqhutywa izifundo zeBhayibhile ezizi-2 726 252 iiveki ngeeveki. Kutheni le nto ungenzi umgudu ongakumbi ukuze ube nesabelo kulo msebenzi uvuyisayo? Yazisa uthile omaziyo ukuba unokuzinikela umqhubele isifundo seBhayibhile, mhlawumbi ummelwane okanye lowo uye wamhambisela uncwadi. Cela uYehova akuncede ekufumaneni umntu oyimvu ngolo hlobo.
Yoyisa Imiqobo Ukuze Uvuye
Kakade ke, ukuba umntu uziva engakufanelekelanga ukufundisa abanye, oku kunokuba ngumqobo wokwenene ekufumaneni kwakhe uvuyo kubulungiseleli basentsimini. Noko ke, khumbula ukuba, “ukulingana [ukuba ngabakufanelekele kunene, NW] kwethu oko kuphuma kuThixo.” (2 Korinte 3:5) Ibe esebenzisa intlangano yakhe uYehova uye wenza amalungiselelo amaninzi namahle ukuze asincede sifaneleke njengabalungiseleli abaphumelelayo.
Okokuqala, phakathi kwethu kukho abantu abaninzi abebekhonza uThixo ixesha elide yaye banamava amaninzi kubulungiseleli basentsimini. Sinokubathelela aba balungiseleli banamava kumsebenzi abawenzayo size sifunde kubo. Ngaphezu koko, amacebiso amahle avela nyanga nganye kuBulungiseleli Bethu BoBukumkani. Kwakhona kukho impapasho ethi Ukuqiqa NgeZibhalo, equlethe inkcazelo ebubutyebi neyenzelwe ukulola ubuchule bethu bokushumayela. Zisebenzise ezi zixhobo uze ubuxhobele ngokucokiseke ngakumbi ubulungiseleli basentsimini. Cinga ngeendlela ezintsha nezivus’ umdla zokuzazisa kwabasendlwini. Okanye khawuqwalasele iindlela ezahlukeneyo zokubatsalela kwincoko abaninimzi. Njengoko uya usiba ngonomphumo ngakumbi entsimini, ihlombe novuyo lwakho ekushumayeleni ngokungathandabuzekiyo luya kwanda.
Ubulungiseleli bunandipheka ngakumbi xa sikwazi ukuthetha nabantu. Kweminye imimandla oku ngokungenakukhanyelwa kuyingxaki. Ngaba unokulungiselela ukuba nesabelo kwinkonzo yasentsimini ngexesha laxa abantu abangakumbi bekumakhaya abo, njengakurhatya lwemivundla? Abaninzi bakufumanisa kuyimpumelelo gqitha ukwenjenjalo. Nawe unokuyiqalisa ngokwakho incoko uze uthethe nabantu nakuziphi na iindawo abafumaneka kuzo—abasezitratweni, abahleli kwizihlalo zasepakini nabahlamba iinqwelo-mafutha zabo. Khumbula ukuba abantu bayayifuna inyaniso kwanokuba ubomi bubandakanyekile. Oku kunokukunceda kukushukumisele ukuba woyise utyekelo lokuba neentloni. Ngoxa kuyinyaniso ukuba inkoliso yabantu ayisayi kusabela kakuhle, abo basabelayo basizisela uvuyo olukhulu.
Noko ke, olunye lwamancedo abalasele ngakumbi ekulondolozeni uvuyo Iwethu ngumthandazo. Cela uYehova ukuba ngomoya wakhe akomeleze aze akwenze ukhaliphe. UPawulos wathi: “Ndinokuzenza izinto zonke, ndikulowo undomelezayo, uKristu.” (Filipi 4:13) Nathi, sinokuvakalelwa ngaloo ndlela, njengoko sifunda ukuthembela ngokupheleleyo kuYehova.
