“Intliziyo Yenu Mayingakhathazeki”

“Intliziyo yenu mayingakhathazeki; kholwani kuThixo, nikholwe nakum.”—YOHANE 14:1.

1. Kutheni amazwi kaYesu akuYohane 14:1 ayefike ngelona xesha lifanelekileyo?

KWAKUNGONISAN 14 ngomnyaka wama-33 C.E. Iqela elincinane lamadoda lalihlanganisene kwigumbi eliphezulu eYerusalem emva kokutshona kwelanga. Inkokeli yawo yayiwaluleka yaye iwakhuthaza kuba yayisele iza kuhamba. Ngokuyinxenye yathi: “Intliziyo yenu mayingakhathazeki.” (Yohane 14:1) Amazwi ayo ayefike ngelona xesha lifanelekileyo, kuba iziganeko ezilusizi zaziza kwenzeka kungekudala. Ngobo busuku yabanjwa, kwathethwa ityala layo, yaza yagwetyelwa ukuxhonywa.

2. Kutheni loo mini yayiyimini ebalulekileyo, yaye yintoni eyabancedayo abafundi?

² Unesizathu esilungileyo sokuyijonga loo mini njengeyona ibalulekileyo embalini, ichaphazela lonke ikamva loluntu. Ukufa okulidini kwale Nkokeli, uYesu, kwazalisekisa iziprofeto ezininzi zamandulo kwaza kwalungiselela isizinzi sobomi obungunaphakade kwabo banokholo kuye. (Isaya 53:5-7; Yohane 3:16) Kodwa abapostile, bematshekile yaye bemangalisiwe ziziganeko ezibuhlungu zobo busuku, bakha badideka baza banoloyiko okwethuba elithile. UPetros wade wamkhanyela uYesu. (Mateyu 26:69-75) Noko ke, emva kokuba abapostile abathembekileyo befumene umncedi owayethenjisiwe, umoya oyingcwele, babuya banenkalipho baza abakhathazeka. (Yohane 14:16, 17) Ngaloo ndlela, xa uPetros noYohane badibana nenkcaso enzima baza bavalelwa entolongweni, bathandaza kuThixo ukuba abancede balithethe ilizwi lakhe “ngako konke ukungafihlisi.” Umthandazo wabo waphendulwa.—IZenzo 4:1-3, 29-31.

3. Kutheni abantu abaninzi bekhathazeke ngokunzulu namhlanje?

³ Namhlanje, siphila kwihlabathi elikhathazeke ngokunzulu. Isiphelo sale nkqubo indala yezinto sisondela ngokukhawuleza. (2 Timoti 3:1-5) Izigidi ngezigidi zichatshazelwa ngokobuqu okanye zikhathazeke ngokunzulu ngenxa yokuwohloka okunzulu kobomi bentsapho nemilinganiselo emihle yokuziphatha, ukwanda okuxhomis’ amehlo kwezifo ezingaziwayo, ukungazinzi kwezobupolitika, ukungaqeshwa, ukunqongophala kokudla, ubugrogrisi nesisongelo semfazwe yenyukliya. Iintliziyo ezininzi zikhathazekile ngenxa yoloyiko olunxunguphalisayo ngekamva. Njengokuba uYesu waxelayo kwangaphambili, kukho ‘ukuxinezeleka kweentlanga ngoxa abantu besifa kukoyika nakukulindela izinto ezilizelayo elimiweyo.’—Luka 21:25, 26.

4. Ziziphi iimeko ezinokubangela ukuba amaKristu eve ubunzima boxinezeleko?

⁴ KwanamaKristu anokuchatshazelwa ngokunzulu ziimeko ezidandathekisa ngolo hlobo. Asekwanokujamelana noxinezeleko ngenxa yentiyo engokonqulo okanye inkcaso evela kwizalamane, kubamelwane, kubantu asebenza nabo, kumaqabane esikolo nakumagunya aseburhulumenteni. (Mateyu 24:9) Ngoko kunokwenzeka njani ukuba sihlale sizolile, singakhathazekanga, kula maxesha anzima kangaka? Singalulondoloza njani uxolo lwengqondo xa ezi zinto ziqhubekayo zithabath’ unyawo? Sinokujamelana njani nekamva ngentembelo? Yintoni eya kusinceda ukuba soyise ixhala elinzulu eliya lisanda ngokwanda? Sikwixesha laxa uYesu wanikela isiluleko esikuYohane 14:1, ngoko makhe sisihlolisise ngenyameko.

