Khuthazanani Njengoko Imini Isondela
“[Khuthazanani] ngakumbi nangakumbi, kuba nani niyabona ukuba imini leyo iyasondela.”—HEBHERE 10:25, “TE.”
1, 2. Yiyiphi imini esondelayo, yaye bafanele babe nasiphi isimo sengqondo abantu bakaYehova?
ABO namhlanje banesabelo ekuthini, ‘Yiza uze uthabathe amanzi obomi,’ abazahluli kwabanye abantu. Njengoko imini enkulu yoloyiso lukaYehova isondela, basebenzisa isiluleko seBhayibhile esithi: “Masikhathalelane, sivuselelane uthando, ngokunjalo nokwenza imisebenzi emihle. Kananjalo masikuxabise ukudibana namanye amakholwa, siphefumlelane, singabi njengabo bawutyeshelayo lo mkhwa. Ewe, masikhuthazane ngakumbi nangakumbi, kuba nani niyabona ukuba imini leyo iyasondela.”—Hebhere 10:24, 25, TE.
2 IZibhalo ziprofeta ngaloo “mini” ‘njengemini kaYehova.’ (2 Petros 3:10, NW) Njengoko uYehova engOsenyangweni, uThixo onamandla onke, ayikho imini ekunokwenzeka ukuba igqwese imini yakhe. (IZenzo 2:20) Le yimini yokuthethelelwa kolongamo lwakhe njengoThixo wendalo iphela. Loo mini ebaluleke ngokungenakuthelekiswa nanto iyasondela.
3. Imini kaYehova yayisondela njani kumaKristu ngenkulungwane yokuqala, ibe kuthekani ngathi namhlanje?
3 Umpostile uPawulos waxelela amaKristu ngenkulungwane yokuqala yeXesha lethu Eliqhelekileyo ukuba imini kaYehova yayisondela. Ayekhangele phambili ekufikeni kwaloo mini, kodwa emva apho, loo mini yayikude kangangeminyaka eli-1 900. (2 Tesalonika 2:1-3) Phezu kwaso nje eso sibakala, ayemele akhuthazwe kuba ngokuqinisekileyo loo mini yayiza kufika, yaye ukuba amaKristu ayetyhalela phambili ngokuthe ngcembe enolo kholo, ayeya kungena kuloo mini isikelelekileyo. (2 Timoti 4:8) Emva apho, loo mini yayibonakala isondela. Ke kuthi namhlanje, ngenene imini kaYehova ayifikanga igalelekile. Zonke iinzaliseko ezimangalisayo zesiprofeto seBhayibhile zingqinela esi sibakala sibangel’ uvuyo. Kungekudala, igama loThixo wethu, uYehova, liya kungcwaliswa ngonaphakade kanaphakade.—Luka 11:2.
Ukukhuthazwa Ngegama LikaThixo
4. Ngokutsho kweSityhilelo 19:6, ngubani oza kuba nguKumkani, ibe igama lakhe liqondwa njani?
4 Yonke intsapho yoluntu ifanele ibe nomdla kwigama likaThixo. IToday’s English Version ithi: “Dumisani uThixo! Kuba iNkosi, uThixo wethu uSomandla, unguKumkani!” (ISityhilelo 19:6) Ngokutsho kwaloo nguqulelo yeBhayibhile yenkulungwane yama-20, uyiNkosi, uThixo ongusomandla. Loo nguqulelo, kwanezinye iinguqulelo ezininzi zale mihla, azilichazi igama loThixo oqalisa ukulawula njengoKumkani. Phofu ke, igama likaThixo liqukiwe kwisibhengezo esithi “Haleluya!” (“Dumisani uYa” okanye, “Dumisani uYehova”) esifumaneka kwiBhayibhile yesiXhosa, kwiRevised Standard Version, iNew International Version, nakwinguqulelo kaMoffat yeSityhilelo 19:6. Kangangethuba elide kweli Xesha lethu Liqhelekileyo, igama likaThixo ngokusisiseko liye lanyamalala kwiinguqulelo zeBhayibhile. Noko ke, njengoko siza kubona, elo gama liye labakhuthaza gqitha abantu bakaThixo, kumaxesha amandulo nawanamhlanje.
