Ikhaya Elitsha LeSikolo SaseGiliyadi Sabavangeli Basemazweni
NGOFEBRUWARI 1, 1943, uNathan H. Knorr, owayesakuba ngumongameli weWatchtower Bible and Tract Society, wanikela intetho yokuvulwa kweklasi yokuqala yesikolo esitsha. Walicacisela ikhulu labafundi elalilapho ukuba “akuyonjongo yesi [sikolo] ukunixhobisa ukuba nibe ngabalungiseleli abamiselweyo. Seningabalungiseleli kade ibe benisoloko nikhuthele kubulungiseleli kangangeminyaka. . . . Uludwe lwezifundo . . . lolwenjongo ekhethekileyo yokunilungiselela ukuba nibe ngabalungiseleli abanempumelelo engakumbi.” De kube namhlanje iSikolo seBhayibhile seWatchtower saseGiliyadi sisaqhubeka siqeqesha abalungiseleli ukwenzela umsebenzi wobuvangeli basemazweni.
Emva phayaa ngowe-1943, iSikolo saseGiliyadi sasikummandla waseFinger Lakes kwilizwe laseNew York. IGiliyadi iye yaqhubeka ilapho kangangeminyaka eli-17. Kwandule ke, ngowe-1961, yafuduselwa eBrooklyn. Ngayiphi injongo? Uludwe lwezifundo zaseGiliyadi belusoloko lucetyelwe ukuhlangabezana neemfuno zentlangano. Imfuneko yokwandisa nokuphucula ukwenziwa kwezinto kwizakhiwo zesebe ukutyhubela umhlaba kuye kwafuna ukuba abafundi baqeqeshwe ngokubanzi ngakumbi ngamalungu asebenza kwikomkhulu lamaNgqina kaYehova, eliseBrooklyn. Ngoko ke kangangeminyaka eliqela, kwakugxininiswa ngakumbi ekuqeqesheni abasebenzi bamasebe. Emva koko, kwanikelwa ingqalelo kwakhona kumsebenzi wobuvangeli basemazweni.
Kwiminyaka engama-27 eyalandelayo, ukususela kowe-1961 ukuya kowe-1988, abafundi beSikolo saseGiliyadi baye banandipha ilungelo lokuhlala nokufundela kanye phakathi kwabasebenzi bekomkhulu eliseBrooklyn. Apho abafundi bangenelwa lunxulumano olusondeleyo namalungu eQumrhu Elilawulayo lamaNgqina kaYehova nabanye abalungiseleli abanamava. Yiyiphi indlela efanelekileyo yokufunda indlela isebe leWatch Tower Society elisebenza ngayo? Abafundi abazange bangenelwe kuphela kuqeqesho lwaseklasini kodwa kwakhona ngokuqwalasela indlela abasebenzi bekomkhulu abasebenza ngayo suku ngalunye.
Esi Sikolo saseGiliyadi siye sanaliphi igalelo kumsebenzi wokushumayela wezizwe ngezizwe? Kwabo balungelelanisa iikomiti zamasebe abangama-93 belungelelanisa umsebenzi wazwenibanzi, ama-74 abo aphumelela kwiSikolo saseGiliyadi. Oku kububungqina obucacileyo bokuba la madoda afumana uqeqesho olusemagqabini lokusingatha imbopheleleko enzima yokwalusa abantu bakaThixo namhlanje. Inyambalala yabaveleli abahambahambayo ngoku abakhonza iimfuno zentlangano nabo baphumelela kwiSikolo saseGiliyadi. Ewe, ucwangciso loqeqesho lweSikolo saseGiliyadi luye lwahambisana neemfuno zentlangano.
IGiliyadi Iyafuduka EBrooklyn
Noko ke, kwaye kwakhona kwenziwa isigqibo sokufudusa iSikolo saseGiliyadi. Ngoko ngokwindla lowe-1988, iilori ezine ezizaliswe yifanitshala nempahla yaseofisini zaye zafika kwikhaya lesithathu laseGiliyadi—iiFama zeWatchtower, eziseWallkill, eNew York. Ngeenyanga nje ezimbini kuphela, abo basebenza ukulungisa umzi kwiiFama zeWatchtower balungiselela amagumbi amahle okufundela, ithala leencwadi, neeofisi zesikolo. Bambi basebenza imini nobusuku belungisa izakhiwo zesikolo ukuze zilunge ngexesha khon’ ukuze kuqaliswe uqeqesho olulandelayo.
Ngo-Oktobha 17, 1988, iklasi yaseGiliyadi yama-86 yaqalisa. Kungakhange kubekho nasinye isiphazamiso, isikolo saqhubeka nenjongo yaso ‘yokuqeqesha amadoda namabhinqa ukuze abe ngabalungiseleli abanempumelelo engakumbi.’ Kwindawo yaso entsha esingqongileyo kwiiFama zeWatchtower, ezinye zezinto ezazibangel’ umdla kwisikolo sokuqala esasikummandla waseFinger Lakes zenziwa zakho.
