Indlela Esinokumazi Ngayo uThixo

BAMBI abantu bakholelwa ukuba uThixo ukuyo yonke indawo, usezinkwenkwezini nakwizijikelezi-langa, kumnyama, kwiphiko lentaka, nakwigqabi lengca. Noko ke, iBhayibhile ifundisa ukuba uThixo, njengoMntu, unendawo eyiyeyakhe. UKumkani osisilumko uSolomon ethandaza kuThixo wathi: “Yiva ke emazulwini, endaweni ohlala kuyo.” Yaye kwincwadi yeBhayibhile kaIsaya, uThixo ngokwakhe ucatshulwa esithi: “Amazulu ayitrone yam.”—1 Kumkani 8:49; Isaya 66:1.

Nangona uThixo engekho kwindalo yakhe, iimpawu zakhe zobuntu zibonakalisiwe kuyo. KumaRoma 1:20 umpostile uPawulos wathi: “Kuba kwasekudalweni kwehlabathi, iindawo zakhe ezibe zingenakubonwa zibonwa kakuhle, ziqondeke, ngezinto ezenziweyo, kwa-amandla akhe angunaphakade, nobuthixo bakhe.” Ngokufanayo umdumisi uDavide wabhala: ‘Izulu libalisa uzuko lukaThixo, saye isibhakabhaka sixela umsebenzi wezandla zakhe. Imini impompozela imini intetho, ubusuku buxelela ubusuku ukwazi.”—INdumiso 19:1, 2.

Ewe, khawukhangele phandle ngobusuku obuneenkwenkwezi uze ucinge okomzuzwana ngobulumko obubalaseleyo naloo mandla afunekayo ukuze kudalwe nokuze kulondolozwe indalo yethu! (Thelekisa uIsaya 40:26.) Eneneni, indalo ingumthombo wenkcazelo ongenasiphelo obonisa ubuntu bukaThixo. Yaye umntu akanakuze abuqonde ngokupheleleyo ubungqina obuyintabalala obuboniswa yindalo ngokuphathelele iimpawu zikaThixo. Incwadi kaYobhi isikhumbuza oku: “Uyabona, ngamancam eendlela zakhe lawo; iyini na ke intsebezo yelizwi esiyivayo ngaye?” (Yobhi 26:14) Kukho iqhalo elidala laseSweden elithi: ‘Oyinkosi mkhulu kakhulu kunemisebenzi yakhe.’ Ngokuvisisana noko, ukuba indalo inkulu, uThixo umele abe mkhulu kakhulu; ukuba indalo ibonisa ubulumko, uThixo umele abe nobulumko obu-the chatha; ukuba indalo ibonisa amandla, uThixo umele abe ngonamandla ade angakumbi!

IBhayibhile—Incwadi KaThixo

Ngaloo ndlela indalo inikela inkcazelo eninzi ngoThixo. Noko ke, ngaba ukufundisisa indalo kunokukuxelela igama likaThixo? Ngaba kuya kuyityhila injongo yokubakho kwendalo okanye isizathu sokuvumela kwakhe ubungendawo? Iimpendulo kwimibuzo enjalo zifuna ufundisiso olungakumbi kunokuhlolisisa nje imisebenzi ebonakalayo eyenziwe nguThixo. Ngethamsanqa, uThixo uye waqinisekisa ukuba inkcazelo enjalo ephathelele naye yandlaliwe eBhayibhileni.

Kuyo uThixo akaze nakanye achazwe njengento exakayo, ekrelekrele ngokungachazekiyo okanye amandla akho kuyo yonke indawo ngamaxesha onke. KwiZenzo 3:19 (NW) sifunda ‘ngobuso bukaYehova.’ Xa uNyana wakhe, uYesu Kristu, wathi wavuswa kwabafileyo, iBhayibhile ithi wangena kumazulu ngokwawo ukuze abonakale “ebusiveni bukaThixo.” (Hebhere 9:24) Ngokuqinisekileyo, uYesu akazange ambize uThixo ngokuthi ungaMandla Amakhulu, uMntu Okrelekrele ngokungenamda, okanye nangalo naliphi na ibinzana elixakayo xa wathetha ngaye okanye wathandaza kuye. Ngokwahlukileyo koko, ngokufuthi wayembiza ngokuthi Bawo wasezulwini, ibinzana elityhila ubuhlobo obunzulu noThixo.—Mateyu 5:48; 6:14, 26, 32.

