Ubomi Nobulungiseleli BukaYesu

Ukugqitywa Kobulungiseleli Basetempileni

UYESU ubonakala okokugqibela etempileni. Enyanisweni, ugqibezela ubulungiseleli bakhe basesidlangalaleni ngaphandle kweziganeko zokulingwa nokubulawa kwakhe kwiintsuku ezintathu kamva. Ngoku uyaqhubeka ekhalimela ababhali nabaFarisi.

Izihlandlo ezithathu kwakhona uyadanduluka esithi: “Yeha, nina babhali, baFarisi, bahanahanisindini!” Okokuqala, uvakalisa uyeha kubo kuba behlambulula “umphandle wendebe nesitya, kanti ke ngaphakathi kuzele kukuphanga nokungazeyisi.” Ngoko uyaluleka esithi: “Hlambulula tanci okungaphakathi kwendebe nesitya, ukuze kuthi okungaphandle kwazo kuhlambuluke nako.”

Ngokulandelayo uvakalisa uyeha kubabhali nabaFarisi ngokubola kwangaphakathi abathi bazame ukukufihla ngokubonakalisa intlonelo yangaphandle. Uthi, “Nifana namangcwaba aqatywe ifutha, athi abonakale emahle okunene ngaphandle, kanti ngaphakathi azele ngamathambo abafileyo nokungcola konke.”

Okokugqibela, uhanahaniso lwabo lubonakala ekuvumeni nasekukulungeleni kwabo ukwakha amangcwaba abaprofeti baze bawahombise ukuze batsalel’ ingqalelo kwizenzo zabo zesisa. Kanti, njengoko uYesu etyhila, ‘bangoonyana babo babulala abaprofeti.’ Eneneni, nabani na onesibindi sokubhenca uhanahaniso lwabo usengozini!

Ehlabela mgama, uYesu uvakalisa awona mazwi akhe aqatha okubachasa. Uthi: “Zinyokandini, nzalandini yamarhamba, ningathini na ukuwusaba umgwebo wesihogo [weGehena, NW]?” IGehena yintlambo esetyenziswa njengendawo yokulahla amabibi eYerusalem. Ngoko uYesu uthi ngokuqhubeka nekhondo labo elingendawo, ababhali nabaFarisi baya kutshatyalaliswa ngonaphakade.

Mayela nabo athi abathume njengabameli bakhe, uYesu uthi: “Niya kuthi inxenye kubo niyibulale, niyibethelele eminqamlezweni, nithi inxenye kubo niyityakatye ezindlwini zenu zesikhungu, niyitshutshise kwimizi ngemizi; ukuze linifikele lonke igazi elinobulungisa, elaphalazwayo emhlabeni apha, lithabathela egazini lika-Abheli ilungisa, lizise egazini likaZekariya, unyana kaBherekiya [obizwa ngokuba nguYehoyada kweyesi-2 yeziKronike], enambulalela phakathi kwendawo engcwele nesibingelelo. Inene, ndithi kuni, zonke ezo zinto ziya kusihlela esi sizukulwana.”

Kuba uZekariya wathi ngokunenkalipho wazigxibha iinkokeli zakwaSirayeli, ‘zamceba zamxuluba ngamatye, ngokomthetho wokumkani entendelezweni yendlu kaYehova.’ Kodwa, njengoko uYesu exela kwangaphambili, uSirayeli uyakuhlawula ngalo lonke igazi elinjalo lamalungisa elaphalazwayo. Bahlawula kwiminyaka engama-37 kamva, ngowama-70 C.E., xa imikhosi yamaRoma itshabalalisa iYerusalem kuze kutshabalale amaYuda angaphezu kwesigidi.

Njengoko uYesu ecinga ngale meko yoyikekayo, uyakhathazeka. Kwakhona uyadanduluka athi, “Yerusalem, Yerusalem, . . . kufuthi kangakanani na ndithande ukubabuthela ndawonye abantwana bakho, ngohlobo esithi isikhukukazi siwabuthele ndawonye amathole aso ngaphantsi kwamaphiko, anavuma! Yabonani, indlu yenu ishiywa nani ize.”

Wandula ke uYesu ongezelele athi: “Aniyi kuba sandibona emveni koku, nide nithi, Makabongwe lowo uzayo egameni leNkosi.” Loo mini iyakuba ngexesha lokubuya kukaKristu xa engena ebukumkanini bakhe bamazulu baze abantu bambone ngamehlo okholo.

Ngoku uYesu uya kwindawo apho anokuthi abone imikhumbi yokulondoloza imali etempileni yaye nezihlwele ziphosa imali kuyo. Izityebi ziphosa iimali ezininzi. Kodwa ngelo xesha kuza umhlolokazi olihlwempu aze aphose iimalana ezimbini ezinexabiso eliphantsi.

Ebabizele kuye abafundi bakhe, uYesu uthi: “Inene ndithi kuni, Lo mhlolokazi ulihlwempu uphose ngaphezu kwabo bonke abaphosileyo emkhumbini wokulondoloza imali.” Bamele bamangaliswe yindlela okunokwenzeka ngayo oku. Ngoko uYesu uyacacisa esithi: “Bonke abo baphose bethabatha kwikhupha labo; ke yena ekusweleni kwakhe uphose konke abenako, impilo yakhe iphela.” Emva kokuthetha ezi zinto uYesu uyayishiya itempile okwesihlandlo sokugqibela.

Bemangalisiwe bubukhulu nabubuhle betempile, abafundi bakhe bayadanduluka: “Mfundisi, uyawabona na la matye angaka, nezi zakhiwo zingaka?” Enyanisweni, kuthiwa la matye phantse abe ziimitha ezili-11 ubude, phantse abe ziimitha ezintlanu ububanzi yaye phantse abe ngaphezu kweemitha ezintathu ukuphakama!

UYesu uyaphendula esithi: ‘Niyazibona na ezi zakhiwo zikhulu? Akusayi kusala litye phezu kwelitye elingayi kuchithwa.’

Akuba ezithethile ezi zinto uYesu nabapostile bakhe banqumla iNtlambo iKidron baze benyuke iNtaba yeMinquba. Belapho banokukhangela ezantsi kwitempile enobukhazikhazi. Mateyu 23:25–24:3, thelekisa ne-NW; Marko 12:41–13:3; Luka 21:1-6; 2 Kronike 24:20-22.

◆ Yintoni eyenziwa nguYesu ebudeni botyelelo lwakhe lokugqibela etempileni?

◆ Kungayiphi indlela oluthi uhanahaniso lwababhali nabaFarisi lubonakaliswe?

◆ Lithetha ukuthini ibinzana elithi “umgwebo weGehena”?

◆ Kutheni uYesu esithi umhlolokazi unikele ngaphezu kwezityebi?