Sinokuloyisa Njani Ixhala?

5. IZibhalo zisinika ziphi izibongozo ezikhuthazayo?

⁵ Emva kokuba ebanike ukhuthazo lothando lokuba ‘zingakhathazeki iintliziyo zabo,’ uYesu waxelela abapostile bakhe oku: “Kholwani kuThixo, nikholwe nakum.” (Yohane 14:1) IZibhalo eziphefumlelweyo zisinika izibongozo ezininzi ezikwanjalo: “Umthwalo wakho wulahlele kuYehova; yena wokuzimasa.” “Yiyekele kuYehova indlela yakho, ukholose ngaye; wokwenzela.” (INdumiso 55:22; 37:5) UPawulos wawanika amaFilipi eli cebiso libaluleke ngokona kona: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu.”—Filipi 4:6, 7.

6, 7. (a) Yiyiphi enye indlela yokunciphisa uxinezeleko? (b) Sinokuluhlakulela njani umanyano olusondeleyo noYehova?

⁶ Maxa wambi ixhala okanye inkxalabo ebangelwa ziingxaki nayimbopheleleko enzima inokuyichaphazela impilo yethu kwanomoya wethu. Sekunjalo, ingcali kwezamayeza, kwincwadi yayo ethi Don’t Panic igqabaza isithi: “Ukuba abantu bayakwazi ukuthetha ngeengxaki zabo nomnye umntu abamhlonelayo . . . , ngokufuthi umlinganiselo woxinezeleko uncitshiswa kakhulu ngokwenene.” Ukuba oko kunjalo mayela nokuthetha nje nomnye umntu, olungakanani ukuba lukhulu ngakumbi uncedo oluya kufumaneka ngokuthetha noThixo. Ngubani ebesiya kumhlonela ngakumbi kunoYehova?

⁷ Kungenxa yoko le nto ulwalamano lobuqu nolusondeleyo naye lubaluleke kangaka kumaKristu namhlanje. Bakwazi kakuhle oku abakhonzi bakaYehova abakhulileyo ngolwazi, ngenxa yoko bakuphaphele ukuluphepha unxulumano nabantu behlabathi okanye uhlobo lokuzihlaziya obelunokulwenza buthathaka olo lwalamano. (1 Korinte 15:33) Kwakhona bayayiqonda indlela ekubaluleke ngayo ukuthetha noYehova emthandazweni, kungekuphela nje kanye okanye kabini ngemini, kodwa ngokuthe rhoqo. Ingakumbi amaKristu aselula okanye amatsha amele aluhlakulele olu manyano lusondeleyo noYehova ngofundisiso oluthe rhoqo nangokucamngca ngeLizwi lakhe nangokunxulumana namaKristu nokuba nesabelo enkonzweni. Siyabongozwa: “Sondelani kuye uThixo, wosondela kuni.”—Yakobi 4:8.

Isiluleko Awasinikelayo UYesu

8, 9. Sisiphi isiluleko esingqalileyo esinokusisebenzisa kwiingxaki ezingokoqoqosho?

⁸ Kumazwe amaninzi, ukungaqeshwa noxinezeleko olungokwezoqoqosho zingoonobangela abanzulu bokukhathazeka. UYesu wanikela isiluleko esingqale kakhulu mayela nokuxhalela ezi zinto: “Musani ukubuxhalela ubomi benu, nisithi nodla ntoni na; nosela ntoni na; kwanomzimba wenu, nisithi niya kwambatha ntoni na. Ubomi abungaphezulu na kuko ukudla, nomzimba awungaphezulu na kwinto yokwambatha?” (Mateyu 6:25) Ewe, umphefumlo kwanomzimba, okanye umntu ephela, ubaluleke ngakumbi gqitha kunokudla kwanempahla. Abakhonzi bakaThixo banokuqiniseka ukuba uya kubanceda ukuba bazifumane izinto ezisisiseko abazisweleyo. UYesu wenza lo mzekelo: “Yondelani ezintakeni zasezulwini; ngokuba azihlwayeli, azivuni, azibutheli koovimba; ukanti ke uYihlo wasemazulwini uyazondla. Nina anizidlule kakhulu na?” (Mateyu 6:26) Makube lee ukucinga ukuba uThixo ebeya kuzilungiselela ezi zidalwa zineentsiba ukanti sekunjalo abatyeshele abakhonzi bakhe abangabantu, abaxabiseke ngokwenene kuye nabo uKristu wabuncamela bona ubomi bakhe.

