Ihenyukazi Elidume Kakubi—Ukuwa Kwalo

“Iwile, iwile iBhabheli, loo mzi mkhulu! Ngokuba iseze zonke iintlanga ngewayini yomsindo wobuhenyu bayo.”—ISITYHILELO 14:8.

Eli nqaku nelilandelayo athatyathwe kwintetho yokuqukumbela kungcelele lweentetho olunomxholo othi “Ixesha Elimisiweyo Likufuphi,” eyanikelwa ebudeni bowe-1988 kwiiNdibano Zesithili Zokuba Sesikweni KukaThixo zamaNgqina kaYehova

1. Lingubani “ihenyukazi” elidume kakubi, ibe kutheni kufuneka sazile ngalo?

LINGUBANI “ihenyukazi” elidume kakubi? Kutheni kufuneka sithethe ngalo? Azithi na iinoveli, imifanekiso eshukumayo, umabonwakude neevideo zibonise izinto ezilungele ukubalekisa umzimba zokuziphatha okubi? Eneneni kunjalo! Kodwa eli henyukazi asilonenekazi liqhelekileyo elenza izinto zokungcola ebumnyameni. Enyanisweni, lihenyukazi elineyona mpembelelo inkulu, elidume kakubi nelilelona liqengq’ ugodo kuyo yonke imbali. Yaye ngaphezu kweminyaka engama-4 000 belithengisa ngothando lwalo! Kufuneka silazile ukuze sikhuseleke. KwiSityhilelo 14:8, isithunywa sezulu siyibiza le nkazana idume kakubi ngokuthi ‘yiBhabheli Enkulu’ ibe siyichaza njengomlukuhli weentlanga. Ekubeni iyingozi ngolo hlobo, sifanele sikuvuyele ukwazi ukuba elikaYehova “ixesha elimisiweyo likufuphi” ukuba ayigwebe.—ISityhilelo 1:3.

2. Eli henyukazi lilifumana phi igama lalo, ibe baqala njani ubukhosi behlabathi bonqulo lobuxoki?

² Eli henyukazi linegama elithatyathwe kwiBhabhiloni yamandulo, isixeko sebhongo esasakhiwe eMesopotami kwiminyaka engaphezu kwama-4 000 eyadlulayo nguNimrodi, “igorha lezingela phambi koYehova.” Xa abemi baseBhabhiloni baqalisa ukwakha inqaba yonqulo lobuhedeni, uYehova waludubaduba ulwimi lwabo waza wabenza basasazeka ukusa eziphelweni zomhlaba. Bahamba nonqulo lwabo, ibe leyo yindlela ubukhosi behlabathi bonqulo olubuBhabhiloni obaqala ngayo. Kuyinyaniso ukuba, luyiBhabhiloni ENKULU. (Genesis 10:8-10; 11:1-9) Ukuza kuthi ga kwixesha lethu, izinto eziziimfihlelo zeBhabhiloni yamandulo zibonakala kwiinkolelo noqheliselo lweenkonzo zehlabathi. (ISityhilelo 17:7) Igama lesiHebhere leso sixeko, iBhabheli, lithetha “iSiphithiphithi,” gama elo eliyifaneleyo ingxubevange yanamhlanje yonqulo lobuxoki!

3. (a) IBhabhiloni yabathimba ixesha elingakanani abantu bakaThixo, ibasondeza ngakumbi entwenini? (b) Yawa nini iBhabhiloni ngokuyintlekele, ibe kwakutheni ukuze isiphelo sayo singafiki ngelo xesha?

