Isipho Somoya Oyingcwele Esivela KuYehova

“Wobeka phi na ke yena uYihlo wasemazulwini, ukugqithisela ukubapha uMoya oyiNgcwele abo bamcelayo?”—LUKA 11:13.

1, 2. (a) Liliphi idinga elingomoya oyingcwele uYesu awalenzayo, ibe kutheni oku kuthuthuzela ngokwenene? (b) Uyintoni umoya oyingcwele?

EKWINDLA ngonyaka wama-32 C.E. ngoxa wayeshumayela iindaba ezilungileyo kwelakwaYuda, uYesu wathetha nabafundi bakhe ngobubele bukaYehova. Wasebenzisa imizekeliso echukumisayo waza emva koko wavakalisa idinga elimangalisayo, esithi: “Ukuba ke ngoko nina, ningendawo nje, niyakwazi ukubapha abantwana benu izipho ezilungileyo, wobeka phi na ke yena uYihlo wasemazulwini, ukugqithisela ukubapha uMoya oyiNgcwele abo bamcelayo?”—Luka 11:13.

² Hayi indlela asithuthuzela ngayo loo mazwi! Njengoko sinyamezela iziphithiphithi zemihla yokugqibela yeli hlabathi, sijamelana nobutshaba bukaSathana needemon zakhe, yaye sisilwa notyekelo lwethu lwesono, ngokwenene kuyavuyisa ukwazi ukuba uThixo uya kusomeleza ngomoya wakhe. Eneneni, asinakukwazi ukunyamezela ngokuthembeka ngaphandle kwaloo nkxaso. Ngaba ukhe wayiva indlela asebenza ngayo amandla alo moya, ongamandla kaThixo asebenzayo? Ngaba uyayiqonda indlela anokukunceda ngayo? Ngaba uwasebenzisa ngokuzeleyo?

Amandla Omoya Oyingcwele

3, 4. Bonisa indlela asebenza ngayo amandla omoya oyingcwele.

³ Kuqala khawuqwalasele amandla omoya oyingcwele. Khawucinge ngoko kwenzeka emva phayaa ngowe-1954. Oko kwakuxa kwaqhushumba ibhombu yehydrogen phezu kwesiqithi iBikini Atoll kuMzantsi Pasifiki. Ngephanyazo emva kokuqhushumba kwaloo bhombu, eso siqithi sibukekayo sasililangatye nje elikhulu lomlilo yaye sidlakazwe lugqabhuko-dubulo olunamandla alingana naweetoni ezizizigidi ezili-15 zeTNT. Ayevela phi onke loo mandla ayo okutshabalalisa? Ayebangelwe kukuguqulwa nje kweqhezu elincinane leuranium nelehydrogen aba ngamandla awayebumba umphakathi waloo bhombu. Noko ke, bekungenzeka ntoni ukuba izazinzulu bezinokwenza okwahlukileyo koko zakwenzayo eBikini? Masithi mhlawumbi bezithabatha onke la mandla omlilo zize ziwaguqule abe ziikhilogram ezimbalwa zeuranium nehydrogen. Ngokwenene beziya kuba zenze eyona nto yakha yankulu! Noko ke, uYehova wenza into efana naleyo kodwa eyenza ngomlinganiselo omkhulu xa “ekuqalekeni [yena] wadala amazulu nehlabathi.”—Genesis 1:1.

⁴ UYehova unamandla amakhulu gqitha. (Isaya 40:26) Ekudaleni kwakhe, umele ukuba wasebenzisa inxalenye yala mandla xa wayedala zonke izinto ezibumba indalo iphela. Yintoni awayisebenzisayo kulo msebenzi wokudala? Wasebenzisa umoya oyingcwele. Sifunda oku: “Lenzeka ngelizwi likaYehova izulu, umkhosi walo lonke ngomoya womlomo wakhe.” (INdumiso 33:6) Kwaye ingxelo yeGenesis ethetha ngendalo ifundeka ngolu hlobo: “UMoya [oyingcwele] kaThixo wafukama phezu kwamanzi lawo.” (Genesis 1:2) Hayi indlela onamandla ngayo umoya oyingcwele!