⁹ Ngokulandelayo uYesu ukugxininisa oku ngokubhekisela kwiinyibiba zasendle ezingabulalekiyo nokubulaleka yaye zingasonti kwanokusonta, kanti “noSolomon kubo bonke ubunewunewu bakhe, wayengavathiswanga nanjenganye kwezi.” Ulawulo lukaKumkani uSolomon lwalubalasele ngobukhazikhazi balo. UYesu ubuya abuze ngelithuthuzelayo esithi: “[UThixo] akayi kunambathisa kakhulu ngakumbi na?”—Mateyu 6:28-32; INgoma yazo iiNgoma 3:9, 10.

10. (a) Amazwi athuthuzelayo kaYesu abhekiswe koobani? (b) Wanikela liphi icebiso ngekamva?

¹⁰ Phofu ke, uYesu uhlabela mgama ebonisa ukuba oku kokwabo kuphela ‘bafuna tanci ubukumkani bukaThixo nobulungisa bakhe.’ Ehlabathini jikelele, amaKristu okwenyaniso anjalo ayakuqonda oko bukuko ngokwenene uBukumkani bukaThixo yaye abubeka tanci ebomini bawo. Kuwo, esi sibongozo sikaYesu siyasebenza: “Musani ukuxhalela ingomso; kuba ingomso liya kuxhalela okwalo. Buyanele imini leyo obayo ububi.” (Mateyu 6:33, 34) Ngamanye amazwi, yisingathe ingxaki nganye njengoko iphakama, uze ungazikhathazi ngokungeyomfuneko ngekamva.

11, 12. Wambi amaKristu azive njani kuba uYehova wawancedayo ekuphenduleni imithandazo yawo?

¹¹ Phofu ke, inkoliso yabantu ityekele ekulixhalabeleni ikamva, ingakumbi xa izinto zingahambi kakuhle. Kodwa amaKristu anokuphethukela kuYehova enokholo yaye amele enjenjalo. Khawuqwalasele le meko kaEleanor. Umyeni wakhe wayegula kakhulu, yaye akazange akwazi ukuphangela umnyaka wonke. Wayenabantwana ababini abancinane noyise owalupheleyo ekwakufuneka ebanyamekele, nto leyo eyathetha ukuba wayengenakukwazi ukuwuthabatha umsebenzi wengqesho wexesha elizeleyo. Bamcela uYehova ukuba abancede. Kungekudala nje emva koko, ngenye intsasa bafumana imvulophu ngaphantsi komnyango. Yayinesixa esikhulu semali—eyayanele ukubanceda baqhubeke bephila de kwalithuba lokubuyela emsebenzini komyeni wakhe. Baziva benombulelo onzulu ngolu ncedo lufike ngexesha elifanelekileyo. Akukho sizinzi singokweBhayibhile sokulindela ukuba into efana naleyo iya kwenzeka kumKristu ngamnye osweleyo, kodwa sinokuqiniseka ukuba uYehova uya kuziva izikhalo zethu nokuthi unawo amandla okusinceda ngeendlela ezahlukeneyo.

¹² Emazantsi eAfrika umhlolokazi ongumKristu kwafuneka efune umsebenzi ukuze akwazi ukulungiselela abantwana bakhe ababini abancinane. Kodwa wayenomnqweno onamandla wokusebenza kuphela isiqingatha semini ukuze akwazi ukuchitha ixesha kunye nabo. Emva kokuba ewufumene umsebenzi, wanyanzeleka ukuba awuyeke xa umphathi wakhe wagqiba kwelokuba wayefuna unobhala owayenokusebenza ixesha elizeleyo. Ephinde walahlekelwa ngumsebenzi, lo dade wathandaza ngokunyanisekileyo kuYehova ecela uncedo. Kwiiveki ezintathu kamva, umphathi wakhe wangaphambili wamcela ukuba abuyele emsebenzini aze asebenze isiqingatha semini. Enjani indlela awavuya ngayo! Waba nemvakalelo yokuba uYehova wayeyiphendulile imithandazo yakhe.

