Umsebenzi Onokukonwabisa

UANTONIO waseGenoa, eItali, uthi, “Ndandiwuthanda ngokwenene umsebenzi wam wokushicilela. Ndandifumana umvuzo oncumisayo, yaye le nto yandenza ukuba ndisebenze iiyure ezininzi ezongezelelekileyo kunezo zesiqhelo. Kwiminyaka nje embalwa, nangona ndandiselula, ndaba yintonga esekhosi kumqeshi wam.” UAntonio wabonakala ngathi uzifumene izinto ezilusukelo ezishukumisela abaninzi ukuba basebenze nzima, ezizezi: ubutyebi, iwonga nomsebenzi obangela umdla awayewunandipha.

Ngaba uAntonio ‘wayebona okulungileyo emigudwini yakhe yonke’? (INtshumayeli 3:13) Yaye ngaba umsebenzi onjalo wawumonwabisa ngokwenene? Uyaqhubeka esithi, “Ngenxa yoxinezeleko olwalubangelwa yindlela yokuphila ubomi bobungxashingxashi, saqalisa ukuba neengxaki njengentsapho. Oku kwasibangela asonwaba.” Nakuba babesebenza ngokwanelisayo, uAntonio nomfazi wakhe babengonwabanga. Kuthekani ngawe? Ngaba ‘ubona okulungileyo emigudwini yakho yonke’? Umsebenzi wakho ngaba uyakonwabisa ngokwenene?

Ziziphi Iintshukumisa Ezifanelekileyo?

Esona sizathu sibalulekileyo sokusebenza nzima kukuze sikwazi ukuzixhasa ukuze siphile. Kwamanye amazwe, abantu bamele basebenze iiyure ezininzi ukuze nje bakwazi ukufumana into edliwayo. Bambi basebenza njengamakhoboka ubusuku nemini ukuze abantwana babo baphile ubomi obulunge ngakumbi. Abanye baziva benyanzelekile ukusebenza ukuze bafumbe ubutyebi.

ULeonida wakwiiPhilippines wayenemisebenzi emibini. Ebudeni bemini wayesebenza ebhankini aze ngokuhlwa afundise kwanokholeji iiyure ezintathu okanye ezine. Ngaba ukufumana imali engakumbi kwakuwufanele loo mgudu? Uyacacisa esithi: “Ndandisoloko ndikrwaqula ixesha. Ndandikruqukile. Ndandisebenza ndingenalo ulwaneliseko.”

Hayi, ukusebenza ngenxa nje yokufumana imali akuphumeli kulwaneliseko nakulonwabo lokwenyaniso. UKumkani uSolomon osisilumko ululeka esithi: “Musa ukuzidinisa ngokufuna ubutyebi . . . Kuba bona buzenzela amaphiko, buphaphazela njengexhalanga [“ukhozi,” NW] elisinge ezulwini.” (IMizekeliso 23:4, 5) Kuthiwa ezinye iinkozi zibhabha ngesantya esifikelela kwi-130 leekhilomitha ngeyure. Oku kuyibonakalisa kakuhle indlela ubutyebi obusetyenzelwe nzima obusengabhanga bumke ngayo ngokukhawuleza. Enoba umntu unokufumba ubutyebi obungakumbi, xa esifa akanakuthabatha nantoni na emke nayo.—INtshumayeli 5:15; Luka 12:13-21.

Maxa wambi ukuba ngozinikele gqitha ekuzameni indlela yokuziphilisa kunokubangela iingxaki ezinzulu. Kusengakhokelela ekuthandeni imali. Kwinkulungwane yokuqala, kwakukho iqela labanquli elalibizwa ngokuba ngabaFarisi ababesaziwa ngokuthanda imali. (Luka 16:14) Umpostile ongumKristu uPawulos, njengomnye owayesakuba ngumFarisi, wayeyazi ngokupheleleyo indlela ababephila ngayo. (Filipi 3:5) UPawulos ulumkisa esithi, “Abo banga bangaba zizityebi, beyela ekuhendweni, nasesibatheni, nasezinkanukweni ezininzi ezibubudenge ezenzakalisayo; zona zibatshonisayo abantu ekonakaleni, nasekutshabalaleni. Kuba ukuthanda imali yingcambu yeento zonke ezimbi: abathe abathile, ngokuzolulela kuko, . . . bazibhodloza ngobuhlungu obuninzi.” (1 Timoti 6:9, 10) Ewe, “ukuthanda imali,” usenza nayiphi na into ngenxa yayo, kunokubonakalisa ubomi bukabani. Ikhondo elinjalo alizisi lonwabo.