Imisebenzi Emangalisayo

5. Ziziphi iindlela ezibalaseleyo umoya oyingcwele asebenza ngazo?

⁵ Umoya oyingcwele usasebenza ngeendlela ezibalasele gqitha. Ukhokela yaye walathisa intlangano kaYehova yasezulwini. (Hezekile 1:20, 21) Njengamandla atyekezwa yibhombu yehydrogen, unokusetyenziselwa ukutshabalalisa iintshaba zikaYehova ezigwetyelwe oko, kodwa uye wasebenza nangezinye iindlela ezisimangalisayo.—Isaya 11:15; 30:27, 28; 40:7, 8; 2 Tesalonika 2:8.

6. Umoya oyingcwele wamxhasa njani uMoses noonyana bakaSirayeli kwiinkqubano zabo neYiputa?

⁶ Ngokomzekelo, malunga nowama-1513 B.C.E., uYehova wathuma uMoses ukuya kuxelela uFaro waseYiputa ukuba akhulule oonyana bakaSirayeli. Kangangeminyaka engama-40 ngaphambi koko, uMoses wayesalusa kwelakwaMidiyan, ngoko yintoni eyayinokubangela uFaro aphulaphule umalusi? Kukuba uMoses wayethunywe ngokuphela koThixo wokwenyaniso, uYehova. Ukuze angqine oku, uYehova wamjizeka ngamandla okwenza imimangaliso. Le mimangaliso yayichukumisa kangangokuba nababingeleli baseYiputa banyanzeleka ukuba bavume besithi: “Ngumnwe kaThixo.”a (Eksodus 8:19) UYehova wayibetha ngezibetho ezilishumi iYiputa, ibe esokugqibela sazo samnyanzelisa uFaro ukuba abakhulule abantu bakaThixo bemke eYiputa. Xa ngobuntamo-lukhuni uFaro wawasukelayo enomkhosi wakhe, amaSirayeli asinda xa kwenzeka isimanga sezimanga ngokusuka kuvuleke indlela kuLwandle Olubomvu. Umkhosi waseYiputa wawalandela waza ke warhaxwa ngamanzi olwandle.—Isaya 63:11-14; Hagayi 2:4, 5.

7. (a) Yayiziziphi ezinye zezizathu ezabangela umoya oyingcwele wenze imimangaliso? (b) Nangona ingasekho imimangaliso eyenziwa ngomoya oyingcwele, kutheni ingxelo ethetha ngayo eBhayibhileni ithuthuzela nje?

⁷ Ewe, ngomoya wakhe uYehova wenza imimangaliso emikhulu ngenxa yamaSirayeli ngomhla kaMoses, nangamanye amaxesha. Yayisenzelwa ntoni loo mimangaliso? Yayihambisela phambili iinjongo zikaYehova, yabangela igama lakhe laziwa, ibe yabonakalisa amandla akhe. Yaye maxa wambi, njengakwimeko kaMoses, yangqina ngaphandle kwamathandabuzo ukuba loo mntu wayexhaswa nguYehova. (Eksodus 4:1-9; 9:14-16) Noko ke, imimangaliso eye yenziwa ngomoya oyingcwele ibinqabile ukutyhubela imbali.b Kusenokwenzeka ukuba inkoliso yabantu ababephila ngamaxesha okubhalwa kweBhayibhile ayizange ibone nomnye ngawayo amehlo, ibe namhlanje ayisenzeki. Sekunjalo, njengoko namhlanje silwisana neengxaki ezisenokubonakala zingenakuconjululwa, ngaba akusikhuthazi ukwazi ukuba xa simcela uYehova sinokholo, uya kusipha umoya onjengalowo waxhasa uMoses phambi koFaro waza wavulela amaSirayeli indlela kuLwandle Olubomvu?—Mateyu 17:20.