Abo Baphumelele Kwiklasi Yama-86
NgoMatshi 5, 1989, bebonke abasebenzi bekomkhulu leWatchtower eliseBrooklyn nabakwiiFama zeWatchtower bahlanganisana kwiHolo yeNdibano yeSixeko saseNew Jersey ukuze banandiphe ucwangciso nabo babephumelele kwiklasi yama-86. UDaniel Sydlik, ilungu leQumrhu Elilawulayo, waluqalisa ucwangciso ngomthandazo. UKarl Klein olilungu leQumrhu Elilawulayo waba ngusihlalo. Kwingabula-zigcawu yakhe, wabonisa umahluko okhoyo phakathi kwabavangeli beNgqobhoko nabo bamaNgqina kaYehova. Hayi indlela abaye banempumelelo ngayo abavangeli basemazweni abaqeqeshwe eGiliyadi ekufundiseni inyaniso engeLizwi likaThixo kumazwe anjengeJapan, apho ngoku kukho amaNgqina angaphezu kwe-131 000 asebenza ngenkuthalo kubulungiseleli basentsimini!
Esebenzisa umxholo othi “Maniphawulwe Ngemisebenzi Emihle,” uDonald Krebs wacacisa indima eyintloko abavangeli basemazweni baseGiliyadi abathe banayo zwenibanzi ekwandiseni intlangano kaYehova. Wathi: “Imisebenzi yenu emihle kwintsimi yobuvangeli basemazweni njengabo bafundisa iLizwi likaThixo iya kuba . . . yinto ephambili yokunahlula. Siyanikhuthaza ukuba nibe nenyameko. UYehova uya kuyisikelela ngokutyebileyo imigudu yenu.”
UGeorge Gangas, ilungu leQumrhu Elilawulayo, wanikela udlwabevu lwentetho enomxholo othi “IBhayibhile Iyeyona Ncwadi Ibalulekileyo Phantsi Kwelanga.” Eluleka abo babephumelele wathi: “Ningaze nikulibale ukufundisisa iBhayibhile. IBhayibhile izele bubutyebi obungokomoya . . . obukhazimlayo nobumenyezelayo. Obuxabisayo ufuna ukubujonga ngokuphindaphindiweyo aze anandiphe ukumenyezela kwabo.”
Umxholo kaRichard Eldred wawusithi “Ninokwenza Umahluko.” Njengoko abavangeli basemazweni abatsha bechukumisa ubomi babanye abantu, banokwenza umahluko ophawulekayo. Amadoda namabhinqa amandulo anjengoDavide, uNehemiya, uDebhora noAbhigali ayenempembelelo entle kwabanye ngokubakhathalela ngokunzulu, belondoloza ukholo olunenkalipho, bebonakalisa isimo sengqondo sokuthobela nesokutyekela kwizinto zokomoya.”
Amazwi kaLyman Swingle, olilungu leQumrhu Elilawulayo, kwiklasi yabo babephumelele ayesithi “Zibaleni Iintsikelelo Zenu.” Emva kokubalisa ezinye zeentsikelelo le klasi ethe yazifumana, ezinjengokukwazi ukuchitha iinyanga ezintlanu kufundisiso olunzulu lweBhayibhile, wayikhuthaza esithi: “Njengoko isiphelo sisondela, nisenokufumanisa ukuba izinto ziyaqupha, kuya kusiba nzima, indlela iya inyuka. Kodwa qinisekani ukuba anisayi kutyhafa, ukuba anisayi kuncama, nokuba anisayi kuze nikreqe.”
Omnye wabahlohli, uJack Redford, watyondyotha ethetha ngomxholo othi “Ningaze Nivumele Ukuba Amandla Enu Abe Bubuthathaka.” Ngokusekelwe kwisiluleko sikaSolomon, esithi “Musa ukuba lilungisa ngokukhulu,” walumkisa ngokuxhomekeka ngokugqithiseleyo kwizinto zobuqu kunokweyama ngoYehova. (INtshumayeli 7:16, 17) “Ukugxininisa kakhulu kwiimpawu ezilungileyo kunokuba ngumgibe.” Ngokomzekelo, lowo ubambelele ngokuqinileyo emthethweni nasemgaqweni usenokugxininisa gqitha kolo phawu ngokuba ngongqongqo gqitha. Ngenxa yoko, wanikela isiluleko kwiklasi ngokuthi: “Sisonke sifanele sibazi ubuthathaka bethu, kodwa kwakhona simele sazi apho somelele khona. Yiba lilungisa kodwa ungazingci. Yayama ngoYehova. UYehova makabe ngamandla akho.”
