Badala—Balulekeni Abanye Ninomoya Wobulali

INTLIZIYO yomKristu wokwenyaniso inokufaniswa nesitiya sokomoya esivelisa iziqhamo ezihle. Uthando, uvuyo, uxolo, ukuzeka kade umsindo, ububele, ukulunga, intembeko, ubulali, nokuzeyisa ngokuzenzekelayo ziya kumila zize zichume apho. Kakade zimele zenze njalo. Ngapha koko, ezi ziziqhamo zomoya oyingcwele uYehova uThixo awunika abakhonzi bakhe abazahluleleyo. (Galati 5:22, 23) Sekunjalo, wonke umKristu onqwenela ukulondoloza isitiya sentliziyo yakhe siyindawo ekholekileyo kuYise wasezulwini ufanele aqhubeke esilwa ngamandla nxamnye nokhula lwesono esizuzw’ ilifa.—Roma 5:5, 12.

Ngamathub’ athile, kusenokuqalisa ukukhula nto ithile enganqwenelekiyo entliziyweni engafezekanga yomntu ohlonel’ uThixo. Kusenokwenzeka ukuba ubenengxelo entle gqitha ngokomoya. Kodwa masithi ngoku kuphakama ingxaki ethile, mhlawumbi ebangelwe lunxulumano olubi okanye sisigqibo esingesosabulumko. Abadala bebandla banokumnceda njani loo mntu ngokomoya?

Isiluleko Sabapostile

Xa benceda umKristu owonileyo, abadala bafanele balandele isiluleko sompostile uPawulos esithi: “Bazalwana, ukuba umntu [indoda, NW] uthe waqutyulwa nokuqutyulwa sisiphoso esithile, nina bangaboMoya, mlulekeni onjalo ninomoya wobulali, uzilumkela ukuba ungahendwa nawe.” (Galati 6:1) Xa ikholwa esikhonza kunye nalo ‘liqutyulwe nokuqutyulwa sisiphoso esithile,’ abadala banembopheleleko yokunikela uncedo ngokukhawuleza kangangoko kunokwenzeka.

UPawulos ubhekisela ‘endodeni’ njengethabatha inyathelo eliphosakeleyo. Noko ke, igama lesiGrike (anʹthro·pos) elisetyenziswe apha linokusebenza enoba kusendodeni okanye emfazini. Yaye kuthetha ukuthini ‘ukululeka’ umntu? Eli binzana lesiGrike (ka·tar·tiʹzo) lithetha “ukubuyisela kulungelelwano olufanelekileyo.” Eli gama likwasetyenziswa xa kuthethwa ngokulungisa iminatha. (Mateyu 4:21) Likwasetyenziswa naxa kumiliselwa ilungu lomntu elaphukileyo. Ugqirha ukwenza ngenyameko oku ephepha ukubangela intlungu engeyomfuneko kumntu amnyangayo. Ngokufanayo, ukunceda umzalwana okanye udade ukuba abuyele kulungelelwano olufanelekileyo lokomoya kufuna inyameko, ubuchule, novelwano.

Abadala bangqinela ukholo lwabo ngokubonisa umoya wobulali xa bezama ukululeka umntu. Ngokuqinisekileyo, uYesu onomoya wobulali ubeya kuyisingatha imicimbi enjalo ngobulali. (Mateyu 11:29) Abadala bafanele babonise olu phawu kumkhonzi kaYehova othabathe inyathelo eliphosakeleyo kuba nabo abakhululekanga ukuba bangangaqutyulwa sisono, ngokuchaseneyo notyekelo lwentliziyo yabo. Oku kunokwenzeka kwixesha elizayo ukuba akusele kwenzekile kakade kwixesha elidluleyo.

La madoda afanelekayo ngokomoya afanele ngothando ‘athwalisane ubunzima’ nabo banqula kunye nabo. Eneneni, kusentliziyweni yabadala ukunceda umzalwana okanye udade ukuba alwe nxamnye noSathana, nezilingo, nobuthathaka benyama, kunye neentlaselo zesono. Ngokuqinisekileyo le yenye indlela abaveleli abangamaKristu ‘abanokuwuzalisa ngayo umthetho kaKristu.’—Galati 6:2.

Amadoda aneemfaneleko zokwenene zokomoya athobekile, eqonda ukuba ‘ukuba umntu uba uyinto, engento, uyazikhohlisa.’ (Galati 6:3) Ingakhathaliseki indlela abadala abazama nzima ngayo ukwenza oko kulungileyo nokuluncedo, basaya kuwa nganeno koko kwenziwa nguNyana kaThixo ofezekileyo nonovelwano olunothando, uYesu Kristu. Kodwa oko akusosizathu sokuba bangenzi ngako konke okusemandleni abo.