5, 6. (a) Kwakutheni ukuze kube yimfuneko ngoMoses ukulazi igama loThixo awayemmela? (b) Kumele ukuba waba yintoni umphumo kumaSirayeli xa uMoses walibalaselisayo igama likaThixo?
5 Siyakhumbula ukuba xa uMoses wathunywa nguThixo Osenyangweni kubantu bakwaSirayeli ababengamakhoboka kwilizwe laseYiputa, kwaphakama umbuzo kwiingqondo zabo bantu uMoses wayethunywe kubo wokuba ngubani owayemthumile. UMoses wayenolindelo lokuba amaYuda abandezelekileyo ayeya kufuna ukulazi igama loThixo awayemmela. Kule nkalo sifunda oku kwiEksodus 3:15: “Waphinda wathi uThixo kuMoses, Wothi koonyana bakaSirayeli, UYehova, uThixo wooyihlo, uThixo ka-Abraham, uThixo kaIsake, uThixo kaYakobi, undithumile kuni: ligama lam elo ngonaphakade, sisikhumbuzo sam eso kwizizukulwana ngezizukulwana.”
6 Xa le nkcazelo yabethelelwayo kuwo, amaSirayeli amele ukuba aziva ekhuthazeke gqitha. Ukukhululwa kwawo kwakuqinisekiswe ngokuphela koThixo oyinyaniso, uYehova. Ibe hayi indlela ekumele ukuba kwawakhuthaza ngayo ukuba nethemba lokumazi lo Thixo xa wayeya kubonakalisa intsingiselo yegama lakhe lobuqu—engazahluli ngokuzingca!—Eksodus 3:13; 4:29-31.
7. (a) Sazi njani ukuba abafundi bakaYesu babelazi igama likaThixo? (b) Lafihlwa njani igama likaThixo?
7 Nabafundi beNkosi uYesu Kristu bakhuthazwa kakhulu ligama likaThixo, uYehova, noko lalikumela. (Yohane 17:6, 26) Ebudeni bobulungiseleli bukaYesu basemhlabeni, ngokuqinisekileyo akazange alifihle igama likaThixo, ibe kwakungeyonjongo yakhe ukubalaselisa elakhe igama, uYesu. Kuphela kwaba semva kokuqalisa kowexuko olwaluxelwe kwangaphambili kukholo lobuKristu bokwenyaniso elathi igama likaThixo lafihlwa, yaye, lashenxiswa ngokoqobo kwincoko yamaKristu. (IZenzo 20:29, 30) Lakuba nje igama loNyana kaThixo liqalise ukubalaseliswa ngakumbi, lisitha ngandlel’ ithile elo likaYise, abo babesithi bangamaKristu babeya kufumanisa ukuba ukunqula kwabo uBawo ngomlinganiselo omkhulu kwakulilize, kungeyonto intsapho emanyeneyo kuyo, yaye ngoko kungakhuthazi kangako.
8. Uye waba yintoni umphumo oqhubekayo kubantu bakaThixo ngokwamkela kwabo igama elithi amaNgqina kaYehova?
8 Ngaloo ndlela, yaba luvuyo olungathethekiyo xa aBafundi BeBhayibhile Bezizwe Ngezizwe ababenxulumene neWatch Tower Society bamkela igama elithi AmaNgqina kaYehova ngowe-1931. Oku kwakungavuyisi nje kuphela koko kwakukhuthaza gqitha. Ngesi sihlandlo, abafundi beBhayibhile ababesandul’ ukwamkela igama elitsha babenokukhuthazana.—Thelekisa uIsaya 43:12.