U-Ulysses Glass, umhlohli nombhalisi kwesi sikolo, wacacisa amazwi kaYesu athi, “Thabathani idyokhwe yam niyithwale.” (Mateyu 11:29, 30) Apho uYesu umema abafundi bakhe ukuba ‘bangene phantsi kwedyokhwe yakhe’ kunye naye. Wayengafuni ukubathwalisa ubunzima. Wayesoloko ecinga ngeentswelo zabanye engqondweni yakhe. Wabonisa ukuthobeka. Akazange abohlwaye kabukhali abafundi bakhe. UYesu wathi, “Nifunde kum.” Umvangeli wasemazweni umele abe nengcinga kaKristu. Esi sithethi sawancoma amalungu ale klasi ngomoya wawo wokuzinikela saza sawakhuthaza ukuba aqhubeke ebonakalisa loo moya mnye kwizabelo zawo ezikumazwe asemzini.
Njengoko ucwangciso lwakusasa lwalusondela esiphelweni salo uCarey Barber olilungu leQumrhu Elilawulayo wanikela udlwabevu lwentetho enomxholo othi “Ukuvuna Kukuphela Kwale Nkqubo Yezinto.” Watsalela ingqalelo kwinzaliseko yanamhla yomzekeliso kaYesu wengqolowa nokhula. (Mateyu, isahluko 13) Okokuqala, kuhlanganiswa abo bathanjisiweyo bakaKristu. Emva koko, ngokukhethekileyo ukususela kunyaka we-1935, kuye kwangenelela ezinye izimvu eziye ‘zavunwa.’ ISikolo saseGiliyadi siye saphumeza umsebenzi omkhulu ukuncedisa ukuvuna abafundi bakaKristu.
Emva kokuba abo babephumelele baye banikwa iziqinisekiso zabo, omnye kwelo qela wafunda incwadi efudumeleyo evakalisa iimvakalelo zabo ngolu qeqesho nangengqalelo abaye bayifumana kubahlohli nakwintsapho yaseBheteli. Inxalenye yale leta yayisithi: “Umdla wenu kuthi kungekuphela nje njengeklasi yaseGiliyadi kodwa njengabantu ngabanye usichukumisile yaye ulikhondo elifanele ukulandelwa. Kungeemvakalelo ezixubeneyo kuba sisahlukana—kulusizi ukuhamba kuba siya kunikhumbula kodwa siyavuya yaye sinehlombe ngesabelo sethu esitsha.”
Kucwangciso lwasemva kwemini, abo babephumelele baba nenxaxheba kwisifundo seMboniselo esasiqhutywa nguRalph Walls. Emva koko amalungu ale klasi anikela iimbalasane zamava aye awafumana kubulungiseleli basentsimini ebudeni bexesha awayehleli kwiiFama zeWatchtower. IKomiti Yokufundisa yeQumrhu Elilawulayo yenza umdlalo omfutshane othi “Ukuhlonela Igunya Kukhulisa Umanyano” nentetho yemifanekiso eyayibonisa uvuyo lwabavangeli basemazweni kumazwe amaninzi abaye bakhonza kuwo kwiminyaka edlulileyo. Ucwangciso lwaqukunjelwa ngomthandazo ochukumisayo nguFrederick Franz, umongameli weSikolo seBhayibhile seWatchtower saseGiliyadi oneminyaka engama-95 ubudala.
Ngokusabela ngehlombe, abo babekho babonakalisa inkxaso yabo ngabo babeza kuba ngabavangeli basemazweni noxabiso ngocwangciso. Alithandabuzeki elokuba abo bangama-24 babephumelele kwiklasi yama-86 yaseGiliyadi babezimisele ukumenza uYehova amandla abo njengoko babehamba besiya kwizabelo zabo kwintsimi yobuvangeli basemazweni.
[Ibhokisi ekwiphepha 21]
INKCAZELO ENGABAFUNDI
Inani lezibini ezitshatileyo: 12
Inani labafundi: 24
Inani lamazwe abavela kuwo abafundi: 6
Inani lamazwe ababelwe kuwo: 12
Umlinganiselo wobudala: 32,3
Umlinganiselo weminyaka besenyanisweni: 14,1
Umlinganiselo weminyaka bekwinkonzo yexesha elizeleyo: 9,1
[Umfanekiso okwiphepha 23]
Abaphumelele Kwiklasi Yama-86 YeSikolo SeBhayibhile SeWatchtower SaseGiliyadi
Kuludwe olungezantsi, kubalwa ukusuka kwabemi kuluhlu olungaphambili ukuya kwabangasemva, yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Parrott, R.; Imig, E.; Benig, G.; Bengtsson, E.; Baart, W.; Ihander, K. (2) Lewis, J.; Hilario, L.; Lindmark, A.; Antoncich, C.; Agurs, C. (3) Bengtsson, R.; Parrott, J.; Benig, J.; Imig, J.; Baart, A.; Rissell, S. (4) Rissell, M.; Lewis, L.; Antoncich, M.; Hilario, R.; Agurs, H.; Lindmark, L.; Ihander, J.