Imibuzo Evela Kubafundi

◼ Ngaba amaKristu athile athanjisiweyo aya kusinda ‘kwimbandezelo enkulu’ ukuze aphile emhlabeni kwihlabathi elitsha ngaphambi kokuthatyathelwa ezulwini?

IBhayibhile ayithethi ngokungqalileyo ngako oku.

Sekulithuba elide amaKristu enomdla kumalungelo uThixo asenokuwanika wona. (IZenzo 1:6) Oko bekuyinyaniso ngokukhethekileyo kumhla wethu ukususela ekumiselweni koBukumkani. (Mateyu 24:3, 24, 34) Ekubeni isiphelo sale nkqubo ingendawo siza kufika ngexesha lawo, amaKristu aye azibuza enoba abathile abathanjiswe ngomoya basenokuphila ukutyhubela ‘imfazwe yaloo mini inkulu kaThixo’ baze bakhonze emhlabeni kangangethuba elithile ngaphambi kokufumana umvuzo wabo wasezulwini. (ISityhilelo 16:14) IBhayibhile ayitsho ukuba oku kuya kwenzeka kusini na, kanti imizekelo neziprofeto ezithile ziye zaqondwa njengezo zibonisa ukuba oku kusenokwenzeka. Kunokuqiniseka, sinokulinda ukuze sibone indlela uThixo aya kuzisingatha ngayo izinto.

Kamva, phakathi kwabantu bakaThixo kuye kwenzeka iziganeko ezifana nezithile eziseBhayibhileni. Ngokomzekelo, siyazi ukuba uYona wayeginywe yintlanzi enkulu kangangeentsuku ezintathu nobusuku obuthathu. Bambi abantu basenokukujonga oko njengomzekelo nje wokuhlangulwa nguThixo, kodwa uYesu wathi oko kwakusisiprofeto esasibonisa indlela awayeya kuthi ngayo abe sengcwabeni ithuba elilingana nelo ngaphambi kokuvuswa kwakhe. (Yona 1:17; Mateyu 12:40) Ewe, amava kaYona ayengumzekelo obuprofeti. Kuyaqondakala ukuba, abakhonzi bakaThixo baye bakhangela kwiziprofeto neengxelo zeBhayibhile ezithile ukubona enoba ezi zisenokuyichaza kusini na indlela uYehova asaya kuqhubana ngayo nabo.

Njengomzekelo obandakanya isiprofeto seBhayibhile, IMboniselo [yesiNgesi] kaDisemba 15, 1928, yaxubusha uMika 5:2-15. Incwadi kaMika yayithetha ngokutshatyalaliswa kwelakwaSamari yiAsiriya nokubuya kwamaYuda ekuthinjweni eBhabhiloni. (Mika 1:1, 5-7; 4:10) Kodwa yayikwalatha nakwiziganeko zakamva, ezinjengokuzalwa kukaMesiya eBhetelehem. (Mika 5:2) UMika waprofeta ukuba emva kokukhululwa kwawo “kuma-Asiriya,” “amasalela akwaYakobi” ayeya kuba “njengombethe ophuma kuYehova” ‘kwananjengengonyama entsha phakathi kwemihlambi yeegusha.’ (Mika 5:6-8) IMboniselo yagqabaza yathi: “Oku kusenokuthatyathwa njengembonakaliso yokuba bambi bentsalela baya kuba semhlabeni kwanasemva kokuba iArmagedon iliwe yaye ngoko baya kuba nomsebenzi ongakumbi abamele bawenze egameni leNkosi nakudumo nozuko lwayo.” Phawula intetho ebonisa ukuthozama nenengqiqo esetyenzisiweyo ukuchaza le nto esenokwenzeka: “Oku kusenokuthatyathwa njengembonakaliso.”

Kuthekani ngengxelo yeBhayibhile esenokufanekisela oko kusindela emhlabeni? Omnye umzekelo oye wanikelwa uphathelele uNowa nentsapho yakhe. UNowa uye wajongwa njengofanekisela uYesu kweli xesha lesiphelo. (Genesis 6:8-10; Mateyu 24:37) Njengoko uNowa wakhokela umfazi wakhe noonyana babo abathathu noomolokazana bakhe ukutyhubela isiphelo saloo nkqubo yakudala, uKristu uya kunikela ukhokelo kwintsalela yodidi lomtshakazi wakhe nakwabo baba ngabantwana ‘bakaBawo Ongunaphakade [NW],’ uYesu. Umfazi kaNowa wasinda kuMkhukula ibe waba nesabelo ekubuyiselweni konqulo oluyinyaniso kumhlaba ocociweyo. Into efana naleyo isenokuba kukusindela kwihlabathi elitsha kwentsalela yodidi lomtshakazi.—Isaya 9:6, 7; 2 Korinte 11:2; ISityhilelo 21:2, 9.a

Ezinye iingxelo zeBhayibhile ziye zajongwa njengezo zibonisa ukuba bambi kwabo bathanjisiweyo kusenokwenzeka baphile ukuya kutsho kwihlabathi elitsha. Ngokomzekelo, uYeremiya wasinda ekutshatyalalisweni kweYerusalem; “indoda” enezinto zokubhala yahlala ukuze ibone ukuphunyezwa komgwebo ngaphambi kokuba ibuyele ukuya kunikela ingxelo yayo.—Hezekile 9:4, 8, 11.