Abadala bayazi ukuba bekuya kuba kokuphosakeleyo ukugxeka lowo bakholwa kunye naye ngendlela ebonisa ikratshi okanye bazenze ongcwele ngcwele! Ngokuqinisekileyo uYesu ubengenakukwenza oko. Kaloku, wancamela ubomi bakhe kungekuphela nje abahlobo bakhe kodwa kwaneentshaba zakhe! Abadala bazabalazela ukubonisa uthando olufanayo xa bezama ukunceda abazalwana okanye oodade ukuba baphume engxakini baze babasondeze kuYise wabo wasezulwini nakwimilinganiselo yakhe yobulungisa. Ngawaphi amanyathelo athile aya kunceda abadala ukululeka abo bakhonza kunye nabo?

Amanyathelo Athile Aluncedo

Kholosani ngoYehova ninesimo somthandazo ngoxa nithetha yaye nisenza ngendlela ebonisa umoya wobulali. UYesu wayenomoya wobulali, wayethandaza ngokunzulu efuna ukhokelo kuYise wasezulwini, yaye ngamaxesha onke wayesenza izinto ezikholekileyo Kuye. (Mateyu 21:5; Yohane 8:29) Abadala bafanele benze okufanayo xa bezama ukululeka umntu othabathe inyathelo eliphosakeleyo. Njengomalusi onobulali ongaphantsi, umdala uya kuba ngokhuthazayo nowakhayo entethweni yakhe, angabi ngogrogrisayo. Ebudeni bengxubusho, uya kuzama ukwenza umoya oya kubangela umKristu ofuna uncedo azive ekhululeke kangangoko kunokwenzeka ekuvakaliseni iingcinga zakhe. Ukuze enjenjalo, umthandazo wokuvula osuk’ entliziyweni uya kuba luncedo olukhulu. Lowo ufumana isiluleko esinikelwe ngobulali uya kukulungela ngakumbi ukusamkela ngokusuk’ entliziyweni ukuba uyazi ukuba, njengoYesu, umluleki ufuna ukwenza izinto ezikholekileyo kuThixo. Umthandazo wokuqukumbela usenokubethelela kumntu lowo imfuneko yokuba asebenzise isiluleko asinikwe ngendlela enjalo yothando nobulali.

Emva komthandazo, mncomeni ngokunyanisekileyo. Oku kusenokuquka iimpawu ezintle zomntu lowo, ezinjengobubele, ezinjengokuba ngulowo kusenokuthenjelwa ngaye okanye ngokuba ngokhutheleyo. Kusenokubhekiselwa kwingxelo yakhe yokuthembeka enkonzweni kaYehova, mhlawumbi ngaphezu kweminyaka emininzi. Ngale ndlela, sibonisa ukuba sinenkathalo yaye sinembono efana nekaKristu ngomntu lowo. UYesu wasiqalisa isigidimi sakhe esasisiya kwibandla laseTiyatira ngokuncoma, esithi: “Ndiyayazi imisebenzi yakho, nothando, nolungiselelo, nokholo, nomonde wakho, nokuba imisebenzi yakho yokugqibela imininzi kuneyokuqala.” (ISityhilelo 2:19) Loo mazwi awenza amalungu ebandla aqiniseka ukuba uYesu wayewazi umsebenzi omhle awayewenza. Nangona ibandla lalinempazamo zalo—ukuvumela impembelelo ‘kaIzebhele’—laliqhuba kakuhle gqitha kwezinye iinkalo, yaye uYesu wafuna abo bazalwana noodade bazi ukuba umsebenzi wabo wenzondelelo wawungajongwa njengongabalulekanga. (ISityhilelo 2:20) Ngendlela efanayo abadala bafanele bancome apho kufaneleke khona.

Musani ukwenza isiphoso sibonakale sinzulu ngaphezu kokuba iimeko zifuna oko. Abadala bafanele balondoloze umhlambi kaThixo baze bagcine intlangano yakhe icocekile. Kodwa amanyathelo athile aphosakeleyo ngokomoya afuna isilulelo esingqongqo anokusingathwa ngokuchotshelwa ngumdala omnye okanye ababini ngaphandle kwekomiti egwebayo. Kwiimeko ezininzi, inyathelo eliphosakeleyo elithatyathwe ngumKristu libangelwa bubuthathaka benyama kunokuba libangelwe bubungendawo bangabom. Abadala bafanele bawuphathe ngothantamiso umhlambi bekhumbula oku: “Kuba umgwebo awuyi kuba natarhu kulowo ungenzanga nceba; kananjalo inceba iyawuqhayisela umgwebo.” (Yakobi 2:13; IZenzo 20:28-30) Ngoko, kunokuyibaxa imicimbi, abadala bafanele baqhubane ngendlela enobulali namakholwa azohlwayayo akunye nabo, belinganisa uThixo wethu onemfesane nenceba, uYehova.—Efese 4:32.