Imibhalo Ephefumlelweyo

8. Umoya oyingcwele wawunayiphi indima ekunikelweni kweMithetho Elishumi?

⁸ Emva kokukhululwa kwawo eYiputa, uMoses wawakhokelela amaSirayeli kwiNtaba yaseSinayi, apho uYehova wenza umnqophiso nawo waza wawanika uMthetho wakhe. Inxalenye esisiseko yaloo Mthetho owanikelwa ngoMoses yayiyiMithetho Elishumi, ibe imibhalo yayo yantlandlolo yayikrolwe kumacwecwe amatye. Njani? Ngomoya oyingcwele. IBhayibhile ithi: “Akukhova [uYehova] ukuthetha naye entabeni yaseSinayi, wamnika uMoses amacwecwe amabini esingqino, amacwecwe amatye, ebhalwe ngomnwe kaThixo.”—Eksodus 31:18; 34:1.

9, 10. Umoya oyingcwele wasebenza njani ekubhalweni kweZibhalo zesiHebhere, ibe oku kubonakala njani kumazwi awasetyenziswa ngabafundi bakaYesu?

⁹ Ukongezelela kwiMithetho Elishumi, uYehova esebenzisa umoya wakhe wanika amaSirayeli amakhulukhulu emithetho nemimiselo yokukhokela ubomi bamadoda nabafazi abathembekileyo. Ibe imibhalo engakumbi ephefumlelweyo yayiseza kufika. Iinkulungwane emva komhla kaMoses, abaLevi bakungqinela oku kumthandazo wasesidlangalaleni ababewubhekisa kuYehova: “Wabathwala [abantu bakwaSirayeli] iminyaka emininzi, wangqina ngabo ngoMoya wakho, ngabaprofeti bakho.” (Nehemiya 9:5, 30) Iziprofeto ezininzi eziphefumlelweyo ezavakaliswa ngabo baprofeti zabhalwa phantsi. Ngaphezu koko, umoya oyingcwele washukumisa amadoda athembekileyo ukuba abhale phantsi iingxelo ezingcwele zembali neengoma zokudumisa ezihlab’ umxhelo.

¹⁰ UPawulos wayethetha ngayo yonke le mibhalo xa wathi: “Sonke isibhalo, siphefumlelwe nguThixo.” (2 Timoti 3:16; 2 Samuweli 23:2; 2 Petros 1:20, 21) Eneneni, xa babecaphula ezi zibhalo, abafundi bakaYesu benkulungwane yokuqala babedla ngokusebenzisa amabinzana anjengelithi ‘umoya oyingcwele wathetha ngomlomo kaDavide,’ “watyapha uMoya oyiNgcwele ukuthetha ngomlomo kaIsaya,” okanye elithi “njengoko atshoyo uMoya oyiNgcwele.” (IZenzo 1:16; 4:25; 28:25, 26; Hebhere 3:7) Enjani yona intsikelelo ngokuthi loo moya oyingcwele ukwamnye owaphembelela ukubhalwa kweZibhalo Ezingcwele uye wazilondoloza ukuze zisikhokele zize zisithuthuzele namhlanje!—1 Petros 1:25.

Ukukholosa Ngomoya Oyingcwele

11. Kwabonakala njani ukusebenza komoya oyingcwele ngokuphathelele ukwakhiwa kwetempile?

¹¹ Ngoxa amaSirayeli ayemise iintente zawo emazantsi eNtaba yaseSinayi, uYehova wawayalela ukuba akhe umnquba njengesazulu sonqulo lokwenyaniso. Ayeza kukufeza njani oku? “Wathi uMoses koonyana bakaSirayeli, Khangelani, uYehova umbize ngegama uBhetsaleli, unyana kaUri, unyana kaHuri, wesizwe sakwaYuda. Umzalisile ngoMoya kaThixo, ngobulumko, nangengqondo, nangokwazi, nangobungcibi bamashishini onke.” (Eksodus 35:30, 31) Umoya oyingcwele womeleza nabuphi na ubuchule bemvelo uBhetsaleli awayenabo, ibe wayenokuvelela ngokuphumelelayo ekwakhiweni kweso sakhiwo sibalulekileyo.

