IGcisa Elikhulu Lomzobi—UYehova!
“AMAGCISA okuzoba azoba imifanekiso engenakubalwa yokuphuma nokutshona kwelanga, ibe imisebenzi yawo ithengiswa ngamakhulu, kwanangamawaka eedola. Ukanti, uYehova uThixo, iGcisa Lokuzoba Elikhulu neMbangi yokutshona nokuphuma kwelanga, usinika ngamnye kule mifanekiso suku ngalunye—ngesisa. Ukutshona nokuphuma kwelanga okukokwemvelo kukugqwesa lee oko kukhutshelwe ngabazobi. Ngaba oko akufanele kusinike isizathu sokumxabisa njengoMdali?” Waqiqa njalo umveleli ohambahambayo wamaNgqina kaYehova eHawaii ebudeni benye yeentetho zakhe ebandleni.
Elinye ibhinqa elalingabukholelwa ubukho bukaThixo, lityelele iHolo yoBukumkani okwesihlandlo sokuqala, laliphakathi kwabaphulaphuli. Layiphawula indlela yokuqiqa yalo mlungiseleli, kodwa ayesahleli amathandabuzo awomeleleyo malunga nobukho bukaThixo. Phofu ke, njengoko laliqhuba inqwelo-mafutha libuyela ekhaya livela emsebenzini phantse kwiminyaka emibini kamva, lalityaziswa zizithuthi ezininzi. Oku kwabangela ukuba liphawule ukutshona kwelanga okunomtsalane ngokugqithiseleyo. Iingcinga zalo zabuyela kulaa ntetho yomveleli ohambahambayo.
Libalisa oku: “Kunokuba ndiphazamiseke koku kulityaziswa zezi zithuthi zininzi, ndaphawula ukutshona kwelanga okunomtsalane, ibe kwandikhumbuza oko kwakuthethwe sisithethi ngokuxabisa uYehova uThixo njengeGcisa Lokuzoba kwananjengoMdali. Kwandenza ukuba ndicinge oku, ‘Mhlawumbi oko sasikuthetha kuyinyaniso; kusenokwenzeka ukuba ngokwenene ukho uMdali.’ Ndacinga ngako oku njengoko ndandiqhubeka ndigoduka, ibe ngaloo ngokuhlwa ndabiza umhlobo wam owayendimemele okokuqala kwiHolo yoBukumkani. Ndaqalisa ukufundisisa iBhayibhile, ibe ngoku ndinqula uYehova njengoThixo noMdali wam.”
Njengomdumisi, eli bhinqa alizange kuphela limxabise uYehova njengeGcisa Lokuzoba Elikhulu lendalo kuphela kodwa lwakwafikelela ekuvumeni iindumiso zakhe. Umdumisi wabhala: “Dumisani uYehova emazulwini . . . mdumiseni, wena langa, nawe nyanga; mdumiseni, nonke zinkwenkwezi zinokukhanya . . . Mazilidumise ezo nto igama likaYehova; ngokuba wawisa umthetho, zadalwa.”—INdumiso 148:1-5.