Ngaba Uya Kuthi, “Ndikho, Thuma Mna”?
“INkosi, [yathi], Ndothuma bani na? Ngubani na owosiyela? Ndathi, Ndikho, thuma mna.”—ISAYA 6:8.
1, 2. Sisiphi isizathu esikhethekileyo sokonwaba esasinaso esinye isibini?
ASIKUKO nokuba siyavuya ukunithumelela ileta yokusamkela kwethu isicelo sokuya eColombia. Siye salinandipha ilungelo lethu lokukhonza apha e-Ecuador ngakumbi lee kunokuba lo matshini wokuchwetheza unokukuchaza oko.” Yatshayelela ngelitshoyo ileta eyayivela kumaNgqina kaYehova amabini awathi aya e-Ecuador apho kwakusakhiwa isebe elitsha leofisi leWatch Tower Society.
2 Aba balungiseleli baya e-Ecuador ukuze benze okungakumbi kunokunceda esakhiweni; baba kwanokunceda njengabafundisi abangamaKristu. Babhala oku: “Siye safumanisa ukuba inkonzo yasentsimini iyenye yezona zinto zibalulekileyo. Kwiiveki nje ezintathu ezidlulileyo, sahamba singabantu abasibhozo saya emarikeni ethengisela phandle saza sahambisa iincwadi ezingama-73 namaphephancwadi angaphezu kwama-40. Kwiveki engaphambili, sasiqalise izifundo zeBhayibhile ezibini. Sinokuyibona ngokwenene imfuneko yesebe elitsha. Mna nomfazi wam sithanda ukudlulisela umbulelo wethu ngeli lungelo lokuqhubeka ngale ndlela ikhethekileyo yenkonzo yexesha elizeleyo” ngoku eColombia.
3. Abaninzi baye basibonakalisa njani isimo sengqondo esifanayo neso sabonakaliswa nguIsaya?
3 Esi sibini, nabanye abangamakhulukhulu abaye bazinikela ukuba bathunyelwe kwelinye ilizwe, babonakalisa isimo sengqondo esifanayo nesomprofeti uIsaya. Xa weva uYehova esithi: “Ndothuma bani na? Ngubani na owosiyela?” UIsaya waphendula wathi: “Ndikho, thuma mna.” Waza uThixo wamyalela esithi: “Yiya, uthi kubo aba bantu, Yivani, ukuva oku niya kuva, ningaqondi.” (Isaya 6:8, 9) UIsaya wayezinikela ukuba athunywe ntoni, yaye oku kwaphumela entwenini? Ibe yintoni thina esinokuyifunda kwindlela le ngxelo esebenza ngayo namhlanje nakwindlela enokusinceda ngayo thina ngokobuqu?
Uthumo LukaIsaya Lokuya Kushumayela
4, 5. (a) Yiyiphi imeko eyayibalasele xa uIsaya waboniswa umbono ochazwe kwisahluko 6? (b) UIsaya wabona ntoni kulo mbono?
4 Kwakungomnyaka wokufa kukaKumkani u-Uziya awathi uYehova uThixo wabuza uIsaya esithi, “Ndothuma bani na?” (Isaya 6:1) Oko kwakungowama-777 B.C.E., okanye malunga nekhulu elinamashumi asixhenxe anesihlanu eminyaka ngaphambi kokuba amaBhabhiloni ayitshabalalise iYerusalem aze aliphanzise ilizwe lakwaYuda. UYehova wayesibona eso siganeko silusizi sisiza, ibe wathuma uIsaya ukuba abhengeze isigidimi ngaso. Yintoni esinokuyifunda kuthumo lwakhe lokuya kushumayela?
5 Kumele ukuba uIsaya wachukunyiswa ngokunzulu yindlela awalufumana ngayo uthumo lwakhe, njengoko bekuya kuba njalo nakuthi. Wabhala oku: “Ndayibona iNkosi ihleli etroneni ende enyukileyo; amasondo eengubo zayo ezirholayo azalisa itempile. Kumi iiserafi ngaphezu kwayo, iyileyo inamaphiko amathandathu, ngamabini ifihle ubuso bayo, ngamabini ifihle iinyawo zayo, ngamabini iphaphazela. Iyileyo idanduluke kuleyo isithi. Uyingcwele, uyingcwele, uyingcwele uYehova wemikhosi; buzalise ihlabathi lonke ubuqaqawuli bakhe.”—Isaya 6:1-3.
