“Alukho Uxolo Kwabangendawo”
“Alukho uxolo kwabangendawo, utsho uThixo wam.”—ISAYA 57:21.
1, 2. (a) Abantu abaninzi bavakalelwa njani ngekamva loluntu? (b) Uyintoni umphumo wemigudu yabantu yokuzisa uxolo?
“NDISOKOLO ndiyiphaphele into yokuba nangawuphi na umzuzu ehlabathini kusenokubakho ugqabbuko-dubulo olunokulitshabalalisa ndijongile.” La mazwi akhwankqisayo, awacatshulwa kwiphephancwadi iPsychology Today, athethwa ngomnye umfundi wesikolo semfundo ephakamileyo kuMntla Merika. Lo mfundi unoloyiko lokuba, kwithuba elithile elingekude imfazwe yenyukliya mhlawumbi iya kutsbabalalisa lonke uluntu. Intwazana ehamba isikolo yaseRashiya ichaza imiphumo yemfazwe yenyukliya ngokuthi: “Zonke izinto eziphilileyo ziya kutshabalala—akuyi kubakho ngca, mithi, okanye uhlaza.” Olunjani lona ukoyikeka olo lindelo! Kanti, abantu banoluvo lokuba oku kunokwenzeka ngenene. Kuhlolisiso lwakutshanje ama-40 ekhulwini abantu abakhulileyo ekwadliwan’ indlebe nabo baba noluvo lokuba izinto “zithambekele” ngasekubeni kubekho imfazwe yenyukliya ngapbambi konyaka wama-2000.—Bona uLuka 21:26.
2 Kwaneenkokeli zehlabathi ziyayiqonda le ngozi. Emva kwemfazwe yokugqibela yehlabathi, zamisela intlangano yeZizwe Ezimanyeneyo ukuze kuzanywe ukuziswa uxolo nonqabiseko kuluntu—kodwa ayiphumelelanga. Endaweni yoko, kwiminyaka yasemva kwemfazwe kwavela ukruthakruthwano oluqatha phakathi kwamagunya amakhulu amabini axhobe ngenyukliya. Ngamathub’ athile, iinkokeli zala magunya ziyahlanganisana ngelinge lokuthomalalisa ixhala elikho kwizizwe ngezizwe kodwa akubangakho miphumo ingako. Phezu kwaso nje isibakala sokuba iinkokeli zonqulo zithandazela uxolo, le meko injengokuba uIsaya wayichazayo esithi: “linjengele zabo ziyakhala ngaphandle; abathunywa boxolo balila ngokukrakra.”—Isaya 33:7.
3. Kutheni le nto kungenakwenzeka ukuba abantu babe baya kuphumelela kumalinge abo okuzisa uxolo?
3 AmaKristu anolwazi ayasazi isizathu sokuba abantu bezobupolitika bengasayi kuze bazise luxolo luhlala luhleli. Ayaqonda ukuba lo gama nje abantu besazaliswe kukuzingca, yintiyo, kukubawa, likratshi nangamabhongo, akuyi kubakho luxolo. (Thelekisa uYakobi 4:1.) Ngaphandle koko, iziganeko zabantu azilawulwa ngokupheleleyo ngabantu. Kunoko, iBhayibhile isixelela oku: “Ihlabathi liphela lilele kongendawo.” (1 Yohane 5:19; 2 Korinte 4:4) UIsaya wayichaza kakuhle imeko yoluntu olulawulwa ngulo ungendawo esithi: “Abangendawo banjengolwandle oluvunjululweyo, ngokuba alunakuzola . . . Alukho uxolo kwabangendawo, utsho uThixo wam.”—Isaya 57:20, 21.
“UThixo Onika Uxolo”
4. Ngubani okuphela konamandla okuzisa uxolo kulo mhlaba?
4 Oku akuthethi ukuba uhlanga lwabantu alunakusinda kwintshabalaliso yemfazwe yenyukliya ezayo. Kuthetha nje ukuba ukuze kubekho uxolo, kuya kufuneka luvele kumthombo ongaphandle. Okonwabisayo kukuba, loo Mthombo ukho yaye unguYehova uThixo, “uThixo onika uxolo.” (Roma 16:20, NW) Unamandla okoyisa impembelelo kaSathana ibe unenjongo ‘yokubasikelela ngoxolo abantu bakhe.’ (INdumiso 29:11) Ngaphezu koko, uye wenza eli dinga lifudumez’ intliziyo: “Ke bona abalulamileyo baya kulidla ilifa ilizwe, baziyolise ngobuninzi boxolo.”—INdumiso 37:11.