Bonakalisani ukuziqonda izibakala ezisenokuba zikhokelele ekwenzeni isiphoso. Abadala bafanele baphulaphule ngenyameko ngoxa ikholwa elikhonza kunye nabo lizityand’ igila kubo. Ekubeni ‘uThixo engayideli intliziyo eyaphukileyo netyumkileyo,’ nabo kufanele babe njalo. (INdumiso 51:17) Mhlawumbi unobangela wengxaki ube kukusilela kweqabane lomtshato ukubonisa inkxaso engokwemvakalelo. Udandatheko olunzulu olungokwasengqondweni noluqhubeke ixesha elide lusenokuba lutshabalalise inxalenye yamandla aqhelekileyo angokweemvakalelo omntu lowo okanye luye lwabangela ubunzima obukhulu ekwenzeni izigqibo zobulumko. Abadala abanothando baya kuziqwalasela izibakala ezinjalo, kuba nangona uPawulos wayalela abazalwana bakhe ukuba ‘baluleke abanxaxhayo’ wakwabakhuthaza ngale ndlela: “Bakhuzeni abamxhelo mncinane; basekeleni abathambileyo; yibani nokuzeka kade umsindo kubantu bonke.” (1 Tesalonika 5:14) Ngoxa abadala bengafanele kuyenza buthathaka imilinganiselo kaThixo yobulungisa, bafanele bazinikele ingqalelo izibakala ezibangela ukuba kubekho isingxengxezo, kanye njengokuba uThixo esenza.—INdumiso 103:10-14; 130:3.

Kuphepheni ukukujongela phantsi ukuzixabisa komKristu okhonza kunye nani. Asifuni nanini na ukuhlutha isidima somzalwana okanye udade okanye simenze avakalelwe engaxabisekanga. Kunoko, ukumqinisekisa umntu lowo ukuba sinentembelo kwiimpawu zakhe zobuKristu nasekumthandeni kwakhe uThixo kuya kumkhuthaza ukuba ayilungise impazamo. Mhlawumbi, abaseKorinte babekhuthazelwa ukuba babe nesisa xa uPawulos wabaxelela ukuba wayeqhayise kwabanye ‘ngokuthumekelela’ “nokuzondelela” kwabo kule nkalo.—2 Korinte 9:1-3.

Bonisani ukuba ingxaki inokoyiswa ngokukholosa ngoYehova. Ewe, zamani ngokunyanisekileyo ukunceda umntu lowo abone ukuba ukukholosa ngoThixo nokusebenzisa isiluleko seLizwi Lakhe kuya kunceda ekulungisweni okufunekayo kwemeko. Ukuze oku kwenzeke, oko sikuthethayo kumele kusekelwe eZibhalweni nakwiimpapasho ezisekelwe eBhayibhileni. Usukelo lwethu luntlu-mbini: (1) ukunceda lowo ofuna uncedo ukuba abone aze aqonde imbono kaYehova (2) ukubonisa umntu lowo indlela ngokuyinxenye aye akakukhathalela okanye wasilela ngayo ukulandela le migaqo yobuthixo.

Sebenzisani isiluleko seZibhalo kunye nemibuzo ebonakalisa ububele enxulumene nombandela lowo. Oku kusenokuba kokuphumelela gqitha ekufikeleleni intliziyo. Ngomprofeti wakhe uMalaki, uYehova wasebenzisa umbuzo ukwenza abantu Bakhe baqonde indlela ababephambuke ngayo. Wabuza esithi: “Umntu angamqhatha na uThixo?” wongezelela esithi: “Kodwa niyandiqhatha.” (Malaki 3:8, NW) Ukusilela kwamaSirayeli ukunikela ngesishumi sesivuno sabo njengokuba kwakufunwa nguMthetho kaMoses kwakufana nokumqhatha uYehova. Ukuze alungise le meko, kwafuneka amaSirayeli afeze iimbopheleleko zawo ngonqulo olunyulu enokholo lokuba uThixo wayeya kuwasikelela ngokuyintabalala. Ngokusebenzisa imibuzo exhokonx’ iingcinga nebonisa uvelwano, kwakhona abadala banokubethelela ukuba ukwenza okulungileyo namhlanje kuquka ukukholosa ngoBawo wethu wasezulwini nokumthobela. (Malaki 3:10) Ukudlulisela loo ngcamango entliziyweni kuya kuba negalelo elikhulu ekuncedeni umzalwana wethu ukuba azenzele ‘imizila ethe tye iinyawo zakhe.’—Hebhere 12:13.

