Umoya KaYehova Uyabakhokela Abantu Bakhe

“UMoya wakho olungileyo makandikhaphele ezweni elisithabazi.”—INDUMISO 143:10.

1, 2. Yintoni esenokubenza badimazeke abakhonzi bakaYehova abanyanisekileyo?

‘NDIZIVA ndidandatheke kakhulu! Ndinokuyifumana phi intuthuzelo? Ngaba uThixo undilahlile?’ Ngaba ukhe uvakalelwe ngaloo ndlela? Ukuba kunjalo, akuwedwa. Nangona abakhonzi bakaYehova abanyanisekileyo bephila kwiparadisi echumileyo yokomoya, maxa wambi bajamelana neengxaki, izilingo, nezihendo ezidimazayo njengabo bonke abanye abantu.—1 Korinte 10:13.

² Mhlawumbi ujamelene nesilingo esithile esingapheliyo okanye enye into ebangela uxinezeleko olukhulu. Usenokuba ubuhlungu kukufelwa ngothandekayo yaye usenokuziva ulilolo ngokwenene. Okanye intliziyo yakho isenokuba ikhathazwa kukugula komhlobo osenyongweni. Iimeko ezilolo hlobo zisenokukuphanga uvuyo noxolo yaye zisenokulusongela ukholo lwakho. Yintoni ofanele uyenze?

Cela UThixo Akunike Umoya Wakhe

3. Ukuba kukho into ekuphanga iimpawu ezinjengoxolo novuyo, yintoni ekuya kuba bubulumko ukuyenza?

³ Ukuba kukho into ekuphanga uxolo, uvuyo, okanye olunye uphawu lobuthixo, kuya kuba bubulumko ukuthandazela umoya oyingcwele, okanye amandla asebenzayo kaThixo. Ngoba? Ngenxa yokuba umoya kaYehova uvelisa iziqhamo ezihle ezimncedayo umKristu ajamelane neengxaki, izilingo nezihendo. Emva kokulumkisa ‘ngemisebenzi yenyama,’ umpostile uPawulos wabhala oku: “Ke sona esoMoya isiqhamo luthando, uxolo, ukuzeka kade umsindo, ububele, ukulunga, intembeko, ubulali, ukuzeyisa; akukho mthetho uchasene nezinto ezinjalo.”—Galati 5:19-23.

4. Xa ujamelene nesilingo okanye isihendo, kutheni kusenokuba kokufanelekileyo ukungqala kwimithandazo yakho?

⁴ Ngenxa yohlobo lwesilingo ojamelene naso, usenokuqonda ukuba usengozini yokuphulukana nobulali bakho. Ngoko ngqala ngokuthi uthandazele ukuba uYehova uThixo akuphe isiqhamo somoya esibubulali. Ukuba ujamelene nesihendo esithile, ufuna ngokukhethekileyo isiqhamo sokuzeyisa. Kambe ke, kuya kuba kokufanelekileyo nokuthandazela uncedo lukaThixo ekuxhathiseni eso sihendo, ekuhlangulweni kuSathana nokucela ubulumko obufunekayo ekunyamezeleni isilingo.—Mateyu 6:13; Yakobi 1:5, 6.

5. Ukuba iimeko zidimaza ngohlobo lokuba ungasazi esona siqhamo somoya ofanele usithandazele, yintoni enokwenziwa?

⁵ Noko ke, maxa wambi iimeko zisenokuba zezidimaza okanye ezidida ngohlobo lokuba ungasazi esona siqhamo somoya usifunayo. Eneneni, uvuyo, uxolo, ubulali nazo zonke ezinye iimpawu zobuthixo zisenokuba sengozini yokuphela. Yintoni ke omele uyenze? Kutheni ungaceli uThixo akunike umoya oyingcwele uze ukubangele ukuba uvelise iziqhamo ezifunekayo? Iziqhamo eziyimfuneko zisenokuba luthando okanye uvuyo okanye uxolo okanye intlanganisela yeziqhamo zomoya. Kwakhona thandazela ukuba uThixo akuncede uthobele ulwalathiso lomoya wakhe, kuba uwusebenzisela ukukhokela abantu bakhe.

