Ngoobani Abaya Kusinda ‘Ngexesha Lembandezelo’?
“Bothi bonke abasukuba benqula igama likaYehova, basinde.”—YOWELI 2:32.
1. Ngokutsho kukaDaniyeli noMalaki, yintoni ephawula abo baza kusinda ‘ngexesha lembandezelo’ elizayo?
EKHANGELE phambili kumhla wethu, umprofeti uDaniyeli wabhala: “Kuya kubakho ixesha lembandezelo elingazanga libekho elinjalo, kususela koko lwabakhoyo uhlanga, kude kube nangelo xesha. Ngelo xesha baya kusinda abantu bakowenu, bonke abafunyenwe bebhaliwe encwadini.” (Daniyeli 12:1) Amazwi athuthuzelayo ngokwenene! UYehova uya kubakhumbula abantu akholiswayo ngabo, kanye njengokuba noMalaki 3:16 esithi: “Ke kaloku abamoyikayo uYehova bathetha elowo nowabo; uYehova wazibaza iindlebe, weva; incwadi yokukhumbuza phambi kwakhe yabhalelwa abamoyikayo uYehova, abacinga ngegama lakhe.”
2. Uba yintoni umphumo ngokucinga ngegama likaYehova?
2 Ukucinga ngegama likaYehova kukhokelela ekubeni nolwazi oluchanileyo ngaye, ngoKristu wakhe, nangazo zonke iinjongo zakhe ezizukileyo zoBukumkani. Ngenxa yoko, abantu bakhe bafunda ukumhlonela, ukungena kulwalamano olusenyongweni nolokuzahlulela kuye, nokumthanda ‘ngentliziyo iphela, nangengqiqo iphela, nangamandla ephela.’ (Marko 12:33; ISityhilelo 4:11) Ngedini likaYesu Kristu, uYehova wenze ilungiselelo lothando lokuba abalulamileyo bomhlaba bafumane ubomi obungunaphakade. Ngenxa yoko, aba ngentembelo banokuthetha amazwi awathethwa ngumkhosi wasezulwini owawuzukisa uThixo ngexesha lokuzalwa kukaYesu, besithi: “Uzuko kuThixo enyangweni, uxolo emhlabeni, inkolelo ebantwini.”—Luka 2:14.
3. Ngaphambi kokuba uxolo lufike kulo mhlaba, yintoni uYehova amele ayenze?
3 Olo xolo lusondele ngakumbi kunokuba inkoliso yabantu icinga. Kodwa kuqala uYehova umele agwebe eli hlabathi lonakeleyo. Umprofeti wakhe uZefaniya uthi: “Isondele imini enkulu kaYehova, isondele, ikhawulezile kakhulu.” Yimini enjani leyo? Esi siprofeto siyaqhubeka: “Yivani, imini kaYehova! Liyakhala ngokukrakra khona igorha. Loo mini yimini yokuphuphuma komsindo, yimini yembandezelo nocutheko, yimini yentshabalala yakwantshabalala, yimini yobumnyama nesithokothoko, yimini yamafu, namafu amnyama; yimini yesigodlo nokuhlaba umkhosi emizini enqatyisiweyo, naseluqoqweni olude. Ndiya kubabandezela abantu, bahambe ngokweemfama, kuba bonile kuYehova.”—Zefaniya 1:14-17; bona kwanoHabhakuki 2:3; 3:1-6, 16-19.
4. Ngoobani namhlanje abasabelayo kwisimemo sokwazi uThixo nesokumkhonza?
4 Okuvuyisayo kukuba izigidi namhlanje ziyasabela kwisimemo sokwazi uThixo nokumkhonza. Kwaprofetwa oku ngamaKristu athanjisiweyo nangeniswe kumnqophiso omtsha: “Bonke bephela baya kundazi, kuthabathela kwabancinane kuse kwabakhulu, utsho uYehova.” (Yeremiya 31:34) La aye akhokela kumsebenzi wanamhla wokunikela ubungqina. Kwaye ngoku njengoko abangakumbi nangakumbi bentsalela ethanjisiweyo beligqiba ikhondo labo lasemhlabeni, “isihlwele esikhulu” ‘sezinye izimvu’ siye sazinikela ukuza ‘kukhonza uThixo imini nobusuku’ kwilungiselelo lakhe elinjengetempile. (ISityhilelo 7:9, 15; Yohane 10:16) Ngaba unandipha eli lungelo lizuke gqitha?