Bethelelani iingenelo ezifunyanwa ngokwamkela isiluleko. Ukululeka ngokuphumelelayo kuquka ukulumkisa ngemiphumo yokuqhubeka nekhondo eliphosakeleyo nokukhumbuza ngeengenelo ezizuzwa ngokulungisa iimeko. Emva kwesiluleko esinikelwe ngexesha elililo, uYesu waqinisekisa abo bebandla elingakhathaliyo ngokomoya laseLawodike ukuba ukuba babeguquka kwikhondo labo langaphambili baze babe ngabafundi abanenzondelelo, babeya kunandipha amalungelo abalaseleyo, aquka ithemba lokulawula kunye naye emazulwini.—ISityhilelo 3:14-21.

Yibani nomdla ekuboneni enoba isiluleko sinikelwa ingqalelo kusini na. Njengokuba ugqirha onenyameko ehlola ngokuphindaphindiweyo ukuze abone ukuba ithambo alimiliseleyo lisalungelelene kakuhle, ngokunjalo nabadala bafanele bazame ukufumanisa enoba isiluleko seZibhalo siyasetyenziswa. Basenokuzibuza oku: Ngaba kufuneka uncedo olungakumbi? Ngaba isiluleko sifanele siphindwe, mhlawumbi ngenye indlela? UYesu kwafuneka abaluleke ngokuphindaphindiweyo abafundi bakhe ngemfuneko yokuthobeka. Kangangexesha elide, ngomonde wazama ukulungisa indlela yabo yokucinga ngokusebenzisa isiluleko, imizekeliso, nokubafundisa ngezinto ababezibona. (Mateyu 20:20-28; Marko 9:33-37; Luka 22:24-27; Yohane 13:5-17) Ngokwentelekiso, abadala banokunceda ukuqinisekisa enoba umzalwana okanye udade ulungise ngokupheleleyo ngokulungiselela ukubuyela kuye ukuze babe neengxubusho ezingokweZibhalo eziyilelwe ukukhuthaza inkqubela yakhe ukuze afikelele kwimpilo epheleleyo ngokomoya.

Mncomeni ngako nakuphi na ukuphucula akwenzileyo. Ukuba ngokunyanisekileyo lowo uthabathe inyathelo eliphosakeleyo uzabalazela ukusebenzisa isiluleko seZibhalo, mncomeni ngokufudumeleyo. Oku kuya kusenza isiluleko esinikelweyo sibetheleleke ngakumbi yaye kusenokukhuthaza ukuphucula okongezelelekileyo. Kwincwadi yokuqala kaPawulos eya kwabaseKorinte, wanyanzeleka ukuba abanike isiluleko esiqatha kwimicimbi eyahlukahlukeneyo. Kungekudala emva kokuba uTito wazisa umpostile ngentsabelo entle gqitha kwincwadi yakhe, uPawulos wababhalela wabancoma. Wathi: “Ngoku ndiyavuya, ndingavuyeli kuba nenziwa buhlungu, ndivuyela ukuba nenziwa ngokwasinga enguqukweni; kuba nenziwa buhlungu ngokokukaThixo.”—2 Korinte 7:9.

Unobangela Wovuyo

Ewe, uPawulos wavuya akuva ukuba isiluleko sakhe sibancedile abaseKorinte. Ngokufanayo, abadala bale mihla baba novuyo olukhulu xa ikholwa elikhonza kunye nabo lishiya ikhondo eliphosakeleyo ngenxa yokusabela kakuhle kuncedo lwabo olunothando. Banokukuvuyela ngokwenene ukunceda umKristu ozohlwayayo ukuba ancothule ukhula oluhlabayo lwesono entliziyweni yakhe ukuze isiqhamo sikaThixo sibe nokumila size sichume ngobuninzi apho.

Ukuba abadala bayaphumelela ekulungiseni umntu othabathe inyathelo elithile eliphosakeleyo, loo mntu uya kube ubuyisiwe kwikhondo ebeliya kuba yintlekele ngokupheleleyo ngokomoya. (Thelekisa uYakobi 5:19, 20.) Ngoncedo olunjalo, lowo ufumene uncedo ufanele avakalise umbulelo kuYehova uThixo. Amazwi avakalisa uxabiso lokwenyaniso ngoncedo lothando, ngovelwano, nokuqonda kwabadala nawo aya kuba ngafanelekileyo. Yaye xa umntu sele echache ngokupheleleyo ngokomoya, bonke abo bebebandakanyekile banokuvuya kuba isiluleko siye sanikelwa ngomoya wobulali.