Amagqabaza athe enziwa angokuba kusenokwenzeka ngabathile kwabo bathanjisiweyo ukuba basindele kwihlabathi elitsha aye enziwa ngeenjongo ezithile nangenxa yoko kwenzeka ngaphambili eBhayibhileni ukuzama ukuqonda iziprofeto okanye imizekelo ebonisa okufanayo okunokwenzeka kamva. Ukuba kuthe kwenzeka ukuba kungabikho namnye kubathanjiswa oya kusala emhlabeni, akusayi kubakho sizathu sakunganeliseki. Sele siyamkele kakade into yokuba imibandela engokweBhayibhile iqondwa ngokuchane ngakumbi njengoko ixesha lihamba. Ngokomzekelo, IMboniselo kaJanuwari 1, 1982, yaxubusha uMika 5:6-9 kwakhona yaza yacacisa ukuba “intsalela yamaSirayeli okomoya akufunekanga ukuba ilinde kude kube semva . . . kweArmagedon ukuze ‘ibe ngumbethe’ ohlaziyayo ebantwini.” Le ngxubusho kwakhona yathi kusenokwenzeka ukuba intsalela inokusinda kwimfazwe enkulu kaThixo yaye okwethutyana iya “kuqhubeka ‘injengombethe’ ohlaziyayo ‘kwisihlwele esikhulu’ ‘sezinye izimvu.’” Noko ke, sinokubona ukuba ukuhamba kwexesha nokwanda kokukhanya kokomoya kusenokuyenza banzi kuze kuyiguqule indlela esiziqonda ngayo iziprofeto okanye iziganeko ezenzeka eBhayibhileni.—IMizekeliso 4:18.

Siyazi ukuba iBhayibhile inxulumanisa ‘ukufika koNyana womntu nokuhlanganiswa kwabanyuliweyo kumacala omane omoya.’ (Mateyu 24:29-31) Kwakhona, ebudeni ‘bokufika [“bobukho,” NW] kweNkosi’ isemandleni oBukumkani, abathanjisiweyo abalele ukufa bavuselwa ebomini ezulwini. (1 Tesalonika 4:15, 16) Aba batywiniweyo balapho ukuze babe yinxalenye yomfazi weMvana. Kwenzeka nini oko?

Kwincwadi yeSityhilelo, emva nje kokuba uYohane ethethe ngokutshabalalisa kukaThixo ihenyukazi elingokonqulo, iBhabhiloni Enkulu, uchaza “umsitho weMvana.” “Umfazi” ongcolileyo, noziphethe kakubi uyasuswa angabikho, size sibone “umtshakazi, umfazi wayo iMvana” ‘ethiwe wambu ngelinen ecikizekileyo emhlophe, efuzisela imisebenzi yobulungisa yabangcwele.’ (ISityhilelo 18:10; 19:2, 7, 8; 21:9) Ukutshatyalaliswa kweBhabhiloni Enkulu kuyinxalenye yembandezelo enkulu. (Mateyu 24:21; ISityhilelo 7:14) Ngoko kunokuqiqwa ngelokuba abathile bodidi lomtshakazi baya kusinda kwimbandezelo enkulu njengobungqina bokuba uYehova uyakholiswa ngabo yaye uyabakhusela. (Zefaniya 2:3; thelekisa uMateyu 24:22.) Ukuba ngaloo ndlela bayalondolozwa emhlabeni, banokuhlala apha de uThixo akhethe ukubathabathela ezulwini.

Noko ke, ingxelo yeSityhilelo ayizilandelelanisi ngokuthe ngqo ngokwenzeka kwazo izinto. Yaye asikukuba intsalela encinane yabathanjisiweyo ibiya kufuneka ukuze kubekho ihlabathi elitsha, kuba sele iqeqeshe izigidi zamaKristu anyanisekileyo aya kuphila ngonaphakade emhlabeni. Ngokuvisisana noko, uThixo ebenokubathabathela ezulwini abathanjisiweyo bakhe ngokukhawuleza emva kokutshatyalaliswa kweBhabhiloni Enkulu, elungiselela ukuba “umsitho wemvana” uqhubeke. Ngaloo ndlela bonke abangcwele banokuba nesabelo kunye noKristu ‘ekwaluseni iintlanga ngentonga yentsimbi’ ebudeni bexesha elisaseleyo lembandezelo enkulu. (ISityhilelo 2:26, 27; 19:11-21) Ukuba uThixo uyisingatha ngaloo ndlela imicimbi, bonke abali-144 000 baya kuba noYesu ukuze ‘balawule njengookumkani noKristu iminyaka eliwaka.’—ISityhilelo 20:4.

Ngokuqinisekileyo kuyinto entle ukuba abantu bakaThixo babe nomdla onzulu wokufuna ukwazi indlela aya kubalathisa aze abavuze ngayo abakhonzi bakhe. (Thelekisa eyoku-1 kaPetros 1:12.) Oku kubonisa intembelo yabo yokuba ukuthanda kwakhe kuya kwenzeka. Nangona singenako yaye singafanele sizithembe njengabaqiniseke gqitha ngeenkcukacha, sinokukhangela phambili ngolangazelelo koko kuya kwenzeka.

[Umbhalo osemazantsi]