UYehova—Ngaba Ngumntu Omqhelileyo Okanye Ngumhlobo Wakho?

“JOHN, ngaba ndingakwazisa kumhlobo wam? Lo ngu—uxolo kancinane, ngubani igama lakho kanene?”

Ngaba wakha waluva olu hlobo lwempazamo encokweni? Oku kunikela umzekelo wendlela abanye abantu abalisebenzisa phosakeleyo ngayo igama elithi “umhlobo.” Enyanisweni kuphela bathetha “umntu abamqhelileyo” okanye maxa wambi ingekuko noko. Ukuqhelana noMnu. Skhweyiya ohlala ngaphesheya kwesitrato kuyenye into; ukuba ngumhlobo wakhe kukwayenye.

Esinye isichazi-magama sichaza ibinzana elithi “umntu omqhelileyo” ngokuthi “ngumntu owazana naye nje ekuhlaleni kodwa ongenalwalamano lungako lobuqu nolusenyongweni naye.” Libonisa “ukuqhelana, ukusondelelana, ulwalamano nokunqwenelelana izinto ezithile ngendlela enganeno kunoMHLOBO.”

Oku kusilela kokuba nolwalamano lobuqu olomeleleyo kusinceda sicacelwe sisizathu sokuba ngokufuthi sinikela ingqalelo encinane koko kwenzeka kubantu esibaqhelileyo, ngoxa ngobubele sibandakanyeka kubomi babahlobo bethu. Sivuyisana yaye silila kunye nabo, sivumela ezo zinto ukuba zisichukumise ngokunzulu. Kambe ke, simele sikulumkele ukuvumela ukubandakanyeka ngokweemvakalelo ukuba kusikhohlisele ekubeni sigxuphuleke kwimicimbi yabo yobuqu.—1 Petros 4:15.

Ukuba nolwalamano lobuqu olomeleleyo nabahlobo bethu kukwacacisa isizathu sokuba ngokuqhelekileyo sizama ukubakholisa. Ukuba umntu esimqhelileyo ufumanisa ukuba ihambo yethu akayithandi okanye ayifanelekanga, ukungayithandi kwakhe kusenokungasishukumiseli ekuyiguquleni. Kodwa umhlobo unokuba nempembelelo enamandla ngokwenene, enoba kukumbandela wesinxibo, ihambo okanye isimo sengqondo.

Ngokuphathelele ukuthembana, uthando, intlonelo nokunyaniseka, ubuhlobo bufuna ukuba ube nembopheleleko engakumbi kunokuqhelana nje nomntu. Lowo ufuna ukwakha ubuhlobo, ngokungathi kunjalo, obungenazimbopheleleko, enyanisweni ufuna kuphela umntu anokuqhelana naye, akafuni mhlobo. Abahlobo abasondeleleneyo bayakuvuyela ukufeza iimbopheleleko eziphelekwa lulwalamano lobuqu olomeleleyo, beqonda ukuba ezi zibanika ithuba lokungqina ubuhlobo babo.

Ubuhlobo NoThixo

NjengoMdali, uYehova nguBawo wasemazulwini woluntu yaye ufanelwe kukuthandwa, ukuthotyelwa nokuhlonelwa. Kodwa ufuna ukuba abantu bakwenze oku ngenxa yolwalamano lobuqu olomeleleyo, kungekhona ngokuba kufanelekile. (Mateyu 22:37) Ukwafuna ukuba bamthande njengoMhlobo. (INdumiso 18:1) Ekubeni “wasithanda kuqala,” yena ngokwakhe uye wabeka isiseko esigqibeleleyo sobuhlobo obunjalo.—1 Yohane 4:19.

Abazali bethu bokuqala, uAdam noEva, babeqhelene noYehova. Umbuzo ngulo: Ngaba babeya kubamkela ubuhlobo awayebunikela? Okubuhlungu kukuba, abazange babamkele. Ukuxhakamfula kwabo ngokuzingca ukuzimela geqe kuThixo kwabonisa ukuba babengenayo imvakalelo yolwalamano lobuqu olomeleleyo. Bekulungele ukwamkela iintsikelelo zobuhlobo awayebanika zona, babengakulungelanga ukuzalisekisa iimbopheleleko zabo. Kwaba ngathi babefuna ukunandipha ubunewunewu nonqabiseko lwekhaya labo elimfumamfuma eliyiParadisi bengafuni ukurhafela indlu.