5. (a) UYehova wamsebenzisa njani uDaniyeli ukuba asinike inkcazelo engenjongo Yakhe yokuzisa uxolo? (b) Kutheni le nto sifanele sibe nenkxalabo ngesi siprofeto sabhalwa nguDaniyeli?
5 Kwiminyaka emininzi eyadlulayo, uYehova wathetha ngokuvela okungokwembali kweziganeko ezaziya kukhokelela ekuziseni kwakhe uxolo kulo mhlaba. Ngesithunywa sezulu, wathetha nomprofeti wakhe othembekileyo uDaniyeli ngethuba ‘lasekupheleni kwemihla,’ elilixesha lethu. (Daniyeli 10:14) Waluxela kwangaphambili ukruthakruthwano lwanamhla lwamagunya amakhulu waza wabonisa ukuba luya kuphela ngokukhawuleza ngendlela angayicingelanga omabini la magunya. Ibe wathembisa ukuba oku kubonakala kweziganeko kungalindelekanga kwakuya kukhokelela kuxolo lokwenene. Esi siprofeto sibaluleke kunene kumaKristu. Sinikela imbono ecacileyo ngento yokuba sinxayiphi kumsinga wexesha ibe someleza uzimiselo lwethu lokuhlala singathabathi cala kukruthakruthwano lwezizwe ngezizwe ngoxa silindele ngomonde kuThixo ukuba asihlangule.—INdumiso 146:3, 5.
Ukruthakruthwano Luyaqalisa
6. Chaza izibakala ezingokwembali zokruthakruthwano lwamagunya amakhulu anamhla.
6 Inyaniso ikukuba, ukruthakruthwano lwanamhla lwamagunya amakhulu asinto intsha ukubonakala ehlabathini. Kunoko, lukukuqhubeka kwento eyaqalisa kude kudala. Emva kokuwa kobukhosi behlabathi bukaAlexander Omkhulu ngasekupheleni kwenkulungwane yesine Ngaphambi kweXesha Eliqhelekileyo, iinkokeli zakhe ezimbini zomkhosi zathi zalawula kwa-Aram naseYiputa. Ukruthakruthwano olungenasiphelo olwathi ekugqibeleni lwakhokelela kusukuzwano lwamagunya amakhulu anamhlanje lwaqhambuka phakathi kwazo naphakathi kwamalandela azo—ekwabhekiselwa kuzo njengokumkani wasentla nokumkani wasezantsi ngenxa yokuba zazimi kumntla nomzantsi welizwe labantu bakaThixo. Ukuvela kolu kruthakruthwano embalini kwatyhileIwa umprofeti uDaniyeli kusetyenziswa isithunywa sezulu.
7. (a) Sazi njani ukuba kukho izidalwa ezingabonakaliyo zokomoya kwimicimbi yabantu? (b) Ekuqaleni, yayingubani ukumkani wasentla nokumkani wasezantsi, ibe ukruthakruthwano lwabo lwaqalisa njani?
7 Isithunywa sezulu okokuqala sichaza indlela esathi, ngokuxhaswa nguMikayeli, salwa ‘nomthetheli’ ongumoya wasePersi nowakwaYavan. (Daniyeli 10:13, 20-11:1) La mavandlakanya angommandla womoya aqinisekisa into yokuba iimbambano zobuhlanga zibandakanya okungakumbi kunabantu nje. Kukho imikhosi yeedemon, okanye “abathetheli,” eqhuba abalawuli ababonakalayo abangabantu. Kodwa ukususela kumaxesha amandulo, abantu bakaThixo babenaye “umthetheli,” uMikayeli, wokubomeleza nxamnye nala magunya eedemon. (Efese 6:12) Sandula ke isithunywa sezulu siphethulele ingqalelo yethu kukruthakruthwano oluphakathi kwama-Aram neYiputa. Siqalisa ngokuthi: “Ke uya komelela ukumkani wasezantsi; omnye kubathetheli bakhe.” (Daniyeli 11:5a) Lo kumkani wasezantsi apha yayinguPtolemy I, umlawuli waseYiputa, owathimba iYerusalem malunga nowama-312 B.C.E. Ngokulandelayo isithunywa sezulu sibhekisela komnye ukumkani owayeya kuthi “omelele ngaphezu kwakhe, alawule; lube lulawulo olukhulu ulawulo lwakhe.” (Daniyeli 11:5b) Lo ngukumkani wasentla owayenguSeleucus I Nicator, obukumkani bakhe, bakwa-Aram, bathi bomelela kunobaseYiputa.