UYehova Ukulungele Ukunceda

6. UYesu wayigxininisa njani kubalandeli bakhe imfuneko yokuthandaza bangayeki?

⁶ Xa abafundi bakaYesu Kristu bafuna ulwalathiso ngendlela yokuthandaza, ngokuyinxenye wababongoza ukuba bathandazele umoya kaThixo. Okokuqala uYesu wasebenzisa umzekeliso ngenjongo yokubashukumisela ekubeni bazingise ekuthandazeni. Wathi: “Nguwuphi na kuni ongathi, enomhlobo, aze aye kuye phakathi kobusuku, athi kuye, Sihlobo, ndiboleke izonka zibe zithathu; kuba ke umhlobo wam uphambukele kum eseluhambeni, ndaye ndingenanto ke ndingayibeka phambi kwakhe; aze asuke lowo ungaphakathi aphendule athi, Musa ukundaphula; seluvaliwe ucango, nabantwana bam basesililini nam; andinako ukuvuka ndikunike? Ndithi kuni, Nokuba akayi kuvuka amnike, ngakuba engumhlobo wakhe, noko ngenxa yozingiso lwakhe olungenantloni wovuka, amnike inani alisweleyo.”—Luka 11:5-8.

7. Uyintoni umongo wamazwi kaYesu akuLuka 11:11-13, yaye asinika siphi isiqinisekiso ngokuphathelele uThixo nomoya wakhe?

⁷ UYehova ukulungele ukunceda nawuphi na kubakhonzi bakhe abathembekileyo nabazahluleleyo, yaye uyaziphulaphula izicelo zabo. Kodwa ukuba umntu onjalo ‘uyaqhubeka ecela,’ njengoko uYesu wabongozayo, oku kubonisa umnqweno osuk’ entliziyweni kwanokholo. (Luka 11:9, 10, NW) UKristu wongezelela ngelithi: “Nguwuphi na ke uyise kuni oya kuthi, unyana akucela isonka, amnike ilitye; athi akucela intlanzi, amnike inyoka endaweni yentlanzi? Athi, ukuba uthe wacela iqanda, amnike unomadudwane? Ukuba ke ngoko nina, ningendawo nje, niyakwazi ukubapha abantwana benu izipho ezilungileyo, wobeka phi na ke yena uYihlo wasemazulwini, ukugqithisela ukubapha uMoya oyiNgcwele abo bamcelayo?” (Luka 11:11-13) Ukuba umzali wasemhlabeni, nangona enotyekelo lobungendawo ngenxa yesono asizuz’ ilifa, umnika izinto ezilungileyo umntwana wakhe, ngokuqinisekileyo uBawo wethu wasezulwini uya kuqhubeka emnika umoya wakhe oyingcwele nabani na kubakhonzi bakhe abanyanisekileyo owucela ngokuthobekileyo.

8. INdumiso 143:10 isebenza njani kuDavide, kuYesu nakubakhonzi bakaThixo banamhlanje?

⁸ Ukuze singenelwe kumoya kaThixo, simele sikulungele ukuthobela ukhokelo lwawo njengoko uDavide wayenjalo. Wathandaza wathi: “Ndifundise ukwenza ikholo lakho, ngokuba unguThixo wam. UMoya wakho olungileyo makandikhaphele ezweni elisithabazi.” (INdumiso 143:10) UDavide, owayezingelwa ngukumkani wakwaSirayeli uSawule, wafuna umoya kaThixo umkhokele ukuze aqiniseke ukuba ikhondo lakhe lalithe tye. Ekuhambeni kwexesha uAbhiyatare weza nengubo yombingeleli eyi-efodi eyayisetyenziselwa ukuqinisekisa ukuthanda kukaThixo. Njengommeli kaThixo ongumbingeleli, uAbhiyatare wamyalela uDavide indlela amakahambe ngayo ukuze akholise uYehova. (1 Samuweli 22:17–23:12; 30:6-8) NjengoDavide, uYesu wayekhokelwa ngumoya kaYehova, yaye kube njalo nangeqela labalandeli bakaKristu abathanjisiweyo. Ngowe-1918-19, babesenziwa amakheswa libutho labantu, yaye iintshaba zabo zonqulo zazicinga ukuba zazinokubatshabalalisa. Abathanjiswa bathandazela indlela yokuphuma kwimeko yabo yokungasebenzi, yaye ngowe-1919, uThixo wayiphendula imithandazo yabo, wabahlangula, waza wabavuselela kwinkonzo yakhe. (INdumiso 143:7-9) Ngokuqinisekileyo, umoya kaYehova ngoko wawubanceda yaye ubakhokela abantu bakhe, njengoko usenjenjalo unanamhlanje.