6. Kutheni kwakulilungelo nje kuIsaya ukubona oko wakubonayo?
6 UIsaya wayesazi ukuba u-Uziya waba neqhenqa xa wathi ngokuzikhukhumalisa wangena kwiNgcwele yetempile ukuze aqhumisele khona, nakubeni wayengenguye owesizwe sababingeleli. Ngoko, elinjani lona ilungelo awaba nalo uIsaya ukubona ubukho bukaThixo! UIsaya, owayengumntu ongafezekanga, akazange ambone ngokoqobo uYehova, kodwa wavunyelwa ukuba ambone embonweni. (Eksodus 33:20-23) Ukuzuka kwalo mbono kwabalaseliswa zizithunywa zezulu ezikudidi oluphezulu (iiserafi) ezazingasetroneni kaYehova. Zathi ngokuzithoba zabufihla ‘ubuso’ bazo, zibona ukuba ngcwele kukaThixo. Ukongezelela kwesi senzo sokuzithoba, zathi zabubhengeza ngamandla ubungcwele kukaThixo. Ucinga ukuba oku xa kukonke kwakunokuba nawuphi umphumo emntwini?
7. Wathini ulsaya, yaye kutheni le nto ngesasivakalelwe ngaloo ndlela nje nathi?
7 Masiyekele kuIsaya aphendule. “Ndathi, Athi ke mna! Ngokuba ndithe shwaka, ngokuba ndiyindoda emlomo uyinqambi; ndihleli phakathi kwabantu abamilomo iyinqambi; ngokuba emehlo am abone ukumkani, uYehova wemikhosi.” (Isaya 6:5) UIsaya wayesazi ukuba wayengumlomo kaThixo, ukanti lo mbono wamshukumisela ukuba azibone ukuba wayeyinqambi, engenamilebe icocekileyo ebiya kufanelekela isithethi salo Kumkani uzukileyo nongcwele. Kwanabanye bethu, basenokuba maxa wambi bakhe bashukunyiswe kukuba nezono kwabo, beziva bengakufanelekelanga ukusondela kuThixo ngomthandazo, kungasathethwa ke ngokubizwa ngegama lakhe. Ngoko, amava kaIsaya ahlabela mgama afanele abe lukhuthazo.
8. Nguwuphi umsebenzi owaphunyezwa sisithunywa sezulu, kwaza kwenzeka ntoni?
8 Enye yeeserafi ezazikuloo mbono yaphaphazela yeza kuye iphethe ilahle elivuthayo elithabathe esibingelelweni sokunyusa amadini ezilwanyana. Sibeka eli lahle emlonyeni kaIsaya esi sithunywa sezulu sathi: “Yabona, eli lahle lifikile nje emlonyeni wakho, bususiwe ubugwenxa bakho, nesono sakho sicanyagushelwe.” (Isaya 6:6, 7) Ngemihla kaSolomon, umlilo ovela ezulwini wawungqina ukuba uYehova wayelamkele idini lesibingelelo, nakubeni amadini ayengenakubenza ukuba bacoceke ngokupheleleyo nkqu ababingeleli phambi koThixo. (2 Kronike 7:1-3; Hebhere 10:1-4, 11) Sekunjalo, xa ubunqambi bukaIsaya bapheliswayo ngeli lahle livuthayo, wayenokuyamkela imbono kaYehova yokuba ubungendawo bakhe babuxolelwe ukusa kumlinganiselo ofunekayo ukuze afumane uthumo olukhethekileyo lokuya kushumayela. Oku kubonisa siphi isenzo esibuprofeti nesinomtsalane ngokuphathelele ikamva?