9. AmaKristu okwenyaniso avakalelwa njani ngaLowo angamaNgqina akhe?
9 Ngenxa yoko, amaKristu okwenyaniso namhlanje akufumanisa kuyinto efanelekileyo ukumchaza Lowo axelwa kwangaphambili ukuba ayeya kuba ngamaNgqina akhe, kwanjengokuba uYesu Kristu iNkokeli yawo wenjenjalo xa wayelapha emhlabeni. (ISityhilelo 1:1, 2) Ewe, amchaza njengokuphela kwalowo ugama linguYehova.—INdumiso 83:18.
Ukuzaliswa Luvuyo Nomoya Oyingcwele
10-12. (a) Wawuya kuba yintoni umphumo wamandla asebenzayo kubalandeli bakaYesu? (b) AmaNgqina kaYehova ashukunyiswa luvuyo afuna ukuphathana njani?
10 Kumazwi awabashiya nawo abapostile bakhe uYesu Kristu wathi: “Hambani ngoko niye kuzenza abafundi zonke iintlanga, nibabhaptizela egameni loYise, loNyana, loMoya oyiNgcwele; nibafundisa ukuba bazigcine zonke izinto endiniwisele umthetho ngazo. Niyabona, mna ndinani yonke imihla, kude kube sekuphelisweni kwephakade eli.”—Mateyu 28:19, 20.
11 Phawula ukuba amaKristu awayesandul’ ukufundiswa ayemele abhaptizelwe egameni lomoya oyingcwele. Lo moya oyingcwele awungomntu koko ungamandla asebenzayo kaYehova uThixo, lawo Yena awasebenzisayo ngoYesu Kristu. NgePentekoste, uYehova uThixo, esebenzisa uYesu, wathulula la mandla asebenzayo phezu kwabalandeli abazahluleleyo bakaYesu Kristu. (IZenzo 2:33) Bazaliswa ngulo moya oyingcwele, kwaye enye yezinto obonakala ngazo, okanye iziqhamo zomoya oyingcwele, luvuyo. (Galati 5:22, 23; Efese 5:18-20) Uvuyo luphawu olukhuthazayo. Abafundi bamele bazaliswe luvuyo lomoya oyingcwele. Umthandazo owenziwa ngumpostile uPawulos ufaneleke gqitha: “Wanga ke uThixo wethemba elo anganizalisa ngalo lonke uvuyo noxolo ekukholweni, ukuze niphuphume ithemba ngamandla omoya oyingcwele.”—Roma 15:13.
12 Ezaliswe ngulo moya ubangela uvuyo, amaNgqina kaYehova namhlanje, kuquka “isihlwele esikhulu,” aya kufuna, ewe, aya kushukunyiselwa, ukuba akhuthazane phakathi kwale nkqubo yezinto ingenabuhlobo. Ngokuvisisana noko, umpostile uPawulos wathetha ‘ngokukhuthazana.’—ISityhilelo 7:9, 10; Roma 1:12, NW; Ro 14:17.
Izizathu Zokuba Simele Sikhuthazwe
13. Ziziphi izizathu esinazo zokuba simele sikhuthazwe nokuba sikhuthazane?
13 Ezifumanisa ephakathi kwale nkqubo yezinto, enomlawuli kwanothixo wayo ongafuni nokuva nento le ngobulungisa, kuyimfuneko ukuba amaKristu akhuthazane kwibandla lobuKristu elisehlabathini lonke, elizaliswe ngumoya oyingcwele kaYehova uThixo. (Hebhere 10:24, 25; IZenzo 20:28) Sinezizathu ezaneleyo zokuba sikhuthazwe. Hayi indlela esimele sibe nombulelo ngayo kuba sinolwazi oluchanileyo ngoYehova nangoNyana Wakhe nangamandla asebenzayo lawo bawasebenzisayo, angala, umoya oyingcwele! Hayi indlela esimele sibe nombulelo ngayo ngenxa yethemba abasinike lona! Ngaloo ndlela unqulo lwethu luba loluvuyisa ngokupheleleyo. Umpostile uPawulos waxelela amaKristu awayewabhalela incwadi yakhe ukuba ayefanele akhuthazane nokuba avuselelane kolona kholo lwawo lungcwele. Ayemele akwenze oku ‘ngokungakumbi njengoko ayeyibona ngokufuziselayo ukuba loo mini iyasondela.’ Ngaphezu koko, xa amagunya ezobupolitika eli hlabathi ebhangisa ubuKristu bobuxoki, kunye nazo zonke ezinye iinkonzo zobuxoki, le meko iya kunyanzelisa ukuba sikhuthazane ngakumbi.
