Nqula UMdali, Kungekhona Indalo

“NguYehova uThixo wakho omele umnqule, yaye umele uyinikele kuye kuphela inkonzo engcwele.”—LUKA 4:8, “NW.”

1. Ibinzana elithi “ukunqula” lichazwa njani, yaye unqulo lokwenyaniso lufanele luphunyezwe njani?

IBINZANA elithi “ukunqula” lichazwa ngolu hlobo kwisichazi-magama: “Ukugqala okuthile njengokufanelwe yintlonelo, yimbeko, okanye luzinikelo olupheleleyo, kwanolugqithiseleyo.”a Ngubani ke ofanele anqulwe ngaloo ndlela? UYesu Kristu wathi: “Uze uyithande iNkosi [“uYehova,” “NW”] uThixo wakho ngentliziyo yakho iphela, nangomphefumlo wakho uphela, nangengqondo yakho iphela.” (Mateyu 22:37) Kwakhona, xa wayenikwa zonke izikumkani zehlabathi ukuba nje wayenokwenza ‘isenzo esinye sokunqula’ uSathana, uYesu walandula, esithi: “NguYehova uThixo wakho omele umnqule, yaye umele uyinikele kuye kuphela inkonzo engcwele.” (Luka 4:7, 8, NW) Ngokwamazwi kaYesu nezenzo zakhe, kucace mhlophe ukuba nguYehova uThixo kuphela omele anqulwe. Olu nqulo luquka “inkonzo engcwele,” kuba “ukholo, ingekho imisebenzi, lufile.”—Yakobi 2:26.

2. Kutheni kufanelekile ukunqula uMdali kuphela?

² Ukunqula uYehova ngaloo ndlela kufanelekile kuba unguMongami Ophakamileyo wendalo iphela, uMdali wamazulu awoyikekayo nowomhlaba nezinto zonke eziphila kuwo. Njengonjalo, nguye kuphela ofanele agqalwe ngabantu njengofanelwe “yintlonelo, yimbeko, okanye luzinikelo olupheleleyo, kwanolugqithiseleyo.” IBhayibhile ithi: “Ufanele, Nkosi [“Yehova,” NW] ukwamkela uzuko, nembeko, namandla; ngokuba inguwe owadala zonke izinto, nangenxa yokuthanda kwakho zikho, zadalelwa oko.” (ISityhilelo 4:11) Ngokuqinisekileyo, akakho umntu nje ongento yanto, kungekho nanto iphilayo okanye engaphiliyo, enokufanelwa “yintlonelo, yimbeko, okanye luzinikelo” olunjalo. NguYehova kuphela ofanelwe “luzinikelo olupheleleyo.”—Eksodus 20:3-6, NW.

Kungxamiseke Ngokukhethekileyo

3. Kutheni kungxamiseke ngokukhethekileyo nje ukuba sinqule uThixo?

³ Ngenxa yokuba siphila kwixesha lomgwebo, ngoku kungxamiseke ngokukhethekileyo ukunqula uThixo ngokufanelekileyo. Kuqinisekiswa ngezinto eziya kuba likamva labathile ngokwahlukeneyo. ILizwi likaThixo elibuprofeti lisixelela ukuba kule “mihla yokugqibela” yale nkqubo ikhoyo yezinto, uKristu Yesu selefikile ekubuqaqawuli basezulwini “enazo zonke izithunywa.” Ufika ngayiphi injongo? UYesu ubuqu wayixela kwangaphambili loo njongo, esithi: “Zihlanganiswe phambi kwakhe zonke iintlanga, abahlule abanye kwabanye, njengokuba umalusi ezahlula izimvu ezibhokhweni.” Izimvu ziza kuya “ebomini obungunaphakade.” Iibhokhwe ziza kuya “elubethweni olungunaphakade.”—2 Timoti 3:1-5; Mateyu 25:31, 32, 46.

4. (a) UPawulos ubachaza njani abo baza kutshatyalaliswa ngonaphakade ekuphelisweni kweli hlabathi? (b) Sisiphi isimo sengqondo esiboniswa ngabo baza kufumana ubomi obungunaphakade?