Indlela Ezingena Ngayo “Izinto Ezinqwenelekayo”
5, 6. Ngaphambi kokuba zonke iintlanga zinyikimiswe ngentshabalalo, nguwuphi umsebenzi wokusindisa owenziwayo?
5 Ngoku masityhile kuHagayi 2:7, apho uYehova aprofeta ngendlu yakhe yokomoya yonqulo. Uthi: “Ndizinyikimise zonke iintlanga, zifike izinto ezinqwenelekayo zeentlanga zonke, ndiyizalise le ndlu ngobuqaqawuli.” Iziprofeto zeBhayibhile zibonisa ukuba ‘ukunyikimiswa kweentlanga’ kusingisele ekugwebeni kukaYehova iintlanga. (Nahum 1:5, 6; ISityhilelo 6:12-17) Ngenxa yoko, oko kuya kwenziwa nguYehova nokwaprofetwa kuHagayi 2:7 kuya kufikelela incopho ngokunyikimiswa kweentlanga zingabikho—zitshatyalaliswe. Kodwa kuthekani ‘ngezinto ezinqwenelekayo zeentlanga zonke’? Ngaba zifanele zilindele oko kunyikimisa kokugqibela okutshabalalisayo ukuze zingeniswe ngaphakathi? Nakanye.
6 UYoweli 2:32 uthi “bothi bonke abasukuba benqula igama likaYehova, basinde; kuba entabeni yaseZiyon naseYerusalem kuya kubakho abasindileyo, njengoko watshoyo uYehova; naphakathi kwabaseleyo kubekho awobabiza uYehova.” UYehova uyabatsala, yaye banqula igama lakhe ngokholo kwidini likaYesu ngaphambi kokunyikimisa okuyincopho kwembandezelo enkulu. (Thelekisa uYohane 6:44; IZenzo 2:38, 39.) Okuvuyisayo kukuba isihlwele esikhulu esixabisekileyo, ngoku esingaphezu kwezigidi ezine, ‘singena’ kwindlu kaYehova yonqulo ngaphambi kokuba ‘azinyikimise zonke iintlanga’ eArmagedon.—ISityhilelo 7:9, 10, 14.
7. Yintoni ebandakanyekileyo ‘ekunquleni igama likaYehova’?
7 Aba basindi balinqula njani igama likaYehova? UYakobi 4:8 usithela thsuphe, esithi: “Sondelani kuye uThixo, wosondela kuni. Hlambululani izandla, boni, nenze nyulu iintliziyo, nina bamphefumlo umbaxa.” Njengentsalela ethanjisiweyo eye yahlahl’ indlela, abo banethemba lokuba yinxalenye yesihlwele esikhulu esiya kusinda eArmagedon bamele benze isigqibo ngecala abalikhethayo. Ukuba unethemba lokusinda, umele usele ngamandla kwiLizwi likaYehova elihlambululayo uze usebenzise imigaqo yakhe yobulungisa kubomi bakho. Umele wenze isigqibo sokunikela ubomi bakho kuYehova, ukufuzisele oku ngobhaptizo lwasemanzini. Ukunqula kwakho uYehova ngokholo kukwaquka ukunikela ubungqina ngaye. Ngaloo ndlela, kwabaseRoma isahluko 10, indinyana 9 neye-10, uPawulos uyabhala: “Xa uthe wamvuma ngomlomo wakho ukuba uyiNkosi uYesu, wakholwa ngentliziyo yakho ukuba uThixo wamvusa kwabafileyo, wosindiswa. Kuba umntu ukholwa ngentliziyo, ukuze abe nobulungisa; avume ke ngomlomo, ukuze asindiswe.” Wandula ke lo mpostile, kwindinyana 13, acaphule isiprofeto sikaYoweli, ebethelela into yokuba “bonke abasukuba belinqula igama [likaYehova, NW] bosindiswa.”