Indlela Onceda Ngayo Umoya

9. (a) Umoya oyingcwele usebenza njani ‘njengomncedi’? (b) Sazi njani ukuba umoya oyingcwele awungomntu? (Bona umbhalo osemazantsi.)

⁹ UYesu Kristu wawubiza umoya oyingcwele ngokuthi ‘ngumncedi.’ Ngokomzekelo, wabaxelela oku abalandeli bakhe: “Mna ndiya kucela kuBawo, aze aninike omnye uMthetheleli [“umncedi,” NW], ukuze ahlale nani ngonaphakade: uMoya wenyaniso, lowo lingenako ihlabathi ukumamkela, ngokuba lingamboni, lingamazi nokumazi. Nina ke niyamazi; ngokuba uhleli nani, kanjalo uya kuba kuni.” Phakathi kwezinye izinto, loo “mncedi” wayeya kuba ngumfundisi, kuba uKristu wathembisa oku: “Ke [“umncedi,” NW], uMoya oyiNgcwele, aya kumthuma uBawo egameni lam, yena uya kunifundisa zonke izinto, anikhumbuze zonke izinto endizithethe kuni.” Kwakhona umoya uya kungqina ngoKristu, yaye wabaqinisekisa ngelithi abafundi bakhe: “Kunilungele ukuba ndimke; kuba, ndingemkanga, [“umncedi,” NW] akayi kuza kuni; ke, ndithe ndemka, ndiya kumthumela kuni.”—Yohane 14:16, 17, 26; 15:26; 16:7.a

10. Umoya oyingcwele ungqineke ungumncedi ngaziphi iindlela?

¹⁰ Esezulwini, uYesu wathulula phezu kwabalandeli bakhe ngomhla wePentekoste yowama-33 C.E. umoya oyingcwele awayethembise ngawo. (IZenzo 1:4, 5; 2:1-11) Njengomncedi, umoya wabenza bakuqonda ngakumbi ukuthanda kukaThixo nenjongo yakhe waza wabakhanyisela nangeLizwi lakhe lesiprofeto. (1 Korinte 2:10-16; Kolose 1:9, 10; Hebhere 9:8-10) Kwakhona loo mncedi wabomeleza abafundi bakaYesu ekunikeleni ubungqina kuwo wonke umhlaba. (Luka 24:49; IZenzo 1:8; Efese 3:5, 6) Namhlanje, umoya oyingcwele unako ukumnceda umKristu ozahluleleyo ukuba akhule elwazini ukuba uyawasebenzisa amalungiselelo okomoya enziwa nguThixo ‘ngomkhonzi othembekileyo noqondayo.’ (Mateyu 24:45-47) Umoya kaThixo unokunceda ngokunikela inkalipho namandla afunekayo ekunikeleni ubungqina njengomnye wabakhonzi bakaYehova. (Mateyu 10:19, 20; IZenzo 4:29-31) Phofu ke, umoya oyingcwele ukwabanceda abantu bakaThixo nangezinye iindlela.