³ IBhabhiloni yamandulo yavela kweso sakhiwo santlandlolo ibe, xa kwabhukuqwa iAsiriya ngowama-632 B.C.E., yaba ligunya lesithathu lehlabathi kwimbali yeBhayibhile. Uzuko lwayo aluzange luhlale ixesha elide—lwahlala ithuba elingaphantsi kweminyaka elikhulu—kodwa phantse iminyaka engama-70 yaloo minyaka, yagcina abantu bakaThixo amaSirayeli ekuthinjweni. Oku kwabasondeza ngakumbi kwiitempile nezindlu zeenkonzo eziliwaka zeBhabhiloni, koothixo bayo ababengoobathathu emnye noothixo bayo beedemon abangoobathathu emnye, kunqulo lwayo lukanina nonyana, nakunqulo lwayo lweziqu zasezulwini ekwakuthiwa zingoothixo abangafiyo. Ngaloo ndlela, amaSirayeli athinjiweyo ayephantsi kweso sazulu sehlabathi sonqulo lobuxoki xa, ngowama-539 B.C.E., esi sixeko saseBhabhiloni sathi soyiswa ngokuyintlekele. Kodwa isiphelo sayo sasingekafiki! Abo babeyoyisile baqhubeka beyisebenzisa njengesazulu sonqulo esidumileyo.

Ubukhosi Bonqulo Behlabathi Lonke

4. (a) Abaprofeti bakaYehova bavakalisa ntoni ngokuphathelele iBhabhiloni, ibe kwenzeka ntoni kwiBhabhiloni? (b) Yiyiphi enye iBhabhiloni ekhoyo, eyonakalisa abantu bomhlaba?

⁴ Abaprofeti bakaYehova babevakalise umgwebo wokuba iBhabhiloni yayimele itshayelwe “ngomtshayelo wentshabalalo”—“njengoko wayibhukuqayo uThixo iSodom neGomora.” Ngaba ezo ziprofeto zazalisekiswa kamva? Ewe, zazalisekiswa zonke! Ekuhambeni kwexesha, iBhabhiloni yamandulo yaba yimfumba yamatye—ingenabemi ngaphandle kwezinto ezirhubuluzayo namarhamncwa asendle—kanye njengokuba kwakuxelwe kwangaphambili! (Isaya 13:9, 19-22; 14:23; Yeremiya 50:35, 38-40) Noko ke, loo Bhabhiloni iyenye, iBhabhiloni Enkulu yanamhla, isekho. Njengobukhosi behlabathi bonqulo lobuxoki, isazingisa kwiimfundiso nakumoya wokuzicingela weBhabhiloni yantlandlolo. Isisixhobo esiphambili sikaSathana sokumfamekisa abantu ukuba bangaziboni iinjongo zoBukumkani bukaYehova.—2 Korinte 4:3, 4.

5. (a) Ziziphi iinkonzo ezavelayo ngoxa iBhabhiloni yayifikelele incopho yozuko lwayo, kodwa kwakutheni ukuze uSathana angaphumeleli ekuzaliseni ihlabathi lonke ngonqulo lobuxoki? (b) USathana walusebenzisa njani unqulo lobuxoki emva kokuvela kobuKristu?

⁵ Malunga nenkulungwane yesithandathu ngaphambi kokuzalwa kukaKristu, xa elo gunya lehlabathi laseBhabhiloni lathi lafikelela kwincopho yozuko lwalo, iinkonzo zobuHindu, zobuBhuda, zobuConfucius nezobuShinto nazo zathi zavela. Kodwa ngaba uSathana waphumelela ekuzaliseni ihlabathi lonke ngonqulo lobuxoki? Hayi, kuba intsalela yamangqina kaYehova amandulo yabuya eBhabhiloni yaya eYerusalem ukuze ivuselele kwakhona unqulo lukaYehova. Ngaloo ndlela, kwiinkulungwane ezintandathu kamva, amaYuda athembekileyo ayekho apho, ukuze amkele uMesiya nokuze abe ngamalungu okuqala ebandla lamaKristu. Unqulo lobuxoki lwabangela ukufel’ inkolo koNyana kaThixo lwaza lwaba sisixhobo sikaSathana sokuchasa ubuKristu bokwenyaniso, kanye njengokuba uYesu nabapostile bakhe babelumkisile.—Mateyu 7:15; IZenzo 20:29, 30; 2 Petros 2:1.

6. (a) USathana wazama njani ukonakalisa iimfundiso zobuKristu, yaye ziziphi iimfundiso ezingazukisi Thixo ezathi zavela? (b) Kwenzeka ntoni kumawaka abantu awayekhetha inyaniso yeBhayibhile kuneemfundiso ezisisiseko zeBhabhiloni?

