Libonge Igama Elingcwele LikaYehova!
“Umlomo wam mawuthethe indumiso kaYehova, inyama yonke ilibonge igama lakhe elingcwele ngonaphakade kanaphakade.”—INDUMISO 145:21.
1, 2. (a) Kungayiphi indlela athe uSathana wacel’ umngeni ulawulo lukaThixo? (b) Yiyiphi imibuzo ephakamayo mayela neNdumiso 145:11-21?
ALITHANDABUZEKI elokuba uYehova unguMongami Wendalo iphela. Kodwa uSathana uye wabucel’ umngeni ubulungisa nokulunga kolawulo lukaThixo. (Genesis 2:16, 17; 3:1-5) UMtyholi uye wacela umngeni nengqibelelo yabo bonke abakhonzi bakaThixo ezulwini nasemhlabeni. (Yobhi 1:6-11; 2:1-5; Luka 22:31) Ngoko uYehova uye wavulela ithuba lokuba zonke izidalwa ezinobulumko zibone iziqhamo ezibi zokuvukela ulawulo lwakhe nelokuba zizibonakalise apho zimi khona kwezi mbambano.
2 INdumiso 145 isinceda silumele ngokuqinileyo ulawulo lukaThixo. Isinceda njani? Uthini uDavide ngobukumkani bukaYehova? Yaye uThixo uqhubana njani nabameli babo? Iimpendulo eziluncedo zikwiNdumiso 145:11-21.
Thetha Ngobukumkani BukaYehova
3. Ukuba ubukumkani bukaYehova sibuxabisile, siya kwenza ntoni?
3 Ulawulo lukaYehova lwaluyinto eyayixhalatyelwe gqitha nguDavide, owathi: “Uzuko lobukumkani bakho balutsho, bathethe ngobugorha bakho. Ukuze ubazise oonyana babantu ubugorha bakhe, ubuqaqawuli obuhle bobukumkani bakhe.” (INdumiso 145:11, 12) Abantu bayathetha ngezinto ezibabangela umdla. Ngoko indoda iyathetha ngentsapho yayo, ikhaya layo, izilimo zayo. UYesu wathi, “Umntu olungileyo, ebuncwaneni obulungileyo bentliziyo yakhe, uvelisa oko kulungileyo.” (Luka 6:45) Ukuba ulawulo lukaThixo luxabisekile ezintliziyweni zethu, siya kuthandazela ukuba uBukumkani bakhe bufike, yaye siya kubaxelela abanye ngokusesikweni, uxolo nobulungisa obuya kwesamela ngaphantsi kolawulo lwabo. Siya kumdumisa uYehova ‘njengoKumkani wamaphakade,’ yaye siya kuthetha ngokubonakaliswa kolongamo lwakhe ngoBukumkani obungoMesiya ezandleni zoNyana wakhe oyintanda, uYesu Kristu. (ISityhilelo 15:3, NW; Isaya 9:6, 7) Elinjani lona ilungelo ekulilo ukuthetha ngozuko lwasezulwini lobukumkani bukaYehova, obuya kuthi kungekudala bubonakaliswe kubuhle beparadisi yasemhlabeni ezaliswe zizidalwa ezonwabe ngokugqibeleleyo!—Luka 23:43.
4. Kunini apho sifumana ithuba lokuthetha “ngobugorha” bukaYehova, yaye sixhaswa njani kulo msebenzi?
4 Uxabiso luya kusishukumisela nasekubeni sithethe “ngobugorha” bukaYehova. Nangona ‘emkhulu ngamandla,’ akaze awasebenzise kakubi. (Yobhi 37:23) Wasebenzisa amandla akhe ukuba adale umhlaba noluntu yaye uya kuwasebenzisela ukutshabalalisa abangendawo. Sinethuba lokuthetha ngobugorha bukaThixo xa sivakalisa iindaba ezilungileyo. Yaye ngaba asinambulelo kuba lo Mthombo wawo onke amandla usomelezela ukwenza lo msebenzi? (Isaya 40:29-31) Ewe, njengamaNgqina kaYehova, kwinkonzo engcwele sixhaswa ngamandla nomoya kaThixo. Kungale ndlela kuphela esithi isigidimi soBukumkani sivakaliswe ngempumelelo emangalisayo zwenibanzi.—INdumiso 28:7, 8; Zekariya 4:6.