‘Funani, Funani, Funani’
8. (a) Ngokutsho komprofeti uZefaniya, yintoni uYehova ayifunayo ukuze sizuze usindiso? (b) Igama elithi “mhlawumbi” elikuZefaniya 2:3 lidlulisela siphi isilumkiso kuthi?
8 Xa sityhila eBhayibhileni kwincwadi kaZefaniya, isahluko 2, indinyana 2 neyesi-3, sifunda oko uYehova akufunayo ukuze sizuze usindiso: “Kungekanifikeli ukuvutha komsindo kaYehova, ingekanifikeli imini yomsindo kaYehova. Funani uYehova, nonke balulamileyo belizwe, bakwenzileyo okusesikweni kwakhe; funani ubulungisa, funani ululamo, mhlawumbi nositheliswa ngemini yomsindo kaYehova.” Phawula igama elithi “mhlawumbi.” Asingombandela wokuba ukuba ukhe wasindiswa, uhlala usindisiwe. Ukusitheliswa kwethu kuxhomekeke ekuqhubekeni kwethu sisenza ezo zinto zintathu. Simele sifune uYehova, sifune ubulungisa, sifune nolulamo.
9. Abo bafuna ululamo bavuzwa njani?
9 Uyamangalisa ngokwenene umvuzo wokufuna ululamo! KwiNdumiso 37, indinyana 9 kuse kweye-11, siyafunda: “Abamthembayo uYehova, baya kulidla ilifa ilizwe. Kusaya kuba mzuzwana, angabikho ongendawo . . . Ke bona abalulamileyo baya kulidla ilifa ilizwe, baziyolise ngobuninzi boxolo.” Yaye kuthekani ngokufuna ubulungisa? Nd 37 Indinyana 29 ithi: “Amalungisa aya kulidla ilifa ilizwe, ahlale kulo ngonaphakade.” Ngokuphathelele ukufuna uYehova, Nd 37 indinyana 39 neyama-40 zisixelela oku: “Usindiso lwamalungisa luphuma kuYehova; uligwiba lawo ngexesha lembandezelo. UYehova uyawanceda, awasindise, awasindise kongendawo, awasindise, ngokuba azimela ngaye.”
10. Ngoobani abaye baphawuleka ngokungavumi kwabo ukufuna uYehova nokufuna ululamo?
10 Amahlelo eNgqobhoko aye asilela ukufuna uYehova. Abefundisi bawo bade baligculele igama lakhe elixabisekileyo, ngokuzikhukhumalisa belishenxisa nakwiinguqulelo zabo zeBhayibhile. Bakhetha ukunqula iNkosi okanye uThixo ongenagama nokuhlonela uBathathu Emnye wabahedeni. Ngaphezu koko, iNgqobhoko ayibufuni ubulungisa. Amarhamente ayo amaninzi aphila okanye akhuthaza ubomi bukavula-zibhuqe. Kunokufuna ululamo njengoko uYesu wenzayo, ayaqhayisa, ngokomzekelo kumabonwakude, ngokuphila tofotofo yaye ngokufuthi nangokuziphatha okubi. Abefundisi bazifumbela ubutyebi ngokumfimfitha imihlambi yabo. Ngokuvisisana namazwi akuYakobi 5:5, baye ‘badla ubuncwane emhlabeni baza baxhamla iziyolo.’ Njengoko imini kaYehova isondela, ngokuqinisekileyo baya kufumanisa ukuba la mazwi aphefumlelweyo azaliseka kubo: “Abunyusi ubuncwane ngemini yokuphuphuma komsindo.”—IMizekeliso 11:4.