14. Ngoobani abafanele bakhuthazane, ibe banokukwenza njani oku?
14 Ngoxa abadala bekhokela ekukhuthazeni umhlambi kumabandla abakuwo, onke amaKristu kufuneka akhuthazane, kanye njengoko amaHebhere 10:25 eluleka. Enyanisweni, oku kuyimfuneko kumaKristu. Ukuba ulilungu lebandla, ngaba uyabakhuthaza abanye? Usenokubuza oku, ‘Ndiza kuqala ngaphi? Yintoni endinokuyenza?’ Okokuqala, ngokubakho nje kwakho kwiintlanganiso nangokuxhasa kwakho ilungiselelo lobuKristu, ngaba abakhuthazeki bonke abanye abazalwana noodade, kanye njengokuba nawe usenokuba uyakhuthazeka xa ubona abanye besiza ngokuthembekileyo kwiintlanganiso zebandla? Bakwanokukhuthazwa ngumzekelo wakho wokunyamezela ngokuthembeka. Ngokuqhubeka uhamba kwikhondo lobuKristu phezu kwazo nje iingxaki namahla-ndinyuka obu bomi, ungaze unikezele, unokumisela umzekelo okhuthazayo.
Ukuhlangabezana Nokudimazeka Okubangelwa NguMtyholi
15. Kutheni uMtyholi ‘enomsindo omkhulu,’ ibe ujoliswe kubani loo msindo?
15 Ayisithi sodwa abaziyo ukuba imini kaYehova iyasondela. NoSathana uMtyholi uyakwazi oko. ISityhilelo 12:12 sisixelela ukuba ngoku kuvakala uyeha emhlabeni “ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.” Njengoko ISityhilelo 12:17 sibonisa, umsindo wakhe omkhulu ujoliswe kwabo “bayigcinayo imithetho kaThixo, abanobungqina bukaYesu Kristu.” Asinakulithandabuza elo—uMtyholi ufuna ukusidimaza! Ibe uyayazi nendlela yokuzama ukwenjenjalo. Uyabazi ubuthathaka neengxaki zethu, ibe usebenzisa ezi zinto.
16. Kutheni uSathana esebenzisa ukudimazeka njengesixhobo?
16 Kutheni uMtyholi esebenzisa ukudimazeka njengesixhobo? Kungenxa yokuba ngokufuthi kuyaphumelela. Kwanomntu oye wanyamezela inkcaso nentshutshiso ekrakra usenokuba lixhoba lokudimazeka. USathana ufuna ukungcikiva uYehova uThixo ibe uzama ukungqina ukuba unako ukubatyekisa abantu ekukhonzeni uThixo. (IMizekeliso 27:11; thelekisa uYobhi 2:4, 5; ISityhilelo 12:10.) Ukuba unokukudimaza, usenokukubangela ukuba uthob’ isantya kwinkonzo yakho kuThixo; usenokude akubangele ukuba uyeke, uphole ekushumayeleni iindaba ezilungileyo zoBukumkani.—2 Korinte 2:10, 11; Efese 6:11; 1 Petros 5:8.