5. Ekubeni abaninzi bengazazi ‘izenzo zobugorha’ zikaYehova, yintoni esifanele siyenze?
5 Kukho imfuneko yokuba sazise oonyana babantu ‘ngezenzo zobugorha’ zikaYehova, kanye njengokuba amaSirayeli axelela abantwana bawo ngendlela uThixo awawakhulula ngayo kubukhoboka baseYiputa. (Eksodus 13:14-16) Abantu bakha izakhiwo zezikhumbuzo besakhela abantu abamisebenzi yabo bayigqala iyephawulekayo, kodwa bangaphi abaziyo ngezenzo zikaThixo zobugorha? Kunjengokuba omnye umphengululi wathi: “Babhala izenzo zamagorha abo kwixina, kodwa izenzo ezizukileyo zikaYehova zibhalwa entlabathini, yaye ukuhamba kwexesha kuyazicima kwinkumbulo.” Ezo zenzo azicimi ngokwenene, nangona zingaziwa ngabaninzi. Ngoko kumsebenzi wethu wendlu ngendlu, xa siqhuba izifundo zeBhayibhile zamakhaya, nangezinye izihlandlo, ngenzondelelo masithethe ngezenzo zikaThixo zobugorha.
6. (a) Kungasiphi isihlandlo kwiminyaka eyadlulayo owathi umoya wenzondelelo esibufeza nga-wo ubulungiseleli bethu wabonakaliswa kakuhle? (b) Enyanisweni, kwathiwani ngowe-1922 mayela nokubhengeza uBukumkani?
6 Sikwafanele ngenzondelelo sivakalise uzuko lobukumkani bukaThixo. Ngokuqinisekileyo inzondelelo ngenkonzo enjalo yoBukumkani yabonakala ngokucacileyo xa, ngowe-1922, uJ. F. Rutherford, ngelo xesha owayengumongameli weWatch Tower Society, wanikela intetho kwababeze endibanweni eCedar Point, eOhio, waza wathi: “Ukususela ngowe-1914 uKumkani wozuko uye wasemandleni . . . Ubukumkani bamazulu busondele; uKumkani uyalawula; ubukhosi bukaSathana buyawa; izigidi eziphilayo ngoku azisayi kuze zife. Niyakukholelwa na oko? . . . Ngoko buyelani entsimini, nina boonyana boThixo osenyangweni! Bhinqani isikrweqe senu! Yibani ngabalungeleleneyo, yibani nenkalipho, khuthalani, yibani nesibindi. Yibani ngamangqina athembekileyo nayinyaniso eNkosi. Qhubelani phambili emlweni de onke amasalela eBhabhiloni abe yinkangala. Vakalisani isigidimi kude nakufuphi. Ihlabathi limele lazi ukuba uYehova unguThixo nokuba uYesu Kristu unguKumkani wookumkani neNkosi yeenkosi. Le yimini yeemini. Khangelani, uKumkani uyalawula! Nina ningabameli bakhe. Ngoko ke mbhengezeni, mbhengezeni, mbhengezeni, uKumkani nobukumkani bakhe.”
7. Sifanele sivakalelwe njani ngomsebenzi wethu njengabavakalisi boBukumkani?
7 Olunjani lona uvuyo okululo ‘ukucinga ngegama likaThixo,’ ukuxelela abanye ngolawulo lwakhe nokubhengeza uBukumkani obungoMesiya boNyana wakhe oyintanda! (Malaki 3:16) Njengabavakalisi nabameli boBukumkani, siyalixabisa ilungelo esinalo lokuvakalisa iindaba ezilungileyo nokuguqulela iintliziyo zabanye kuThixo, kuKristu naseBukumkanini. Ngaphakathi kuthi, kufanele kubekho umnqweno ovuthayo wokuxelela abanye ngobuqaqawuli bendili yobukumkani bukaYehova.—Thelekisa uYeremiya 20:9.
8. (a) Ubukumkani bukaYehova bumelwa yintoni namhlanje? (b) Kutheni kunokuthiwa uThixo ulawula “kwizizukulwana ngezizukulwana”?