“Ngezincwino Ezingathethekiyo”

11. Yintoni umKristu afanele ayenze, ukuba isilingo sibonakala simongamela?

¹¹ Ukuba umKristu ujamelene nesilingo esibonakala simongamela, yintoni afanele ayenze? Kaloku, makathandazele umoya oyingcwele, uze ke wona wenze umsebenzi wawo! UPawulos wathi: “Ngokukwanjalo ke noMoya uncedisana nokuswela kwethu amandla; kuba esingakuthandazelayo ngokoko simelwe kukuthandaza ngako, asikwazi; uthi ke uMoya ngokwakhe asithethelele ngezincwino ezingathethekiyo. Ke oziphengululayo iintliziyo uyakwazi into okuyiyo ukunyameka koMoya; ngokuba ubathethelela abangcwele ngokukaThixo.”—Roma 8:26, 27.

12, 13. (a) AmaRoma 8:26, 27 asebenza njani kwimithandazo eyenziwe ngokukodwa kwiimeko ezilingayo? (b) Benza ntoni uPawulos namaqabane akhe xa babexineke ngokuncamisileyo kwisithili saseAsiya?

¹² Abo bangcwele abathethelelwa ngumoya kaThixo ngabalandeli bakaYesu abathanjisiweyo, abanethemba lasezulwini. Kodwa enoba unobizo lwasezulwini okanye ithemba lasemhlabeni, njengomKristu unokulufumana uncedo lomoya oyingcwele kaThixo. Maxa wambi uYehova uwuphendula ngqo umthandazo ongqalileyo. Noko ke, maxa wambi usenokuxinezeleka kangangokuba ungakwazi ukuvakalisa iimvakalelo zakho uze kuphela nje ube nokumkhunga uYehova ngezincwino ezingathethekiyo. Enyanisweni, usenokungayazi eyona nto ikulungeleyo uze mhlawumbi ude ucele into ephosakeleyo ngaphandle kokuba uthandazela umoya oyingcwele. UThixo uyazi ukuba ufuna ukuthanda kwakhe kwenziwe, yaye uyakwazi oko ukufuna ngokwenene. Ngaphezu koko, ngomoya wakhe oyingcwele, wabangela ukuba imithandazo emininzi ibhalwe eLizwini lakhe, yaye inokuthanani neemeko ezilingayo. (2 Timoti 3:16, 17; 2 Petros 1:21) Ngenxa yoko, uYehova unokugqala iingcamango ezithile ezivakaliswe kuloo mithandazo njengamazwi nawe obuya kuthanda ukuwavakalisa njengomnye wabakhonzi bakhe, yaye unokukuphendulela wona.

¹³ UPawulos namaqabane akhe basenokuba babengayazi eyona nto mabayithandazele xa babejamelene nembandezelo kwisithili saseAsiya. Ekubeni ‘babexineke ngokuncamisileyo, ngaphezu kwamandla abo, bavakalelwa kukuba babeza kubuncama ubomi babo.’ Kodwa bacela abanye ukuba babakhungele yaye bakholosa ngoThixo, onokuvusa abafileyo, yaye wabahlangula. (2 Korinte 1:8-11) Hayi indlela ethuthuzela ngayo into yokuba uYehova uThixo eyiva yaye eyiphendula imithandazo yabakhonzi bakhe abathembekileyo!

14. Yiyiphi imiphumo emihle esenokubakho ukuba uYehova unokusivumela isilingo siqhubeke ithuba elithile?

¹⁴ Ngokufuthi abantu bakaThixo njengentlangano bajamelana nezilingo. Njengoko kuphawuliwe ngaphambilana, batshutshiswa ebudeni beMfazwe Yehlabathi I. Nangona ngoko babengekakuqondi ngokucacileyo ukuma kwabo ibe ke ngoko bengayazi ngokuqinisekileyo eyona nto bamele bayithandazele, iLizwi likaYehova lalinemithandazo ebuprofeti awathi wabaphendulela yona. (INdumiso 69, 102, 126; Isaya, isahluko 12) Kodwa kuthekani ukuba uYehova uyasivumela isilingo siqhubeke ithuba elithile? Oku kunokuphumela ekunikelweni kobungqina, kusenokukhokelela abanye ekubeni bamkele inyaniso, yaye kuvulela amaKristu ithuba lokubonisa uthando lobuzalwana ngokuthandazela okanye ngokunceda abo bakholwa kunye nawo ababandezelekayo. (Yohane 13:34, 35; 2 Korinte 1:11) Khumbula ukuba uYehova ubakhokela abantu bakhe ngomoya wakhe oyingcwele, ubenzela okona kubalungeleyo, yaye usoloko elungelelanisa imicimbi ngendlela eya kuzukisa ize ingcwalise igama lakhe elingcwele.—Eksodus 9:16; Mateyu 6:9.