⁶ Ngokukodwa emva kokutshatyalaliswa kwesibini kweYerusalem ngowama-70 C.E., uSathana wasebenzisa abapostile bobuxoki ukuze onakalise iimfundiso zamaKristu, ezixubanisa neemfundiso zenkolelo yaseBhabhiloni nentanda-bulumko yehlabathi yamaGrike. Ngaloo ndlela, ‘uthixo ongubathathu emnye,’ wathabathel’ indawo ‘uYehova omnye’ ekuthethwa ngaye eBhayibhileni. (Duteronomi 6:4; Marko 12:29; 1 Korinte 8:5, 6) Yaye imfundiso yokungafi komphefumlo womntu, njengoko yayifundiswa ngumthandi wobulumko ongumhedeni uPlato, yafakwa ukuze ibhangise imfundiso yeBhayibhile exabisekileyo yedini likaKristu novuko. Oko kwavulela indlela inkolelo yesihogo somlilo nendawo engatshisi kangako yentlambululo miphefumlo. (INdumiso 89:48; Hezekile 18:4, 20) Iimfundiso ezingazukisi Thixo ngolo hlobo eziye zoyikisa abantu ziye zanceda ekuzaliseni iibhokisi zemali zeecawa. Ngokubhekele phaya, ngemihla yokuNcina amakholwa kweRoma naleyo yoHlaziyo, abefundisi abazange balindele amalangatye esihogo somlilo ukuze ibe ngawo athuthumbisayo. Amawaka abantu awayekhetha inyaniso yeBhayibhile kunemfundiso esisiseko yeBhabhiloni ayetshiselwa esibondeni somthi ephila ngamaKatolika nangamaProtestanti. Kodwa njengoko siza kubona, ukuhenyuza kweBhabhiloni Enkulu akuphelelanga nje ekukhuthazeni ubuxoki.

Umhla KaYehova Womgwebo

7. (a) Kunini ibe kukanjani awathi uYehova waqalisa ukubuyisela iinyaniso zeBhayibhile ezisisiseko waza wabhenca iimfundiso zobuxoki zeBhabhiloni? (b) Ziziphi iinyaniso zeBhayibhile ezisisiseko ezabuyiselwa ngaBafundi beBhayibhile?

⁷ Umhla wokuba uYehova aphumeze umgwebo wakhe kwihenyukazi umele ufike! (Hebhere 10:30) Kuye kwakho ithuba lokulungiselela oko, elaqala ngeminyaka yee-1870, xa uYehova wathumela “umthunywa” wakhe—iqela elinyanisekileyo labafundi beBhayibhile—ukuba abuyisele iinyaniso ezisisiseko zeBhayibhile nokuba abhence iimfundiso zobuxoki zeBhabhiloni. (Malaki 3:1a) Eli qela ‘lomthunywa’ liye lazithoba kumazwi esiprofeto seSityhilelo 4:11 athi: “Ufanele, Nkosi, ukwamkela uzuko, nembeko, namandla; ngokuba inguwe owadala zonke izinto, nangenxa yokuthanda kwakho zikho, zadalelwa oko.” Kwakhona lo “mthunywa” uye waba ngumvakalisi ongafihlisiyo wedini likaYesu lentlawulelo, ilungiselelo likaThixo lokuhlawulela uluntu. Okokuqala, uluntu oluhlawulelweyo lwaluya kuquka ‘umhlambi omncinane’ oza kulawula noYesu eBukumkanini bakhe basezulwini ibe, kamva, amakhulu ezigidi ayeya kuphila ngonaphakade emhlabeni owenziwe iParadisi—uninzi lwawo oluya kuvuswa kwabafileyo. (Luka 12:32; 1 Yohane 2:2; IZenzo 24:15) Ewe, abo Bafundi BeBhayibhile bazibuyisela ezi nyaniso zisisiseko, ibe ngendlela efuziselayo, bade ‘bavulela umbhobho wamanzi esihogweni baza bacima loo mlilo’ wemfundiso esisiseko yeBhabhiloni yentuthumbo kanaphakade!a

8. (a) Abefundisi beNgqobhoko bayisebenzisa njani iMfazwe Yehlabathi I ekuzameni ukutshabalalisa aBafundi beBhayibhile? (b) Kwenzeka ntoni kwijaji eyagcina amagosa asibhozo eWatch Tower Society entolongweni ngokwala ukuba bakhululwe ngebheyile?

