Ukulondoloza Umanyano Lwethu LobuKristu

UMBHALI wamaKatolika uDomenico Mosso wabhala wenjenje: “Khawuthelekelele ubizwa ngokuba ungumzalwana okanye udade, ungabizwa ngumfundisi, kodwa ubizwa ngumfo oliqina osecaleni kwakho okanye linenekazi eliselula elisandul’ ukufika ngakwesokunene sakho. ‘Ubusithini?’ ‘Bendisithi, molo mzalwana.’ ‘Usifumana phi eso sibindi . . . andikwazi konke konke, undiqhelele phi? Ngapha koko, sisecaweni apha.”’

Ingqiqo yokwenene yobuzalwana ngokwenene ayikho phakathi kweecawa zeNgqobhoko. Oku kubonisa ukungabikho komanyano lobuKristu kuzo. Noko ke, akunjalo ngamaNgqina kaYehova. Njengabalandeli baka Yesu bokuqala, ngokukhululekileyo sibiza omnye nomnye ngokuthi ngumzalwana nodade. (2 Petros 3:15) Kungakhathaliseki apho siya khona ehlabathini, sinokwamkelwa ngobubele ngabazalwana xa sifika kwiHolo yoBukumkani ekufuphi. Umanyano lukwabonakala ngendlela yokuba onke amabandla alandela indlela efanayo yokufundisa nokuba onke amaNgqina abandakanyeke ekushumayeleni ‘iindaba ezilungileyo zobukumkani.’—Mateyu 24:14.

Ngobusuku bangaphambi kokuba afe, uYesu Kristu wathandaza wathi: “Ndicelela nabo baya kukholwa kum ngelizwi labo; ukuze bonke babe banye; njengokuba wena, Bawo, ukum, mna ndikuwe.” (Yohane 17:20, 21) lngxelo yeBhayibhile ibonisa ukuba uYehova uThixo wawuphendula umthandazo kaYesu. Phakathi kwamaKristu okuqala, ubutshaba obabunethuba elide bukho phakathi kwamaYuda nabeeNtlanga baphela ngenxa yeemfundiso zikaKristu ezinamandla amanyanisayo.—Galati 3:28.

Noko ke, kwafuneka umgudu ukuze kulondolozwe olu manyano. Umpostile uPawulos wabongoza abo babesebenza naye ukuba ‘bahambe ngokulufaneleyo ubizo [lwasezulwini] . . . bekhuthalele ukubugcina ubunye boMoya ngentambo yoxolo.’ Babengayi kwahlukana benze amahlelo awahlukahlukeneyo. Kwakungayi kuba njalo, kuba ‘mnye umzimba, mnye noMoya, njengokuba babizwayo nokubizwa, baba nathemba linye lobizo lwabo. Inye iNkosi, lunye ukholo, lunye ubhaptizo, mnye uThixo, uYise wabo bonke.’ Abapostile, abalusi nabo bafundisayo ebandleni babelungiselelwe ukunceda ‘bonke bafike kubo ubunye benkolo [ekumanyaneni elukholweni, NW]’—Efese 4:1-6, 11-14.

Kumaxesha anamhlanje amaNgqina kaYehova aye alulondoloza ngokunempumelelo olu ‘manyano’. Phofu ke, iimeko ezahlukahlukeneyo—umoya wokuzimela geqe, umahluko ongokwempucuko nongokobuzwe, iziphako ezahlukahlukeneyo nokungafezeki phakathi kwamaKristu angoowethu—zisenokukusongela ‘ukumanyana kwethu elukholweni.’ Kunokulondolozwa njani?

Ukuzondla Esithebeni Esinye

UYehova akakhanyiseli mKristu ngamnye. Endaweni yoko, uKristu wamisela udidi ‘lomkhonzi othembekileyo noqondayo’ ukuba lulungiselele amaKristu asemhlabeni wonke umbandela ofundisiswayo ongokweZibhalo nesiluleko esifika ngexesha elifanelekileyo. (Mateyu 24:45-47) Ngaloo ndlela IMboniselo ipapashwa ngeelwimi ezili-103 ukuze kuhlangatyezwane naloo ntswelo ikhoyo zwenibanzi.