17. Yabonakala njani imiphumo emibi yokudimazeka ngomhla kaMoses?
17 Imiphumo emibi yokudimazeka inokuphawulwa kumzekelo wamaSirayeli akwiYiputa yamandulo. Emva kokuba uMoses ethethe noFaro, loo zwilakhe wawanika umsebenzi onzima waza wawacinezela ngakumbi. UThixo waxelela uMoses ukuba awaqinisekise amaSirayeli ukuba ngenene wayeya kuwakhulula, awenze abantu Bakhe, awasindise aze awangenise kwilizwe ledinga. UMoses wabaxelela oku oonyana bakwaSirayeli. Kodwa iEksodus 6:9 inikela le ngxelo: “Abamphulaphulanga uMoses, ngenxa yokukhathazeka [“yokudimazeka,” NW], nangenxa yomsebenzi onzima.” Le ndlela awasabela ngayo yamdimaza noMoses ekubeni afune ukuthetha noFaro njengoko wayeyalelwe, de uYehova wamqinisekisa uMoses waza wamkhuthaza.—Eksodus 6:10-13.
18. Kutheni kukho imfuneko enkulu ngabantu bakaThixo yokuba bahlangabezane nokudimazeka okubangelwa nguMtyholi?
18 USathana uMtyholi uwazi kakuhle umphumo ombi ukudimazeka okunokuba nawo kumkhonzi kaThixo. Kunjengokuba iMizekeliso 24:10 (NW) isithi: “Ngaba uye wazibonakalisa udimazekile ngemini yembandezelo? Amandla akho aya kuba mancinane.” Ekubeni singene nzulu kweli xesha lokuphela, kufuneka sibe namandla kwaye somelele ngokomoya. Imbi ngokwaneleyo into yokuba simele silwe nokungafezeki, ubuthathaka bethu neziphoso ezisenokusibangela sirhoxobise; kodwa njengoko uSathana ezama ukusebenzisa ezi ziphoso, siyalufuna uncedo.
Thembela Ngokuqinileyo Kwidini LikaKristu
19. Yintoni eya kusinceda ukuba silwe nokudimazeka, ibe ngoba?
19 Eyona nto inokusinceda kule nkalo lilungiselelo lentlawulelo uYehova alenze lafumaneka ngoYesu Kristu. Sinokoyisa ngokukholosa ngokuqinileyo ngentlawulelo. Kuyingozi ukulijongela phantsi eli lungiselelo. Sisaya kuzenza iimpazamo, okanye sone, lo gama nje singafezekanga. Kodwa akuyomfuneko ukuba sidimazeke size siyeke, sinoluvo lokuba amathemba aphelile, size ngaloo ndlela siwele kumgibe kaSathana. Siyazi ukuba sinalo idini elipheleleyo lesono. Intlawulelo iyakwazi ukuzishenxisa izono. Ukuba singabo ‘besihlwele esikhulu,’ simele sibe nokholo olupheleleyo size sikholose ngelokuba sinokuzihlamba iingubo zethu sizenze mhlophe egazini leMvana.—ISityhilelo 7:9, 14.
20. ISityhilelo 12:11 sibonisa njani ukuba ichule elikhulu lokudimaza, uMtyholi, linokoyiswa?
20 KwiSityhilelo 12:10 uSathana uchazwa ‘njengommangaleli wabazalwana bethu, lowo ubamangalelayo emehlweni kaThixo wethu imini nobusuku.’ Sinokumoyisa njani ummangaleli ongendawo nechule elinjalo ekudimazeni? Indinyana 11 yeso sahluko inikela impendulo: “Bameyisile bona ngenxa yegazi leMvana, nangenxa yelizwi lobungqina babo; abawuthandanga umphefumlo wabo kwada kwasekufeni.” Ngoko kufuneka abantu bakaYehova babe nentembelo epheleleyo kwidini lentlawulelo, igazi leMvana. Lugcine lomelele ukhuthazo olufumaneka ngokunikela ubungqina, usabelana rhoqo ngeendaba ezilungileyo zoBukumkani bukaThixo naye wonk’ ubani onokumfumana.
