Oko Kuthethwa BuBukumkani BukaThixo Kwabaninzi
UYESU KRISTU wayesoloko ethetha ngoBukumkani bukaThixo. Ngokuphathelele oku umbhali-mbali uH. G. Wells wabhala oku: “Iyaphawuleka indlela uYesu awayibalaselisa ngayo imfundiso yoko wayekubiza ngokuba buBukumkani Bamazulu, yaye ngokufanayo kuyaphawuleka ukugqalwa kwayo njengento engabalulekanga kwinkqubo nakwimfundiso yenkoliso yeecawa zamaKristu. Le mfundiso yoBukumkani Bamazulu, eyayiyimfundiso kaYesu engundoqo, nenendima encinane kangaka kwizivumo zokholo zamaKristu, ngokuqinisekileyo yenye yezona mfundiso zahlukileyo ngokusisiseko kwezakha zaxhokonxa zaza zaguqula ukucinga kwabantu.”
Kutheni iicawa zithetha okuncinane kangaka ngoBukumkani bukaThixo? Esinye isizathu kukuba zisenokuba aziqinisekanga ngoBukumkani. Zeziphi iimbono abebesoloko benazo abantu ngabo?
Indlela UBukumkani Obebugqalwa Ngayo
Bambi baye bathi uBukumkani bukaThixo yiCawa yamaKatolika. Emva kokuba oobhishophu bamkela uMlawuli uConstantine njengentloko yabo kwiBhunga laseNicaea ngonyaka wama-325 C.E., icawa yangena zwabha kwiipolitiki, yaye abantu baxelelwa ukuba uBukumkani babusele bufikile. IEncyclopædia Britannica ichaza ukuba ngokutsho kwemfundiso yezakwalizwi ka-Augustine (354-430 C.E.), “uBukumkani bukaThixo sele buqalisile kweli hlabathi ngokusekwa kwecawa” yaye “sele bukho kwizithethe ezingcwele zonqulo ezenziwa ecaweni.”
Abanye babugqala uBukumkani bukaThixo njengento enokufikelelwa ngabantu. Loo ntyilalwazi ikwanye ithi: “Iicawa zoHlaziyo . . . kungekudala zaba ngamaziko abalaseleyo akwimimandla ngemimandla, nto leyo eyabangela ukuba lufiphale ulindelo lwexesha lesiphelo” ngokuphathelele ukufika koBukumkani bukaThixo. UH. G. Wells wabhala oku: “Abantu bayeka ukujonga ubukumkani bukaThixo nobuzalwana boluntu njengeyona nto ibalulekileyo ebomini babo baza bajonga kwiindawo ezibonakala zisebenza nezizezokwenene ngakumbi, iFransi neNgilane, iRashiya Engcwele, iSpeyin, iPrussia . . . Zazingoothixo bokwenene nabaphilayo baseYurophu.”
Kwanakumaxesha anamhlanje, uBukumkani buye bajongwa njengorhulumente wabantu. IEncyclopædia Britannica ithi: “Uphawu sisimo sengqondo umntu ngokwakhe anaso ukulungiselela ibutho labantu elizayo eligqibeleleyo ngendlela eyakhayo nelungiselelayo nokuba ‘ukuthemba’ ‘nokulinda’ kuthatyathelw’ indawo yintshukumisa yabantu.” Ngokuphathelele “ivangeli yokuphucula intlalo,” kwaloo ncwadi ikwanye eneembekiselo ihlabela mgama isithi: “Le nkqubo yayigqala isigidimi sobuKristu esingoBukumkani bukaThixo ngokuyintloko njengentshukumisa yokulungelelwaniswa kwakhona kweemeko ezingezozalunqulo zebutho labantu ngengqiqo yemilinganiselo yokuziphatha phantsi koBukumkani bukaThixo.”
KwanamaYuda amaninzi ayebugqala uBukumkani njengento enokuziswa ngabantu. Ngowe-1937 kwinkomfa yoorabhi boHlaziyo eColumbus, eOhio, eUnited States, kwathiwa: “Sikugqala ingumsebenzi wethu okhethekileyo ukusebenzisana nabo bonke abantu ekumiseleni ubukumkani bukaThixo, ubuzalwana bazwenibanzi, okusesikweni, inyaniso noxolo emhlabeni. Olu lusukelo lwethu olungomesiya.”
Enye imbono ekubanjelelwe kuyo ngokubanzi kukuba uBukumkani bukaThixo busisimo sentliziyo kabani. Ngokomzekelo, eUnited States, kwiNdibano YamaBhaptisti Asemazantsi Yowe-1925 kwathiwa: “UBukumkani bukaThixo kukulawula kukaThixo entliziyweni nasebomini bomntu kuzo zonke iintlobo zolwalamano lwabantu, nakuzo zonke iintlobo neenkqubo zebutho labantu elilungelelanisiweyo. . . . UBukumkani bukaThixo buya kuphelela xa konke ukucinga nokuthanda komntu kuya kuthinjelwa ekwenzeni ukuthanda kukaKristu.”
Ke ngoko, ngaba icawa ibuBukumkani bukaThixo? Ngaba obo Bukumkani buya kuziswa ngeendlela ezingezozalunqulo? Ngaba busisimo sentliziyo? Yaye bunokuthetha ntoni kuwe uBukumkani bukaThixo?