9. Yayiyintoni intsingiselo yesigidimi sikaIsaya?
9 La mava akhwankqisayo athi akhokelela ekubeni lo mprofeti afumane uthumo olwakhankanywayo lokuya kushumayela. (Isaya 6:8, 9) Kodwa kutheni kwafuneka ukuba uIsaya athi abantu babeya kuva ngokuphindaphindiweyo kodwa sekunjalo bangaqiqi? ILizwi likaThixo longezelela lisithi: “Yityebise intliziyo yaba bantu, neendlebe zabo zenze zithi nkqi, namehlo abo uwavingce; hleze babone . . . babuye, baze baphiliswe.” (Isaya 6:10) Ngaba oko kuthetha ukuba uIsaya, wayefanele athi ngokungakhathali okanye ngokungasebenzisi buchule, awahlab’ amadlala amaYuda ukuze ahlale eziintshaba zikaYehova? Akunjalo. Oku kwakubonisa nje indlela inkoliso yamaYuda eyayiya kusabela ngayo kungakhathaliseki ukuba uIsaya wayeya kuwuzalisekisa ngokuthembeka nangokucokiseke kangakanani na umsebenzi wokushumayela awazinikela ukuba awenze ngokuthi, “Ndikho, thuma mna.”
10. (a) Ngubani owayenetyala ngokungaboni nokungeva kwabantu ababengathi baziimfama nezithulu? (b) Wayethetha ukuthini uIsaya ngokubuza athi, “Kube mzuzu ungakanani na?”
10 Yayingabantu ababenetyala. Phezu kwako nje ukubanika kukaIsaya ithuba ‘lokuva’ kaninzininzi, babengayi kulwamkela olu lwazi okanye baqonde. UThixo wabonisa kwangaphambili ukuba inkoliso, ngenxa yesimo sayo sengqondo sobuntamo-lukhuni nokungazixabisi izinto zokomoya, yayingayi kusabela. Kwakusenokusabela nje iqaqobana labantu. Kodwa abaninzi babeya kuba ziimfama ngokungathi amehlo abo ayevingcwe ngesona sinamathelisi sinamandla, ukuba unokuba nombono waloo nto. Le meko ilusizi yayiza kuqhubeka de kube nini? Kunokuba abuze ukuba mingaphi na iminyaka awayeza kuyikhonza, uIsaya wabuza oko ngala mazwi: “Kube mzuzu ungakanani na, Nkosi?” Ngaloo ndlela uThixo waphendula esithi: “Kude kuye kuchithwa imizi, ingabi nabemi.” Kwenzeka kanye ngolo hlobo, nangona kwaba semva kokufa kukaIsaya. AmaBhabhiloni abathimba abantu, elishiya elakwaYuda ‘lisenkangala.’—Isaya 6:11, 12; 2 Kumkani 25:1-26.
11. Yayithuthuzela njani intshumayelo kaIsaya?
11 Noko ke, ekugqibeleni uYehova wamqinisekisa uIsaya ukuba kwakungayi kuphela themba layo yonke into. ‘Kwakusaya kubakho isahlulo seshumi’ kweli lizwe. Ewe, lalifana ‘nomoki, othi ekuwisweni kwawo kushiyeke isiphunzi, esiyimbewu engcwele.’ (Isaya 6:13) Emva kweminyaka engama-70 yokuthinjelwa eBhabhiloni, le mbewu, okanye intsalela, yabuyela elizweni layo, ngokungathi lihlumelo elitsha elintshula esiphunzini somoki. (2 Kronike 36:22, 23; Ezra 1:1-4; thelekisa uYobhi 14:7-9; Daniyeli 4:10, 13-15, 26.) Ngenxa yeso sizathu, nangona isigidimi sikaIsaya sasisesentlekele, sasinamazwi athuthuzelayo. Noko ke, sinesizathu esingokweZibhalo sokumgqala uIsaya njengalowo wayefuzisela iziganeko ezaziza kwenzeka. Sitsho ngoba kutheni?