⁴ Umpostile uPawulos wabhala “[ngokutyhileka] kweNkosi uYesu, ivela emazulwini inezithunywa zamandla ayo; inomlilo odangazelayo, ibaphindezela abangamaziyo uThixo, nabangazilulameliyo iindaba ezilungileyo zeNkosi yethu uYesu Kristu; bona abo baya kuva ukubethwa, intshabalalo engunaphakade ke leyo.” (2 Tesalonika 1:7-9) Ngaloo ndlela, intshabalalo engunaphakade likamva labantu abangoontamo-lukhuni nabanjengeebhokhwe abangafuniyo ukwazi ngeenjongo zikaThixo okanye abasuka bazalel’ endle bangafuni ukuthabatha isenzo xa ithuba livela. Kodwa ‘ubomi obungunaphakade’ bulikamva labantu abalulamileyo, abanjengezimvu abafuna ukwazi ngoYehova, bayibekele indlebe imiyalelo yakhe, bandule ke benze ukuthanda kwakhe. IBhayibhile ithi: “Ihlabathi ke liyadlula, nenkanuko yalo; ke yena owenza ukuthanda kukaThixo uhleli ngonaphakade.”—1 Yohane 2:17; bona kwaneyesi-2 kaPetros 2:12.

5, 6. (a) Yintoni umntu amele ayenze ukuze afumane inyaniso engoYehova neenjongo zakhe? (b) Kutheni le nto sinokuba nentembelo yokuba inyaniso iya kufikelela kwabo bayifunayo ingakhathaliseki imeko yabo ebomini?

⁵ Abantu abanjengezimvu bakulungele ukuncama ixesha, amandla, nobuncwane bezinto eziphathekayo ukuze bafune inyaniso. Benza oko IMizekeliso 2:1-5 ikutshoyo: “Nyana wam, ukuba uthe wazamkela iintetho zam, wayiqwebela kuwe imithetho yam, ukuze uyibazele ubulumko indlebe yakho, uyithobele ukuqonda intliziyo yakho; ewe, ukuba uthe wayibiza ingqondo, walisa ekuqondeni ilizwi lakho; ukuba uthe wabufuna njengesilivere, wabumba njengobutyebi obuselelweyo: uya kwandula ukukuqonda ukoyika uYehova, ukufumane ukumazi uThixo.”

⁶ Ukuvuma ukufuna uYehova kuko kanye okwahlula abantu abanjengezimvu kwabanjengeebhokhwe. “Ukuba uthe wamfuna, wofunyanwa nguwe; ukuba uthe wamshiya, wokulahla mpela.” (1 Kronike 28:9) Ngaloo ndlela, kungakhathaliseki ukuba umntu ungowaluphi na uhlanga okanye isizwe, ingakhathaliseki imfundo anayo, enoba usisityebi okanye ulihlwempu, ukuba uyifuna ngokwenene inyaniso engoThixo, uya kuyifumana. Bekummandla wasezulwini, uKristu nezithunywa zakhe zasezulwini baya kuqinisekisa ukuba inyaniso iyafikelela kulowo uyifunayo, ingakhathaliseki indawo ahlala kuyo loo mntu. Uya kuba yintoni umvuzo woko kufuna? UYesu wathi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3; bona kwanoHezekile 9:4.

Kuphephe Ukunqula Indalo

7, 8. (a) Kunabuphi ubungozi ukunqula abantu? (b) Chaza indlela uMariya agqalwa ngayo njengofanelwe ‘yintlonelo, yimbeko, okanye luzinikelo olugqithiseleyo.’

⁷ Abantu abaninzi emhlabeni wonke babagqala abanye abantu—abaphilileyo okanye abafileyo—befanelwe ‘yintlonelo, yimbeko, okanye luzinikelo olugqithiseleyo.’ Ngoxa besenokuvakalelwa kukuba oku kuyinxalenye yonqulo lwabo kuThixo, ngokwenene kuyabatyekisa kunqulo lokwenyaniso. Oku kubavulela indlela yokukholelwa kwiimfundiso baze babandakanyeke kuqheliselo olungavisisaniyo nokuthanda kukaThixo. Omnye umzekelo obalaseleyo woku yindlela uMariya, unina kaYesu, agqalwa ngayo zizigidi zabantu kumazwe obuRoma Katolika nawobuOthodoki bobuKatolika baseMpuma.

