Yilungele Imini KaYehova!

Iimbalasane ZeyokuQala KwabaseTesalonika

IMINI kaYehova! AmaKristu aseTesalonika yamandulo ayecinga ukuba yayisemnyango. Ngaba ayechanile? Yayiza kufika nini? Lowo yayingomnye umbandela obalulekileyo owaxutyushwa kwincwadi yokuqala yompostile uPawulos eyayisiya kwabaseTesalonika, awayithumela eseKorinte malunga nonyaka wama-50 weXesha lethu Eliqhelekileyo.

UPawulos noSilas baseka ibandla eTesalonika, ikomkhulu lolawulo lwephondo laseRoma eMakedoni. (IZenzo 17:1-4) Kamva, kwincwadi yakhe yokuqala eya kwabaseTesalonika, uPawulos wabancoma, wanikela isiluleko, waza waxubusha ngemini kaYehova. Kwanathi sinokungenelwa kule ncwadi, ingakumbi ekubeni imini kaYehova ngoku isondele kangaka.

Ncoma Yaye Ukhuthaze

Okokuqala uPawulos wabancoma abemi baseTesalonika. (1Te 1:1-10) Babefanele banconywe ngenxa yokusebenza kwabo ngokuthembeka nangokunyamezela. Kwakhona, yayincomeka into yokuba ‘babelamkele ilizwi besembandezelweni eninzi, benovuyo loMoya oyiNgcwele.’ Ngaba uyabancoma abanye, njengokuba uPawulos wenzayo?

Lo mpostile wayemisele umzekelo omhle. (2:1-12) Phezu kwako nje ukuphathwa kakubi eFilipi, ‘wesuka akafihlisa, ekuye uThixo, ukuzithetha iindaba ezilungileyo’ kwabaseTesalonika. Wakuphepha ukuqhatha, ukubawa, nokufuna uzuko. UPawulos akazange abe luxanduva kodwa wayethantamisa kubo njengokuba umdlezana enjalo kumntwana wakhe. Onjani wona ukuba mhle umzekelo kubadala namhlanje!

Amazwi kaPawulos alandelayo abakhuthaza abemi baseTesalonika ukuba bahlale beqinile xa betshutshiswa. (2:13–3:13) Babenyamezele ukutshutshiswa ngabantu besizwe sabo, ibe uTimoti wayephathele uPawulos ingxelo entle malunga nemeko yabo engokomoya. Lo mpostile wathandazela ukuba bakhule eluthandweni nokuba iintliziyo zabo zizimaseke. Ngokufanayo, ngoku amaNgqina kaYehova athandazela amakholwa angoowawo atshutshiswayo, ayawakhuthaza ukuba kunokwenzeka, ibe ayavuya xa efumana iingxelo zokuthembeka kwawo.

Hlala Uphaphile Ngokomoya!

Ngokulandelayo abemi baseTesalonika bafumana isiluleko. (4:1-18) Babemele bahambe ngokuzele ngakumbi ngekhondo elimkholisayo uThixo, belubonakalisa ngakumbi uthando lobuzalwana yaye besebenza ngezandla zabo ukuze banyamekele iintswelo zabo. Ngaphezu koko, babemele bathuthuzelane ngethemba lokuba ekufikeni kukaYesu amakholwa azelwe ngomoya awayefile ayeya kuvuswa kuqala aze amanyaniswe naye. Kamva, abathanjiswa abasindileyo babeya kuthi ekufeni nasekuvusweni kwabo babe kunye noKristu nabo sele bevuselwe kubomi basezulwini.

Ngokulandelayo uPawulos waxubusha ngemini kaYehova yaye wanikela isiluleko esibhekele phaya. (5:1-28) Imini kaYehova yayisiza njengesela, kuza kufika ngokuqinisekileyo intshabalaliso ngebhaqo emva kokuba kwenziwe isibhengezo esithi: “Luxolo nokunqaba!” Ngoko abemi baseTesalonika babemele bahlale bephaphile ngokomoya, bekhuselwe sisigcina-sifuba sokholo nothando nasisigcina-ntloko esilithemba losindiso. Babemele babahlonele ngokugqithiseleyo abo babesongamela ebandleni yaye babemele bazinxweme kubungendawo, njengokuba nathi simele senjenjalo.

Incwadi yokuqala kaPawulos eya kwabaseTesalonika ifanele isishukumisele ukuba siwancome size siwakhuthaze amakholwa angoowethu. Ikwafanele isishukumisele ukuba sibe ngumzekelo ngehambo nangesimo sengqondo. Yaye ngokuqinisekileyo isiluleko sayo sinokusinceda ukuba siyilungele imini kaYehova.

[Ibhokisi/Umfanekiso okwiphepha 22]

Isigcina-sifuba Nesigcina-ntloko: Esibongoza ukuba siphaphe ngokomoya, uPawulos wabhala: “Masibe ziingcathu; masinxibe isigcina-sifuba sokholo nothando, nesigcina-ntloko esilithemba losindiso.” (1 Tesalonika 5:8) Isigcina-sifuba yayilikhaka lokukhusela isifuba sejoni, elalenziwe lanamaqoqo, amatyathanga okanye isinyithi esiqinileyo. Ngokufanayo, isigcina-sifuba sokholo siyasikhusela ngokomoya. Yaye kuthekani ngesigcina-ntloko samandulo? Ngokufuthi sasenziwe ngesinyithi, singumnqwazi wasemkhosini owawenzelwe ukukhusela umphumi-mkhosi ebudeni bedabi. Njengoko isigcina-ntloko sasikhusela intloko yejoni, ngoko ithemba losindiso likhusela amandla engqondo, ngaloo ndlela libangela ukuba umKristu akwazi ukugcina ingqibelelo. Hayi indlela ekubaluleke ngayo ukuba abantu bakaYehova banxibe isikrweqe somoya esilolo hlobo!—Efese 6:11-17.