Kwabathile, intshukumisa yokuzibhokoxa kwabo ikukuba banyukele kumanqwanqwa aphezulu. Sekunjalo, ekugqibeleni bajongana nobunyaniso bezinto. Iphephancwadi iFortune lithi: “Oosomashishini abaselula abakwiminyaka yabo yama-20 nabathe tyishi kancinane kuma-30 eminyaka abanosukelo lokufikelela kwinqanaba lokuphatha amashishini baye bafikelela ekuqondeni nto ithile engathandekiyo kodwa engaphephekiyo yokuba, phezu kwako nje ukubulaleka ngumsebenzi onzima, asinguye wonke ubani oya kuphumelela. Beqobekile kukusebenza nzima, balingelwa ukuba babuze intsingiselo yako konke oku. Kutheni sizibulala ngolu hlobo? Ngubani okukhathaleleyo ukubulaleka kwethu?”

Ubomi benye indoda elolo hlobo, enguMizumori, babakhelwe ekuhambeleni phambili ehlabathini. Ngenxa yokuba wayesukela izikhundla zokuphatha kwenye yezona bhanki zinkulu eJapan, wayengenalo ixesha lokuba kunye nentsapho yakhe. Emva kokusebenza nzima ngaphezu kweminyaka engama-30, impilo yakhe yonakala, ibe ngokuqinisekileyo wayengonwabanga. Uthi, “Ndaqonda ukuba ukusukuzana ngezikhundla phakathi kwabantu abazama ukuba ngababalulekileyo ‘kungamampunge, nokusukelana nomoya.’”—INtshumayeli 4:4.

Kodwa kuthekani ngabo bafana noAntonio, abawunandiphayo umsebenzi wabo? Ethabathekile ngumsebenzi wakhe, uAntonio wabenza idini ubomi bentsapho yakhe ngenxa yokuthanda umsebenzi. Abanye bancama impilo yabo kwanobomi babo, njengoko kubonisiwe kukufa ngequbuliso kwabalawuli abaninzi nabadumileyo bamashishini baseJapan abakumanqwanqwa aphezulu nabaziqoba ngomsebenzi. Iziko lokunikela intuthuzelo kwabo bafelweyo lamangaliswa kukufumana iminxeba eli-135 ngemini nje enye.

Bambi banikela ubomi babo ekuncedeni abanye. UYesu wawukhuthaza lo moya. (Mateyu 7:12; Yohane 15:13) Ukuzigcina uxakekile kumsebenzi ofanelekileyo wokunceda abanye konwabisa ngokwenene.—IMizekeliso 11:25.

Noko ke, isimo sengqondo esifaneleke ngolo hlobo senkuthalo sinemigibe yaso. Ngokomzekelo, ukumkani wakwaYuda u-Uziya waba nesabelo kumsebenzi omkhulu wesizwe wokumba amaqula amaninzi entlango. U-Uziya usenokuba wayecinga ngengenelo yabantu bakhe, njengokuba ‘wayemquqela uYehova’ ngelo xesha yaye ngokucacileyo ewuphulaphule umyalelo kaThixo wokuba ookumkani bangabi ngabazingcayo. (2 Kronike 26:5, 10; Duteronomi 17:14-20) Oku kwamenza waphumelela ngakumbi kwezomkhosi, yaye “laduma igama lakhe, lada laya kude.” Kodwa wathi akomelela, yaphakama intliziyo yakhe, oko kwaphumela ekuweni kwakhe. (2 Kronike 26:15-20; IMizekeliso 16:18) Nobani ozinikele ekuncedeni abanye ukanti eshukunyiswe ngumnqweno wokwanelisa iminqweno yakhe nalikratshi unokuphelela ekuweni kabuhlungu. Ngoko, kutheni nabani na efanele afune ukusebenza nzima?