Mkhunge UYehova

13. (a) Kuthetha ntoni ‘ukukhunga’? (b) Yiyiphi imizekelo yokukhunga esinayo eZibhalweni?

¹³ Nceda phawula ukuba emva kokucebisa esithi, “Ningaxhaleli nto,” uPawulos wongezelela esithi, “mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo.” (Filipi 4:6) Kutheni ekhankanya “ukukhunga” nje? Eli gama lithetha “isibongozo esinyanisekileyo,” okanye ‘umthandazo wokucela ngokungazenzisiyo.’ Oku kubandakanya ukumbongoza uThixo ngokunyaniseke gqitha, njengakwixesha loxinezeleko olukhulu okanye lokuchanabeka engozini. Xa wayengumbanjwa, uPawulos wacela amaKristu angoowabo ukuba enze izikhungo ngenxa yakhe ukuze akwazi ukuzivakalisa ngokungenaloyiko ‘iindaba ezi zilungileyo njengesigidimi esisezintanjeni.’ (Efese 6:18-20) Kwanegosa lomkhosi waseRoma uKorneli ‘lalimane likhunga kuThixo ngamaxesha onke.’ Enjani indlela ekumele ukuba wavuya ngayo xa isithunywa sezulu sathi kuye: “Imithandazo yakho namalizo akho anyukile, aba sisikhumbuzo emehlweni kaThixo”! Yaye elinjani ilungelo awaba nalo lokuba phakathi kwabokuqala baseziNtlangeni ukuthanjiswa ngomoya oyingcwele!—IZenzo 10:1-4, 24, 44-48.

14. Sinokwazi njani enoba ukumbongoza ngokunyanisekileyo uYehova kunokwenziwa isihlandlo nje esinye?

¹⁴ Kumele kuphawulwe ukuba ngokufuthi ukumbongoza ngokunyaniseke ngolo hlobo uYehova akwenziwa nje kube kanye. KwiNtshumayelo yakhe edumileyo yaseNtabeni uYesu wafundisa esithi: “Qhubekani nicela, nophiwa; qhubekani nifuna, nofumana; qhubekani ninkqonkqoza, novulelwa.” (Mateyu 7:7, NW) Iinguqulelo ezininzi zeBhayibhile zikubeka oku ngokuthi: “Celani . . . funani . . . nkqonkqozani.” Kodwa isiGrike santlandlolo sinikela ingcamango yesenzo esikwimo yoqhubeko.a

15. (a) Kutheni uNehemiya wayethe khunubembe ngoxa wayedlulisa iwayini kuKumkani uArtashashta? (b) UNehemiya wakwenza njani okungaphezu kokwenza nje umthandazo omfutshane?

¹⁵ Xa uNehemiya wayekhonza ukumkani wamaPersi uArtashashta njengomngcamli wewayini, ukumkani wambuza isizathu sokuba wayethe khunubembe. UNehemiya wathi kwakungenxa yokuba wayevile ukuba iYerusalem yayikwimeko yokuphanza. Wandula ke ukumkani wambuza esithi: “Ufuna ntoni na ke?” Kwaoko uNehemiya wamcela uYehova ukuba amncede, ngokungathandabuzekiyo esenjenjalo ngokufutshane nje, ethe cwaka. Wandula ke wacela imvume yokubuyela eYerusalem ukuze abuye akhe isixeko sakokwabo esithandekayo. Isicelo sakhe samkelwa. (Nehemiya 2:1-6) Kambe ke, ngaphambi kolo dliwanondlebe lwamanqam, uNehemiya wayechithe imihla eliqela embongoza, emkhunga, uYehova ukuba amncede. (Nehemiya 1:4-11) Ngaba kukho nto oyifundayo koku?

UYehova Uyaphendula

16. (a) Liliphi ilungelo elikhethekileyo awalinandiphayo uAbraham? (b) Ngawaphi amancedo anamandla esinawo anokubandakanywa ekuphendulweni kwemithandazo yethu?