⁸ Abantu baqubuda baze banqule imifanekiso nemifuziselo kaMariya, yaye kwimfundiso yecawa engokwasemthethweni, kubhekiselwa kuye ngokuthi “uMariya oyiNtombi Enyulu uTheotokos.” Igama elithi the·o·toʹkos lithetha “uMzalikazi kaThixo” okanye “unina kaThixo.” INew Catholic Encyclopedia ithi: “UMariya ngunina kaThixo. . . . Ukuba uMariya ngokuyinyaniso akanguye unina kaThixo, ngoko uKristu akanguye uThixo wokwenene yaye engenguye nomntu wokwenene.” Ngaloo ndlela, njengenxalenye yemfundiso yazo kaBathathu Emnye, ezi nkonzo zifundisa ukuba uYesu wayenguThixo uSomandla ongumntu, nto leyo eyenza ukuba uMariya abe “ngunina kaThixo.” Kwale ncwadi yongezelela ngokuthi ukuzinikela kuMariya kuquka: “(1) ukunik’ imbeko, okanye ukuligqala ngentlonelo iwonga likaNina kaThixo oyiNtombi Enyulu; (2) ukubongoza, okanye ukucela ukuxolelwa nguMariya oyiNtombi Enyulu ongunina nokwayinkosazana; . . . nemithandazo yangasese [ebhekiswa kuMariya].”

9. Ngaba iBhayibhile ifundisa ukuba uMariya ‘wayengunina kaThixo’?

⁹ Phofu ke, igama elithi the·o·toʹkos alikho kwiZibhalo eziphefumlelweyo. Yaye ayikho indawo eBhayibhileni ethi uMariya ‘wayengunina kaThixo.’ UYesu akazange akufundise oko, engazange enjenjalo namaKristu enkulungwane yokuqala. Ngaphezu koko, iBhayibhile ibonisa ngokucacileyo ukuba uYesu wayengengoThixo uSomandla ongumntu kodwa wayenguNyana kaThixo.b Eneneni, xa uMariya waziswa sisithunywa sezulu ukuba wayeza kuzala unyana, waxelelwa oku: “UMoya oyiNgcwele uya kuza phezu kwakho, athi namandla Osenyangweni akusibekele; kungoko loo nto ingcwele izalwa nguwe iya kubizwa ngokuba nguNyana kaThixo.” (Luka 1:35) Ngoko uYesu wayenguNyana kaThixo, kungekhona uThixo ngokwakhe ongumntu. Ngenxa yoko, uMariya wayengunina wonyana kaThixo uYesu, kungekhona unina kaThixo ongumntu. Kungoko uYesu nabafundi bakhe bengazange bambize uMariya ngokuthi “ngunina kaThixo.”

10, 11. (a) Yiyiphi imizekelo ebonisa indlela uYesu awamgqala ngayo unina? (b) Abapostile nabafundi bakaYesu bamgqala njani unina?

¹⁰ Indlela uYesu awayemgqala ngayo unina ibonisa isigxina sakhe kuye. Kumsitho womtshato owawuseKana, ingxelo yeBhayibhile isixelela oku: “Kuthe ke, bakuphelelwa yiwayini, wathi unina kaYesu kuye, Abanawayini. Uthi uYesu kuye, Yintoni na enam nawe, mfazi?” Kule ndinyana uHlelo lweDouay yeBhayibhile yamaRoma Katolika lufundeka ngolu hlobo: “Mfazi, yintoni na ephakathi kwam nawe?” (Yohane 2:3, 4) Ngesinye isihlandlo, omnye umntu wathi kuye: “Sinoyolo isizalo esakubambayo, namabele owawanyayo.” Elo yayilithuba elihle lokuba uYesu amhlonele ngokukhethekileyo unina nelokubonisa abanye ukuba babefanele benze okufanayo. Kunokuba enjenjalo, uYesu wathi: “Yithi kanye, Banoyolo abo balivayo ilizwi likaThixo baligcine.”—Luka 11:27, 28.