Ungaze Uwenze Buhlungu Umoya

15. AmaKristu anokukholosa ngomoya kaYehova ukuba uwenzele ntoni?

¹⁵ Ngoko ke, ukuba ungumkhonzi kaYehova, ngomthandazo cela umoya oyingcwele ebudeni bezilingo nangamanye amaxesha. Ngoko qinisekisa ukuba uyaluthobela ulwalathiso lwawo, kuba uPawulos wabhala: “Musani ukumenza buhlungu uMoya oyiNgcwele kaThixo, enathi kuye natywinwa, naqiniselelwa imini yentlawulelo.” (Efese 4:30) Umoya kaThixo wawulitywina kwaye uselilo, okanye “isiqinisekiso sezinto ezizayo,” kumaKristu athanjisiweyo athembekileyo—oko kukuthi, ubomi bokungafi ezulwini. (2 Korinte 1:22, TE; Roma 8:15; 1 Korinte 15:50-57; ISityhilelo 2:10) AmaKristu athanjisiweyo kunye nabo banethemba lasemhlabeni banokukholosa ngomoya kaYehova ukuba ubenzele okukhulu. Unokubalathisela kwihambo ethembekileyo yobomi uze ubancede baphephe imisebenzi yesono ekhokelela ekubeni uThixo angakholiswa ngabo, baphulukane nomoya wakhe oyingcwele, baze bangabufumani nobomi obungunaphakade.—Galati 5:19-21.

16, 17. UmKristu unokuwenza buhlungu njani umoya?

¹⁶ UmKristu unokuwenza buhlungu njani umoya, enoba oko ukwenza esazi okanye engazi? Kaloku, uYehova usebenzisa umoya wakhe ukukhulisa umanyano nokumisela amadoda anokuthenjwa ebandleni. Ngoko ke, ukuba ilungu lebandla linesikrokro ngabadala abamiselweyo, lihamba libadla izithende, njalo njalo, liya kuba alilandeli ukhokelo lomoya kaThixo olusa eluxolweni naselumanyanweni. Ngamany’ amazwi, liya kuba liwenza buhlungu umoya.—1 Korinte 1:10; 3:1-4, 16, 17; 1 Tesalonika 5:12, 13; Yuda 16.

¹⁷ Ekubhaleleni kwakhe amaKristu ase-Efese, uPawulos wawalumkisa ngotyekelo lokuxoka, ukufukama ingqumbo, ubusela, iintetho ezingatshongo khona, inkanuko yohenyuzo, ihambo elihlazo neziqhulo zokungcola. Ukuba umKristu uyazivumela akhukhuliswe zizinto ezinjalo, uya kuba wenza okuchasene nesiluleko seBhayibhile esiphefumlelwe ngomoya. (Efese 4:17-29; 5:1-5) Ewe, ngomkhamo othile ebeya kuba uwenza buhlungu umoya kaThixo.

18. Yintoni enokwenzeka kuye nawuphi na umKristu oqalisa ukusityeshela isiluleko seLizwi likaThixo eliphefumlelwe ngomoya?

¹⁸ Eneneni, nawuphi na umKristu oqalisa ukusityeshela isiluleko seLizwi likaYehova eliphefumlelwe ngomoya usenokuqalisa ukuvelisa isimo sengqondo okanye utyekelo oluya kuphumela ekubeni one ngabom aze aphulukane nenkoliseko kaThixo. Nangona esenokuba akasiqheliseli isono okwalo mzuzu, usenokuba ufunzele koko. Loo mKristu ohamba ngokuchasene nokhokelo lomoya uya kuba uwenza buhlungu. Ngaloo ndlela uya kuba umelene kwaye emenza buhlungu uYehova, onguMthombo womoya oyingcwele. Akanakuze umntu omthandayo uThixo afune ukwenza oko!

