Uyakhumbula Na?
Ngaba uye wacingisisa nzulu ngeenkupho zakutshanje zeMboniselo? Ukuba kunjalo, kunokwenzeka ukuba uya kukufumanisa kubangel’ umdla ukukhumbula oku kulandelayo:
◻ Ingxelo yeBhayibhile engamadabi kaYehova isinika njani intembelo yokujongana ‘nembandezelo enkulu’? (Mateyu 24:21)
Ekubeni ngamaxesha onke izinto ziphantsi kolawulo lwakhe, uYehova uye wabonakalisa ukuba unokuzodlula iintshaba zakhe ngokucinga aze alungelelanise iimeko ukuze asindise abantu bakhe.—8/15, iphepha 27.
◻ Yintoni abazali abamele bakulungele ukuyenza ukuze balondoloze unxibelelwano phakathi kwabo nabantwana babo?
Abazali bamele bachithe ixesha nabantwana babo. Kwakhona, bamele bakulungele ukuncama okuthile ngenxa yabantwana babo ukuze bakhule ngokwasengqondweni, ngokwasemzimbeni nangokomoya.—9/1, iphepha 22.
◻ Ukwenziwa kumila kumbi kukaYesu kunayiphi intsingiselo kuthi namhlanje? (Marko 9:2-4)
Ukwenziwa kumila kumbi kunokwakha ukholo kwilizwi likaYehova lesiprofeto kuze komeleze ukholo lwethu kuYesu Kristu njengoNyana kaThixo noMesiya othenjisiweyo. Kwakhona kunokuyomeleza inkolelo yethu ekuvuselweni kukaYesu kubomi bokomoya ezulwini kuze kwandise ukholo lwethu kurhulumente kaThixo.—9/15, iphepha 23.
◻ Lithetha ukuthini ibinzana elithi “okwethutyana” kuIsaya 11:6, NW?
Ukuguqulelwa ngenyameko kwale ndinyana kubonisa ukuba ingcuka nemvana aziyi kuba kunye lonke ixesha kwihlabathi elitsha. Kusenokwenzeka ukuba izilwanyana ezinjalo ziya kuhlala kwiindawo ezahlukahlukeneyo zize ngaloo ndlela zibe phantsi koluhlu ‘lwezilwanyana zasekhaya namarhamncwa asendle’ njengoko kwakunjalo kwiParadisi yantlandlolo. (Genesis 1:24) Noko ke, izilwanyana ziya kube ziseluxolweni, zikwazi ukuba kunye ngaphandle kwengozi.—9/15, iphepha 31.
◻ Siyintoni isiseko sobuKristu bokwenene?
Uthando lusisiseko sobuKristu bokwenene. Kubalulekile ukuba nokholo, imisebenzi nonxulumano olulungileyo, kodwa lungekho uthando ezo zinto aziloncedo. Oku kunjalo ngenxa yokuba uYehova ngokubalaseleyo unguThixo wothando. (1 Korinte 13:1-3; 1 Yohane 4:8)—10/1, iphepha 20.
◻ Ngaba amazwi athi “ukuzala kunexesha lako, ukufa kunexesha lako” akwiNtshumayeli 3:2 axhasa ingcamango yokuba uThixo ulimisele kwangaphambili ixesha lokufa kwethu?
Akunjalo. USolomon wayexubusha nje ngomjikelo wobomi nokufa othwaxa uluntu olungafezekanga. INtshumayeli 7:17 ithi: “Musa ukuba ngongendawo ngokukhulu, ungazenzi isidenge; yini na ukuba ufe lingekabi lixesha lakho?” Esi siluleko besiya kuba nayiphi ingqiqo ukuba ixesha likabani lokufa belimiselwe kwangaphambili?—10/15, iphepha 5-6.
◻ Yintoni ephikisana nengcamango yokuba umpostile uPetros wayengubhishophu wokuqala waseRoma?
Abukho ubungqina bokuba uPetros wayekhe wasityelela kwaukusityelela isixeko saseRoma; noPetros akazange akhe abhekisele kuye nangayiphi na indlela ngaphandle kokuba engumpostile kaKristu. (2 Petros 1:1)—10/15, iphepha 8.
◻ Ngaba kufanelekile ngamaKristu ukuba athumele iintyatyambo emngcwabeni?
Ukuba kwaziwa kakuhle ukuba isiko elithile (okanye iintyatyambo ezo zilungiswe ngohlobo oluthile, mhlawumbi zimile okomnqamlezo) linentsingiselo yonqulo kwindawo ubani ahlala kuyo, lifanele liphetshwe. Ngoko amaKristu awayi kuthumela iintyatyambo ezimile okomnqamlezo okanye azisebenzise ngendlela ngokuqinisekileyo enentsingiselo yonqulo lobuxoki. Noko ke, ngoku kumazwe amaninzi, isiko lokuthunyelwa kweentyatyambo ngokungenakuthanani nonqulo liqhelekile. Wambi amaKristu aye athumela iintyatyambo ngenjongo yokuthuthuzela kwisihlandlo esibuhlungu nokuze abonakalise uvelwano nenkathalo.—10/15, iphepha 31.
◻ Yintoni eyenziwa icace ziinkcazelo ezamkelwa njengezisisiseko ngokuphathelele uBathathu Emnye?
Zenza kucace ukuba imfundiso kaBathathu Emnye asiyongcamango ilula. Kunoko, yingqokelela entsonkothileyo yeengcamango eziye zahlanganiswa ebudeni beenkulungwane eziliqela. Abaphengululi abaninzi, kuquka abo bakholelwa kuBathathu Emnye, bayavuma ukuba enyanisweni iBhayibhile ayinayo imfundiso kaBathathu Emnye.—11/1, iphepha 21-22.
◻ Kutheni owama-29 C.E. ingunyaka obalulekileyo kwimbali yeBhayibhile?
Kungenxa yokuba ngokuhlanganisa inkcazelo echanileyo yeBhayibhile nokubalwa kweentsuku okuqhelekileyo ebudeni bolawulo lukaTibheriyo, abafundi beBhayibhile banokubala baze bafumane ukuba ubulungiseleli bukaYohane baqala ngentwasahlobo yowama-29 C.E. ibe kwiinyanga ezintandathu kamva, ekwindla lowama-29 C.E., uYohane wabhaptiza uYesu.—11/15, iphepha 31.
◻ Kwakuthetha ntoni “ukunqula” kubantu ababethetha isiHebhere, ibe oku kusebenza njani kumaNgqina kaYehova namhlanje?
Isifanokuthi sesiHebhere segama elithi “ukunqula” sinokuguqulelwa ngokuthi “inkonzo.” Ngoko ke, ezingqondweni zamaHebhere unqulo lwaluthetha inkonzo. Oku koko likuthethayo kubantu bakaYehova namhlanje, ngoko eyona nkalo ibalulekileyo kunqulo lokwenyaniso yinkonzo yobuthixo yokushumayela.—12/1, iphepha 19.