12. Umoya wabomeleza njani abantu ngabanye ngeendlela ezingaqhelekanga emva komhla kaMoses?

¹² Kamva, umoya kaYehova wasebenza kuSamson, umnika amandla angaphezu kwawomntu ukuze akwazi ukukhulula amaSirayeli kumaFilisti. (ABagwebi 14:5-7, 9; 15:14-16; 16:28-30) Kanti, noSolomon wanikwa ubulumko obukhethekileyo njengokumkani wabantu bakaThixo abanyuliweyo. (2 Kronike 1:12, 13) Phantsi kwakhe, amaSirayeli abona impumelelo angazange ayibone ngaphambili, ibe imeko yawo evuyisayo yaba ngumzekelo obonisa iintsikelelo eziya kunanditshwa ngabantu bakaThixo phantsi koLawulo Lweminyaka Eliwaka lukaKristu Yesu, uSolomon Omkhulu.—1 Kumkani 4:20, 25, 29-34; Isaya 2:3, 4; 11:1, 2; Mateyu 12:42.

13. Ingxelo yokomelezwa kukaBhetsaleli, kukaSamson nokukaSolomon ngumoya isikhuthaza njani thina namhlanje?

¹³ Enjani yona intsikelelo ekuyiyo ukuba uYehova ewenza loo moya ukwamnye ufumaneke nakuthi! Xa siziva singakulingene ukufeza isabelo esithile okanye ukwenza umsebenzi wokushumayela, sinokumcela uYehova ukuba asiphe umoya ofanayo nalowo wawunika uBhetsaleli. Xa sigula okanye sijamelene nentshutshiso, loo moya ukwamnye owomeleza uSamson ngamandla angaqhelekanga uya kusomeleza—kambe kungekhona ngomlingo. Yaye xa sijamelene neengxaki ezinzima okanye kufuneka senze izigqibo ezibalulekileyo, sinokumcela uYehova, owanika uSolomon ubulumko obukhulu, ukuba asincede senze ngobulumko. Siya kwandula ke, njengoPawulos, sithi: “Ndinokuzenza izinto zonke, ndikulowo undomelezayo.” (Filipi 4:13) Kwaye idinga likaYakobi liya kuzaliseka kuthi: “Ukuba ke ubani kuni uswele ubulumko, makacele kuThixo, onika bonke engenakumbi, engangcikivi; wonikwa.”—Yakobi 1:5.

14. Ngoobani, mandulo nanamhlanje, abaye baxhaswa ngumoya oyingcwele?

¹⁴ Kwakhona umoya kaYehova wamnceda uMoses kumsebenzi wakhe wokugweba uhlanga. Xa kwamiselwa abanye ukuba bancedise uMoses, uYehova wathi: “[Kuya kufuneka] ndicaphule kumoya okuwe, ndibeke kuwo, awuthwale nawe umthwalo wabantu aba, ungawuthwali wedwa wena.” (Numeri 11:17) Ngaloo ndlela, loo madoda ayengazi kuxhomekeka kumandla awo. Umoya oyingcwele wawaxhasa. Sifunda ukuba kwizihlandlo ezalandelayo umoya kaYehova wathululelwa phezu kwabanye abantu. (ABagwebi 3:10, 11; 11:29) Xa uSamuweli wathambisa uDavide ukuze abe ngukumkani kwaSirayeli, ingxelo ithi: “USamuweli wathabatha isigodlo seoli, wamthambisa esesazulwini sabakhuluwa bakhe. UMoya kaYehova wamfikela ngamandla uDavide, ukususela kuloo mini.” (1 Samuweli 16:13) Abo namhlanje baneembopheleleko ezinzima—ezentsapho, ezebandla, okanye ezentlangano—banokuthuthuzelwa kukwazi ukuba umoya kaThixo usabaxhasa abakhonzi bakhe njengoko benyamekela iimbopheleleko zabo.