21. Sinokuba negalelo njani singaqondanga kumsebenzi kaMtyholi wokudimaza abazalwana bethu?
21 Maxa wambi, singaqondi, sisenokuba negalelo kumsebenzi kaMtyholi wokudimaza abazalwana bethu. Njani? Ngokuba ngabagxeka gqitha, abalindele okukhulu gqitha, okanye ngokuba ngamalungisa ngokugqith’ emgceni. (INtshumayeli 7:16) Sonke sineentsilelo nobuthathaka. Masingasebenzisi ezi zinto njengoko uMtyholi esenjenjalo. Kunoko, masithethe izinto ezikhuthazayo ngabazalwana bethu nangabantu bakaYehova abaliqela elilungelelanisiweyo. Sifuna ukuhlala sikhuthazana size ngolo hlobo singabadimazi abanye.
Ukukhuthazana Njengoko Imini Isondela
22, 23. (a) Kutheni singafanele siyekele abadala kuphela ukuba ibe ngabo abanikela ukhuthazo? (b) Abaveleli bebandla lobuKristu banokukhuthazwa njani?
22 Sifanele sikwenze isigqibo sethu esiqinileyo ukukhuthazana ngamaxesha onke njengoko imini isondela. Bakhuthaze abanye ngomzekelo wakho wokuthembeka nangamazwi entuthuzelo. Xelisa uYehova neNkosi uYesu Kristu ngokwenza oku. Musa ukuyekela kubadala bebandla kuphela ukuba ibe ngabo abakhuthaza abanye. Ewe, nabadala bayakufuna ukukhuthazwa. Babuthathaka ibe baneentsilelo njengawo wonke umhlambi, ibe bamele bahlangabezane neengxaki ezifanayo ekulungiseleleni iintsapho zabo kweli hlabathi liwohlokayo. Ukongezelela koko, banoko uPawulos wakuchaza njengokuxhalela amabandla. (2 Korinte 11:28, 29) Umsebenzi wabo unzima—bayakufuna ukukhuthazwa.
23 Unokubakhuthaza gqitha abo bakwizigxina zokuvelela kwibandla lamaKristu ngokusebenzisana nabo. Ngoko uya kuba ulandela isiluleko esikumaHebhere 13:17: “Bathambeleni abakhokeli benu, nibathobele; kuba bona abalali, ngenxa yemiphefumlo yenu, ngokwabaya kuphendula, ukuze bakwenze oko bevuyile, bengancwini; kuba anisizakali kuko oko.”
24. Ngale mihla idimazayo, yintoni esifanele ukuba sibe siyayenza, ibe ngoba?
24 Siphila kwimihla edimazayo. Eneneni iintliziyo zabantu ziyanyibilika kukoyika nakukulindela izinto ezilizelayo elimiweyo, njengoko uYesu waxela kwangaphambili. (Luka 21:25, 26) Ekubeni kukho iingxaki ezininzi kangaka ezidandathekisayo nezityumz’ intliziyo, ‘khuthazanani ngakumbi nangakumbi, kuba nani niyabona ukuba imini leyo iyasondela.’ Landela isiluleko esihle sompostile uPawulos esikweyoku-1 kwabaseTesalonika 5:11: “Thuthuzelanani, nakhane, kwanjengokuba nisenjenjalo.”
Ubuya Kuphendula Njani?
◻ Kutheni amaKristu efanele akhuthazane, ngokude kwangakumbi kunangaphambili?
◻ Ukwazi igama likaThixo kubakhuthaze njani abantu bakaYehova?
◻ Ziziphi iindlela esinokukhuthazana ngazo njengabantu ngabanye?
◻ Kutheni simele sikuphephe ukuba negalelo kumsebenzi kaMtyholi wokudimaza abazalwana bethu?
[Umfanekiso okwiphepha 17]
Abadala bayakhokela ekukhuthazeni umhlambi osemabandleni abakuwo