¹¹ Amazwi anjalo abonisa ukuba uYesu wayekuphaphele ukuzinikela okanye ukumnika imbeko engamfanelanga uMariya okanye ukumbiza ngalo naliphi na igama elikhethekileyo. Akazange avumele ulwalamano lwabo lumphembelele. Yaye abapostile nabafundi balandela umzekelo wakhe, kuba akukho naphi na kwiincwadi zabo eziphefumlelweyo apho uMariya anikwa khona imbeko, igama, okanye amandla angamfanelanga. Ngoxa babemhlonela njengonina kaYesu, abazange bagabadele. Ngokuqinisekileyo abazange babhekisele kuye ‘njengonina kaThixo.’ Babesazi ukuba uYesu wayengengoThixo uSomandla ongumntu yaye, ngenxa yoko, besazi nokuba kwakungenakwenzeka ukuba uMariya abe ngunina kaThixo, sigxina eso iLizwi likaThixo elisibeka kude lee kuMariya.

Ukunqulwa Koothixokazi Abangoomama

12. Yavela phi yaye nini ingcamango yokuba uMariya ‘wayengunina kaThixo’?

¹² Ngoko, yavela phi le ngcamango? Yanyebelezela ngokuthe ngcembe kwiNgqobhoko ewexukileyo ngenkulungwane yesithathu neyesine yeXesha lethu Eliqhelekileyo. Oku kwenzeka ngokukhethekileyo emva konyaka wama-325 C.E. xa iBhunga laseNicaea laqulunqa imfundiso engeyoyazibhalo yokuba uKristu wayenguThixo. Yakuba loo ngcamango itenxileyo yamkelwe, kwaba lula ukufundisa ukuba uMariya ‘wayengunina kaThixo.’ Ngokubhekisele koku, iThe New Encyclopædia Britannica ithi: “Kubonakala ngathi igama elithi [‘unina kaThixo’] livele kunqulo, ngokunokwenzeka eAlexandria, malunga nenkulungwane yesithathu okanye yesine . . . Ngasekupheleni kwenkulungwane yesine, uTheotokos wayesele emiselwe ngokunempumelelo kumahlelo awahlukahlukeneyo ecawa.” INew Catholic Encyclopedia ibonisa ukuba le mfundiso yamkelwa ngokusemthethweni “ukususela kwiBhunga lase-Efese ngowama-431.”

13. Yintoni ekusenokwenzeka ukuba yaphembelela iBhunga lase-Efese ngowama-431 C.E. ukuba limvakalise ngokusemthethweni uMariya ‘njengonina kaThixo’?

¹³ Into ebangel’ umdla yindawo elo bhunga elahlanganisana kuyo nesizathu sokuhlanganisana kwalo. Incwadi iThe Cult of the Mother-Goddess, ebhalwe nguE. O. James, ithi: “IBhunga lase-Efese lahlanganisana kwiholo yecawa eTheotokos ngowama-431. Apho, ingakumbi kwisixeko esasidume kakubi ngokunqula uArtemis, okanye uDiana njengoko amaRoma ayembiza njalo, kwakusithiwa umfanekiso wakhe oqingqiweyo wawuwe uvela ezulwini, kufutshane netempile enkulu eyayinikezelwe kuMagna Mater [uNina Omkhulu] ukususela ngowama-330 B.C. ibe ngokwesithethe, yayinendawo yokuhlala uMariya okwexeshana, yaye kungangenkankulu ukuba ibinzana elithi ‘UMzalikazi kaThixo’ lalingaxhaswa apho.”

