Linyamekele Ilizwi LikaThixo Elibuprofeti!
Iimbalasane ZeyesiBini KaPetros
ILIZWI likaYehova elibuprofeti, okanye isigidimi, sinjengesibane esikhanyisa kwindawo emnyama, yaye amaKristu okwenyaniso afanele alinyamekele ngokwenene. Oko akulula xa abafundisi bobuxoki bezama ukukhuthaza uwexuko. Kodwa kunokwenziwa ngoncedo lukaThixo. Yaye sifanele sinamathele ngokuthe nkqi kwilizwi likaThixo ukuba siza kusinda ngemini kaYehova esondela ngokukhawuleza.
Incwadi ephefumlelweyo yesibini yompostile uPetros inokusinceda sinyamekele ilizwi likaThixo elibuprofeti. Mhlawumbi uPetros wayibhala le ncwadi yakhe eseBhabhiloni malunga nowama-64 C.E. Kwincwadi yakhe uxhasa inyaniso kaThixo, ulumkisa amakholwa angoowabo ngemini kaYehova eza njengesela, aze ancede abo bafunda le ncwadi yakhe bangakhukuliswa lulahlekiso lwabangenammiselo. Ekubeni imini kaYehova sel’ isemnyango, sinokungenelwa kakhulu kumazwi kaPetros aphefumlelweyo.
Kholosa Ngelizwi Elibuprofeti
NjengamaKristu, kufuneka sizabalazele ukubonakalisa iimpawu zikaThixo yaye simele silinyamekele ilizwi elibuprofeti. (2Pe 1:1-21) Ukuze siphephe ukuba ngabapholileyo okanye abangavelisi siqhamo, kufuneka ‘elukholweni lwethu songezelele isidima, ulwazi, ukuzeyisa, unyamezelo, ukuhlonela uThixo, ukuthanda abazalwana nothando.’ Xa uPetros wabona uYesu enziwe kumila kumbi waza weva uThixo ethetha ngoKristu kweso siganeko, ilizwi elibuprofeti laqinisekiswa ngakumbi. (Marko 9:1-8) Kufuneka silinyamekele elo lizwi liphefumlelwe nguThixo.
Balumkeleni Abawexuki
Ngokulinyamekela ngokungqongqo ilizwi likaThixo elibuprofeti, sinokubalumkela abawexuki nabanye abantu abanxaxhayo. (2:1-22) UPetros walumkisa ngokuthi abafundisi bobuxoki babeya kungena ebandleni. Noko ke, uYehova wayeya kubagweba ngokuqatha aba bawexuki, nanjengoko wazigwebayo izithunywa zezulu ezingathobeliyo, ihlabathi elingahloneli Thixo lomhla kaNowa nesixeko saseSodom nesaseGomora. Abafundisi ababuxoki bacekisa igunya elimiselwe nguThixo yaye bahenda ababuthathaka ukuba babathelele ekungalungisini kwabo. Ngekulunge ngakumbi ngabawexuki abanjalo ukuba babengayazanga “indlela yobulungisa, kunokuba bathi beyazile, babuye umva, baphume kuwo umthetho ongcwele abawuwiselwayo.”
Imini KaYehova Iyeza!
Njengabo balinyamekelayo ilizwi elibuprofeti kule mihla yokugqibela, asimele sivume ukuphenjelelwa ngabagxeki abahlekisa ngesigidimi esingobukho bukaYesu. (3:1-18) Bayalibala ukuba uThixo ozimisele ukutshabalalisa le nkqubo yezinto watshabalalisa ihlabathi langaphambi koMkhukula. Ukuzeka kade umsindo kukaYehova akufanele kujongwe njengokulibazisa, kuba ufuna abantu baguquke. Le nkqubo iza kutshatyalaliswa “ngemini kaYehova” (NW) yaye iya kuthatyathelwa indawo ‘lelitsha izulu, nomtsha umhlaba, apho kumi ubulungisa.’ Ngoko ke, sifanele sikhuthalele ukuba ‘singabi nabala, singabi nasiphako, sibe seluxolweni.’ Kunokuba silahlekiswe ngabafundisi ababuxoki, masikhule ekumazini uYesu Kristu.
Masiwathabathele entliziyweni amazwi kaPetros. Singaze sisilele ukubalumkela abafundisi bobuxoki. Masiphile siqonda ukuba imini kaYehova iza kufika kungekudala. Yaye masisoloko silinyamekela ilizwi likaThixo elibuprofeti.
[Ibhokisi/Umfanekiso okwiphepha 31]
Zikhahlelelwe Enzonzobileni: UYehova ‘akaziconganga izithunywa zezulu ezonayo, wesuka wathi ezikhahlelele enzonzobileni [eTartarus, NW] wazinikela emixokelelanweni yesithokothoko, zigcinelwe umgwebo.’ (2 Petros 2:4) Le asiyoTartarus yasentsomini ekuthethwa ngayo kwincwadi ethi Iliad kaHomer njengendawo engaphantsi komhlaba apho oothixo bobuxoki abanganeno, uCronus neminye imimoya kaTitan, babevalelwe khona. ITartarus ekuthethwa ngayo eBhayibhileni yindawo elihlazo engathi yintolongo apho uThixo waphosa izithunywa zezulu ezingathobeliyo ngomhla kaNowa. (Genesis 6:1-8; 1 Petros 3:19, 20; Yuda 6) ‘Isithokothoko’ sibangelwa kukuba uThixo uye wazahlukanisa nokukhanya okungokomoya njengabagxothiweyo kwintsapho yakhe. Njengezo zigcinelwe umgwebo wakhe oqatha, zicinga kuphela ngekamva elingemyoli. Le Tartarus yimeko ebakho ngaphambi kokuphoswa kukaSathana needemon zakhe enzonzobileni ngaphambi kokuba kuqalise uLawulo LukaKristu Lweminyaka Eliwaka. Ukutshatyalaliswa kwabo kuya kwenzeka emva koLawulo lukaYesu Lwewaka Leminyaka.—Mateyu 25:41; ISityhilelo 20:1-3, 7-10, 14.
[Umfanekiso]
UZeus uphosela oothixo abanganeno kwiTartarus yasentsomini
[Inkcazelo]
National Archaeological Museum, eAtene, eGrisi