15. Umoya oyingcwele uyomeleze ngaziphi iindlela intlangano kaYehova (a) ngemihla kaHagayi noZekariya? (b) namhlanje?

¹⁵ Kumawaka eminyaka emva komhla kaMoses, abanye babathembekileyo koonyana bakaSirayeli babuyela eYerusalem besuka eBhabhiloni yaye benomyalelo wokuphinda bayakhe kwakhona itempile. (Ezra 1:1-4; Yeremiya 25:12; 29:14) Noko ke, kwavela imiqobo enzima, yaye kangangeminyaka emininzi babedimazekile. Ekugqibeleni, uYehova wavelisa umprofeti uHagayi noZekariya ukuze bawakhuthaze amaYuda ukuba angakholosi ngamandla awo. Kodwa umsebenzi wona wawuza kufezwa njani? “Akungabukroti, akungamandla; kungoMoya wam; utsho uYehova wemikhosi.” (Zekariya 4:6) Ibe ngenkxaso yomoya kaThixo, itempile yakhiwa. Nabantu bakaThixo ngokufanayo namhlanje bafeza umsebenzi omkhulu. Ukushunyayelwa kweendaba ezilungileyo kuye kwanda emhlabeni jikelele. Izigidi zabantu zifundiswa ngenyaniso nangobulungisa. Kulungiselelwa iindibano. Kwakhiwa iiHolo zoBukumkani neeofisi zamasebe. Inxalenye enkulu yalo msebenzi ubusenziwa phezu kwayo nje inkcaso ekrakra. Kodwa amaNgqina kaYehova awakhange adimazeke, esazi ukuba konke aye akufeza, akakwenzanga ngobukroti, okanye ngamandla abantu, kodwa ngomoya kaThixo.

Umoya KaThixo Kwinkulungwane Yokuqala

16. Ngawaphi amava ababenawo abakhonzi bakaYehova bamaxesha angaphambi kobuKristu ngokusebenza komoya kaThixo?

¹⁶ Njengoko sesibonile, abakhonzi bakaThixo bamaxesha angaphambi kobuKristu babewaqonda amandla omoya kaThixo. Babekholose ngawo ukuba ubancede bafeze iimbopheleleko ezinzima nokuba benze ukuthanda kukaThixo. Kwakhona babesazi ukuba uMthetho neminye imibhalo engcwele yayiphefumlelwe, yayibhalwe ngempembelelo yomoya kaYehova, yaza ngolo hlobo yaba ‘liLizwi likaThixo.’ (INdumiso 119:105) Noko ke, kuthekani ngexesha lobuKristu?

17, 18. Ziziphi ezinye zeendlela ezimangalisayo owabonakaliswa ngazo umoya kwixesha lobuKristu, ibe zafeza yiphi injongo?

¹⁷ Nangenkulungwane yokuqala yeXesha lethu Eliqhelekileyo umoya kaThixo wawusebenza ngeendlela ezimangalisayo. Umoya wawuphefumlela abantu ukuba baprofete. (1 Korinte 14:1, 3) Kwabhalwa iincwadi ezininzi phantsi kwempefumlelo yomoya oyingcwele, nto leyo eyayizalisekisa idinga likaYesu lokuba umoya oyingcwele wawuya kubakhumbuza abafundi bakhe izinto awayezithethile ibe wawuza kubafundisa iinkalo ezingakumbi zenyaniso. (Yohane 14:26; 15:26, 27; 16:12, 13) Yaye kwakukho nemimangaliso, ibe le iza kuxutyushwa ngokuzeleyo kwinqaku lethu elilandelayo. Eneneni, inkulungwane yokuqala yaqalisa ngommangaliso omkhulu. Malunga nonyaka wesi-2 B.C.E., kwakuza kuzalwa usana olwahluke gqitha kwezinye iintsana, ibe njengomqondiso, unina walo yayiza kuba yintombi enyulu. Yayinokwenzeka njani loo nto? Ngomoya oyingcwele. Ingxelo ithi: “Ukuzalwa kukaYesu Kristu kwaye kungolu hlobo: Kwathi, akubon’ ukuba unina uMariya useleganelwe uYosefu, bengekahlangani, wafunyanwa emithi ngoMoya oyiNgcwele.”—Mateyu 1:18; Luka 1:35, 36.