⁸ Kangangeminyaka enokuba ngama-40 aba Bafundi BeBhayibhile bavakalisa ngokungafihlisiyo ukuba unyaka we-1914 wawuya kuphawula ukuphela kwamaXesha eeNtlanga. Kanye, njengoko kwakulindelwe, loo nyaka waba neziganeko ezigungqisa ihlabathi, nemfazwe yehlabathi yokuqala eyothusa ngokufanayo. Enjani yona into eyenziwa ngabefundisi beNgqobhoko—inxalenye edumileyo yeBhabhiloni Enkulu—ukuzama ukusebenzisa amanqam ehlabathi ukuze batshabalalise abo Bafundi BeBhayibhile bangafihlisiyo! Ekugqibeleni, ngowe-1918, bakhwelisa kuloliwe amagosa asibhozo eWatch Tower Society besiya kuwavalela entolongweni ngenkohliso bewatyhola ngokuvukela umthetho. Kodwa la magosa akhululwa kwithuba leenyanga ezisithoba ibe kamva afunyanwa engenatyala. Ijaji karhulumente waseUnited States uMartin T. Manton, owayegcine aba Bafundi beBhayibhile entolongweni ngokwala ukuba bakhululwe ngebheyile, kamva wathi wazinyaswa nguPopu Pius XI, emnika isibizo sokuba “likhalipha lomthetho kaGregory Omkhulu Ongcwele.” Noko ke, ukuzuka kwakhe kwaba kokwexeshana, kuba ngowe-1939 wafumana isigwebo seminyaka emibini entolongweni waza wahlawuliswa imali eninzi. Kwakutheni? Kungenxa yokuba wafunyanwa enetyala lokuthi ngokunyotywa athengise izigqibo zenkundla ezithandathu ngemali eziirandi ezingama-446 400 iyonke!

9. Isiprofeto sikaMalaki sakuchaza njani oko kwakusenzeka kubantu bakaYehova, ibe ngaloo ndlela umgwebo waqala ngoobani?

⁹ Njengoko sele siphawulile, abantu bakaYehova bafikelela kwithuba lokuvavanywa ngokuqatha ngowe-1918. Amazwi angakumbi omprofeti uMalaki 3:1-3 acacisa oko kwakusenzeka: “Iya kuza ke ngesiquphe etempileni yayo iNkosi [uYehova] leyo niyifunayo; kwaumthunywa womnqophiso [ka-Abraham] enimlangazelelayo”—uYesu. Ewe, uYehova weza noKristu wakhe ukuze agwebe. Ngoko uYehova uyabuza: “Ngubani na ke onokuyinyamezela imini yokuza kwakhe? Ngubani na ke onokuma ekubonakaleni kwakhe? Ngokuba unjengomlilo womnyibilikisi, unjengesoda yabaxovuli beengubo.” Ngokutsho kweyoku-1 kaPetros 4:17, umgwebo wawuza kuqala kwabo babezibiza ngokuthi ‘bangabendlu kaThixo.’ Ngaloo ndlela, amaKristu okwenyaniso asulungekiswa aza acocwa ukuze alungele inkonzo kaYehova.

‘PHUMANI KUYO, BANTU BAM’!

10. Nguwuphi umgwebo kaThixo owafikela iNgqobhoko nalo lonke unqulo lobuxoki ngowe-1919, usiba nawuphi umphumo kwiBhabhiloni Enkulu?