8. Ukuchana okuphawulekayo kwenxalenye yokuqala yesiprofeto sesithunywa sezulu esingokumkani wasentla nokumkani wasezantsi kuthetha ntoni kumaKristu namhlanje?
8 Isithunywa sezulu sihlabela mgama sixela kwangaphambili iinkcukacha ezininzi zokruthakruthwano oluqhubekayo phakathi kwaba balawuli bangamalandela bakwaAram nabaseYiputa. (Daniyeli 11:6-19) Ezi ziprofeto zazichane gqitha kangangokuba bambi banoluvo lokuba incwadi kaDaniyeli imele ukuba yabhalwa emva kokuba zizalisekile.a Noko ke, kumaKristu, ukuchana okuphawulekayo kwezi ziprofeto komeleza ukholo lwawo kwezo nxalenye zesiprofeto ziseza kuzaliseka “ekupheleni kwemihla.”
UMthetheli Womnqophiso
9. Inyathelo lokumkani wasentla lakhokelela njani ekubeni uYesu azalelwe eBhetelehem?
9 Asinakulindela ukuba isithunywa sezulu sibe besingathetha ngomlawuli ngamnye ukususela kuPtolemy ukuhla ukuza kutsho “ekupheleni kwemihla.” Kunoko, siyaqonda ukuba emva kwendinyana 19 isiprofeto sithi tsi siye kutsho kwiminyaka eyayiza kwandulela kanye iXesha lethu Eliqhelekileyo, xa sifunda oku: “Endaweni yakhe [yokumkani wasentla] kuya kusuka kume ocandisa abaqhubi babantu ebungangamsheni bobukumkani.” (Daniyeli 11:20) Ngeli thuba, elakwa-Aram liliphondo laseRoma, ibe ukumkani wasentla umelwa ngumlawuli waseRoma uAwugusto. Nguye owayalela ubhaliso lwabantu olwathi lwaphumela ekubeni uYesu azalelwe eBhetelehem kunokuba azalelwe eNazarete.—Luka 2:1-7; Mika 5:2.
10 Emva kuka-Awugusto yaba nguTibheriyo, indoda ecekisekileyo neyachazwa sisithunywa sezulu ‘njengalowo udelekileyo.’ (Daniyeli 11:21) Ebudeni bolawulo lwakhe, kwathintelwa imvukelo eyingozi eyayikumda osemantla woBukhosi baseRoma yaza yaxoliswa kwalapho emdeni, nto leyo eyayizalisekisa amazwi esiprofeto athi: “lingalo ezikhukulayo ziya kukhukuliswa, zimke ebusweni bakhe, zaphulwe.” Ngaphezu koko, ebudeni bolawulo lwakhe uYesu wabulawa ngamajoni aseRoma nto leyo eyayizalisekisa isiprofeto sesithunywa sezulu sokuba ‘inganga yomnqophiso’ yayiza kwaphulwa.—Daniyeli 11:22; 9:27.
“Ngexesha Elimisiweyo”
11. (a) Ngowe-1914, wafaniswa njani ukumkani wasentla nokumkani wasezantsi? (b) Sisiphi isiprofeto esazaliseka “ngexesha elimisiweyo”?