14. Imbali ingqina njani ukuba le mfundiso inemvelaphi yobuhedeni?

¹⁴ Kanye njengoBathathu Emnye, imfundiso ‘engonina kaThixo’ yimfundiso yobuhedeni eyathi ngobuqhetseba yaguqulelwa ekubeni yinkolelo yamaKristu. Yayibalasele kwiinkulungwane zeenkonzo zobuhedeni ngaphambi kokuzalwa kukaKristu. IThe New Encylopædia Britannica ibonisa oku phantsi komxholo othi “oothixokazi abangoomama”: “Ngabo nabaphi na oothixo ababhinqileyo abahlukahlukeneyo nemiqondiso yoomama yamandla okudala, yokuzala, yokuba neendibano zesini, yokondla neyomjikelo wokukhula. Kwakhona elo binzana liye lasetyenziswa kwimifanekiso eqingqiweyo eyahlukeneyo njengaleyo ebizwa ngokuba Ngoothixokazi BamaGrike Bothando Nobuhle Abenziwe Ngelitye nekwabizwa ngokuthi UMariya oyiNtombi Enyulu. . . . Ayikho inkqubo yelizwe ekungasetyenziswanga kuyo imiqondiso ethile yoomama ekuboniseni oothixo balo. . . . Ungumkhuseli nomondli womntwana onguThixo yaye, ngokubhekele phaya, ukwangumondli woluntu lonke.” Ngaloo ndlela, umfundisi wamaKatolika uAndrew Greely uthi kwincwadi yakhe iThe Making of the Popes 1978: “Umqondiso kaMariya unxibelelanisa ubuKristu ngokuthe ngqo neenkonzo zamandulo [zobuhedeni] zoothixokazi ababengoomama.”

Unqulo Olungafanelekanga

15. (a) Yintoni eye yenziwa yiNgqobhoko ngokuphathelele uMariya? (b) Ngokutsho kweBhayibhile, ngubani kuphela ongumlamli phakathi kwethu noThixo?

¹⁵ Ukuthi uMariya ‘wayengunina kaThixo’ kumphakamisela kwisikhundla sokuba abantu batyekele ekumnquleni, yaye oko koko bekusenzeka kangangeenkulungwane. Amakhulu amawaka abantu kumazwe amaninzi aye athandaza kuye okanye ngaye yaye aye azinikela ekunquleni imifanekiso yakhe eqingqiweyo nemifuziselo yakhe. Ngoxa abefundisi bezakwalizwi besenokuzama ukukungxengxezela oku ngokuthi ukuhlonelwa kukaMariya ngolo hlobo kuyindlela nje engangqalanga yokunqula uThixo, leyo asiyondlela uThixo akujonga ngayo oko. “Mnye uThixo; mnye nomlamli phakathi koThixo nabantu, umntu uKristu Yesu.” (1 Timoti 2:5; 1 Yohane 2:1, 2) UYesu ngokwakhe wathi: “Ndim indlela, ndim inyaniso, ndim ubomi; akukho namnye uzayo kuBawo, engezi ngam.”—Yohane 14:6.

16. UPetros noYohane bacacisa njani ukuba nguYehova kuphela omele anqulwe?

¹⁶ Ukuzinikela kuMariya ngokungqalileyo okanye ngokungangqalanga, ukuthandaza kuye, ukuqubuda kwimifanekiso yakhe eqingqiweyo nakwimifuziselo yakhe, kukukunqula indalo kunokunqula uMdali. Kukukunqula izithixo, ibe amaKristu ayalelwa ukuba ‘akubaleke ukubusa izithixo.’ (1 Korinte 10:14) Xa uKorneli ongoweeNtlanga waqubuda ngentlonelo kumpostile uPetros, phawula okwenzekayo: “Kwathi ke, xa angenayo uPetros, uKorneli wamhlangabeza, wawa ezinyaweni zakhe, waqubuda kuye. Uthe ke uPetros wamvusa, esithi, Phakama; nam ngokwam ndingumntu.” (IZenzo 10:25, 26) Ukuqubuda emntwini ngokumnqula kwakungafanelekanga, yaye uPetros wayengayi kukwamkela. Kwakhona, emva kokufumana umbono kwisithunywa sezulu, umpostile uYohane unikela le ngxelo: “Ndawa ndaqubuda phambi kweenyawo zesithunywa sezulu esandibonisa ezi zinto. Sithi kum, Lumka, ungenjenjalo; kuba ndingumkhonzi kunye nawe, nabazalwana bakho abaprofeti, nabo bawagcinayo amazwi ale ncwadi; qubuda [“nqula,” “NW”] kuThixo.” (ISityhilelo 22:8, 9) Ukuba akumelwanga kunqulwe kwanesithunywa esi sezulu sikaThixo, bebengoobani na ke bona abantu okanye imifanekiso yabo eqingqiweyo.