¹⁰ Njengenxalenye engaguqukiyo yeBhabhiloni Enkulu, abefundisi beNgqobhoko abanakuwunyamezela umgwebo kaYehova. Baye bazingcolisa kakubi iingubo zabo ngokuba nenxaxheba ekubulaweni kwabantu ngethuba lemfazwe yehlabathi nangokutshutshisa amaKristu okwenyaniso. (Yeremiya 2:34) Kunokuba babhengeze uBukumkani basezulwini obuzayo phantsi koKristu, baphakamisa uManyano Lwezizwe olwenziwe ngabantu, abaluchaza ‘njengembonakaliso yobupolitika yoBukumkani bukaThixo emhlabeni.’ Ngowe-1919 kwabonakala ukuba uYehova wayezise umgwebo kwiNgqobhoko—ibe eneneni kulo lonke unqulo lobuxoki. IBhabhiloni Enkulu yayiwile, igwetyelwe ukufa! Lalifikile ixesha lokuba bonke abathandi benyaniso nobulungisa benze ngokuvisisana nomyalelo wesiprofeto esikuYeremiya 51:45: “Phumani phakathi kwayo, bantu bam; sizani elowo umphefumlo wakhe, ngenxa yokuvutha komsindo kaYehova.”

11, 12. (a) Sithini isithunywa sezulu kwiSityhilelo 17:1, 2 ngokuphathelele ukugwetywa kweBhabhiloni Enkulu? (b) Ayintoni “amanzi amaninzi” elihleli kuwo ihenyukazi elikhulu, ibe libenze njani abo bawumiyo umhlaba ukuba ‘banxiliswe yiwayini yobuhenyu balo’?

¹¹ IBhabhiloni Enkulu iwile! Kodwa ayikatshatyalaliswa. Njengobukhosi behlabathi bonqulo lobuxoki, iza kuqhubeka isebenza ithuba elifutshane njengesixhobo esiphambili sikaSathana senkohliso. UThixo uza kuyigweba njani okwesihlandlo sokugqibela? Asishiywanga sithandabuza! Masityhile iiBhayibhile zethu kwiSityhilelo 17:1, 2. Apha isithunywa sezulu sithetha nompostile uYohane ibe, sisebenzisa yena, sithetha nabo bafunda ngesi siprofeto namhlanje, sisithi: “Yiza apha, ndikubonise ukugwetywa kwalo ihenyukazi elikhulu, elihleli phezu kwawo amanzi amaninzi; abahenyuze nalo ookumkani bomhlaba, abo bawumiyo umhlaba, banxiliswa yiwayini yobuhenyu bayo.” Ibinzana elithi “amanzi amaninzi” libhekisela kuluntu olungazolanga noluyinkungu nelanga, oluthi okwangoku lucinezelwe lihenyukazi elikhulu. Ibe esi siprofeto sithi “abo bawumiyo umhlaba” banxiliswa yiwayini yalo. Bazihlohla ngeemfundiso zobuxoki nangeendlela ezimbi zokuziphatha zehlabathi zeBhabhiloni Enkulu ibe bahamba begxadazela, ngokungathi banxiliswe yiwayini engabizi mali ininzi nethengiswa ngokungekho mthethweni.

¹² KuYakobi 4:4 siyafunda: “Bakrexezindini, bakrexezikazindini, anazi na ukuba ubuhlobo balo ihlabathi bubutshaba kuye uThixo?” Unqulo lwenkulungwane yamashumi amabini lusoloko lukulungele ukulalanisa neli hlabathi, ibe oku kwenziwa ngokukodwa yiNgqobhoko. Asikuko nje kuphela ukuba abefundisi bayo bayasilela ukuvakalisa iindaba ezilungileyo zoBukumkani bukaYehova obuzayo kodwa babhangisa iimfundiso zeBhayibhile zokuziphatha okuhle, bebetha ngoyaba uvula-zibhuqe wehlabathi phakathi kwamalungu ecawa. Kwanabefundisi abakho msulwa kangako ekwenzeni umbulo wokoqobo, owagxekwa ngokuphandle ngumpostile uPawulos xa wathi: “Musani ukulahlekiswa; abenza umbulo, nabakhonzi bezithixo, nabakrexezi, nezifebe namadoda alalanayo, . . . abayi kubudla ilifa ubukumkani bukaThixo. Naye ninjalo ke inxenye yenu; kuloko nahlanjululwayo.”—1 Korinte 6:9-11.