Thina sonke, abanye ngomlinganiselo ongaphezulu kunabanye, siye sawuzuz’ ilifa loo moya wokungabi naluxabiso nowokuzimela geqe. (Genesis 8:21) Ngokomzekelo, bambi abantu abaselula baye bavumela umnqweno wabo wokwemvelo wokuzimela geqe ukuba ubenze bangabi naluxabiso ngabazali babo. Oku kuye kwaphumela ekuwohlokeni kobona buhlobo buxabisekileyo obebufanele bubekho phakathi kwabo nabazali babo ubomi babo bonke. Noko ke, okulusizi kukuba, ukuwohloka kobuhlobo bethu noBawo wethu wasezulwini kunzulu ngakumbi. Enyanisweni, kunokubulala!

Imfuneko Zobuhlobo

Ngaphandle kokuthembana, alukho ulwalamano olunokuhlala ithuba elide, nokuba kukunye nabantu okanye noThixo. Usolusapho uAbraham wakuqonda oku, yaye kungeso sizathu lento ngokuphindaphindiweyo wabonakalisa ukuthembela ngokupheleleyo kuThixo. Funda iGenesis 12:1-5 nesama-22:1-18, uze ubone imizekelo emibini ebalaseleyo yokuthembela kwakhe kuYehova. Ewe, “wakholwa ke uAbraham nguye uThixo; kwaza oko kwabalelwa ebulungiseni kuye.” Yiyo loo nto “wabizwa ngokuba sisihlobo sikaThixo.”—Yakobi 2:23.

Enye imfuneko engakumbi yobuhlobo noThixo kukufeza iimbopheleleko eziphelekwa bobu buhlobo. Ngenxa yesikhundla sethu esisezantsi kwiinkqubano zethu noYehova, ezi mbopheleleko zisengqiqweni kakhulu ngakumbi kunokuba beziya kuba njalo kubuhlobo babantu. Zingaphaya kokufuna kwethu ukumkholisa kwezinye izinto—njengokuba besiya kwenjenjalo kumhlobo ongumntu. Ziquka ukufuna kwethu ukumkholisa kuzo zonke izinto. UYesu, uNyana kaThixo noyena mhlobo usenyongweni, wakubonisa oku xa wathi ngoYehova: “Mna ndihleli ndisenza izinto ezikholekileyo kuye.”—Yohane 8:29.

Ngaloo ndlela, ubuhlobo noYehova, okanye noNyana wakhe, abufumaneki ngaphandle kweembopheleleko; buxhomekeke ekuphileni kwethu ngokuvisisana nezinto ezifunekayo kubuhlobo abaye bazimisela. (Bona INdumiso 15:1-5.) UYesu wakubonakalisa oku ngokucacileyo kwincoko yakhe nabafundi bakhe. Wabaxelela oku: “Nizizihlobo zam nina, ukuba nithi nikwenze konke endinimisela kona mna.”—Yohane 15:14.

Enye imfuneko yobuhlobo lunxibelelwano olukhululekileyo nolokungafihlisi. Ngosuku lokufa kwakhe, uYesu waxelela abapostile bakhe abathembekileyo oku: “Andisatsho ukuthi ningabakhonzi; ngokuba umkhonzi akakwazi okwenziwa yinkosi yakhe; mna ke ndithi nizizihlobo; ngokuba zonke izinto endaziva kuBawo, ndanazisa zona.” (Yohane 15:15) Ekwabelaneni ngeengcamango zakhe nabahlobo bakhe, uYesu wayelandela umzekelo kaYise wasezulwini, uAmosi 3:7 athi ngaye: “Ayikhe yenze into iNkosi uYehova, ingathanga iluhlakaze ucweyo lwayo kubakhonzi bayo abaprofeti.”

Ngaba oku akunto iqhelekileyo phakathi kwabahlobo? Kusenokungabikho nto isishukumisela ukwabelana ngamava ethu noMnu. Skhweyiya ohlala ngaphesheya kwesitrato. Yaye okona kuqinisekileyo kukuba besingenakufuna ukumxelela iingcamango nezona mvakalelo zethu zangaphakathi. Ngapha koko, ungumntu nje esimqhelileyo. Kodwa ngokufuthi kuye kube nzima nokulinda ngaphambi kokuba sibaxelele abahlobo bethu izinto ezinjalo!