Ukunyamezela Njengabantu Abavuyayo
Abantu abaninzi abawuxabisi umsebenzi wethu. UYesu waqonda ukuba oku kwakuya kwenzeka. Ngoko xa wathuma abalandeli bakhe ukuba baye kushumayela, wabaluleka wathi: “Nothe akawamkela akaweva amazwi enu, vuthululani uthuli lweenyawo zenu. . . . Yabonani, mna ndinithuma njengezimvu phakathi kweengcuka; ngoko yibani nobulumko njengeenyoka, nibe njengamahobe ukungabi nabuqhinga.” Kwakhona uYesu wathi: “Nina ke, kwaneenwele ezi zentloko yenu zibaliwe zonke. Musani ukoyika ngoko.”—Mateyu 10:11-16, 30, 31.
La mazwi ayasinceda ukuba sinyamezele sivuya. Asinceda siqonde ukuba xa sihlangana nabantu abangayixabisiyo imigudu esiyenza ngenxa yabo, sisalivakalisa igama likaYehova; sisamdumisa. (INdumiso 100:4, 5) Okubangel’ umdla kukuba, maxa wambi abaninimzi abasalelayo ukuba singene kumakhaya abo banokuviwa besithi kwabanye: “BebengamaNgqina kaYehova.” Ewe, singathethanga nelizwi eli, igama likaYehova liye lazukiswa, yaye abantu baye balifumana ithuba lokuyamkela okanye lokuyichasa inyaniso. (Mateyu 25:31, 32) Ngoko nemimandla engenabantu basabelayo sinokuyinyamezela sinovuyo.
Ngaphandle koko, asilazi ixesha abaya kuthi ngalo abo bantu basiguqule isimo sabo sengqondo. Ngaminazana ithile, umfazi othile owamheshela kude udade ongumKristu ukuba angangeni kwindlu yakhe izihlandlo ezininzi wabuza lo dade enoba wayenalo na uncwadi olutsha. Lo dade wothuka waza wathi lo mfazi wayengazange alwamkele uncwadi lweBhayibhile ngaphambili. Lo mfazi wacacisa esithi indoda yakhe yayisebenza nendoda eyayifundisisa iBhayibhile namaNgqina kaYehova. Ngoko yayimnika yena nendoda yakhe enye yeempapasho zeWatch Tower Society. Ebangelwa kukufun’ ukwazi eyayikuqulathile, lo mfaziwayifunda waza eso sigidimi wasiphawula njengesiyinyaniso. Ngoko nangoko wagqiba kwelokuba kwixesha elizayo etyelelwa liNgqina wayeya kulivulela lingene. Kwaqalisw’ isifundo seBhayibhile, waza kamva loo mfazi waba liNgqina likaYehova elizahluleleyo!
Ngaloo ndlela sinelungelo elikhulu—ilungelo elivuyisayo—lokuvakalisa ekuphela kwesigidimi sethemba ehlabathini. Yaye umsebenzi wokushumayela usisabelo esisinikwe nguThixo ebudeni bale mihla yokugqibela. Umele wenziwe ngaphambi kokuba isiphelo sifike. (Mateyu 24:14) Kuya kuthabatha ixesha elide kangakanani ngaphambi kokuba kufike isiphelo sale nkqubo ingendawo kaSathana? Siyazi ukuba isiphelo asiyi kufika emva kwexesha. (Thelekisa uHabhakuki 2:3.) Okwangoku ke, kusekho ixesha lokuba abanye bafunde inyaniso. Masilisebenzise kakuhle ixesha elisasisaleleyo size ngokunenzondelelo senze umsebenzi wethu wokushumayela. Yaye masibe nesimo sengqondo esikhuthazayo, sisebenza ngenkuthalo ukuze ‘sizisindise thina kwanabo basivayo.’ (1 Timoti 4:16) Ngokwenjenjalo, siya kuhlala singabantu abavuyayo ekubeni nesabelo kumsebenzi wolwando loBukumkani.
[Umfanekiso okwiphepha 23]
Umsebenzi wethu wokushumayela ungunobangela wovuyo lokwenyaniso—kwanaxa abantu bengasabeli kwisigidimi soBukumkani