‘Ukuzityikatyika Eludakeni’

13, 14. (a) Yiyiphi imizekelo ebonisa ukuba abefundisi banamhlanje abakhange ‘bahlanjululwe’? (b) Sisiphi isimo sengqondo elaba naso ibhunga lecawa yaseTshetshi ngokubhekisele kwizenzo zamafanasini, ibe umbhali weendaba wathi mayiphinde ithiywe njani icawa? (c) Ngawaphi amazwi ompostile uPetros abafanelekela kakuhle abefundisi abawexukileyo?

¹³ Ngaba abefundisi banamhlanje baye ‘bahlanjululwa’? Kaloku, ngokomzekelo, khawuqwalasele imeko yaseBritani, ndawo leyo eyakhe yayintsika yobuProtestanti. NgoNovemba we-1987, xa inkulu baphathiswa yaseBritani yayibongoza abefundisi ukuba bamisele ukhokelo ekuziphatheni okuhle, umfundisi wesiphaluka wecawa yaseTshetshi wathi: “Amafanasini anelungelo elikhulu lokuqhelisela isini njengoko nabani na esenza; sifanele sibujonge njengobulungileyo size sikhuthaze ukuthembeka [phakathi kwamafanasini].” Iphephandaba laseLondon lanikela le ngxelo: “Izenzo zobufanasini ziye zesamela kakhulu komnye unokholeji wabefundisi baseTshetshi kangangokuba abafundi abasuka komnye unokholeji baye balelwa ngabaphathi ukuba bayityelele loo ndawo.” Kolunye uphengululo olwenziwayo kwaqikelelwa ukuba “kwesinye isithili saseLondon, iqela labefundisi elityekele kubufanasini lisenokuba ngaphezu kwesiqingatha sabo bonke abefundisi balapho.” Ibe kwenye ingqungquthela yecawa, ama-95 ekhulwini abefundisi becawa yaseTshetshi bayixhasa ingcamango yokuba umbulo nokrexezo zinokubizwa njengesono, kodwa kungekhona izenzo zamafanasini; izenzo ezinjalo zobufanasini kwathiwa kukusilela nje ukufikelela umgangatho oqhelekileyo. Egqabaza ngako konke oku, omnye umbhali weendaba wathi kunokwenziwa kakuhle ukuba kunokuphindwa kuthiywe icawa yaseTshetshi ngokuthi yiSodom neGomora. Elinye iphephandaba laseLondon lavakalisa oku: “Abantu baseBritani babambe ongezantsi njengoko becamngca ngemiphumo yesizukulwana sikavula-zibhuqe.

¹⁴ Enjani yona indlela abathe abefundisi abawexuke kangangeminyaka bawafanekela ngayo amazwi ompostile uPetros athi: “Kananjalo ke liyinene iqhalo elithi: ‘Inja ibuyele kumhlanzo wayo; ihagu ehlanjiweyo ibuye yazityikatyika eludakeni’”!—2 Petros 2:22, TE.

15. (a) Kukuphi ukuwohloka kwemigaqo yokuziphatha okuhle okuye kwakho kuyo yonke iNgqobhoko? (b) Ngoobani abamele baphendule ngesi sivuno sibangel’ usizi?

