Ngaba Sifanele Uxakeke Kwimisebenzi Efileyo Okanye Kwinkonzo KaYehova?

“UXOLO, ndixakekile.” Le yenye yeendlela achaswa ngazo amaNgqina kaYehova njengoko eshumayela ekuhleni iindaba ezilungileyo zoBukumkani. (Mateyu 24:14) Yaye ngoxa ukuthi “Ndixakekile” maxa wambi kusisingxengxezo nje sokuzithethelela, inyaniso kukuba abantu abaninzi baxakekile. Bathiwe minxi “ngamaxhala ale nkqubo yezinto”—iingcinezelo zokuziphilisa, ukuhlawula amatyala, impangelo, ukukhulisa abantwana, ukunyamekela ikhaya, inqwelo-mafutha nezinye izinto abanazo.—Mateyu 13:22, NW.

Noko ke, ngoxa abantu besenokuxakeka ngokwenene, bambalwa ababandakanyeke kwimisebenzi enesiqhamo okanye enemveliso ngokwenene. Kunjengokuba indoda esisilumko uSolomon yakha yabhala: “Umntu uba nantoni na ngemigudu yakhe yonke, nangenzondelelo yentliziyo yakhe, aphuka yiyo yena phantsi kwelanga? Ngokuba imihla yakhe yonke inomvandedwa, nasekuzameni kwakhe ukhathazekile, nasebusuku ayiphumli intliziyo yakhe; kwanaloo nto ingamampunge.”—INtshumayeli 2:22, 23.

Kwakhona iBhayibhile ithi imisebenzi elilize ngolo hlobo ‘yimisebenzi efileyo.’ (Hebhere 9:14) Ngaba imisebenzi enjalo iyabulawula ubomi bakho? Oku kufanele kukuxhalabise kakhulu njengomKristu, ekubeni uThixo eya ‘kubuyekeza elowo ngokwezenzo zakhe.’ (INdumiso 62:12) Yaye ekubeni ‘ixesha eliseleyo lifinyele,’ sifanele sikuphaphele ngokukodwa ukuba singachithi ixesha ngemisebenzi efileyo. (1 Korinte 7:29) Kodwa iyintoni imisebenzi efileyo? Sifanele siyijonge njani? Yaye sinokuqiniseka njani ukuba sixakeke yimisebenzi exabiseke ngokwenene?

Ukuchaza Imisebenzi Efileyo

KumaHebhere 6:1, 2, uPawulos wabhala: “Endithi ngoko, masithi, siyeka elengqalo ilizwi elithetha ngoKristu, siqhubele kwelokukhula; singabuyi siseke ngeloguquko emisebenzini efileyo, nokukholwa kuThixo, ngelemfundiso yeembaptizo, neyokubekwa izandla, neyovuko lwabafileyo, neyogwebo olungunaphakade.” Phawula ukuba ‘imfundiso yelengqalo’ yayiquka ‘ukuguquka emisebenzini efileyo.’ NjengamaKristu, abo uPawulos wayebabhalela babesele beguqukile kwimisebenzi enjalo efileyo. Njani?

Ngaphambi kokwamkela uKristu, bambi kwinkulungwane yokuqala babebandakanyeke ‘kwimisebenzi efileyo yenyama,’ eyile, “umbulo, ukungcola, uburheletyo, ukubusa kwizithixo, ukukhafula,” nezinye izenzo ezingcolileyo. (Galati 5:19-21) Ukuba babengayiphaphelanga, loo misebenzi ngeyabakhokelela ekufeni ngokomoya. Noko ke, ngenceba, loo maKristu abuya kwikhondo lawo elitshabalalisayo, aguquka aza “ahlanjululwa.” Ngaloo ndlela anandipha ukuma okucocekileyo noYehova.—1 Korinte 6:9-11.

Noko ke, asingawo onke amaKristu awayemele aguquke kwimisebenzi engendawo okanye yokuziphatha okubi. Incwadi kaPawulos yayibhalelwe ngokuyintloko amakholwa angamaYuda, ngokungathandabuzekiyo uninzi lwawo olwalunamathele ngokungqongqo kuMthetho kaMoses ngaphambi kokwamkela uKristu. Ngoko, yiyiphi imisebenzi efileyo awayeguquke kuyo? Ngokuqinisekileyo kwakungekho nto iphosakeleyo ngokulandela kwawo iinkqubo nemimiselo yezinto ezazimele zityiwe eyayibhalwe eMthethweni. Ngaba umthetho ‘wawungengcwele, unobulungisa, ulungile’? (Roma 7:12) Ewe, kodwa kweyabaseRoma 10:2, 3, uPawulos wathi ngamaYuda: “Ndiyabangqinela ukuba banokumzondelela uThixo, koko bengamzondeleli ngokokwazi okukuko. Kuba bathe, bengabazi ubulungisa bukaThixo, befuna nokumisa obabo ubulungisa, ababululamela ubulungisa bukaThixo.”