11 Ekugqibeleni, isiprofeto sisizisa ‘kwixesha elimisiweyo,’ ngowe-1914. (Daniyeli 11:27; Luka 21:24) Ngeli thuba, bekukho inguquko ethile kwindlela yokufanisa abantu bakaThixo. Ekubeni uSirayeli wokwenyama wamchasayo uMesiya, abantu abanyulwe nguYehova bathe baba nguSirayeli wokomoya, ibandla lamaKristu athanjisiweyo. (1 Petros 2:9, 10) Indlela yokufanisa ookumkani ababini nayo iguqukile. IBritani, kunye neqabane layo kwezobupolitika eliyiUnited States of America, ithe yaba ngukumkani wasezantsi, ngoxa ngoku ukumkani wasentla iyiJamani. IMfazwe Yehlabathi I yaxelwa kwangaphambili ngala mazwi: “Ngexesha elimisiweyo [ukumkani wasentla] uya kubuya aye ngasezantsi; ekupheleni kungabi njengoko bekunjalo ekuqaleni.” (Daniyeli 11:29) Ukumkani wasezantsi wayiphumelela loo mfazwe. Ngaloo ndlela imeko yayahlukile koko kwakunjalo “ekuqaleni,” oko kukuthi, xa iRoma eyoyisayo yayingukumkani wasentla.
12. Chaza iimbalasane zeziganeko zehlabathi ukususela kowe-1914 ezazixelwe kwangaphambili kumazwi esiprofeto esithunywa sezulu esawathetha kuDaniyeli.
12 Isithunywa sezulu sihlabela mgama sibalisa ngokhuphiswano oluphakathi kwaba kumkani babini ukususela kowe-1914 yaye ngokungakumbi, sibalisa ngendlela ababeya kuthi bobabini bachase abantu bakaYehova. Sikwaprofeta ngokubonakala ‘kwesikizi lesiphanziso,’ elo namhlanje liyintlangano yeZizwe Ezimanyeneyo. (Daniyeli 11:31) Ukumiselwa kweZizwe Ezimanyeneyo kwakulilinge lezobupolitika abathi kulo aba kumkani babini basebenzisana ukuze bazise uxolo. Kodwa zigwetyelwe ukusilela ngenxa yokuba zichasene noBukumkani bukaThixo.b (Mateyu 24:15; ISityhilelo 17:3, 8) Ekugqibeleni, isithunywa sezulu salathisela ingqalelo yethu ‘kwixesha lokuphela.’—Daniyeli 11:40.
“Ixesha Lokuphela”
13. (a) Ibinzana elithi “ixesha lokuphela” libhekisela entwenini kule nxalenye yesiprofeto? (b) Ngoobani abaye bafeza indima yokumkani wasentla nokumkani wasezantsi ukususela ekupheleni kwemfazwe yehlabathi yesibini?
13 Liliphi eli xesha? Maxa wambi ibinzana elithi “ixesha lokuphela” libhekisela kwixesha lokuphela kwale nkqubo yezinto, ukususela kowe-1914 ukusa kwiArmagedon. (Daniyeli 8:17, 19; 12:4) Kodwa iziganeko ezenzeka kunyaka we-1914, “ixesha elimisiweyo,” zazixelwe kwangaphambili emva phaya kwindinyana 29, ibe isiprofeto sesithunywa sezulu siye sasidlulisela ngaphaya koko.c Ngenxa yoko, “ixesha lokuphela” apha kwindinyana 40 limele libhekisele kumanqanaba okugqibela osukuzwano obelukho kangangeminyaka engama-2 300 phakathi kokumkani wasentla nokumkani wasezantsi. Ngoko, siyaqhubeka sifunda ngomdla omkhulu, ekubeni ngoku sifunda ngeziganeko eziza kwenzeka kungekudala. Sithetha nje, ukuguquguquka kolawulo kwiziganeko zehlabathi kuye kwakhokelela ekuveleni kwezinto ezingakumbi kwindlela yokufanisa aba kumkani babini. Ukususela ekuweni kwamagunya obuNazi nobuFasi ekupheleni kweMfazwe Yehlabathi II, siye sangamangqina okuzibonela ukruthakruthwano obelukho phakathi kwamagunya amabini amakhulu, elinye elimelwa ngukumkani wasentla, olawula ikakhulu icandelo lamazwe obusoshiyali, nelinye elimelwa ngukumkani wasezantsi, olawula ubukhulu becala icandelo lamazwe obukhapitali.