Iinzaliseko Ezinkulu
12. Sisiphi isizathu esingokweZibhalo zokubiza uYesu njengoIsaya Omkhulu?
12 Iinkulungwane ezininzi emva kokufa kukaIsaya, kwafika mntu uthile esinokumbiza ngokuba nguIsaya Omkhulu—uYesu Kristu. Ngaphambi kokuba abe ngumntu, wazinikela ngokuzithandela ukuba athunyelwe nguYise emhlabeni, apho wayeza kuthi ekushumayeleni kwakhe aquke izinto ezabhalwa nguIsaya. (IMizekeliso 8:30, 31; Yohane 3:17, 34; 5:36-38; 7:28; 8:42; Luka 4:16-19; Isaya 61:1) Ngokungqale ngakumbi, uYesu wazimanyanisa noIsaya isahluko 6 xa wayechaza isizathu sokuba afundise ngohlobo awenza ngalo. (Mateyu 13:10-15; Marko 4:10-12; Luka 8:9, 10) Oko kwakufanelekile, kuba inkoliso yamaYuda awamvayo uYesu yayingakulungele ukwamkela isigidimi sakhe nokwenza ngokuvisisana naso kanye njengokuba kwakunjalo ngalawo athi eva umprofeti uIsaya aza akasamkela isigidimi sakhe. (Yohane 12:36-43) Kwakhona, ngowama-70 C.E. amaYuda awazenza ‘iimfama nezithulu’ kwisigidimi sikaYesu afumana intshabalalo efana naleyo yowama-607 B.C.E. Ukuzaliseka koku ngenkulungwane yokuqala eYerusalem kwaba yimbandezelo ‘ekungazanga kubekho injalo kwasekuqalekeni kwehlabathi nekungasayi kubuye kubekho injalo.’ (Mateyu 24:21) Kanti, njengokuba uIsaya waprofetayo, intsalela, okanye ‘imbewu engcwele,’ yabonakalisa ukholo. Yenziwa uhlanga lokomoya, ‘amaSirayeli kaThixo’ athanjisiweyo.—Galati 6:16.
13. Kutheni sikwanokulindela enye inzaliseko kaIsaya 6?
13 Oku kusikhokelela kwenye inzaliseko esekelwe eBhayibhileni kaIsaya isahluko 6. Njengesikhokelo sokuqonda oku, qwalasela amazwi ompostile uPawulos awawabhala malunga nonyaka wama-60 C.E. Wachaza isizathu sokuba amaYuda amaninzi awamva eshumayela eRoma ayengazange akwamkele ‘ukuwaqononondisa kwakhe ngoBukumkani bukaThixo.’ Isizathu sasikukuba amazwi akuIsaya 6:9, lo ayezaliseka kwakhona. (IZenzo 28:17-27) Ngaba oku kuthetha ukuba emva kokuba uYesu ebushiyile ubomi basemhlabeni, abafundi bakhe abathanjisiweyo babeza kuphumeza uthumo olufana nolukalsaya? Eneneni, babeya kwenjenjalo!
14. Abafundi bakaYesu babeza kuwenza njani umsebenzi ofana nokalsaya?
14 Ngaphambi kokuba uIsaya Omkhulu anyukele ezulwini, wathi abafundi bakhe babeya kwamkela umoya oyingcwele baze emva koko ‘babe ngamangqina akhe eYerusalem, kwanakulo lonke elakwaYuda nelaseSamariya, kude kuse nasekupheleni komhlaba.’ (IZenzo 1:8) Kanye njengokuba isibingelelo samadini sanikela oko kwakufuneka ukuze isiphoso sikaIsaya sishenxiswe, ngoko idini likaYesu lalisisizinzi ‘sokucanyagushelwa kwesono’ sabafundi bakhe. (Levitikus 6:12, 13; Hebhere 10:5-10; 13:10-15) Ngaloo ndlela, uThixo wayenokubathambisa ngomoya oyingcwele, owawuza kubanika namandla okuba babe ‘ngamangqina kude kuse ekupheleni komhlaba.’ UIsaya umprofeti noIsaya Omkhulu bathunywa ukuya kubhengeza isigidimi sikaThixo. Ngokufanayo, abalandeli bakaYesu abathanjisiweyo ‘babethunywe nguThixo, bemanywe noKristu.’—2 Korinte 2:17, NW.
15. Kweli xesha lethu abantu ngokubanzi baye bakujonga njani ukushumayela okufana noko kukalsaya, nto leyo eyalatha kwikamva elinjani?