Ewe, ephosisa amaYuda ayekholelwa ukuba ngokulandela uMthetho ngenyameko, ayenokulufumana usindiso lwawo. Noko ke, uPawulos wachaza ukuba “akagwetyelwa umntu ngokwasemisebenzini yomthetho, kuphela kungokukholwa kuYesu Kristu.” (Galati 2:16) Emva kokuba kwakunikelwe intlawulelo kaKristu, imisebenzi yoMthetho—kungakhathaliseki indlela eyayinyaniseke okanye eyayibalasele ngayo—yayiyimisebenzi efileyo yaye yayingaxabisekanga konke konke ekuzuzeni usindiso. Ngaloo ndlela amaYuda aneentliziyo ezilungileyo afuna inkoliseko kaThixo ngokuguquka kuloo misebenzi efileyo aza abhaptizwa ukufuzisela ukuguquka kwawo.—IZenzo 2:38.

Sifunda ntoni koku? Sifunda ukuba imisebenzi efileyo isenokuquka okungakumbi kunezenzo zobungendawo okanye zokuziphatha okubi; iquka nawuphi na umsebenzi ofileyo ngokomoya, olilize, okanye ongenasiqhamo. Kodwa ngaba onke amaKristu akaguquki kuloo misebenzi ifileyo ngaphambi kokuba abhaptizwe? Kunjalo, kodwa ekuhambeni kwexesha wambi amaKristu kwinkulungwane yokuqala abuyela ekuziphatheni okubi. (1 Korinte 5:1) Yaye phakathi kwamaKristu angamaYuda, kwakukho utyekelo lokubuyela ekwenzeni imisebenzi efileyo yoMthetho kaMoses. Kwafuneka ukuba uPawulos abakhumbuze abanjalo ukuba bangabuyeli kwimisebenzi efileyo.—Galati 4:21; 5:1.

Ukulumkela Imisebenzi Efileyo

Ngoko ke abantu bakaYehova namhlanje bamele balumke bangaweli kumgibe wemisebenzi efileyo. Sihlaselwa kuwo onke amacala ngeengcinezelo ukuze silalanise kwimilinganiselo yokuziphatha, singanyaniseki, size sibandakanyeke kwizenzo zokuziphatha okubi ngokwesini. Okubuhlungu kukuba amawaka amaKristu nyaka ngamnye ayanikezela kwezo ngcinezelo, yaye, ukuba awaguquki, ayagxothwa kwibandla lamaKristu. Ngoko, kunanini na ngaphambili umKristu umele athobele icebiso likaPawulos elikumaEfese 4:22-24, (NW): “Ngakwihambo yangaphambili nibulahle ubuntu obudala, obonakaliswayo ngokokweenkanuko zokulukuhla; nihlaziywe ke kuwo umoya wengqiqo yenu, nambathe ubuntu obutsha, obuthe ngokukaThixo badalelwa ebulungiseni, nasebungcweleni benyaniso.”

Kakade ke, amaEfese awayewabhalela uPawulos ayesele ebambathile ubuntu obutsha ngomlinganiselo omkhulu. Kodwa uPawulos wawanceda aqonda ukuba ukwenjenjalo kwakuyinkqubo eqhubekayo! Ukuba ayengaqhubeki esenza umgudu, amaKristu ayenokubuyiselwa emva kwimisebenzi efileyo ziinkanuko ezilukuhlayo nezihlala zihleli njengempembelelo eyonakalisayo. Kuyinto efanayo ngathi namhlanje. Simele ngamaxesha onke sizabalazele ukwambatha ubuntu obutsha, singabuvumeli busulelwe yimikhwa yekhondo lethu elidala lobomi. Simele siluphephe—siluthiye—naluphi na uhlobo lwemisebenzi engendawo yenyama. Umdumisi uyabongoza: “Bathandi bakaYehova, kuthiyeni okubi.”—INdumiso 97:10.