Kukwanjalo ke ngobuhlobo bethu noThixo. Bekunganzima ukulinda ukuba sisondele kuye ngomthandazo, simxelela ngeentswelo zethu, iminqweno yethu nezona mvakalelo zethu zangaphakathi. Kakade ke, ukuba unxibelelwano lucala-nye, ngokukhawuleza ubuhlobo buya kuphela. Ngoko sikwamele sikulungele ukumvumela uThixo athethe nathi. Oku sikwenza ngokuthi ngenyameko siphulaphule iLizwi lakhe elibhaliweyo, sicamngce ngesiluleko sakhe size sisisebenzise kangangoko sinako.

Bubaluleke Kangakanani Kuwe Ubuhlobo NoYehova?

Ukukunceda ukuba uphendule lo mbuzo, khawucinge ngohlobo olukhethekileyo lobuhlobo babantu. Ukuba ungumntu oselula, mhlawumbi unomdla kubuhlobo obunokukukhokelela emtshatweni. Kambe ke, uyaqonda ukuba ukuqhelana nje nalowo uza kuba liqabane lakho akusiso konke konke isiseko esifanelekileyo somtshato. Ukuqhelana nomntu kumele kuqala kuguqulelwe kubuhlobo. Obu buhlobo bunokwandula ke bukhuliswe buze bubunjelwe ekubeni lulwalamano olusondele ngakumbi oluya kuthi ekugqibeleni lwakhe isiseko esifanelekileyo somtshato owonwabileyo.

Ngoku, khawucinge nje. Ngumgudu ongakanani inkoliso yabantu ewenzayo ekukhuliseni olu hlobo lobuhlobo? Ingakanani imali nexesha abayichithela ekubukhuliseni nasekubulondolozeni? Lingakanani ixesha abalichitha becinga ngabo? Baceba ukusa kuwuphi umkhamo—okanye babonise ukukulungela ukuguqula izinto abazicebileyo—ngenjongo yokuphucula nokulondoloza olu lwalamano?

Ngoko khawuzibuze oku: ‘oku kunokuthelekiswa njani nemigudu yam yokukhulisa ubuhlobo noMdali wam okanye yokubuphucula nokubuqinisa? Lingakanani ixesha endilichitha ndisenjenjalo? Kukusa kuwuphi umkhamo obuthi ubuhlobo noYehova buzalise iingcinga zam? Ndiceba ukusa kuwuphi umkhamo—okanye ndibonise ukukulungela ukuguqula izinto endizicebileyo—ngenjongo yokuphucula ndize ndigcine olu lwalamano?’

AmaKristu aselula afanele azi ngokupheleleyo ukuba bonke ubuhlobo babantu, kuquka nobo ekugqibeleni bukhokelela emtshatweni, abubalulekanga njengobuhlobo ekufuneka abe nabo noMdali wawo. Kungenxa yoko ebongozwa ngolu hlobo kwiNtshumayeli 12:1: “Uze umkhumbule ke uMdali wakho ngemihla yobutsha bakho.” Abaninzi bakwenza oku ngokukhonza esidlangalaleni njengabalungiseleli bakaThixo, inani labo elandayo njengabashumayeli bexesha elizeleyo, okanye njengoovulindlela.

Ngaphezu kwako nje ukugxekwa okwandayo nokungakhathalelwa konqulo okubangqongileyo, ngenkalipho aba bathethelela uYehova xa besiva izigculelo nezityholo zobuxoki atyatyekwa ngazo. Ngaba oku asikuko oko uYehova ebefanele akulindele kubahlobo bakhe? Ngaba oko asikuko oko nathi besiya kukulindela kubahlobo bethu? Yaye ngaba bekungasayi kuzenza iintliziyo zethu zivuye xa sifumanise ukuba abahlobo bethu bakwenza oko ngenzondelelo nangokuqiniseka?—Thelekisa IMizekeliso 27:11.

Ewe, ubuhlobo noThixo—kwanabantu—buzisa iimbopheleleko ekufuneka zifeziwe ukuba ubuhlobo buza kuhlala ithuba elide. Umntu ongakulungelanga ukwamkela ezi mbopheleleko, okanye ongekakulungeli ukuzahlulela kuThixo aze aluphumeze, ngokwenene usenokuqhelana noYehova. Noko ke, kusafuneka afumane uvuyo lokumzuza njengoMhlobo.

[Umfanekiso okwiphepha 25]

UAbraham wamthemba uThixo yaye ngoko ke wabizwa ngokuba ngumhlobo kaYehova