11. Ngubani umchasi-mthetho, yaye uye wazifumbela njani ityala elikhulu legazi?
11 Ngenkulungwane yokuqala yeXesha Eliqhelekileyo, njengoko umpostile uPawulos echaza kwincwadi yakhe yesibini eya kwabaseTesalonika, wambi amaKristu aba nemihlali ngokugqithiseleyo, ecinga ukuba ngelo xesha imini kaYehova yayifikile. Kodwa uPawulos wawalumkisa ukuba kwakumele kubekho uwexuko olukhulu kuqala, yaye “umchasi-mthetho” wayemele atyhileke. (2 Tesalonika 2:1-3, NW) Ngoku, kule nkulungwane yama-20, sinokulubona ngomkhamo omkhulu olo wexuko nendlela abachas’ umthetho ngayo abefundisi beNgqobhoko emehlweni kaThixo. Ebudeni bale mihla yokugqibela ukususela ngowe-1914, abefundisi baye bazifumbela ityala legazi ngokuxhasa ‘ukukhandwa kwamakhuba abe ngamakrele.’ (Yoweli 3:10) Kwakhona baye baqhubeka befundisa iimfundiso ezibubuxoki, njengokungafi okungokwemvelo komphefumlo womntu, indawo yentlambululo-miphefumlo, ukuthuthunjiswa esihogweni somlilo, ukuphehlelelwa kweentsana, uBathathu Emnye, nezinye iimfundiso ezifanayo. Kuya kwenzeka ntoni kubo xa uYehova ephumeza umgwebo wakhe? IMizekeliso 19:5 ithi: “Ofutha amanga akasindi.”
12. (a) Ayintoni “amazulu” kunye ‘nomhlaba’ wabantu oza kutshatyalaliswa kungekudala? (b) Sifunda ntoni kule ntshabalalo izayo yeli hlabathi lingendawo?
12 Kweyesi-2 kaPetros 3:10, sifunda oku: “Iya kufika ke imini [kaYehova, NW] njengesela ebusuku, eliya kuthi ngayo izulu lidlule liqhuqhumba, zithi ke iziqalelo zitshe, zichithakale, nomhlaba nayo imisebenzi ekuwo itshiswe kuthi tu.” Ulawulo olunganyanisekanga oluye lwagubungela uluntu njengezulu, nazo zonke iziqalelo ezibumba ibutho labantu eliwohlokileyo lanamhlanje, ziya kutshayelwa kuthi tu emhlabeni kaThixo. Abenzi nabarhwebi bezixhobo ezitshabalalisayo, amamene-mene, amarhamente nabefundisi bawo abahanahanisayo, abantu abakhuthaza inkohlakalo, ugonyamelo nolwaphulo-mthetho—bonke aba baya kuthi shwaka. Baya kunyibilikiswa bangabikho ngengqumbo kaYehova. Kodwa kwindinyana 11 neye-12, uPetros wongezelela esi silumkiso kumaKristu: “Ezo zinto zonke ngoku zichithakala nje, nimele ukuba ngabanjani na ngeehambo ezingcwele nokuhlonela uThixo; nikulindela, nikukhawulezela, ukufika kwayo imini kaThixo.”
UMikayeli Uqalisa Ukusebenza!
13, 14. Ngubani uMthetheleli omkhulu wolawulo lukaYehova, yaye ebesebenza njani ukususela ngowe-1914?
13 Abantu baya kusinda njani ngelo “xesha lembandezelo” eliya kuziswa nguYehova? UMmeli kaThixo wokuhlangula abasindi sisiphatha-zithunywa uMikayeli, ogama lakhe lithetha ukuthi “Ngubani Na OnjengoThixo?” Ngokufanelekileyo ke ngoko, unguMthetheli wolawulo lukaYehova, ephakamisa uYehova njengokuphela koThixo wenyaniso nonelungelo lokuba yiNkosi enguMongami wendalo iphela.