Ukuzondla esithebeni esinye sokomoya kuye kwenza okuninzi ekuveliseni nasekulondolozeni ukumanyana elukholweni. Noko ke, maxa wambi, ezinye zeziluleko zisenokubonakala zingasebenzi kumazwe athile. Ngaba sifanele sivakalelwe kukuba asiyifuni le nkcazelo? Asifanele sibe njalo. Ezinye zeziluleko zikaPawulos kumaKristu awayehlala kwisixeko saseKorinte esasinabantu abaziphethe kakubi nababenqula izithixo zazisenokubonakala zingasebenzi ngokupheleleyo kumaKristu awayehlala emaphandleni. (1 Korinte 6:15, 16; 10:14) Kanti, amaKristu kuzo zonke iindawo ayijonga imibhalo kaPawulos njengenxalenye ‘yeZibhalo.’—2 Petros 3:16.

Ngokukwanjalo namhlanje, amanqaku athile asenokungabonakali esebenza njengamanye kwiimeko zasekuhlaleni. Kodwa sekunjalo sifanele sisamkele isilumkiso esifika kwangaphambili, sisazi ukuba kula maxesha onxibelelwano olukhawulezayo, utyekelo olungeluhle oluqalise kwenye indawo yomhlaba lunokusasazeka ngokukhawuleza!

Ukungafezeki Nokuba Nembono Egabadeleyo

Umfundi uYakobi wathi: “Siyakhubeka kaninzi sonke.” (Yakobi 3:2) Ngenxa yokungafezeki, abantu batyekele ekwenzeni izinto ngokugabadeleyo. Oku kusenokubonakala kungeyongxaki ukuba abantu baneembono ezifanayo ngezinto. Ngokomzekelo, abantu ababini abangamahomba ngokugqithisileyo basenokuqhubana nje kakuhle. Kodwa ukuba omnye ulixelegu yaye omnye ulihomba, akunakuphela ukuxabana!

AmaNgqina kaYehova aphuma “kuzo zonke iintlanga, nezizwe, nabantu, neelwimi.” (ISityhilelo 7:9) Ngenxa yoko, abathile phakathi kwethu basenokuba neembono ezahluke kakhulu malunga nezinto ezinjengokutya, isinxibo, ukunyamekela impilo, kwanemilinganiselo yokuziphatha ebuthweni. Iimbono ezahluke ngolo hlobo azimele zibangele iiyantlukwano phakathi kwethu. IBhayibhile iyasilumkisa nxamnye nokugabadela yaye iyasikhuthaza ukuba sisebenzele ekubeni ngabalungeleleneyo nabasebenzisa ingqiqo. IBhayibhile ithi: “Ubulumko baphezulu . . . boboxolo, buyancedezela.”—Yakobi 3:17.

Kuyinyaniso ukuba, iBhayibhile iyazigweba ngokungqalileyo izinto ezithile eziqheliselwayo. Kodwa ngokufuthi isikhuthaza ngokucacileyo ukuba singathabathi cala phakathi kweembono ezimbini ezigabadeleyo. Qwalasela oko iBhayibhile ikutshoyo ngale mibandela:

Umsebenzi Wempangelo: “Ubuvila buwisela ebuthongweni obukhulu; umphefumlo odangeleyo uyalamba.” (IMizekeliso 19:15) “Aninako ukukhonza uThixo nobutyebi.”—Mateyu 6:24.

Ukuthetha: “Owubambayo umlomo wakhe unengqiqo.” (IMizekeliso 10:19) “Into yonke inexesha elimisiweyo . . . ; ukuthi cwaka kunexesha lako ukuthetha kunexesha lako.”—INtshumayeli 3:1, 7.

Ukuhlalisana Nabanye Abantu: “Ngayo le nto baya kwazi bonke, ukuba ningabafundi barn, ukuba nithe nathandana.” (Yohane 13:35) “Malungayi futhi unyawo lwakho endlwini yommelwane wakho, hleze adikwe nguwe.”—IMizekeliso 25:17.

Ukukhulisa Abantwana: “Oyiyekileyo intonga yakhe umthiyile unyana wakhe; ke omthandayo umqeqesha esemncinane.” (IMizekeliso 13:24) “Musani ukubacaphukisa abantwana benu, ukuze bangafi iintliziyo.”—Kolose 3:21.

Okukhona iimbono zethu zilungelelene ngemicimbi endaweni yokugabadela, kokukhona siya kuba namava okuncipha kokungavisisani namanye amaKristu. Kodwa kuthekani ukuba kusabonakala kukho ukungavumelani ngenxa yokungafezeki? Khumbula amazwi kaPawulos akumaKolose 3:13 athi: “Ninyamezelana, nixolelana, ukuba ubani uthi abe nokusola ngakubani.”