15 Kumaxesha esikuwo, ngokukodwa ukususela ekupheleni kweMfazwe Yehlabathi I, amaKristu athanjisiweyo aye ayibona indlela ekuyimfuneko ngayo ukubhengeza isigidimi sikaThixo. Oku kuquka inyaniso ethuthuzelayo yokuba ‘umhla wempindezelo yoThixo wethu’ ukufuphi. (Isaya 61:2) Intshabalalo yaloo mhla iya kuba yevuthululayo ingakumbi kwiNgqobhoko, ebizibabaza ukususela kwakudala njengabantu bakaThixo, njengokuba wenzayo uSirayeli wamandulo. Phezu kwawo nje amashumi eminyaka okushumayela ngokunyanisekileyo kwamaNgqina kaYehova, inkoliso yeNgqobhoko iye ‘yayityebisa intliziyo yayo, neendlebe zayo yazenza zathi nkqi, namehlo ayo yawavingca.’ Isiprofeto sikaIsaya sibonisa ukuba oku kuya kuqhubeka kunjalo “kude kuye kuchithwa imizi, ingabi nabemi, nezindlu zingabi namntu, utshabalale umhlaba kube senkangala.” Oku kuya kuphawula isiphelo sale nkqubo ingendawo yezinto.—Isaya 6:10-12.
“Thuma Mna”
16. Kutheni kunokuthiwa “isihlwele esikhulu” sinesabelo kumsebenzi ofana nalowo kalsaya?
16 Namhlanje, kukho izigidi zamaKristu azinikeleyo anethemba elingokweBhayibhile lokuphila ngonaphakade kwiparadisi esemhlabeni. Ngesizinzi segazi likaYesu lentlawulelo, esi ‘sihlwele sikhulu’ sinokuxolelwa izono zaso ukusa kumlinganiselo ofanelekileyo okwangoku. Sikwafumana amandla nenkxaso yomoya kaThixo njengoko simanyana nenani eliseleyo lamaKristu athanjisiweyo ekuthini, “Ndikho, thuma mna.” Sithunywa ukwenza ntoni? UPawulos wabonisa oku kumaRoma 10:13-15: “Bonke abasukuba belinqula igama leNkosi bosindiswa. Bothini na ke ukumnqula lowo bangakholwanga kuye? Bothini na ke ukukholwa kulowo bangamvanga? Bothini na ke ukuva, kungekho mshumayeli? Bothini na ke ukushumayela, bengathunywanga? Njengokuba kubhaliwe [kuIsaya 52:7] kwathiwa, Hayi, ukuba zintle kwazo iinyawo zabashumayela iindaba ezilungileyo zoxolo, zabashumayela iindaba ezilungileyo zezinto ezilungileyo!”—ISityhilelo 7:9-15.
17. Ngokufanayo nesiprofeto sikalsaya, simayela nantoni isigidimi sethu?
17 Khumbula ukuba uIsaya wathi, “Ndikho, thuma mna,” engekakwazi konke okwakubandakanyekile kwisigidimi sakhe. Ngokwahlukileyo koko, thina siyakwazi oko uThixo ngoku afuna kuvakaliswe ngabo basithobelayo isimemo sakhe esithi: “Ndothuma bani na? Ngubani na owosiyela?” Siquka isilumkiso sangaphambili ‘somhla wempindezelo yoThixo wethu.’ Kanti, esi sigidimi sikwaquka “iindaba ezilungileyo zezinto ezilungileyo.” Ngokomzekelo, abo ‘bathunyiweyo’ banesabelo ekubhengezeni ‘inkululeko kwabathinjiweyo, nokuvulwa kwamehlo kwabakhonkxiweyo.’ Ngaba ukwenza oko akufanele kube ngumthombo wolwaneliseko olukhulu?—Isaya 61:1, 2.
18, 19. Abaninzi batsho ngaziphi iindlela ezikhethekileyo ukuthi, “Thuma mna”?