14 Ezinjani zona ukubalasela iziganeko ezichazwa kwiSityhilelo isahluko 12, indinyana 7 ukusa kweye-17, ngokuphathelele ‘imini yeNkosi’ eyaqala ngowe-1914! (ISityhilelo 1:10) Isiphatha-zithunywa uMikayeli simkhuphela ngaphandle kwamazulu size simphosele phantsi emhlabeni uSathana onemvukelo. Kamva, njengoko kuchazwe kwiSityhilelo isahluko 19, indinyana 11 ukusa kweye-16, lowo ubizwa ngokuba “nguThembekile, nguNyaniso” “unyathela isixovulelo sewayini yomsindo neyengqumbo kaThixo uSomandla.” Igama lalo mphumi-mkhosi unamandla wasezulwini ‘nguKumkani kakumkani noNkosi kankosi.’ Okokugqibela, kwiSityhilelo isahluko 20, indinyana 1 neyesi-2, sichazelwa ngesithunywa sezulu esikhulu esiphosela uSathana enzonzobileni size simkhonkxe apho iminyaka eliwaka. Ngokucacileyo, zonke ezi zibhalo zibhekisela kuMthetheleli wolongamo lukaYehova, iNkosi uYesu Kristu, lowo uYehova wambeka kwitrone yakhe ezukileyo ezulwini ngowe-1914.
15. UMikayeli uya ‘kusuka eme’ ngayiphi indlela ekhethekileyo kungekudala?
15 Njengoko kusitshiwo kuDaniyeli 12:1, uMikayeli uye ‘wema’ ngenxa yabantu bakaYehova ukususela kwixesha lokumiselwa kwakhe njengoKumkani ngowe-1914. Kodwa kungekudala uMikayeli uza ‘kusuka eme’ ngengqiqo ekhethekileyo—njengoMmeli kaYehova ukuze ashenxise bonke ubungendawo emhlabeni nanjengoMhlanguli webutho lazwenibanzi labantu bakaThixo. Indlela eliya kuba maxongo ngayo elo “xesha lembandezelo” ichazwa ngamazwi kaYesu akuMateyu 24:21, 22: “Ngelo xesha kuya kubakho imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo. Kanjalo ukuba ibingayi kuthi loo mihla inqanyulelwe, bekungayi kubakho nyama isindayo; ngenxa ke yabanyuliweyo, loo mihla iya kunqanyulelwa.”
16. Yiyiphi inyama eya kusindiswa ebudeni bembandezelo enkulu?
16 Hayi indlela esinokuvuya ngayo kuba kuya kubakho inyama eya kusindiswa ngelo xesha! Apha akuthethwa ngabantu abanjengamaYuda awayenemvukelo awayevingcelwe eYerusalem ngowama-70 C.E., awathi amanye awo athinjelwa eRoma njengamakhoboka. Kunoko, abo basindayo ‘ngexesha lokuphela’ baya kufana nebandla lamaKristu elalisele lisabile eYerusalem xa kwaqala ungqingo lokugqibela. Iya kube ingabantu bakaThixo, izigidi zesihlwele esikhulu nabo nabaphi na babathanjiswa abasasele emhlabeni. (Daniyeli 12:4) Isihlwele esikhulu ‘siphuma embandezelweni enkulu.’ Kubangelwa yintoni oko? Kukuba ‘siye sazihlamba iingubo zaso ezinde sazenza mhlophe egazini leMvana.’ Sinokholo kumandla entlawulelo egazi likaYesu elaphalazwayo yaye sibonakalisa olo kholo ngokukhonza uThixo ngokunyanisekileyo. Kwanangoku, uYehova, “lowo uhleli phezu kwetrone,” uba ngumnquba wenkuselo phezu kwabo, ngoxa iMvana, uKristu Yesu, ibalusa yaye ibakhokelela kwimithombo yamanzi obomi.—ISityhilelo 7:14, 15.
17. Isihlwele esikhulu sikhuthazwa njani ngokukhethekileyo ukuba senze oko kufunekayo ukuze sisitheliswe ebudeni bemini ezayo yembandezelo?
