Ubomi Nobulungiseleli BukaYesu

Izonka Negwele

IZIHLWELE ziye zathontelana ukuya kuYesu eDekapoli. Abaninzi bavela kude beze kule ndawo imiwe ikakhulu ngabeeNtlanga ukuza kumphulaphula nokuze baphiliswe kubulwelwe babo. Baphethe iminyazi okanye iingobozi ezinkulu abadla ngokuzisebenzisa ukuze baphathe imiphako xa behamba kwimimandla yeeNtlanga.

Noko ke, ekugqibeleni uYesu ubiza abafundi bakhe aze athi: “Ndisikwa yimfesane ngenxa yesihiwele; ngokuba sekuntsuku ntathu behleli nam, bengenanto bangayidlayo; ukuba ndithe ndabandulula baya emakhayeni abo bengadlanga, botyhafa endleleni; kuba inxenye yabo ivela kude.”

“Wokuzuza phi na umntu ukuba nako ukubahluthisa aba ngezonka, entlango apha?” Babuza ngelitshoyo abafundi.

UYesu uyabuza: “Zingaphi na izonka eninazo?”

Baphendula ngelithi, “Zisixhenxe, neentlanzana ezimbalwa.”

Eyalela abantu ukuba bahlale phantsi, uYesu uthabatha izonka neentlanzi, athandaze kuThixo, aziqhekeze, aze andule azinike abafundi bakhe. Nabo, bazinika abantu, ibe bonke badla bahluthe. Emva koko, xa kuqokelelwa amaqhekeza aseleyo, kuzaliswa iingobozi ezisixhenxe, nakubeni kuye kwadla, amadoda amalunga nama-4 000 kuquka abafazi nabantwana!

UYesu uyazindulula izihlwele, ukhwela emkhombeni nabafundi bakhe, aze anqumle esinge kunxweme olungasentshona loLwandle lwaseGalili. Apha abaFarisi, ngesi sihlandlo bephelekwa ngamalungu ehlelo lonqulo lwabaSadusi, bazama ukulinga uYesu ngokumcela ukuba ababonise umqondiso ovela ezulwini.

Eyiqonda imigudu yabo yokumlinga, uYesu uyabaphendula: “Ngokuhlwa nithi, Liya kusa; kuba izulu limlilo ukuba bomvu. Kanjalo kusasa nithi, Namhla luqhwithela; kuba izulu limlilo ukuba bomvu, lisibekele. . . . nikwazi nje ukubucalula ubuso bezulu, ke yona imiqondiso yamaxesha aninako na ukuyicalula?”

Ngenxa yoko, uYesu ubabiza ngokuba bangabangendawo ibe bangabakrexezi yaye ubalumkisa ngelithi, njengoko ebexelele abaFarisi ngaphambili, akukho mqondiso baya kuwunikwa ingenguwo lowo kaYona. Enduluka apho, yena nabafundi bakhe bakhwela emkhombeni baze benjenjeya besinge eBhetesayida kumntla-mpuma wonxweme loLwandle lwaseGalili. Endleleni abafundi bafumanisa ukuba baye balibala ukuza nesonka, baphethe nje isonka esinye.

Ekhumbula okwenziwe kuye ngabaFarisi nabaSadusi abangabaxhasi bakaHerode, uYesu uyabalumkisa esithi: “Ligqaleni, nililumkele, igwele labaFarisi, negwele likaHerode.” Ekubeni abafundi bekholelwa ukuba uYesu uthetha ebhekisela ekulibaleni kwabo ukuza nesonka, ngokucacileyo igwele libakhumbuza ngesonka, ibe baqalisa ukuxokozela bethetha ngaso. Ephawula ukungaqondi kwabo, uYesu uthi; “Yini na ukuba nicamange, ngokuba ningenazonka?”

Kutshanje, uYesu uye walungiselela ngokungummangaliso amawaka abantu isonka, esenza lo mmangaliso wokugqibela mhlawumbi ngezolo okanye ngezolo elinye. Bafanele baqonde ukuba akaxhalatyiswanga kukungabikho kwezonka zokoqobo. Uyabakhumbuza, “Anikhumbuli na? Okuya ndaqhekezela amawaka amahlanu izonka ezihlanu, zaye zingaphi na izitya ezizele ngamaqhekeza enazisusayo?”

“Zazilishumi elinazibini,” baphendula ngelitshoyo.

“Okuya ke ezisixhenxe ndaziqhekezela amawaka amane, zazingaphi na iingobozi zizele ngamaqhekeza enazisusayo?”

“Zazisixhenxe,” baphendula ngelitshoyo.

UYesu uyababuza, “Phofu yini na ukuba ningaqondi? Yini na le nto ningaqiqiyo, ukuba bendingatsho ngasonka, ukuthi kuni, manililumkele igwele labaFarisi nabaSadusi?”

Ekugqibeleni abafundi bayayifumana ingongoma. Igwele, into ebilisayo ize ibangele isonka sinyuke, yayiligama elalidla ngokusetyenziswa ukuphawula ukonakala. Ngoko ngoku abafundi bayaqonda ukuba uYesu usebenzisa umzekeliso, ebalumkisa ukuba bayilumkele “imfundiso yabaFarisi nabaSadusi,” mfundiso leyo eyonakalisayo. Marko 8:1-21; Mateyu 15:32–16:12.

◆ Kutheni le nto aba bantu bephethe iminyazi emikhulu yomphako?

◆ Akuba uYesu endulukile eDekapoli, kuhambo lwakhe lomkhombe uya kuziphi iindawo?

◆ Yintoni le abafundi bangayiqondiyo ngokuphathelele amagqabaza kaYesu ngegwele?

◆ Wayesingisele enini uYesu ngokuthi “igwele labaFarisi nabaSadusi”?