Kuyancomeka ukuba uninzi lwabantu bakaYehova namhlanje luye lwasithobela esi siluleko lwaza lwahlala lucocekile ngokokuziphatha. Noko ke, bambi baye baphazanyiswa yimisebenzi ethi nangona ingaphosakelanga kodwa ibe lilize yaye ingabi nasiqhamo ngokupheleleyo. Ngokomzekelo, bambi baye babandakanyeka ngokunzulu kumacebo okungenisa imali okanye ekuzifumbeleni izinto eziphathekayo. Kodwa iBhayibhile iyalumkisa: “Abo banga bangaba zizityebi, beyela ekuhendweni, nasesibatheni, nasezinkanukweni ezininzi ezibubudenge ezenzakalisayo; zona zibatshonisayo abantu ekonakaleni, nasekutshabalaleni. (1 Timoti 6:9) Kwabanye, imfundo yehlabathi ingqineke ingumgibe. Liyinyaniso elokuba umgangatho othile wemfundo yehlabathi usenokuba yimfuneko ekufumaneni umsebenzi. Kodwa kumalungiselelo adla ixesha elininzi okuhambisela phambili imfundo yehlabathi, bambi baye bazenzakalisa ngokomoya.

Ewe, imisebenzi emininzi isenokungabi yephosakeleyo ngokokuziphatha. Kodwa sekunjalo ifile ukuba ngokwenene ayongezi nto kubomi bethu bakalokunje okanye ayisenzi sikholeke kuYehova uThixo. Imisebenzi enjalo idla ixesha yaye iyaqoba yaye ayinangenelo ngokomoya, ayizisi ukuhlaziyeka okuhlala kuhleli.—Thelekisa INtshumayeli 2:11.

Ngokungathandabuzekiyo uzabalazela ukuxakeka kwimisebenzi yokomoya exabisekileyo. Noko ke, kuyanceda ukuzihlolisisa rhoqo. Ngamaxesha athile, unokuzibuza imibuzo enjengale: ‘Ngaba ndiyakutyeshela ukuba senkonzweni nakwiintlanganiso ngenxa yomsebenzi wempangelo endiwenzayo ongeyomfuneko?’ ‘Ngaba ndinalo ixesha lokuzihlaziya kodwa ndinexesha elincinane lofundisiso lobuqu nolwentsapho?’ ‘Ngaba ndichitha ixesha namandla amaninzi ekusukeleni ubuncwane bezinto eziphathekayo kodwa ndiyasilela ukunyamekela abasweleyo ebandleni, njengabagulayo nabalupheleyo?’ Iimpendulo zale mibuzo zinokubonisa imfuneko kuwe yokuyibeka kwindawo yokuqala imisebenzi yokomoya.

Hlala Uxakekile Enkonzweni KaYehova

Njengoko eyoku-1 kwabaseKorinte 15:58 (NW) isitsho, ‘kuninzi esinokukwenza emsebenzini weNkosi.’ Umsebenzi wokushumayela ngoBukumkani nowokwenza abafundi ngowona uphambili. Kweyesi-2 kuTimoti 4:5, uPawulos wabongoza: “Ukushumayela iiNdaba Ezilungileyo kwenze kube ngumsebenzi wobomi bakho, ngokuthi unikele inkonzo ecokisekileyo.” (Jerusalem Bible) Kwakhona kuninzi okunokwenziwa ngabadala nezicaka zolungiselelo ekunyamekeleni iintswelo zomhlambi. (1 Timoti 3:1, 5, 13; 1 Petros 5:2) Kwakhona iintloko-ntsapho—inkoliso yazo zingabazali abangenamaqabane omtshato—zineembopheleleko ezinzima ekunyamekeleni iintsapho zazo nokunceda abantwana bazo bakhulise ulwalamano lwabo noThixo. imisebenzi enjalo inokudinisa, iqobe nokuqoba. Kodwa kunokuba ibe yefileyo, izisa ulwaneliseko lokwenene!

Ingxaki yile: Ubani ulifumana njani ixesha lokwenza yonke le misebenzi iyimfuneko nexabisekileyo? Kufuneka siziqeqeshe yaye sibe nocwangciso lobuqu. Kweyoku-1 kwabaseKorinte 9:26, 27, uPawulos wabhala: “Mna ke ngoko ndenjenjalo ukubaleka, ndingangi andiqondi; ndenjenjalo ukugalela ngenqindi, ndingangi ndibetha umoya; ndisuka ndiwuqobe umzimba wam, ndiwuxinzelele phantsi, hleze ndithi, ndakuba ndizivakalisile iindaba ezilungileyo kwabanye, ndibe mna ndingumlahlelwa phandle.” Enye indlela yokusebenzisa umgaqo okwesi sibhalo kukuba ngamathub’ athile uhlolisise uludwe loko ukwenzayo ngokobuqu nendlela ophila ngayo. Usenokufumanisa ukuba unokuyeka izinto eziliqela ezingeyomfuneko ezidla ixesha lakho neziqoba amandla akho.