14. Isithunywa sezulu simchaza njani ukumkani wasentla?
14 Isimo soyena kumkani wamva wasentla sichazwe kakuhle Dan 11 kwindinyana 37, 38: “Akayi kubaqonda oothixo booyise . . . Endaweni yabo wozukisa uthixo weenqaba, uthixo ababengamazi ooyise; amzukise ngegolide, nangesilivere, nangamatye anqabileyo, nangezinto ezinqwenelekayo.” Ngaba kukho nabani na ongenakuyiqonda le ngcaciso? Ukumkani wanamhla wasentla ukukhuthaza ngokusemthethweni ukungakholelwa kuThixo, ubachasile oothixo bonqulo ababekhonzwa ngookumkani basentla bangaphambili. Ukhetha ukuthembela ngezixhobo, “uthixo weenqaba.” Oko kuye kwafak’ isandla kukhuphiswano lwezixhobo olunempambano abamelwe babekw’ ityala ngalo bobabini aba kumkani. Inkcitho yaminyaka le yelinge lokuzikhusela eyenziwa ngukumkani wasentla eyedwa yafikelela phantse kuma-600 000 ezigidi zeerandi ngowe-1985. Onjani wona ukuba mkhulu umnikelo ‘wegolide, wesilivere, wamatye anqabileyo nowezinto ezinqwenelekayo’ othe wanikelwa kuthixo wezixhobo ongasoze aneliseke!
15, 16. (a) Kuya kwenzeka ntoni phakathi kokumkani wasentla nokumkani wasezantsi? (b) Oku kuya kuthetha ntoni kubantu bakaThixo?
15 Ngoko, ekugqibeleni yintoni ethi yenzeke phakathi kwaba kumkani babini? Isithunywa sezulu sithi: “Ngexesha lokuphela [ixesha lokuphela kwembali yaba kumkani babini] uya kuhlabana nokumkani wasezantsi; ukumkani wasentla adlongozele aye kuye, eneenqwelo zokulwa, nabamahashe, neenqanawa ezininzi.” (Daniyeli 11:40; Mateyu 24:3) Ngokucacileyo, iinkomfa zala mazwe ezizezona ziphambili azinikeli sicombululo kukruthakruthwano lwamagunya amakhulu. Ixhala elibangelwe ‘kukuhlaba’ kokumkani wasezantsi nokukhula kokumkani wasentla lisengamana lisiba qatha lize lithomalale; kodwa ekugqibeleni, ngandlel’ ithile, ukumkani wasentla uya kuxhokonxelwa ekubeni athabathe inyathelo logonyamelo oluqatha olwachazwa nguDaniyeli.d
16 Le mihla yokugqibela inzima ngokukhethekileyo kubantu bakaThixo, abo ebudeni bale nkulungwane baye batshutshiswa ngabo bobabini aba kumkani. Isithunywa sezulu salumkisa ngelokuba ukumkani wasentla uya kuthi ‘angene ezweni eliligugu, bakhubeke abaninzi.’ ‘Ilizwe eliligugu’ lilizwe lokomfuziselo labantu bakaThixo. Ngoko, amazwi esithunywa sezulu amele athethe ukuba ekoyiseni kwakhe iintlanga ezininzi, ukumkani wasentla uya kuhlasela imekobume yokomoya yabantu bakaYehova. (Daniyeli 8:9; 11:41-44; Hezekile 20:6) Kwindinyana 45, esi siprofeto songezelela oku: “Wozitwabulula iintente zebhotwe lakhe phakathi kweelwandle, ngasentabeni engcwele eligugu.” Ngamanye amazwi, ulungiselela ukuyihlasela okokugqibela iparadisi yabo yokomoya.
“Afike Ke Ekupheleni Kwakhe”
17. Yintoni le iya kuvela ngokungalindelekanga eya kuthi ixhokonxe ukumkani wasentla?
17 Kodwa ngelo xesha kuya kube sele kwenzeke into ukumkani wasentla okanye ukumkani wasezantsi angakhange ayibone kwangaphambili. Naku okuprofetwa sisithunywa sezulu: “Ziya kumkhwankqisa [ukumkani wasentla] iindaba ezivela empumalanga nasentla, aphume enobushushu obukhulu, ukuze abatshabalalise, abasingele phantsi abaninzi.”—Daniyeli 11:44.