Ngoko ke uThixo ‘Akayonto’ engenagama kodwa kunoko unguMntu onegama. INdumiso 83:18 ithi: “Bazi ukuba wena, ugama linguYehova unguwe wedwa Osenyangweni phezu kwehlabathi lonke.” Kuyinyaniso ukuba, iBhayibhile ikwasebenzisa amagama okanye amabinzana achazayo xa ithetha ngoThixo: “uSomandla,” “uKumkani wawo amaphakade,” ‘umsindisi,’ “umalusi,” “uNyangelemihla,” ‘umveleli,’ ‘uMyaleli Ozukileyo,’ ‘uMkhululi,’ “uLiwa.” (Rute 1:20; 1 Timoti 1:17; Isaya 43:11; INdumiso 23:1; Daniyeli 7:9, 13, 22; 1 Petros 2:25; Isaya 30:20, NW; 54:5; Duteronomi 32:4) Phofu ke, amabinzana anjalo atyhila iimpawu ezibhekele phaya zobuntu bukaThixo, ezinjengokuba ngonamandla kwakhe, inkxalabo yakhe enothando ngabantu bakhe nobulumko bakhe obungunaphakade.

Ngenxa yokuba uThixo enguMntu, unezinto azithandayo nazithiyileyo—yaye ukwanazo neemvakalelo. IBhayibhile isixelela ukuba uyabathanda abantu bakhe (1 Kumkani 10:9), iyamvuyisa imisebenzi yakhe (INdumiso 104:31), ukuthiyile ukunqulwa kwezithixo (Duteronomi 16:22), nokuba uva ubuhlungu ngenxa yobungendawo. (Genesis 6:6) Kweyoku-1 kuTimoti 1:11, (NW) ude abizwe ngokuba ‘nguThixo owonwabileyo.’

Ukwazi UThixo Ngokusondeleyo

Kuyinyaniso ukuba, akukho ngqondo yomntu inkulu ngokwaneleyo ukuba ithwale zonke izinto ezityhila ubuntu bukaThixo. “Hayi, ubunzulu bobutyebi nobobulumko nobokwazi kukaThixo! Asikuko nokuba ayiphengululeki imigwebo yakhe, azilandeki iindlela zakhe! Kuba ngubani na oyazileyo ingqiqo yeNkosi? Ngubani na khona othe waba ngumcebisi wayo?” (Roma 11:33, 34) Sekunjalo, kulowo unokholo, uThixo unokuba ngowokwenene kanye njengokuba enjalo nawuphi na omnye umntu. IBhayibhile isixelela ukuba “uNowa wahamba noThixo,” ngokungathi uYehova wayesecaleni lakhe. (Genesis 6:9) UThixo wayekwangowokwenene kuMoses kangangokuba wayenga “uyambona lowo ungenakubonwa.” (Hebhere 11:27) KwanangoAbraham kwathiwa “sisihlobo sikaThixo.”—Yakobi 2:23.

Kakade ke, uThixo wazityhila ngokobuqu kuNowa, kuAbraham nakuMoses. Bambi basenokuthi, ‘Kaloku, ukuba uThixo ebeya kuzityhila kum ngendlela efanayo yobuqu, nakum ebeya kuba ngumntu wokwenene.’ Noko ke, khumbula ukuba uNowa, uAbraham noMoses babengenayo iBhayibhile. Babengazinto ngoYesu Kristu kwanangayo yonke intlaninge yeziprofeto awazizalisekisayo. Ngenxa yoko, konke oko uYesu Kristu wakutyhilayo ngoThixo babengazinto ngako. Phantsi kweemeko ezinjalo, kwakuyimfuneko yaye kufanelekile ngoThixo ukuba azityhile ngokungqale ngolo hlobo.

Noko ke, namhlanje sinayo iBhayibhile yaye siyibone kangangeenkulungwane inzaliseko yeziprofeto zeBhayibhile. Sineengxelo zeVangeli zobomi nemisebenzi kunye namazwi kaYesu Kristu. Yaye uPawulos uthi: “Ngokuba kuhleli kuye [uKristu] konke ukuzaliseka kobuthixo ngokomzimba.” (Kolose 2:9) Ewe, sikwimeko yokumazi uThixo ngolwalamano olusondeleyo olwalungekho kwimihla yoosolusapho. Ngaba oku ngokubalaseleyo akuhlawuleli eso sibakala sokuba engakhange azityhile ngokungqalileyo kuthi?

Ukufunda IBhayibhile Kusisondeza KuThixo

KuYakobi 4:8 sifunda oku: “Sondelani kuye uThixo, wosondela kuni.” Ngokufunda iBhayibhile, sinokusondela kuThixo. Kodwa kunokwenzeka njani oku? Phakathi kwezinye izinto, ngokufunda icandelo leBhayibhile suku ngalunye, ufunda iimpawu ezintsha zobuntu bakhe. Njengoko ufunda, nqumama ngokuphindaphindiweyo uze uzibuze: ‘Yintoni endiyifunde ngoThixo kule ndinyana okanye kweli candelo?’ Ukongezelela, unokuthandazela umoya kaThixo ukuba usebenze ‘njengomncedi’ ekuqondeni kwakho oko nasekusondeleni kwakho kuThixo.—Yohane 14:26, NW.