¹⁵ Kuyo yonke iNgqobhoko, ibe eneneni kulo lonke ihlabathi, kukho ukuwohloka okoyikisayo kwimigaqo yokuziphatha okuhle. Kweminye imimandla, ngoku umtshato ugqalwa njengongeyomfuneko, ibe abo batshatileyo bacinga ukuba ukuthembeka emtshatweni kukusela ngendeb’ endala. Bambalwa abatshata ngokusemthethweni, ibe kwabo benjenjalo umlinganiselo woqhawulo-mtshato uyanda. EUnited States, inani labantu abaqhawula umtshato liye laphindeka ngaphezu kwesithathu kwiminyaka engama-25 edluleyo lifikelela kwisigidi nyaka ngamnye. EBritani, ebudeni bethuba leminyaka engama-20 ukususela ngowe-1965, inani labantu abaqhawula umtshato laphindeka kane, lisusela kuma-41-000 ukuya kwi-175 000. Abangatshatanga bakhetha ukuhlalisana nabangatshatanga besinye isini, ibe abaninzi bangoodlalani. Bakhala kalusizi ngenxa yezifo ezidluliselwa ngeentlobano zesini, ugawulayo (iAIDS) engobalaseleyo kuzo, owande kangangoboya benja ngenxa yokuphila kwabo ubomi bokuziphatha okubi kodwa bezingisa kuqheliselo lwabo lwesini olulihlazo. Abefundisi beNgqobhoko abawohlwayanga amalungu ecawa awonayo. Ngomlinganiselo abaye bakubetha ngawo ngoyaba ukuziphatha okubi, bamele baphendule ngesi sivuno sibangel’ usizi.—Yeremiya 5:29-31.

16. (a) Yintoni ebalaselisa isibakala sokuba iBhabhiloni Enkulu iwile, ibe ngawaphi amazwi esithunywa sezulu afanelekileyo akwiSityhilelo 18:2? (b) Yintoni abamele bayenze bonke abo bafuna ukusinda kwisiphelo sehlabathi?

¹⁶ Kwakhona imeko elusizi ekuziphatheni kobukhosi behlabathi bonqulo lobuxoki iphawula isibakala sokuba iBhabhiloni Enkulu iwile. UThixo uyigwebile ibe uyiphawulele intshabalalo. Ngoko, hayi indlela ekufaneleke ngayo ukudanduluka ngezwi elikhulu kwesithunywa sezulu kwiSityhilelo 18:2: “Iwile, iwile iBhabheli Enkulu, yaba likhaya leedemon, nentolongo yeentaka zonke ezingcolileyo, ezithiyekileyo.” Ibe hayi indlela ekubaluleke ngayo ukuba bonke abo bafuna ukusinda kwisiphelo seli hlabathi basabele ngoku ekuphenduleni ubizo olukwindinyana 4: “Phumani kuyo, bantu bam, ukuze ningadlelani nayo ngezono zayo, nokuze ningamkeliswa kwizibetho zayo”! Ukuphuma kunqulo lobuxoki kulinyathelo elibalulekileyo elikhokelela ekusindeni “embandezelweni enkulu” engaphambili. (ISityhilelo 7:14) Kodwa kufuneka okungakumbi, njengoko siza kubona!

[Umbhalo osemazantsi]

[Ibhokisi ekwiphepha 8]

UKUZIPHATHA KWABEFUNDISI

“Amakhulu abantwana abaye baxhatshazwa ngokwesini ngabefundisi bamaKatolika eUnited States ebudeni beminyaka emihlanu edluleyo baye benzakala ngokoyikekayo ngeemvakalelo, batsho njalo abazali, oogqirha bengqondo, amapolisa namagqwetha abandakanyeke kula matyala.”—Akron Beacon Journal, Januwari 3, 1988.

“ICawa yamaRoma Katolika eUnited States iye yanyanzelelwa ukuba ihlawule izigidi zeedola zomonakalo kwiintsapho eziye zalwela ukuba abantwana bazo baye baxhatshazwa ngokwesini ngabefundisi. Phezu kwako nje oko, le ngxaki iye yathabath’ unyawo ngendlela eyothusayo ngokokude amagqwetha amaninzi namaxhoba athi icawa iwabetha ngoyaba yaye iyawafihla amatyala anjalo.”—The Miami Herald, Januwari 3, 1988.

[Imifanekiso ekwiphepha 6]

Imifanekiso eqingqiweyo yoothixo abangoobathathu emnye—eyeYiputa yamandulo neyeNgqobhoko

[Inkcazelo]

Saint-Remi Museum collection, Reims, photo by J. Terrisse

Louvre Museum, eParis

[Umfanekiso okwiphepha 9]

IBhayibhile ikufanisa ukuziphatha okubi kweenkokeli zonqulo nehagukazi ehlanjiweyo ethi ibuyele ekuzityikatyikeni eludakeni