18. (a) Ziya kuvela phi “iindaba” ezaxelwa kwangaphambili sisithunywa sezulu? (b) Ekugqibeleni uya kuphelela phi ukumkani wasentla?
18 Ziya kube zisithini ezi ndaba? Isithunywa sezulu asizichazi, kodwa siyachaza ukuba zobe zivela phi. Zivela “empumalanga,” yaye uYehova uThixo noYesu Kristu kubhekiselwa kubo ‘njengookumkani abavela empumalanga.’ (ISityhilelo 16:12) Ezi ndaba zikwavela “nasentla,” ibe iBhayibhile ithetha ngokufuziselayo ngeNtaba yaseZiyon, umzi woKumkani ozukileyo uYehova, njengalowo ‘ukwintlomo yasentla.’ (INdumiso 48:2) Ngenxa yoko, ‘ziindaba’ ezivela kuYehova uThixo noYesu Kristu ezibangela ukuba ukumkani wasentla ahlasele kakhulu okokugqibela. Kodwa ekugqibeleni uya kutshabalala. Apho kuphela khona indinyana 45 sixelelwa oku: “Afike ke ekupheleni kwakhe, kungabikho umncedayo.”
19. (a) lya kuba yintoni imiphumo eyahlukeneyo yeli hlabathi neyabo “bathe tye”? (b) Yiyiphi imibuzo eseleyo ekufuneka iphendulwe?
19 Eneneni, akuyi kubakho ‘luxolo kwabangendawo.’ (Isaya 57:21) Kunoko, imbali yokumkani wasentla iya kuphawuleka ngemfazwe kude kube sekupheleni. Kodwa uYehova ubathembisa oku abakhonzi Bakhe abathembekileyo: “Ngokuba abathe tye baya kulima ilizwe, basale kulo abagqibeleleyo, banqunyulwe ezweni abangendawo, abanginizayo bancothulwe kulo.” (IMizekeliso 2:21, 22) Noko ke, kuya kwenzeka ntoni kukumkani wasezantsi xa ukumkani wasentla ‘efika ekupheleni kwakhe’? Kuya kwenzeka ntoni kumaKristu xa ukumkani wasentla ‘ezitwabulula iintente zebhotwe lakhe’ ngendlela yokubasongela? (Daniyeli 11:45) Luya kufika njani uxolo ekugqibeleni kulo mhlaba? Ngesithunywa sakhe sezulu, uYehova uye wayiphendula le mibuzo, njengokuba siza kubona kumanqaku alandelayo.
[Imibhalo esemazantsi]
a Ukuze ufumane iinkcukacha ezingakumbi, bona incwadi ethi “Mayenziwe Intando Yakho Emhlabeni” isahluko 10, eyapapashwa ngowe-1965, yiWatchtower Bible and Tract Society of New York, Inc.
b Ukuze ufumane inkcazelo engakumbi ngeli candelo lesiprofeto, bona incwadi ethi “Mayenziwe Intando Yakho Emhlabeni,” isahluko 11.
c Phawula nokuba, kwindinyana 35 “ixesha lokuphela” kuthiwa liseza kuba kwixesha elizayo.
d Bona incwadi ethi “Mayenziwe Intando Yakho Emhlabeni,” iphepha 292-297.
Ngaba Unokucacisa?
◻ Ziziphi izidalwa zokomoya eziye zabandakanyeka kwimicimbi yezobupolitika yabantu?
◻ Yayingubani ukumkani wasentla nokumkani wasezantsi ngowe-1914?
◻ Ukumkani wasentla wanamhla umnqula njani uthixo weenqaba?
◻ Yiyiphi ingcinezelo eya kuziswa ngukumkani wasentla kubantu bakaThixo?
◻ Ekugqibeleni kuya kwenzeka ntoni kukumkani wasentla?
10. Yintoni enye adibene ngayo ukumkani wasentla noMesiya esathi isithunywa sezulu sasixelela ngayo?
[Imaphu/Imifanekiso ekwiphepha 12]
(Ukuze ufumane inkcazelo epheleleyo, jonga encwadini)
Ulwandle Olukhulu
Elakwa-Aram
ElakwaYuda
IYiputa
[Inkcazelo Ngomfanekiso okwiphepha 10]
U.S National Archives