Uyakhumbula Na?

Ngaba uye wazifumanisa iinkupho zakutshanje zeMboniselo zizezisebenzisekayo? Ngoko kutheni ungavavanyi inkumbulo yakho ngoku kulandelayo?

◻ Ziziphi izibakala eziphikisa ukwenziwa ngcwele kwendawo ekuthiwa wazalelwa kuyo uYesu?

IBhayibhile ayiyikhankanyi eyona ndawo ichanileyo awazalelwa kuyo uYesu. Iingxelo zeVangeli kaMateyu nekaLuka zinikela nje kuphela iinkcukacha ezibalulekileyo. (Mateyu 2:1, 5; Luka 2:4-7) Ngokufunda uYohane 7:40-42 kubonakala ukuba abantu ngokuqhelekileyo babengayazi indawo awazalelwa kuyo, abanye becinga ukuba wazalelwa eGalili. Kwakhona, ebudeni bokuphila kukaYesu emhlabeni, akazange ahambe ebhengeza iinkcukacha zokuzalwa kwakhe.—12/15, iphepha 5.

◻ UmKristu unokululondoloza njani uvuyo lwakhe ngoxa ehlangabezana neengcinezelo zokugula emzimbeni, udandatheko nengcinezelo yezoqoqosho?

ILizwi likaThixo lilungiselela intuthuzelo nolwalathiso olufunekayo. Ngokufunda okanye ngokuphulaphula iindumiso, kunokulungiselelwa ukuhlaziyeka okufuneka ngakumbi. UDavide wasicebisa wathi: “Umthwalo wakho wulahlele kuYehova; yena wokuzimasa.” Wakwasiqinisekisa ukuba uYehova ngokwenene ‘unguMphulaphuli wemithandazo.’ (INdumiso 55:22; 65:2) Intlangano kaYehova, ngeempapasho zayo nangabadala bayo bamabandla, isoloko ikulungele ukusinceda ukuba sihlangabezane neengxaki zethu.—1/1, iphepha 14-15.

◻ Wayethetha ukuthini uYesu xa endleleni yokuya kuxhonywa, wathi: “Ukuba benza ezi zinto komanzi umthi, kuya kuba njani na kowomileyo?” (Luka 23:31)

UYesu wayebhekisela kumthi wohlanga lwamaYuda. Ngenxa yobukho bukaYesu nentsalela yamaYuda awayekholelwa kuye, uhlanga lwalusenentwana yobomi kulo. Noko ke, xa bonke aba besuswa kolo hlanga, kwakuya kusala kuphela umthi ofileyo ngokomoya, intlangano yohlanga engenaziqhamo.—1/15, iphepha 9.

◻ “Abahlambulukileyo iintliziyo,” ekuthethwe ngabo kuMateyu 5:8, ‘banokumbona njani uThixo’?

‘Bambona uThixo’ xa bembona esenza izinto ngenxa yabagcini bengqibelelo. (Thelekisa iEksodus 33:20; Yobhi 19:26; 42:5.) Noko ke, igama lesiGrike elikuMateyu 5:8 eliguqulelwe ngokuthi “bona” likwathetha “ukubona ngamehlo engqondo, ukuqonda, ukwazi.” Ekubeni uYesu wabubonakalisa ngokugqibeleleyo ubuntu bukaThixo, ukuqonda obo buntu kwenza “abahlambulukileyo iintliziyo” bakwazi ‘ukubona uThixo.’ (Yohane 14:7-9)—1/15, iphepha 16.

◻ Kutheni sifikelela kwisigqibo sokuba uYesu usisiphatha-zithunywa uMikayeli?

ILizwi likaThixo likhankanya isiphatha-zithunywa esinye kuphela, yaye lithetha ngeso sithunywa ngokubhekisele kwiNkosi evusiweyo uYesu lisithi: “INkosi ngokwayo iya kuhla emazulwini inendanduluko, inelizwi lesiphatha-zithunywa, inexilongo likaThixo.” (1 Tesalonika 4:16) KuYuda 9 sifumanisa ukuba igama lesi siphatha-zithunywa nguMikayeli.—2/1, iphepha 17.

◻ Kukweziphi iinkalo ezine esinokuthi kuzo sibonakalise imbeko kwabanye abantu?

Sifanele sibonakalise imbeko kubalawuli bezobupolitika, kubaqeshi, kumalungu entsapho yethu nakwabo basebandleni.—2/1, iphepha 20-2.

◻ Ngaphambi nje kokufa kukaYesu, nguwuphi umzekelo omhle awawumisela abo banabazali abakhulileyo?

Ngoxa uYesu wayesajinga kumthi wentuthumbo esiva intlungu egqithiseleyo, wacinga ngentlalo-ntle yokwenyama neyokomoya kanina ngokucela umpostile wakhe oyintanda uYohane ukuba amnyamekele. (Yohane 19:25-27)—2/15, iphepha 8.

◻ Kwakutheni ukuze uYesu kufuneke abandezeleke?

Ukubandezeleka kukaYesu kwasebenzela ukuzinziswa kwembambano yengqibelelo yabakhonzi bakaThixo. Kwakwamxhobisela indima yakhe njengoMbingeleli Omkhulu onenceba woluntu. (Hebhere 4:15)—2/15, iphepha 14, 15.

◻ Ziziphi iimbambano ezibalulekileyo ezaphakanyiswayo ngemvukelo yase-Eden?

Ngaba umntu unako ukuzilawula ngokunempumelelo ngaphandle koThixo? Ngaba kusesikweni ngoThixo ukufuna ukuba kuthotyelwe ulongamo lwakhe? Ukongezelela, ngaba kukho nabaphi na abantu ababeya kuthi ngokungazingci bakhethe ukukhonza uThixo ngokuzithandela?—3/1, iphepha 6.

◻ Kutheni abathile beye bathabatha ngokuphosakeleyo kwimifuziselo yeSikhumbuzo?

Abathile abangakhulanga ngolwazi basenokuba abakaziqondi ngokulungeleleneyo iinjongo zikaThixo. Basenokungaqondi ukuba ukuthanjiswa “asikokothandayo, kanjalo asikokobalekayo; kokukaThixo onenceba.” (Roma 9:16) Akuxhomekekanga emntwini ngamnye ukugqiba ukuba yena ubengathanda ukuthatyathelwa kumnqophiso omtsha aze abe yindlalifa emanyene noKristu. Lukhetho lukaYehova olubalayo, yaye umoya wakhe ungqinela olo khetho. (Roma 8:16; 1 Korinte 12:18)—3/15, iphepha 21.

◻ Iyintoni “intetho enyulu” ekuthethwa ngayo kuZefaniya 3:9?

Kukuyiqonda ngokufanelekileyo inyaniso engoThixo neenjongo zakhe.—4/1, iphepha 21-2.