17 Ngoxa sifuna uYehova, ubulungisa nolulamo, isihlwele esikhulu esizizigidi asimele siluvumele uthando lwaso lokuqala ngenyaniso luphole. Ukuba ungomnye waba bantu banjengezimvu, umele wenze ntoni? Njengoko kuchazwe kwabaseKolose isahluko 3, indinyana 5 ukusa kweye-14, (NW) umele ‘uzihlube ngokupheleleyo ubuntu obudala, kunye nezenzo zabo.’ Ngokucela uncedo lukaThixo, zabalazela ‘ukwambatha ubuntu obutsha, obusekelwe kulwazi oluchanileyo.’ Ngolulamo, hlakulela uze ulondoloze inzondelelo ekudumiseni uYehova nasekwaziseni abanye ngeenjongo zakhe ezizukileyo. Ngaloo ndlela, usenokusitheliswa ‘ngexesha lembandezelo,’ ngemini “yokuvutha komsindo kaYehova.”
18, 19. Ukunyamezela kuye kwabaluleka ngayiphi indlela ukuze kuzuzwe usindiso?
18 Loo mini isemnyango! Ayifikanga igalelekile. Ukuhlanganiswa kwamalungu esihlwele esikhulu kuye kwaqhubeka kangangeminyaka enokuba ngama-57 ngoku. Abaninzi kwaba baye bafa yaye balindele ukuvuswa. Kodwa isiprofeto seSityhilelo siyasiqinisekisa ukuba njengeqela isihlwele esikhulu siya kuphuma kwimbandezelo enkulu njengenxalenye esisiseko yebutho ‘lomhlaba omtsha.’ (ISityhilelo 21:1) Ngaba uya kuba lapho? Oko kunokwenzeka, kuba uYesu uthi kuMateyu 24:13: “Onyamezeleyo kwada kwaba sekupheleni, lowo uya kusindiswa.”
19 Iingcinezelo abantu bakaYehova abajamelana nazo kule nkqubo indala zisenokuqhubeka zisanda. Yaye xa kuqalisa imbandezelo enkulu engcungcuthekisayo, usenokufumana ubunzima. Kodwa namathela kuYehova nentlangano yakhe. Hlala uphaphile! “Yilindeleni kum, utsho uYehova, ide ibe yimini yokuvuka kwam, ndithimbe. Ngokuba kulunge kum ukuhlanganisa iintlanga, ndibuthe izikumkani, ukuze ndiyiphalaze ingqumbo yam phezu kwazo, konke ukuvutha komsindo wam; kuba liya kutshiswa ngumlilo wekhwele lam lonke ihlabathi.”—Zefaniya 3:8.
20. Njengoko “ixesha lembandezelo” eliyincopho lisondela ngakumbi, simele senze ntoni?
20 Ukuze sikhuselwe yaye sikhuthazeke, ngothando uYehova uye wanika abantu bakhe “intetho enyulu,” equka isigidimi esizukileyo soBukumkani bakhe obuzayo, ‘ukuze banqule igama likaYehova bonke bephela, bamkhonze ngaxhatha linye.’ (Zefaniya 3:9) Njengoko “ixesha lembandezelo” eliyincopho lisondela ngakumbi, ngamana singakhonza ngenzondelelo, sincede abanye abalulamileyo ukuba ‘banqule igama likaYehova’ ukuze basindiswe.
Uyakhumbula Na?
◻ Sisiphi isenzo sikaYehova esiya kwandulela ukuziswa koxolo emhlabeni?
◻ Ngokutsho kukaYoweli, umntu umele enze ntoni ukuze asindiswe?
◻ Ngokutsho kukaZefaniya, abalulamileyo banokukhuselwa njani kumsindo kaYehova ovuthayo?
◻ Ngubani “umchasi-mthetho,” kwaye uye wazifumbela njani ityala legazi?
◻ Kubaluleke kangakanani ukunyamezela kumbandela wosindiso?