8 Sifanele sishukunyiselwe ukuvakalisa uBukumkani bukaThixo ngenzondelelo enkulu, kuba uDavide ngokulandelayo wathi: “Ubukumkani bakho bubukumkani bamaphakade onke, nolawulo lwakho lukwizizukulwana ngezizukulwana.” (INdumiso 145:13) Njengoko ukucamngca komdumisi ngobukumkani bukaYehova kwakuqhubeka, uyayeka ukusebenzisa isimela-bizo esithi “bakhe” aze asebenzise esithi “bakho,” ebhekisa amazwi akhe anyanisekileyo ngokuthe ngqo kuThixo. Kambe ke, ulawulo lukaYehova njengoko lumelwa buBukumkani obungoMesiya alukuthabathel’ indawo ukuba ngukumkani kukaThixo ngonaphakade. Enyanisweni, xa uluntu oluthobelayo luye lwabuyiselwa emfezekweni, uKristu uya kudlulisela uBukumkani kuYise. (1 Korinte 15:24-28) Ngoko uYehova ulawula “kwizizukulwana ngezizukulwana.” UYehova wayenguKumkani xa kwakudalwa uAdam yaye usaya kulawula abantu abangamalungisa ngonaphakade.
9. KwiNdumiso 145, kunokuthiwani ngendinyana eqala ngonobumba wesiHebhere unun?
9 Kule ndumiso ibumbongorha, umbhalo weMasora uyayishiya indinyana eqala ngonobumba wesiHebhere unun. Kodwa ngokuvisisana neSeptuagint yesiGrike, iPeshitta yesiAram, neVulgate yesiLatini, omnye umbhalo-ngqangi wesiHebhere ufundeka ngolu hlobo: “UYehova uthembekile kuwo onke amazwi akhe, kwaye unobubele obunothando [okanye, “unyanisekile”] kuyo yonke imisebenzi yakhe.” (umbhalo osemazantsi kwiNew World Translation of the Holy Scriptures—With References) UThixo uyawazalisekisa onke amadinga akhe yaye unyanisekile unothando, kwaye unobubele kubo bonke abakuxabisayo ukulunga kwakhe.—Yoshuwa 23:14.
Inkxaso KaYehova Ayize Isilele
10. UThixo ‘usixhasa njani’?
10 UKumkani Ongunaphakade akaze ayityeshele intlungu yabakhonzi bakhe. Ngaloo ndlela, uDavide wayenokuthi: “UYehova ungumxhasi wabo bonke abawayo, ngumphakamisi wabo bonke abagobileyo.” (INdumiso 145:14) Ukususela ngemihla ka-Abheli, uYehova ubebaxhasa abanquli Bakhe. Ukuba besinokushiywa, besiya kuwa siwile ngaphantsi kwemithwalo yethu. Siswele amandla awaneleyo okuthwala zonke iinkxwaleko zobomi kwakunye nentshutshiso esizelayo njengabantu bakaThixo, kodwa uYehova uyasiphakamisa. Imo yesenzi sesiHebhere esisetyenziswe apha ibonisa ukuba uThixo ngokuqhubekayo ‘usinika inkxaso.’ Kusenokuphawulwa ukuba uYohane uMbhaptizi noNyana kaThixo ngokwakhe banceda ukuphakamisa aboni abangafezekanga ngokokuziphatha. Xa abo bantu baguqukayo baza baba ngabakhonzi bakaYehova, banandipha intsikelelo emangalisayo yokuxhaswa nguThixo.—Mateyu 21:28-32; Marko 2:15-17.
11. Kungaziphi iindlela athi uYehova ‘abaphakamise ngazo abo bagobileyo’?
11 Kuyathuthuzela ukwazi ukuba ‘uYehova uyabaphakamisa bonke abagobileyo’ ngenxa yeemvavanyo ezahlukahlukeneyo. Uyabakhuthaza abadakumbileyo phakathi kwethu, athuthuzele abalilayo, aze asincede silithethe ilizwi lakhe ngokungafihlisi xa sitshutshiswa. (IZenzo 4:29-31) Akaze ayivumele imithwalo yethu isityumze ukuba nje siyalwamkela uncedo lwakhe. (INdumiso 55:22) Ngoko, ‘njengentombi ka-Abraham eyayigobile’ kodwa yaphiliswa ngokwasemzimbeni nguYesu, sifanele ‘simzukise uThixo’ xa esithi ngokunothando asiphakamise ngokomoya. (Luka 13:10-17) Abathanjiswa ababegotywe bubukhoboka baseBhabhiloni bambulela uThixo xa wabaphakamisayo ngowe-1919, yaye ebephakamisa “ezinye izimvu” ezinoxabiso ukususela ngowe-1935.—Yohane 10:16.