Omnye umfazi ongumKristu owathi wafunda iBhayibhile ukususela ekuqaleni ukusa ekugqibeleni wavakalisa oku, “Ndiye ndakuxabisa ukufumana ulwazi oluthe chatha ngoYehova njengomntu.” Wayengumfundi kwiSikolo seBhayibhile seWatchtower saseGiliyadi, esiqeqesha abavangeli basemazweni abathunyelwa kulo lonke ihlabathi. Nguwuphi umgaqo wokufundisisa iBhayibhile osetyenziswayo kwesi sikolo? Omnye wabahlohli uwucacisa ngale ndlela: “Saqalisa iphulo lokufundisisa yonke iBhayibhile njengeqela. Sasifundisisa amaphepha ali-10 ukuyakwali-15 ngosuku, . . . bonke abafundi besenza uphando baze bafak’ isandla kwingxubusho yethu. Ukuba sasidibana nendinyana enzima, sasiqwalasela (1) umongo, (2) iimeko ngexesha lokubhalwa kwayo (3) nentsingiselo yamagama aziintloko kumbandela. Sasisoloko sizibuza oku, ‘Oku kusixelela ntoni ngoYehova nangeempawu zakhe? Sasisoloko sikufumana kusixelela okuthile ngaye.”

Nangona usenokungabi nalo ilungelo lokufundisisa iBhayibhile ngokucwangcisiweyo kwesi sikolo, eminye yale migaqo yokufundisisa inokukunceda wena nentsapho yakho. Ngokomzekelo, phakathi kwamaNgqina kaYehova kulisiko ukufundisisa izahluko ezimbalwa zeBhayibhile veki nganye ngokuphathelele neentlanganiso zawo zebandla. Kutheni le nto ningalandeli olu cwangciso lokufunda iBhayibhile njengentsapho? Ngokungakumbi, iWatch Tower Society ipapasha amancedo okwenza uphando, anjengeAid to Bible Understanding neNew World Translation Reference Bible, anokuthi akuncede kwizicatshulwa ezinzima zeBhayibhile.a Ucwangciso oluthe rhoqo lokufund’ iBhayibhile lunokulukhulisa ngamandla uxabiso lwakho ngobuntu bukaYehova.

Kwakhona usenokukhetha nje icandelo leBhayibhile elinomtsalane ongamandla kuwe. Ngokomzekelo, ukuba ukhetha ukufundisisa iindinyana ezili-17 kwiNdumiso 86, ubuncinane uya kufumana iimpawu ezili-15 zobuntu bukaThixo: Ulungile, ukulungele ukuxolela, mkhulu ngenceba, ukulungele ukuphendula imithandazo, akanakulinganiswa noothixo, akanakulinganiswa nanto njengomenzi wendalo, ungumlawuli owongamileyo, ungumenzi ozukileyo wezinto ezingummangaliso, ungumhlanguli ekufeni, unemfesane, unobabalo, uzeka kade umsindo, mkhulu ngenyaniso, ungumncedi, yaye ungumthuthuzeli. Luluphi usukelo onokuba nalo kunokuzama ukufunda ngoMdali wakho?

Iingenelo Ezinkulu Zokwazi UThixo

Ukufikelela usukelo lwethu lokugqibela lobomi obungunaphakade yingenelo nje enye yokwazi uThixo. (Yohane 17:3) Ukongezelela, ufumana ingenelo yokuba nothile okukhathaleleyo imihla ngemihla yaye ohlala ekho njengeliwa. (INdumiso 18:31) Xa uKumkani uDavide wavakalelwa kukuba wayengqongwe ziintshaba yaye ebulaleka ziingxaki, wafumanisa ukuba uThixo wayekuphela koyena mncedi ufumanekayo. Ngoko ke wathi: “Umthwalo wakho wulahlele kuYehova; yena wokuzimasa; akayi kuliyekela ilungisa lishukunyiswe naphakade.”—INdumiso 55:22.

Nawe, unokulunandipha ulwalamano olunjalo noThixo, ukuba uzinik’ ixesha lokwazi ngaye. Akunzima noko. Zibekele usukelo lokufunda iLizwi lakhe. Nxulumana nabo ebomini babo babonakalisa ukuba bayamazi uThixo, abanjengabo bakuzisele lo lindixesha. Thetha noYehova emthandazweni. Kuba uThixo akangomandla angenabuntu aya kuzival’ iindlebe zawo xa ukhala kuwo. UnguThixo ophilileyo ‘noMphulaphuli wemithandazo.’ Yaye ‘ukuba uyamfuna, wofunyanwa nguwe.’—INdumiso 65:2; 1 Kronike 28:9.

[Umbhalo osemazantsi]

[Umfanekiso okwiphepha 5]

UThixo wazithyila ngokobuqu kuNowa, kuAbraham nakuMoses

[Umfanekiso okwiphepha 7]

Indalo ngumthombo wenkcazelo ongenasiphelo obonisa ngobuntu bukaThixo