Ngokomzekelo, ngaba amandla nexesha lakho elingakumbi ulichithela ekubukeleni umabonwakude, ekuzihlaziyeni, ekufundeni iincwadi zehlabathi, okanye ekwenzeni imisetyenzana yokuzonwabisa? Ngokwenqaku elikwiThe New York Times, umntu okhulileyo waseUnited States uchitha “iiyure ezingaphezu kwama-30 ngeveki” ebukele umabonwakude. Ngokuqinisekileyo, ixesha elinjalo linokusetyenziswa kakuhle ngakumbi! Umfazi womnye umveleli ohambahambayo uthi: “Ndiziyeke ngokupheleleyo phantse zonke izinto ezidla ixesha njengokubukela umabonwakude.” Waba yintoni umphumo? Wakwazi ukufunda ayigqibe imiqulu emibini yentyilalwazi yeBhayibhile i-Insight on the Scriptures!

Kusenokufuneka uqwalasele nomlinganiselo ongayenza lula ngayo indlela ophila ngayo. USolomon wathi: “Bumnandi ubuthongo bosebenzayo, nokuba incinane, nokuba ininzi into ayidlayo; ke intabalala yesityebi ayisivumeli ukuba silale buthongo.” (INtshumayeli 5:12) Ngaba ixesha namandla akho angakumbi uwanikele ekunyamekeleni izinto eziphathekayo ezingeyomfuneko? Ngokwenene, okukhona sisiba nezinto ezingakumbi, kokukhona zisiba ninzi ngakumbi izinto ekufuneka sizinyamekele, sizilondoloze, sizilungise, yaye sizikhusele. Ngaba unokungenelwa ngokuzikhulula kwizinto ezithile?

Ukuba nocwangciso olusebenzisekayo yenye indlela yokulisebenzisa ngokunengenelo ixesha lakho. Kucwangciso olunjalo kufanele kuqukwe imfuneko kabani yokuphumla okanye yokuzihlaziya. Kodwa izilangazelelo zokomoya zifanele zibekwe kwindawo yokuqala. Kufanele kubekelwe ecaleni ixesha lokuya rhoqo kuzo zonke iintlanganiso zebandla. Kwakhona usenokucwangcisa kusengaphambili iintsuku okanye iingokuhlwa onokuzibekela ecaleni ukwenzela umsebenzi wokushumayela. Ngokucwangcisa ngenyameko, unokukwazi nokuba nenxaxheba eyongezelelekileyo enkonzweni, mhlawumbi ngokukhonza njengovulindlela ongumncedani ngamaxesha athile. Noko ke, qiniseka ukubekela ecaleni ixesha lofundisiso lobuqu nelesifundo sentsapho, kuquka elokulungiselela ngenyameko iintlanganiso. Ngokuba ngolungiseleleyo, akuyi kungenelwa ngakumbi nje kuphela kwiintlanganiso kodwa uya kuba kwimeko entle ‘yokulola eluthandweni nasemisebenzini emihle’ ngamagqabaza akho.—Hebhere 10:24.

Ukufumana ixesha lokufundisisa kusenokufuna ukuzincama okuthile. Ngokomzekelo, iintsapho zaseBheteli ehlabathini jikelele zivuka kwangethuba ntsasa nganye ukuze zibe nengxubusho yetekisi yosuku. Ngaba kunokwenzeka ngawe ukuba uthenge ixesha elincinane ntsasa nganye ukwenzela isifundo sobuqu? Umdumisi wathi: “Ndakuphangela ukusa, ndazibika, ndalindela emazwini akho.” (INdumiso 119:147) Kambe ke, ukuvuka kwangethuba kuya kufuna ukumisela iyure efanelekileyo yokuya emandlalweni ukuze ube nokuqalisa usuku olulandelayo unamandla yaye uphumle ngokwaneleyo.

Iingenelo Zokuxakeka Enkonzweni KaYehova

Ukuba ‘nokuninzi kokukwenza emsebenzi weNkosi’ kufuna ukucwangcisa, ukuziqeqesha nokuzincama. Umphumo uya kuba kukunandipha iingenelo ezininzi. Ngoko hlala uxakekile, kungekhona kwimisebenzi efileyo okanye elilize engeyongenelo nezisa intlungu, kodwa uxakeke enkonzweni kaYehova. Kuba ubonakalisa ukholo lwakho ngemisebenzi enjalo, ufumana inkoliseko kaThixo, yaye, ekugqibeleni, umvuzo wobomi obungunaphakade!

[Umfanekiso okwiphepha 28]

Ukwenza ucwangciso olusebenzisekayo kuyamnceda umKristu alisebenzise ngobulumko ngakumbi ixesha lakhe