¹⁶ Ngasihlandlo sithile, uAbraham wanandipha ilungelo lokuthetha noYehova ngezithunywa zezulu. (Genesis 22:11-18; 18:1-33) Nangona oko kungenzeki namhla, sisikelelwe ngamancedo anamandla awayengenawo uAbraham. Olunye uncedo yiBhayibhile epheleleyo—umthombo ongaphele ndawo wokhokelo nowentuthuzelo. (INdumiso 119:105; Roma 15:4) Ngokufuthi, iBhayibhile inokusinika ukhokelo okanye ukhuthazo esilufunayo, uYehova esinceda ukuba sikhumbule izicatshulwa ezifunekayo. Ngokufuthi, uludwe lwemibandela engokweZibhalo okanye enye yeempapasho ezininzi zeBhayibhile asilungiseleleyo uThixo ngentlangano yakhe zinokusinika impendulo. Isalathiso esineenkcukacha ngokuzeleyo nesisebenzisekayo sezi mpapasho sikwalolunye uncedo olubaluleke kakhulu ekufumaneni inkcazelo efunekayo.

17. UYehova usenokuyiphendula ngaziphi ezinye iindlela imithandazo yethu, yaye amaKristu anobubele, nanovelwano anokuba luncedo njani?

¹⁷ Ukuba sikhathazwa yingxaki ethile okanye siziva silusizi okanye sidimazekile, iimpendulo kwimithandazo yethu zisenokuza kwanangezinye iindlela. Ngokomzekelo, intetho yeBhayibhile ebandleni okanye endibanweni yamaNgqina kaYehova isenokuqulatha kanye elo “yeza” silifunayo. Maxa wambi, ukuncokola nje nomnye umKristu kuya kunikela kanye oko sikufunayo. Izihlandlo ezininzi abadala bebandla banokunikela ukhuthazo okanye icebiso. Kwanokuwuthula nje umthwalo osezintliziyweni zethu kumKristu okhulileyo ngolwazi, onobubele nonovelwano nokwangumphulaphuli olungileyo ngokufuthi kunokusenza sizive sihlaziyekile. Oko kubanjalo ingakumbi ukuba esi sihlobo siyasinceda ukuba sicamngce ngeengcamango eziseBhayibhileni. Ukhuthazwano olunjalo lunokushenxisa umthwalo omkhulu kwingqondo nakwintliziyo yethu.—IMizekeliso 12:25; 1 Tesalonika 5:14.

18. Nguwuphi umsebenzi okhethekileyo onokuwanceda amaKristu ukuba oyise amaxesha okudimazeka, yaye oku kwamnceda njani omnye uvulindlela oselula?

¹⁸ Kukho iindlela eziqhelekileyo nezahlukahlukeneyo zokudandatheka kula ‘maxesha anomngcipheko.’ (2 Timoti 3:1) Abantu bayadimazeka baze bazive bedandathekile ngenxa yezizathu ezahlukeneyo. Oku kusenokwenzeka kwanakumaKristu, yaye kusenokuba ngawona mava angemyoli. Noko ke, abaninzi bafumanise ukuba ukushumayela iindaba ezilungileyo kubancedile ukuba okwethuba elithile bakhululeke kolo dandatheko lwabo.b Ngaba ukuzamile oko? Xa ngandlel’ ithile uziva udimazekile, zama ukuba nesabelo kuhlobo oluthile lwenkonzo yoBukumkani. Ukuthetha nabanye ngoBukumkani bukaThixo ngokufuthi kuya kukunceda ukuba usiguqule isimo sakho sengqondo sokuziva udimazekile uze uzive ukhuthazekile. Ukuthetha ngoYehova nokusebenzisa iLizwi lakhe kunokukunika uvuyo—isiqhamo somoya wakhe—kuze kukwenze uzive ngokwahlukileyo kunokuba ubunjalo ngaphambili. (Galati 5:22) Nomnye uvulindlela oselula wakufumanisa ukuba ukuzigcina exakekile kumsebenzi woBukumkani kwamenza waqonda ukuba “iingxaki [awayenazo] zazincinane kakhulu yaye xa kuthelekiswa neengxaki zabanye izezokwexeshana.”