12. Kwenzeka njani ukuba “amehlo ento zonke akhangele” kuThixo?
12 UYehova akaze abadanise abantu bakhe, njengoko uDavide ngokulandelayo wakwenza kwacaca ngokuthi: “Amehlo ento zonke akhangele kuwe, wena ke uzinika ukudla kwazo ngexesha elililo; uyasivula isandla sakho, uzihluthise into zonke eziphilayo ngeento ezikholekileyo.” (INdumiso 145:15, 16) Kufana nokungathi amehlo ezidalwa zonke eziphilileyo akhangele ngethemba kuMongami Wendalo iphela. Izithunywa zezulu zikhangele kuThixo ukuze ziqhubeke ziphila. Yaye njengokuba umntwana ekhangela kumzali ukuze afumane izinto azifunayo, nathi sikhangele kuBawo wethu osezulwini. Enyanisweni, nguye oxhasa abantu nezilwanyana ngokufanayo. Akukho wumbi unokuzanelisa iintswelo zabo. UThixo uzinika “ukudla kwazo ngexesha elililo,” oko kukuthi, ngethuba ekufuneka ngalo.
13. Kungaziphi iindlela athi uYehova ‘asivule isandla sakhe azihluthise iinto zonke eziphilileyo ngeento ezikholekileyo’?
13 UThixo ‘uyasivula isandla sakhe aze azihluthise iinto zonke eziphilileyo ngeento ezikholekileyo.’ (INdumiso 104:10-28) Kuyinyaniso ukuba, zimbi izilwanyana ziyafa ngenxa yokuswela ukudla. Abantu abaninzi bayalamba kuba bengamaxhoba okuzingca, engcinezelo nokusetyenziswa kakubi kobuncwane obukhoyo. Ngaphezu koko, uYesu waxela kusengaphambili ukuba “iindlala” zaziya kuba yinxalenye ‘yomqondiso’ wobukho bakhe kule mihla yokugqibela. (Mateyu 24:3, 7) Kodwa akukho nanye yezi eyenzeka ngenxa yokuba uYehova eligqolo okanye engakwazi ukulungiselela. Cinga ngamawaka ezigidi zezidalwa azixhasayo! Ngaphezu koko, le ndumiso inikela isiqinisekiso sokuba ngaphantsi kolawulo loBukumkani, xa ‘umntu engayi kugunyazela umntu kube kubi kuye,’ uThixo uya kuzanelisa iintswelo zethu zezinto eziphathekayo nezingokomoya. (INtshumayeli 8:9; Isaya 25:6) Nanamhlanje, akuyomfuneko ukuba silambele ukudla kokomoya, kuba uThixo ukulungiselela ngokuyintabalala ngexesha lako ‘ngomkhonzi othembekileyo noqondayo.’ (Mateyu 24:45-47; 1 Petros 2:2) Ngokwezinto ezingokomoya, amaNgqina kaYehova angabona bantu bondliwa kakuhle ehlabathini. Ngaba uyalubonakalisa uxabiso ngentabalala enjalo?
UYehova Uyabagcina Abo Bamthandayo
14. Kutheni uDavide wayenokuthi “ulilungisa uYehova ngeendlela zakhe zonke, unyanisekile ngezenzo zakhe zonke”?
14 Ubudenge bethu ‘busenokuyiphenula indlela yethu’ buze busizisele iingxaki, kodwa asifanele kumbek’ ityala uThixo ngenxa yezo ngxaki. (IMizekeliso 19:3) UDavide ubonisa isizathu soku xa esithi: “Ulilungisa uYehova ngeendlela zakhe zonke, unenceba [“unyanisekile,” “NW”] ngezenzo zakhe zonke.” (INdumiso 145:17) UThixo usoloko esenza izinto ngendlela ethe tye, esesikweni neyenceba. Inceba yakhe ibonakala ngokukodwa kwilungiselelo losindiso alenze ngedini lentlawulelo likaYesu. (IZenzo 2:21; 4:8-12) Kwaye uYehova “unyanisekile kuzo zonke izenzo zakhe,” uhlala ethembekile, enothando yaye engakhethi buso. Ngoko, ‘njengabaxelisi bakaThixo’ masibe ngabathe tye, sibe nokusesikweni, nenceba, singakhethi buso, size sinyaniseke.—Efese 5:1, 2; Duteronomi 32:4; INdumiso 7:10; 25:8; Isaya 49:7; IZenzo 10:34, 35.