‘Undikhubekisile’

Noko ke, bambi ebandleni basenokutyekela ekubeni ngabanochuku, bebona iintshukumisa ezingezozabubele kumazwi nakwizenzo ezimsulwa. Mhlawumbi oku kungenxa yemvelaphi yabo. Enoba kuyintoni na, hayi indlela ekulusizi ngayo xa abo banochuku bezivumela ukuba bacatshukiswe zizinto ezincinane okanye, okubi ngakumbi, baphazamise abanye malunga nalo mcimbi ngokuhlwayela imbewu yokungamanyani!

Kuyinyaniso ukuba, iBhayibhile iyaligweba ikhondo elinokubakhubekisa abanye abafundi. (Luka 17:1, 2) Yaye abakhulileyo bamele baziqonde iimvakalelo zamaKristu angoowabo. Kwangaxeshanye, iBhayibhile isiluleka kabukhali nxamnye nokuba nochuku nokwandisa izikhubekiso engqondweni yethu. (INtshumayeli 7:9) Ngokungakumbi, ukusasaza ukunganeliseki phakathi kwabazalwana bethu ngokubhenca iintsilelo zikabani kuyenye yezinto ‘azithiyileyo uYehova.’—IMizekeliso 6:16-19.

Umoya kaThixo unokusinceda ukuba sikoyise ukuba nochuku. Endaweni yokuba sicinge ngeziphoso zabazalwana bethu, ngoncedo lomoya, sinokuba neengcinga ezikhuthazayo nezakhayo. (Filipi 4:8) Oku kukhulisa umanyano.

Ukumanyana Asikokwenza Izinto Ngokufanayo

Noko ke, umanyano lwazwenibanzi, aluthethi ukuba simele sibe nobuntu obufanayo size senze izinto ngendlela efanayo. Apho isebenza khona imigaqo yeBhayibhile, kuyasivuyisa ukushiya iindlela ezizodwa zokucinga zeli hlabathi size samkele ukhokelo lomoya kaYehova. Sekunjalo, ekuphumezeni uthumo lwethu njengabashumayeli, sinethuba elininzi ekuphuculeni ubunjani bethu, ewe, nobuchule esinabo bokubona izinto. Eneneni, ngokufuthi abazalwana bethu basebenzisa ubuchule obungakumbi ekulungiseni iindlela zabo zokunikela ubungqina kwiimeko zasekuhlaleni.

Kuthi ke kubekho izinto ezininzi ezenziwayo eziquka amasiko athile asekuhlaleni apho imigaqo engokweZibhalo ingabandakanywa ngokungqalileyo. Kwilizwekazi laseYurophu, ngokuqhelekileyo abantu bayaxhawulana xa bebulisana. Kwiindawo zaseMpuma, bayavova. Nayiphi na yezi ndlela yamkelekile kumaKristu. Okanye qwalasela umbandela wesinxibo nokuzilungisa. IBhayibhile inikela kuphela imigaqo ekhokelayo esisiseko yokunxiba ngokunesidima nangokomlinganiselo ofanelekileyo. Kwezo zinto, sisenokulandela ukhetho lwethu lobuqu, ngoxa siqhelisela ‘ukuba nesidima.’—1 Timoti 2:9, 10.

Ngaloo ndlela, abadala bafanele basoloko bekuphaphele ukunikela isiluleko ngokwemigaqo eqinileyo yeBhayibhile endaweni yokhetho lobuqu. Kakade ke, xa kutikelelwa kwizinto zokomoya, baya kuba ngabokuqala ukukhuthaza umanyano lokwenene. Nathi sinokuba nesikwenzayo. ‘Sinokuzilinga, ukuba siselukholweni olu na’ ngokufundisisa rhoqo iBhayibhile neempapasho ‘zomkhonzi othembekileyo.’ (2 Korinte 13:5) Sinokululondoloza umanyano emisebenzini ngokuthi ngokungatihlisiyo ‘siluvume ekuhleni’ ukholo lwethu.—Hebhere 13:15.

Ngale ndlela siya kusithabathel’ engqale-lweni isiluleko esiphefumlelweyo esithi: “Ke kaloku, ndiyaniyala, bazalwana, ngalo igama leNkosi yethu, uYesu Kristu, ukuba nithethe ntonye nonke, nokuba kungabikho zahlukahlukano kuni; ke nibe ngabalungisiweyo, nigqibelele ngqiqweninye, nasicamangweni sinye.”—1 Korinte 1:10.

[Umfanekiso okwiphepha 30]

Ukulondoloza ulwalamano olulungileyo kubalulekile ekubeni ngabamanyeneyo, naxa ubani enesizathu sokukhubeka