Umntu Wayenzelwe Ukusebenza

Sinokufunda okuninzi ngomsebenzi koyena mntu waphumeza okulunge ngakumbi lee kunaye nawuphi na omnye umntu owakhe waphila emhlabeni. Loo mntu nguYesu Kristu. (Mateyu 20:28; Yohane 21:25) Xa wayesifa kumthi wentuthumbo, wadanduluka esithi, “Kugqityiwe!” (Yohane 19:30) Ebudeni bobomi bakhe beminyaka engama-33¹/2 wawufeza umsebenzi wakhe.

Ubomi bukaYesu buyanceda ekuphenduleni umbuzo othi “Nguwuphi umsebenzi onokukonwabisa?” Yaba kukufeza ukuthanda kukaYise wasezulwini okwamonwabisa ngokungenakuthelekiswa nanto. Ngokufanayo, ukwenza ukuthanda koMdali wethu kunokusinika imvakalelo yokufeza okuthile kuze kusonwabise. Ngoba? Ngenxa yokuba uyayazi indlela esibunjwe ngayo noko sikufunayo kwanangaphezu kokuba sisazi thina.

Xa uThixo wadala umntu wokuqala, uAdam, wamnika umsebenzi amakawenze kokubini owezandla nofuna ukusebenzisa ingqondo. (Genesis 2:15, 19) Ekubeni ‘wayenobukhosi’ kuzo zonke izidalwa zasemhlabeni, uAdam wayenomsebenzi wokulawula awayekwafanele awenze. (Genesis 1:28) Ngalo lonke ixesha uAdam wayelithobela eli lungiselelo, umsebenzi wakhe wahlala ungonentsingiselo yaye ungoxabisekileyo. Isabelo ngasinye esincinane sasithetha elinye ithuba lokukholisa Osenyangweni.

Noko ke, oku akuzange kuqhubeke kunjalo kwimeko kaAdam. Wagqiba ekubeni ashenxe kwilungiselelo likaThixo. UAdam akabanga sakuvuyela ukwenza ukuthanda kukaThixo kodwa wafuna ukwenza oko kukholisa yena. Wona nxamnye noMdali. Ngokomphumo wesigqibo sakhe, uAdam, umfazi wakhe, nayo yonke inzala yakhe ‘balulanyiselwa kokungelutho.’ (Roma 5:12; 8:20) Endaweni yokuba ube ngowonwabisayo, umsebenzi waba luxanduva. Isigwebo sikaThixo nxamnye noAdam saquka la mazwi: “Uqalekisiwe umhlaba ngenxa yakho; uya kudla kuwo ubulaleka, yonke imihla yobomi bakho. Uya kukuntshulela imithana enameva neenkunzane, udle umfuno wasendle. Uya kudla ukudla kokubila kobuso bakho, ude ubuyele umhlabeni.” (Genesis 3:17-19) Umsebenzi, owawufanele ube ngonesidima njengoko wawenzelwe eyona njongo iphakamileyo ekukukholisa uMdali womntu, ngoku wathetha kuphela ukubulaleka okubuhlungu ukuze umntu afumane nje isonka sakhe.

Sinokugqiba ngelithini ngokusuka kwezi nyaniso? Ngokuthi: Ukusebenza nzima kuzisa ulwaneliseko oluhlala luhleli nolonwabo kuphela xa ubomi bethu sibakhela ekwenzeni ukuthanda kukaThixo.

‘Bona Okulungileyo’ Ekwenzeni Ukuthanda KukaThixo

Ukwenza ukuthanda kukaThixo kwakufana nokudla kuYesu Kristu—okuthile awayekunandipha nokwakuzimasa ubomi bakhe bokomoya. (Yohane 4:34) Ungawunandipha njani umsebenzi ngolo hlobo?

Umele ukuqonde “into okuyiyo ukuthanda kweNkosi [“uYehova,” NW]” ngawe. (Efese 5:17) Ukuthanda kwakhe kukuba uluntu lubuyiselwe “enkululekweni yozuko lwabantwana bakaThixo.” (Roma 8:21; 2 Petros 3:9) Ngoku umsebenzi wokuhlanganisa wazwenibanzi ukuze kufezwe oku uyaqhubeka. Nawe usenokuba nenxaxheba kulo msebenzi wanelisa ngokonakona. Ngokuqinisekileyo umsebenzi onjalo uya kukonwabisa.