18 Ukuba sele uzivakalisa kakade “iindaba ezilungileyo zezinto ezilungileyo,” le ngxubusho kaIsaya isahluko 6 isenokukushukumisela ekubeni ubuze oku: Ndinokusabela njani ngokupheleleyo koko kukhuthazwa nguIsaya 6:8? Njengesibini esikhankanywe ekuqaleni, amakhulukhulu aye aba nesabelo kwinkqubo Yabasebenzi Bezakhiwo Abangamatsha-ntliziyo Kumazwe Ngamazwe. Abanye abaninzi, abangengomagcisa okwakha, baye bafudukela kumazwe apho bafuneka gqitha khona abashumayeli boBukumkani. Oku kuba nempumelelo xa kuqalwe kwafunyanwa icebiso elivela kwiofisi yesebe le Watch Tower Society. Kambe ke, ukulungiselela kubalulekile, ukwenzela ulwimi, imilinganiselo yokuphila, amathemba okufumana umsebenzi wesingxungxo nezinye izinto ezisenokwahluka gqitha kwelinye ilizwe. Kanti ke musa ukunikezela kuba nje kusenokufuneka wenze uhlengahlengiso olukhulu. Abaninzi abanesimo sengqondo sokuba “Ndikho, thuma mna” baye baya kwezi ndawo baza basikelelwa ngokutyebileyo nguThixo ngokwenjenjalo.—Thelekisa IMizekeliso 24:27; Luka 14:28-30.
19 Kanti abanye—abazalwana noodade abangatshatanga, izibini ezitshatileyo, kwaneentsapho ziphela—baye bafudukela kwenye indawo kwakwilizwe okanye ummandla abakuwo apho bafuneka ngakumbi khona abashumayeli boBukumkani okanye abaveleli abangamaKristu. (IZenzo 16:9, 10) Ukwenza oku kusenokuba kwafuna ukuzincama, njengokufumana olunye uhlobo lomsebenzi wempangelo, mhlawumbi ohlawula kancinane. Bambi baye bayeka ngaphambi kwexesha ukusebenza badla imali yomhlala phantsi elinganiselweyo baza bafumana umsebenzi wesingxungxo khon’ ukuze babe nexesha elingakumbi lobulungiseleli. Hayi indlela ekukuhle ngayo xa zonke iintsapho zisithi, “Sikho, thuma thina.” Nako oku, kukwafanekisela imeko kalsaya. Umfazi wakhe waba nesabelo ngokukhutheleyo ekwenzeni ukuthanda kukaThixo njengomprofetikazi, noonyana bakhe babebandakanyekile kwizigidimi zeziprofeto.—Isaya 7:3, 14-17; 8:3, 4.
20. UnoIsaya 6:8 engqondweni, yintoni ofanele uyicinge?
20 Kwanokuba iimeko zakho zangoku azikuvumeli ukuba wenze ezo nguqulelo zizezona zibalulekileyo, usenokucinga, ‘Ngaba ndenza konke endinokukwenza, ndixelisa indlela awasabela ngayo uIsaya?’ Zibhokoxe ekuvakaliseni isigidimi sikaThixo, kwanaxa imozulu ingentle okanye xa abantu bekuthele nqa; ngokuqinisekileyo, uIsaya wenza okufanayo. Yiba nenzondelelo yokuthetha nabanye ‘ngeendaba ezilungileyo zezinto ezilungileyo!’ UYehova uthe, “Ndothuma bani na?” Zingqine ukuba, njengoIsaya wamandulo, usabela ngokuthi, “Ndikho, thuma mna” ukuya kuvakalisa isigidimi Sakhe.
Iingongoma Zempinda
◻ Kukweziphi iimeko awathi uIsaya waboniswa umbono Isa okwisahluko 6, yaye wabona ntoni?
◻ UIsaya wafumana uthumo olunjani?
◻ Kutheni kunokuthiwa uYesu unguIsaya Omkhulu, yaye abafundi bakhe babandakanyeke njani emsebenzini ofana nokalsaya?
◻ Unokusibonakalisa njani isimo sengqondo esifana nesikalsaya?
[Umfanekiso okwiphepha 17]
UIsaya wacocwa waza wathunywa ukuya kushumayela
[Umfanekiso okwiphepha 18]
Abaninzi baye bavuma, besithi, “Ndikho, thuma mna”