15. ‘Simnqule njani uThixo ngenyaniso,’ yaye ube yintoni umphumo wokwenza kwethu oko?
15 Ekubeni uThixo enobulungisa yaye enyanisekile, sitsaleleka kuye. Ngaphezu koko, uDavide uyasiqinisekisa: “Usondele uYehova kubo bonke abamnqulayo, kubo bonke abamnqulayo ngenyaniso.” (INdumiso 145:18) Xa sasibhaptizwa njengamakholwa azahluleleyo, sanqula igama likaYehova. (IZenzo 8:12; 18:8; Roma 10:10-15) Ngaloo ndlela ekubeni sasondelayo kuThixo, uyasondela kuthi. (Yakobi 4:8) ‘Simnqula ngenyaniso’ kuba oko sikwenza ngendlela yokwenyaniso, ngoYesu Kristu. Yaye uYehova uya kuhlala esondele ukuba simnqula “ngomoya nangenyaniso,” sibonakalisa ‘ukholo olungahanahanisiyo,’ yaye ‘siyakrota singe siyambona lowo ungenakubonwa.’ (Yohane 4:23, 24; 1 Timoti 1:5; Hebhere 11:27) Ngoko asiyi kuthandazela ilize okanye kufuneke sijamelane nehlabathi likaSathana sisedwa, koko siya kuqhubeka sinandipha uncedo nokhokelo lukaThixo. (INdumiso 65:2; 1 Yohane 5:19) Okunjani kona ukunqabiseka okuthethwa koko!
16. Kutheni uYehova ‘esenza okukholekileyo kwabamoyikayo’ yaye ukwenza njani oku?
16 Sikwanonqabiseko lokwenene ngenxa yezinye izinto uYehova asenzela zona. UDavide wathi: “Uyayenza into ekholekileyo kwabamoyikayo, akuve ukuzibika kwabo, abasindise.” (INdumiso 145:19) UYehova ‘uyakwenza okukholekileyo kuthi’ ngenxa yokuba sinentlonelo enzulu ngoThixo noloyiko oluphilileyo lokungamkholisi. (IMizekeliso 1:7) Intliziyo yethu ethobelayo iye yasishukumisela ukwenza uzahlulelo kuYehova, yaye isimo sethu sengqondo sesokuba, “Makwenziwe ukuthanda kwakho.” Ekubeni ikukuthanda kwakhe ukuba sivakalise isigidimi soBukumkani, uyawuzalisekisa umnqweno wethu wokwenza loo msebenzi. (Mateyu 6:10; Marko 13:10) UThixo ‘wenza okukholekileyo kuthi’ ngenxa yokuba asithandazi ngokuzingca kodwa sicela izinto ngokuvisisana nokuthanda kwakhe. Uyasipha oko kuvisisana nokuthanda kwakhe yaye kukokokulungelwa kwethu.—1 Yohane 3:21, 22; 5:14, 15; thelekisa uMateyu 26:36-44.
17. Kutheni sinokuqiniseka nje ukuba “ukuzibika” kwethu kuya kuviwa nguThixo?
17 NjengamaNgqina athembekileyo kaYehova, sikwanokuqiniseka ukuba “ukuzibika” kwethu akusayi kungaphulaphulwa. UThixo wamhlangula uDavide embandezelweni kwaye wamsindisa uYesu, de wamvusa kwelabafileyo. Xa sihlaselwa ziintshaba, ngokukhethekileyo xa sihlaselwa nguGogi, sinokuqiniseka ukuba uYehova uya kusihlangula. (Hezekile 38:1–39:16) Enyanisweni, ebudeni balo naliphi na ixesha lenkathazo, njengoDavide ngentembelo sinokuthandaza sithi: “Ndibabale, Yehova, ngokuba ndibandezelekile. . . . Ngokuba ndive intlebendwane yabaninzi, ukunxunguphala ngenxa zonke. Ekugquguleni kwabo ngam, bankqangiyela ukuthabatha umphefumlo wam. Ke mna ndikholose ngawe, Yehova; ndithi, UnguThixo wam wena.”—INdumiso 31:9-14.
