“Kumngcelele Woloyiso”
UMNGCELELE woloyiso wawungumbhiyozo onomtsalane wokubhiyozela ukoyisa utshaba. Elinye lawona mawonga aphakamileyo iNdlu Yeengwevu yaseRoma eyayinokulithi jize kwinjengele eyoyisileyo lalikukuyivumela ukuba ibhiyozele uloyiso lwayo ngomngcelele woloyiso ongokwasemthethweni nozuke ngolo hlobo. Umpostile uPawulos wawukhankanya kabini umngcelele woloyiso kwiincwadi zakhe. Noko ke, ngaphambi kokuba siqwalasele amazwi akhe khawuzame ukuba nomfanekiso-ngqondweni womngcelele onjalo. Yiba nombono wezihlwele zimi emacaleni eendlela njengoko lo mngcelele uthe chu ngcembe uhamba ngeVia Triumphalis uze unyuke kumajikojiko aya kwitempile kaJupiter esencotsheni yeNduli iCapitoline yaseRoma.
Umphengululi uJames M. Freeman wabhala wathi, “Ivumba elimnandi leziqholo ezazitshiswa lalisasazeka kwitempile nasezitratweni, lizalisa umoya ngesiqholo salo. Kulo mngcelele kwakukho amalungu endlu yeengwevu neendwalutho zabaseburhulumenteni, ezazisithi ngobukho bazo zizimase lowo woyisileyo. Izinto ezixabisekileyo ezizuzwe emfazweni, ezinjengegolide, isilivere, izixhobo eziziintlobo-ntlobo, imisebenzi yezobugcisa enqabileyo nenexabiso elikhulu, nazo zonke izinto lowo woyisileyo okanye woyisiweyo awayezigqala njengezinexabiso elikhulu, zazithwalwa ukuze zibonwe kweso sixeko sizele zizihlwele. Namabanjwa emfazwe ayenyanzelelwa ukuba ahambe kulo mngcelele. Injengele, ekwakuzukiswa yona ngolo loyiso, yayikhwela enqweleni yohlobo olulodwa netsalwa ngamahashe amane. Ingubo yayo yayihonjiswe ngegolide, nebhatyi yayo ihonjiswe ngeentyatyambo. Kwisandla sayo sokunene yayiphatha isebe lompayini, ize ngesasekhohlo iphathe intonga yasebukhosini; ebunzini layo kwakukho isithsaba seentyatyambo. Njengoko amajoni ekhwaza nabemi basekuhlaleni beqhwaba izandla le njengele yoyisileyo yayithwalwa ukutyhutyha izitrato isiya kwitempile kaJupiter, apho kwakunikelwa imibingelelo, ekwakusithi emva koko kubekho isidlo esikhulu etempileni.”
UPawulos wawusebenzisa ngokufuziselayo umngcelele woloyiso xa wabhala incwadi yakhe yesibini eya kumaKristu aseKorinte ngomnyaka wama-55 weXesha lethu Eliqhelekileyo. Wathi: “Makubulelwe kuThixo osoloko esikhokelela kumngcelele woloyiso sikunye noKristu nowenza ukuba ivumba lokumazi yena liqondwe ngathi kwiindawo zonke! Kuba kuye uThixo silivumba elimnandi likaKristu phakathi kwabasindiswayo naphakathi kwabatshabalalayo; kwabanye silivumba lokufa elisa ekufeni, kwabanye silivumba lobomi elisa ebomini.”—2 Korinte 2:14-16, NW.
Apha uPawulos namanye amaKristu athanjisiweyo baboniswa njengabalawulwa abazinikele kuThixo, ‘bekunye noKristu.’ Baboniswa njengoonyana, abathetheli namajoni alandela kumqokozo kaYehova yaye ekhokelwa nguye kumngcelele woloyiso ohamba kwindlela enevumba elimnandi. (Bona IMboniselo kaJulayi 15, 1990, iphepha 10-15.) Oku kusetyenziswa ngokufuziselayo komngcelele onjalo kukwabonisa ukuba abo bazichasayo iindaba ezilungileyo zoBukumkani bukaThixo bajongene nokufa kuphela. Kodwa hayi indlela okwahluke ngayo ngabalandeli bakaYesu abathanjisiweyo! Banethemba lokusindiselwa kubomi bokungafi ezulwini noKrisu. Ibe kuthekani ngamaqabane abo anyanisekileyo, nawo azahlulele kuThixo? Anethemba elivuyisayo lobomi kwiparadisi yasemhlabeni, apho aya kuthi “azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu.” (ISityhilelo 21:1-4; Luka 23:43) Ngaba uyinxalenye yesi sihlwele sivuyayo?
KweyabaseKolose 2:15 (NW), kunikelwa umfanekiso owahlukileyo, apho uPawulos wabhala oku: “Ke babhunyulwe oorhulumente noomagunya baze, [uThixo] wabenza isibonelo ekuhleni njengaboyisiweyo, ebakhokelela kumngcelele woloyiso ngawo.” Apha oorhulumente namagunya angaphantsi kukaSathana uMtyholi aboniswa njengabathinjwa namabanjwa akumngcelele woloyiso. UYehova uMoyisi ubakhulula babe ze aze abenze isibonelo ekuhleni njengaboyisiweyo. Boyiswe “ngawo,” oko kukuthi, “umthi wentuthumbo” kaYesu. Ukufa kwakhe emthini kwanikela isizinzi sokususwa ‘kombhalo wesandla’ (umnqophiso woMthetho) kwaza kwenza kwaba nokwenzeka ngamaKristu ukukhululwa kubukhoboka bamandla kaSathana obumnyama. (Kolose 2:13, 14, NW) Hayi indlela esifanele siyixabise ngayo inkululeko enjalo yamaKristu!