17. Yintoni intyilalwazi yamaKatolika evumayo ukuba isenokuba ngumphumo wokuhlonela uMariya?

¹⁷ Into yokuba ukuzinikela kuMariya okulolo hlobo kusenokuphumela kunqulo olungafanelekanga iyavunywa yiThe Catholic Encyclopedia. Uhlelo lokuqala lwalo mqulu lwathi: “Ayinakukhanyelwa into yokuba, ngokufuthi ukuzinikela okuthandwayo kwiNtombi Enyulu Engcwele kwakusenziwa ngokugqithiseleyo nangokugabadeleyo.”

18. Nguwuphi umthombo ebinokuphuma kuwo loo mfundiso ingeyoyazibhalo?

¹⁸ Yayinokuvela kuwuphi umthombo loo mfundiso engeyoyazibhalo? Umthombo osisiseko umele ube luTshaba lukaThixo, uSathana uMtyholi. (Yohane 8:44) Sasinokuba yintoni isizathu sokuba akhuthaze ukuveliswa kwemfundiso enjalo? Wayefuna ukuyisingela phantsi nokuyithob’ isidima iNkosi enguMongami uYehova, aphakamise abantu, aze abangele impixano. Iyabatyekisa abantu kunqulo oluyinyaniso ize ibangele ukuba bakhangele kwizidalwa ukuze bafumane usindiso. Kwakhona kangangeenkulungwane iye yabangela abefundisi banegunya elikhulu phezu kwabantu abaqhelekileyo, abathi bafundiswa ukuba bamele bazithobe ngokupheleleyo kwiinkokeli zabo zonqulo kuba ingabefundisi kuphela abanolwazi lwemfundo enjalo yezakwalizwi nentsonkothileyo.

19, 20. (a) Kutheni le nto sinokuqiniseka ukuba ngaphambi kokuphunyezwa kwemigwebo kaThixo, abantu ababumvu baya kuyifumana inyaniso? (b) Yiyiphi imibuzo eya kuxutyushwa ngokubhekele phaya kwinqaku elilandelayo?

¹⁹ Phofu ke, uYesu waxela kwangaphambili ukuba: “Zaye ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” (Mateyu 24:14) Yaye uYehova uthembisa ukuba ngokushunyayelwa koBukumkani, uya kuhlanganisa bonke abantu ababumvu ‘abayalele iindlela zakhe, ukuze bahambe ngomendo wakhe.’ (Isaya 2:2-4) Ngenxa yokuba behlanganiselwe kunqulo olunyulu lukaYehova, uYesu wathi ngabo: “Naniya kuyazi inyaniso, yaye inyaniso iya kunikhulula.” (Yohane 8:32) Ngoko abo bafuna inyaniso baya kuyifumana yaye baya kukhululwa kwiimfundiso zonqulo lobuxoki ezithintela abantu ukuba bangenzi ukuthanda koMdali.

²⁰ Kukho ezinye iimfundiso noqheliselo lonqulo olwamkelwa ngokubanzi oluye lwatyekisa abantu kunqulo lokwenyaniso loMdali, lukhuthaza ukuzinikela kwindalo. Luluphi olunye lwalo, yaye luye lwaphumela entwenini? Unqulo lokwenyaniso lubandakanya ntoni? Inqaku elilandelayo liza kuhlolisisa le mibuzo.

[Imibhalo esemazantsi]

Unokuphendula Uthini?

◻ UYesu wabonisa njani ngokucacileyo ukuba nguYehova kuphela omele anqulwe?

◻ Kutheni ngoku kungxamiseke ngokukhethekileyo ukunqula ngokufanelekileyo?

◻ Kutheni le nto uMariya engafanele anikwe imbeko engamfanelanga?

◻ Yavela phi ingcamango yokuba uMariya ‘ungunina kaThixo’?

◻ Umpostile uPetros noYohane bagxininisa njani ukuba nguYehova kuphela omele anqulwe?