UAntonio, okhankanywe ekuqaleni, wafumana ulwaneliseko nolonwabo kamva. Xa yena nomkakhe babeka kuqala ebomini babo imisebenzi yabo yokuziphilisa “elilize,” yaye bebandakanyeka ngokunzulu kuyo, ubomi babo bokomoya babandezeleka. Oku kwenzeka xa bathi baqala ukuba neengxaki zentsapho. Akuyiqonda imeko, umfazi wakhe wagqiba ekubeni awushiye umsebenzi wakhe waza waqalisa ‘ukuzama ngamandla’ ekwenzeni umsebenzi wokushumayela ngoBukumkani bukaThixo ixesha elizeleyo.—Luka 13:24.

UAntonio uthi: “Ngokukhawuleza saphawula umahluko omkhulu. Akuphindanga kubekho zingxabano zizingisileyo. Intsapho yethu yaba seluxolweni kwakhona.” Umfazi wakhe wafumana uvuyo lokunceda abanye bazuze ulwazi oluthetha “ubomi obungunaphakade.” (Yohane 17:3) Uvuyo lwakhe lwashukumisa uAntonio ukuba akuhlolisise ngokutsha ukuba kukuphi na okuxabiseke ngokwenene. Umnqweno wakhe wokukhonza uThixo ngomphefumlo uphela woyisa. Wala ukunyuselwa ibe wawushiya umsebenzi wakhe wengqesho. Nangona le nguqulelo yathetha ukuba athabathe umsebenzi odelekileyo, bobabini uAntonio nomfazi wakhe bonwabile kuba bechitha elona xesha labo lininzi kubulungiseleli bamaKristu, besenza ukuthanda kukaThixo.

Kakade ke, asingabo bonke abakwimeko yokuba benze iinguqulelo ezinjalo. UMizumori, umsébenzi wasebhankini eJapan okhankanywe ngaphambilana, unandipha ubulungiseleli bakhe njengomdala kwibandla lamaKristu yaye usaqhubeka exhasa intsapho yakhe ngomsebenzi wakhe wengqesho, apho abambe khona isikhundla sokuba ngumphathi. Phofu ke, ubomi bakhe abusapheleliselwanga kumsebenzi wakhe wengqesho kodwa bujoliswe ekwenzeni ukuthanda kukaThixo. Umsebenzi wakhe wengqesho uyindlela yokumzimasa neyokumnceda aphumeze loo njongo. Ngoku ukwenza umsebenzi wengqesho nako kunentsingiselo.

Xa uhlakulela le mbono ngomsebenzi wakho wengqesho, ngokungathandabuzekiyo uya kuzibhokoxa ‘kungabi ngenkonzo yamehlo, ngathi ukholisa abantu; koko kube ngokwentliziyo engenakumbi, usoyika uThixo.’ (Kolose 3:22) Ukunyaniseka okulolo hlobo kusenokungabonakali kubalulekile kweli butho linomoya wokhuphiswano, kodwa, njengoko uMizumori evuma, ngokusebenzisa le migaqo, uya kuba ngumntu othenjiweyo noxatyisiweyo. Nangona wakuyekayo ukusebenzela ukunyuselwa, oko kwazizela kuye.—IMizekeliso 22:29.

Ewe, ukwakhela ubomi bakho ekwenzeni ukuthanda kukaThixo kusisikhokelo sokufumana ulonwabo ekusebenzeni nzima. Kungeso sizathu le nto ukumkani uSolomon osisilumko wafikelela kwesi sigqibo: “Akukho nto ilungileyo phakathi kwabo, ingekukuvuya nokuzizuzela okulungileyo ebomini babo. Kwanokuba wonke umntu adle, asele, abone okulungileyo emigudwini yakhe yonke: sisipho sikaThixo eso.”—INtshumayeli 3:12, 13.

[Umfanekiso okwiphepha 7]

Ukwakhela ubomi bentsapho yakho kwisifundo seBhayibhile nasekwenzeni ukuthanda kukaThixo kusisikhokelo esisa ekunandipheni isiqhamo sokusebenza nzima