¹⁸ Ekukhuleni kwakhe uYesu, wakhupha iidemon, waphilisa abagulayo, wade wavusa nabafileyo ngamandla omoya oyingcwele. Nabanye babalandeli bakhe benza imimangaliso nemisebenzi yamandla. Obu buchule bukhethekileyo babuyimbonakaliso yezipho zomoya. Yayiyintoni injongo yazo? Kanye njengoko kwaba njalo ngemimangaliso yangaphambili, zahambisela phambili iinjongo zikaThixo zaza zatyhila amandla akhe. Ngaphezu koko, zabonakalisa ukuba uYesu wayenyanisile xa wayesithi uthunywe nguThixo; yaye kamva, zangqina ukuba ibandla lamaKristu enkulungwane yokuqala laliluhlanga olunyulwe nguThixo.—Mateyu 11:2-6; Yohane 16:8; IZenzo 2:22; 1 Korinte 12:4-11; Hebhere 2:4; 1 Petros 2:9.

19. Ukholo lwethu lomelezwa njani yingxelo yeBhayibhile engemimangaliso kaYesu nabapostile bakhe?

¹⁹ Noko ke, umpostile uPawulos wathi ezo mbonakaliso zimangalisayo zomoya zazisenzelwa ibandla elisaqingqayo ibe zaziya kuphela, ngoko namhlanje akukho mimangaliso siyibonayo eyenziwa ngumoya oyingcwele. (1 Korinte 13:8-11) Sekunjalo, imimangaliso eyenziwa nguYesu nabapostile bakhe ibaluleke ngakumbi kunokuba yinto nje yembali. Yomeleza ukholo lwethu kwidinga likaThixo lokuba ukugula nokufa akuyi kubakho kulawulo lukaYesu kwihlabathi elitsha.—Isaya 25:6-8; 33:24; 65:20-24.

Fumana Iingenelo Kumoya Oyingcwele KaThixo

20, 21. Sinokulusebenzisa njani uncedo lomoya oyingcwele?

²⁰ Hayi indlela onamandla ngayo lo moya! Kodwa amaKristu namhlanje anokulusebenzisa njani uncedo lwalo moya? Okokuqala, uYesu wathi sifanele siwucele, ngoko kutheni ungawuceli nje? Thandaza kuYehova ucela ukuba akuphe esi sipho simangalisayo kungekuphela nje ngamaxesha engcinezelo kodwa ngamaxesha onke. Ukongezelela koko, funda iBhayibhile ukuze umoya oyingcwele ukwazi ukuthetha nawe. (Thelekisa amaHebhere 3:7.) Camngca ngoko ukufundayo uze ukusebenzise ukuze umoya oyingcwele ube nako ukuphembelela ubomi bakho. (INdumiso 1:1-3) Ngaphezu koko, nxulumana—nabantu ngabanye, emabandleni nasezindibanweni—nabanye abakholose ngomoya kaThixo. Hayi indlela umoya oyingcwele obaqinisa ngayo abo babonga uThixo “emabandleni”!—INdumiso 68:26.

²¹ Ngaba uYehova akangoThixo onobubele? Uthi ekuphela kwento esifanele siyenze thina kukucela nje umoya oyingcwele ibe uza kusipha. Hayi indlela ekububutyhakala ngayo ukukholosa ngobulumko nangamandla ethu ngoxa kukho uncedo olunamandla ngolo hlobo esinokulusebenzisa! Phofu ke, kukho ezinye izinto ezinokuthanani nomoya kaThixo ezisichaphazelayo thina maKristu, ibe ezi ziza kuxutyushwa kwinqaku elilandelayo.

[Imibhalo esemazantsi]

Ngaba Unokuyiphendula Le Mibuzo Ilandelayo?

◻ UYehova wazidala njani zonke izinto ezikwindalo?

◻ Ziziphi ezinye zeendlela awasebenza ngazo umoya oyingcwele kumaxesha angaphambi kobuKristu?

◻ Ukwazi oko umoya oyingcwele wakwenzayo mandulo kusikhuthaza njani thina namhlanje?

◻ Sinokulusebenzisa njani uncedo lomoya oyingcwele?

[Umfanekiso okwiphepha 10]

Umoya owanika uSamson amandla angaphezu kwawomntu unokusinika amandla okwenza zonke izinto