18. Singenelwa njani kukwazi ukuba uYehova ‘uyabagcina abo bamthandayo,’ kodwa uya ‘kubatshabalalisa abangendawo’?
18 UYehova uThixo usoloko ekulungele ukusinceda. Kunjengokuba uDavide esithi: “UYehova ungumgcini wabo bonke abamthandayo, abatshabalalise bonke abangendawo.” (INdumiso 145:20) Ewe, ukuba siyamthanda uThixo, uya kusisikelela aze asigcine. (Numeri 6:24-26) ‘Uphindezela ngokukhulu kowenza ngekratshi’ kodwa uyabakhusela abakhonzi bakhe abathobekileyo, engavumeli nantoni na eya kubenzakalisa ngokusisigxina ukuba ibachukumise. Ekubeni uYehova enathi, masibe nenkalipho. (INdumiso 31:20-24; IZenzo 11:19-21) ‘Zonke izixhobo ezikhandelwe ukulwa nathi aziyi kuba nampumelelo.’ (Isaya 54:17; INdumiso 9:17; 11:4-7) Lawo ngamava abo baye bangqina uthando lwabo ngoThixo njengabakhonzi bakhe abathembekileyo nabazahluleleyo. Njengeqela, amaNgqina kaYehova aya kutyhubela ekhuselekile “imbandezelo enkulu” eya kuziselwa abangendawo. (ISityhilelo 7:14) Yaye enjani yona intsikelelo ukuzinziswa kwembambano enkulu yokuba ngukumkani wendalo iphela kukaYehova okuya kuba yiyo kubo “bonke abamthandayo”!
Qhubeka Ulibonga Igama Elingcwele LikaYehova
19. Kutheni imilomo yethu ithetha “indumiso kaYehova”?
19 UDavide uqukumbela le ndumiso ishukumisayo ngala mazwi: “Umlomo wam mawuthethe indumiso kaYehova, inyama yonke ilibonge igama lakhe elingcwele ngonaphakade kanaphakade.” (INdumiso 145:21) NjengamaNgqina kaYehova, siyabuxabisa ubukhulu, ukulunga, ukuba ngukumkani ngokufanelekileyo, inkxaso engasileliyo, nokunyanyekelwa ngokungenasiphelo nguYehova. Ngoko, njengoDavide, imilomo yethu ithetha indumiso kaThixo. Sishukuyiselwa ukuba sizinikele kuye ngokupheleleyo, simbulele ngeentsikelelo zakhe ezininzi, size silidumise ‘igama lakhe elibekekileyo.’—1 Kronike 29:10-13; Eksodus 20:4-6.
20. Sicinga ngexesha elingunaphakade, lufanele lube yintoni uzimiselo lwethu?
20 Ekubeni uYehova esisikelela mihla le, masimbonge rhoqo, okanye sithethe kakuhle ngaye. Masishumayele iindaba ezilungileyo ezidumisa uThixo ngenzondelelo, sixelela abanye ukuba kungekudala ‘yonke inyama iya kulibonga igama lakhe elingcwele.’ Hayi indlela ekuya kuba kuhle ngayo ukuphila xa bonke abemi bomhlaba—eneneni, zonke izidalwa ezinengqondo zendalo—baya kumvumela indumiso uBawo wethu osezulwini! (INdumiso 148:1-13) Makabongwe uYehova ngokutyhila igama lakhe nokusinika ilungelo lokuba ngamaNgqina akhe. (INdumiso 83:18; Isaya 43:10-12) Kwanga singaziphatha ngendlela ebafaneleyo abo baliphatha ngobungcwele elo gama size sithandazele ukungcwaliswa kwalo. (Luka 11:2) Masimkhonze uThixo ngokunyaniseka, ukuze kwinkqubo yakhe entsha, amazwi ethu aviwe phakathi kwabo baya kuvuma bebonga igama likaYehova elingcwele ngonaphakade.
Athini Amagqabaza Akho?
◻ Yintoni esiya kuyenza ukuba ubukumkani bukaYehova buxabisekile kuthi?
◻ Ubukumkani bukaThixo bumelwa yintoni namhlanje?
◻ UYehova ‘ubaphakamisa njani bonke abagobileyo’?
◻ Kungaziphi iindlela athi uYehova ‘asivule isandla sakhe azihluthise izinto zonke eziphilileyo’?
◻ Sinokulibonga njani igama likaYehova elingcwele?
[Umfanekiso okwiphepha 17]
Ngowe-1922 amazwi athi ‘mbhengezeni uKumkani noBukumkani’ ashukumisela abameli bobukumkani bukaYehova ukuba benze umsebenzi ongakumbi