19. UmKristu owayenempilo enkenenkene wazoyisa njani iingcamango ezidimazayo?

¹⁹ Maxa wambi, ukungaphili ngokwasemzimbeni, mhlawumbi okuhlangene namaxhala okanye iingxaki, kunokukhokelela ekuziveni udandathekile. Oku kunokumenza ubani avuke ebusuku ekhathazekile, njengoko kwakukhe kwenzeke komnye umKristu oliqina lendoda owayenempilo enkenenkene. Kodwa wafumanisa ukuba umthandazo osuka entliziyweni wawuluncedo lokwenene. Nanini na xa wayevuka eziva edandathekile, ngokuzolileyo wayethandaza kuYehova. Ngokukhawuleza oku kwamenza waziva ehlaziyekile. Kwakhona wakufumana kuthuthuzela ukuphindaphinda ngokusuka enkumbulweni izicatshulwa ezithuthuzelayo zeBhayibhile, ezinjengeNdumiso 23. Ngokungenakuthandatyuzwa, umoya kaYehova, osebenza ukuphendula umthandazo onjalo okanye ngeLizwi lakhe, wawuba luncedo ekusithabatheleni indawo esi simo sengqondo sokudandatheka ngesimo sengqondo solonwabo. Kamva, le ndoda yakwazi ukucinga ngeengxaki zayo ngolungelelwano nangokuzola, iyibona indlela yokuzoyisa okanye iziva yomelezekile ukuba izinyamezele.

20. Kutheni maxa wambi impendulo emthandazweni ingafiki kwangoko?

²⁰ Lo ngumzekelo wendlela umthandazo onokuyizisa ngayo impendulo. Kodwa maxa wambi kubonakala ngathi kukho ukulibaziseka ekufumaneni isicombululo. Kungani? Mhlawumbi impendulo kufuneka ilindele ixesha likaThixo elifanelekileyo. Kubonakala ukuba kwezinye iimeko uThixo uyabavumela abo bamcelayo ukuba babonakalise ubunzulu benkxalabo yabo, nobunzulu bomnqweno wabo, nokunyaniseka kozinikelo lwabo. Omnye wabadumisi wakha wanawo loo mava!—INdumiso 88:13, 14; thelekisa eyesi-2 yabaseKorinte 12:7-10.

21. Kutheni kulilungelo elikhulu ukuba ngomnye wamaNgqina kaYehova namhlanje, yaye sinokulubonakalisa njani uxabiso ngenxa yoko?

²¹ Enoba kuyini na ke phofu, ukuthetha noThixo onguSomandla ngomthandazo kungamava awomeleza ukholo anokusiphakamisa kwimeko yokuziva singento size sizuze intembelo. Enjani indlela ekuthuthuzela ngayo ukwazi ukuba uyeva yaye uya kusiphendula! Njengokuba uPawulos walibhalelayo ibandla laseFilipi, imithandazo yethu nezikhungo zethu simele sizenze “ndawonye nokubulela.” (Filipi 4:6) Ewe, mhla ngamnye simele sizivule iintliziyo zethu simbulele uYehova yaye “ezintweni zonke bulelani.” (1 Tesalonika 5:18) Oko kuya kufak’ isandla kumanyano olusondeleyo nolufudumeleyo yaye kosinika uxolo. Inqaku elilandelayo liya kubonisa indlela ekubaluleke ngayo oku kubakhonzi bakaYehova kula maxesha okukhathazeka nakwayingozi.

[Imibhalo esemazantsi]

Ubunokuphendula Uthini?

◻ Ziziphi iimeko ezinokubangela ukuba amaKristu akhathazeke?

◻ Yintoni enokusinceda soyise ixhala?

◻ Kutheni amaKristu enokuqiniseka ukuba uThixo uya kuwanceda kwiintswelo zawo ezisisiseko?

◻ Kuthetha ntoni ‘ukukhunga,’ yaye imizekelo yexesha elidluleyo iyibonisa njani indlela UYehova asabela ngayo?

◻ UYehova unokuyiphendula ngaziphi iindlela ezahlukeneyo imithandazo yethu?

[Umfanekiso okwiphepha 12]

‘UYihlo osemazulwini uyazondla iintaka. Anixabisekanga ngaphezu kwazo nina yini na?’