Hlala Uthandazela Umoya Oyingcwele

19. Kutheni umoya kaYehova ufuneka ngokukhethekileyo kubantu bakhe namhlanje?

¹⁹ Ukuba ungumkhonzi kaYehova, qhubeka uthandazela umoya wakhe oyingcwele. AmaKristu alufuna ngokukhethekileyo uncedo lomoya kaThixo kule “mihla yokugqibela,” enamaxesha anomngcipheko. (2 Timoti 3:1-5) UMtyholi needemon zakhe, abakhutshiweyo ezulwini yaye ngoku abakummandla wasemhlabeni, bayiphethel’ imbengwane intlangano kaYehova. Ngenxa yoko, ngoku kunanini na ngaphambili, abantu bakaThixo bafuna umoya wakhe oyingcwele ukuba ubakhokele, okanye ubalathise, uze ubomelezele ukunyamezela iingcinezelo nentshutshiso.—ISityhilelo 12:7-12.

20, 21. Kutheni sifanele silandele ulwalathiso lweLizwi, lomoya nolwentlangano kaYehova?

²⁰ Ngalo lonke ixesha bonisa uxabiso ngoncedo uYehova uThixo alunikelayo ngomoya wakhe oyingcwele. Landela ulwalathiso lweLizwi lakhe eliphefumlelwe ngomoya, iBhayibhile. Sebenzisana ngokupheleleyo nentlangano kaThixo yasemhlabeni eyalathiswa ngomoya. Ungaze uzivumele ukuba uphambukele kwikhondo elingelolaZibhalo eliya kubangela ukuba uwenze buhlungu umoya oyingcwele, kuba oku ekugqibeleni kusenokukhokelela ekubeni uphulukane nawo kuze oko kuphumele kwintlekele yokomoya.—INdumiso 51:11.

²¹ Ukukhokelwa ngumoya kaYehova kuphela kwendlela emkholisayo neyokuphila ubomi obuseluxolweni nobuyolisayo. Kwakhona, khumbula ukuba uYesu wawubiza umoya oyingcwele ngokuthi ‘ngumncedi,’ okanye “umthuthuzeli.” (Yohane 14:16, umbhalo osemazantsi kwiNW) Ngawo, uThixo uthuthuzela amaKristu aze awomeleze ukuze ajamelane nezilingo. (2 Korinte 1:3, 4) Umoya unika abantu bakaYehova amandla okushumayela iindaba ezilungileyo uze ubancede bakhumbule iingongoma zeZibhalo ezifunekayo ukuze banikele ubungqina obuhle. (Luka 12:11, 12; Yohane 14:25, 26; IZenzo 1:4-8; 5:32) Ngomthandazo nangolwalathiso lomoya, amaKristu anokufumana ubulumko basezulwini obuwenza akwazi ukuhlangabezana nezilingo ezivavanya ukholo lwawo. Ngoko ke, kuzo zonke iimeko zobomi ahlala ethandazela umoya oyingcwele kaThixo. Ngenxa yoko, umoya kaYehova uyabakhokela abantu bakhe.

[Umbhalo osemazantsi]

Zithini Iimpendulo Zakho?

◻ Kutheni sifanele sithandazele umoya oyingcwele kaYehova?

◻ Umoya oyingcwele ungumncedi njani?

◻ Kuthetha ukuthini ukuwenza buhlungu umoya, yaye singakuphepha njani ukwenjenjalo?

◻ Kutheni sifanele sihlale siwuthandazela umoya oyingcwele yaye silandela ukhokelo lwawo?

[Umfanekiso okwiphepha 15]

Njengoko ubawo onothando emnika izinto ezilungileyo unyana wakhe, ngoko uYehova ubanika umoya oyingcwele abakhonzi bakhe abawuthandazelayo

[Umfanekiso okwiphepha 17]

Ngaba uyayazi indlela umoya kaThixo owathethelela ngayo amaKristu xa ethandaza?