Imibuzo Evela Kubafundi

◼ Kutheni ukuguqulelwa kweye-2 kaPetros 1:19 kwiNew World Translation of the Holy Scriptures kwahlukile koko kukwezinye iiBhayibhile?

Egxininisa ukubaluleka kwelizwi likaThixo eliphefumlelweyo, umpostile uPetros wabhala oku: “Kanjalo sinalo nelona lizwi liqinisekileyo elilelobuprofeti, enityaphayo ukulinyamekela, linjengesibane esikhanyisa endaweni emnyama, kude kufike ukusa liphume ikhwezi lokusa, ezintliziyweni zenu.”—2 Petros 1:19, NW.

Phawula ukuba ibinzana elithi “kude kufike ukusa liphume ikhwezi lokusa” lahlulwe kwamanye zizinqumamisi. Inkoliso yeenguqulelo zeBhayibhile azikwenzi oku.

Ngokomzekelo, iBhayibhile yesiXhosa iyiguqulela ngolu hlobo inxalenye yamva yale ndinyana: “. . . linjengesibane esikhanyisa endaweni emnyama, kude kuse, liphume ikhwezi ezintliziyweni zenu.” Iinguqulelo ezinjengale zikhokelela kwimbono yokuba ikhwezi liphuma ezintliziyweni zamakholwa, njengaxa efumana ukukhanyiselwa kohlobo oluthile okungokomoya.

Noko ke, nasemva phayaa ngomhla kaMoses, kwakukho umqondiso wokuba ‘kwakuya kuphuma inkwenkwezi kwaYakobi.’ (Numeri 24:17; thelekisa INdumiso 89:34-37.) UYesu wazazisa ngokucacileyo ‘njengenzala kaDavide, ikhwezi eliqaqambileyo lokusa.’—ISityhilelo 22:16.

Oku kufaniswa ‘kwekhwezi,’ okanye ‘ikhwezi lokusa,’ kuyavisisana noko umpostile uPetros wayekuxubusha. Wayesandul’ ukubhekisela kumbono wokwenziwa kumila kumbi awayewubone iminyaka emalunga nengama-30 ngaphambilana. (Mateyu 16:28–17:9) Loo mbono uqaqambileyo walatha kwixesha xa uYesu wayeya ‘kuza esebukumkanini bakhe,’ okanye ezukisiwe emandleni oBukumkani. Oko uPetros wayekubonile kwagxininisa ukubaluleka kwelizwi likaThixo; ngokufanayo, kufuneka amaKristu namhlanje anikele ingqalelo kwelo lizwi libuprofeti.

Ngoxa iintliziyo zoluntu ngokuqhelekileyo zazisebumnyameni—yaye zisesebumnyameni—oko akufanele kube njalo ngamaKristu okwenyaniso. Ngokungathi kunjalo anesibane esikhanyisayo kwindawo ebiya kuthi ukuba bekungenjalo ibe mnyama, iintliziyo zawo. UPetros wayesazi ukuba ngokunikela ingqalelo kwilizwi likaThixo elibuprofeti nelikhanyisayo, amaKristu ayeya kuhlala ephaphile yaye ekhanyiselwe ukusa kwisifingo semini entsha. Elo yayiya kuba lixesha laxa, “ikhwezi” okanye “ikhwezi eliqaqambileyo lokusa,” laliya kuthi ngokwenene lilawule emandleni oBukumkani.

Kubangel’ umdla ukuba uE. W. Bullinger wabhala oku ngeye-2 kaPetros 1:19: “Apha, kucacile ukuba bekumele kubekho izibiyeli, kuba sisiprofeto esisisibane esikhanyisayo, yaye uKristu nokubonakala Kwakhe liKhwezi neSifingo. Ngokuqinisekileyo, intsingiselo ayinakuba sikhuthazelwa ukuthobela ilizwi elibuprofeti de uKristu abonakaliswe ezintliziyweni zethu! Akunjalo; kodwa sifanele ngeentliziyo zethu sithobele eli lizwi libuprofeti, de ifike inzaliseko ekubonakaleni kukaKristu—ukuvela Kwakhe lowo ubizwa ngokuba ‘liKhwezi Lokusa.’”—Figures of Speech Used in the Bible, yowe-1898.

Ngoko ke, iinguqulelo eziliqela zeBhayibhile zifakela izibiyeli kweye-2 kaPetros 1:19.a INew World Translation of the Holy Scriptures igcina umgaqo osisiseko wokudluliselwa okufunyanwa kwisiGrike santlandlolo. Kodwa isebenzisa izinqumamisi ukwahlula ibinzana elithi “kude kufike ukusa liphume ikhwezi lokusa” kwisilumkiso sokunikela ingqalelo kwilizwi ‘elinjengesibane esikhanyisa endaweni emnyama, ezintliziyweni zenu.’

[Umbhalo osemazantsi]