Ngaba Unokubonakalisa Umonde?

UYEHOVA wamxelela oku uAbram: “Hamba, umke ezweni lakowenu, . . . uye ezweni endokubonisa lona; ndikwenze uhlanga olukhulu, ndikusikelele, ndilikhulise igama lakho.” (Genesis 12:1, 2) UAbram ngoko wayeneminyaka engama-75 ubudala. Wathobela waza ngobulumko wabonakalisa umonde ngalo lonke ixesha lokudla kwakhe ubomi, elindela kuYehova.

Ekugqibeleni, uThixo wenza eli dinga ku-Abraham (Abram) onomonde: “Inene, ndiyakuthi, ndisikelela, ndikusikelele; ndithi, ndisandisa, ndikwandise.” Umpostile uPawulos wongezelela wathi: “Waza ngokunjalo, enokunyamezela [enomonde, NW], walifumanisa idinga.”—Hebhere 6:13-15.

Yintoni umonde? Izichazi-magama ziwuchaza njengobuchule “bokulindela okuthile ngokuzolileyo” okanye bokubonakalisa “unyamezelo xa ucatshukisiwe okanye uphantsi kobunzima.” Ngoko ukuba nomonde kwakho kubekwa eluvavanyweni xa kufuneka ulindele uthile okanye okuthile, okanye xa ucatshukiswa okanye uphantsi koxinezeleko. Kwiimeko ezinjalo umntu onomonde uhlala ezolile; ongenamonde uyangxama aze acaphuke ngokukhawuleza.

Ihlabathi Lethu Lanamhlanje Elingenamonde

Ngokukodwa kwimimandla emininzi yasezidolophini, kugxininiswa kungekhona kumonde kodwa kwisantya. Kwizigidi zabantu abaphila kwizixeko ezixinene ngabantu, suku ngalunye luqalisa xa intsimbi yewotshi ibavusa kusasa. Oko kuqalisa ugqatso olungalawulekiyo—ukuya endaweni ethile, ukuya kubona umntu othile, ukuphumeza okuthile. Ngaba kuyamangalisa ke ngoko ukuba abaninzi baxhalabe baze bangabi namonde?

Ngaba uyacaphuka xa ujamelana neentsilelo zabanye? “Andikuthandi ukungabanjwa kwexesha,” utsho uAlbert. Abaninzi baya kuvuma ukuba ukulinda othile ekudala elindiwe kubangela uxinezeleko, ingakumbi ukuba kukho ixesha elithile elimisiweyo. Ngokuphathelele iTshawe laseNewcastle, ilungu lezobupolitika laseBritani ngenkulungwane ye-18, kwathiwa: ‘Kusasa liphulukana nesiqingatha seyure, nto leyo elenza ukuba lingaze libambelele kucwangciso lwalo lwemini.’ Ukuba kwakunokufuneka uxhomekeke kumntu onjalo imihla ngemihla, ngaba wawunokuhlala unomonde?

Xa uqhuba inqwelo-mafutha, ngaba ucaphuka ngokukhawuleza, ungafuni ukulinda okanye ulingelwe ekubeni uqhube ngesantya esiphakame gqitha? Kwiimeko ezinjalo, ukuswela umonde ngokufuthi kuthetha intlekele. Ebudeni bowe-1989, kwindawo eyayisakuba yiNtshona Jamani, iingozi zoohola bendlela ezingaphezu kwama-400 000 zakhokelela ekwenzakaleni okanye ekufeni. Kwezi, enye kwezintathu yayinokuba ibangelwe kukuqhuba ngesantya esiphakame gqitha okanye ngokusondele gqitha kwisithuthi esingaphambili. Ngoko ke, ubuncinane ukusa kumlinganiselo othile, ukuswela umonde kwakungunobangela wokwenzakala okanye ukufa kwabantu abangaphezu kwe-137 000. Enjani yona ukuba mibi imiphumo ngenxa yokuswela umonde!

UAnn ukhalaza esithi: “Ndikufumanisa kunzima ukuhlala ndinomonde xa ubani ephazamisa ngamaxesha onke okanye eqhayisa ngokugqithiseleyo.” UKarl-Hermann uyavuma ukuba kulucelomngeni kuye ukubonakalisa umonde “kwabaselula abangenantlonelo ngabakhulileyo.”

Ezi kunye nezinye iimeko zinokukubangela ukuba uphelelwe ngumonde. Ngoko, unokuwuhlakulela njani umonde ongakumbi?

UYehova Unokukwenza Ube Nomonde Ngakumbi

Abantu abaninzi bacinga ukuba ukuba nomonde kuthetha ukuswela amandla okwenza izigqibo okanye ukuba buthathaka. Noko ke, kuYehova, oku kuluphawu olubonisa amandla. Yena ngokwakhe ‘usuka azeke kade umsindo [abe nomonde, NW] kuthi, angangi kungatshabalala nabani, unga bonke bangasinga enguqukweni.’ (2 Petros 3:9) Ngoko ke, ukuze uhlakulele unyamezelo olungakumbi, namathela kuYehova uze ukholose ngaye ngentliziyo yakho iphela. Ukomeleza ulwalamano lwakho noThixo kulinyathelo elinye nelilelona libalulekileyo ekwakheni ubuntu obunomonde.

Ukongezelela, kubalulekile ukwazi iinjongo zikaYehova ngomhlaba nangoluntu. UAbraham “wayewulindele umzi lo uneziseko [uBukumkani bukaThixo], ungcibi, umbangi wawo, inguThixo.” (Hebhere 11:10) Ngokufanayo, kuya kuba yingenelo ukuhlala unombono ocacileyo ngamadinga kaThixo uze waneliseke kukulindela kuYehova. Uya kwandula ke ukuqonda ukuba ukuba nomonde, kunokuba kube kubonisa ukuzilazila, enyanisweni kukhokelela abantu kunqulo lokwenyaniso. Ngoko ke, “ukuzeka kade umsindo [ukuba nomonde, NW] kweNkosi yethu kubaleleni ekuthini lusindiso.”—2 Petros 3:15.

Kuthekani ukuba iimeko zakho zobuqu zivavanya ukubonakalisa kwakho ukuba nomonde ukusa kumlinganiselo onganyamezelekiyo? Ngaba abangakholwayo bakutsalisa nzima ngendlela ecaphukisayo? Ngaba ukhe wanesigulo esibonakala sisesingapheliyo? Kwimeko enjalo, cinga ngoko umfundi uYakobi wakubhalayo. Emva kokubhekisela kwimizekelo engokubonakalisa umonde eyanikelwa ngabaprofeti, watyhila imfihlelo engokuhlala uzolile phantsi koxinezeleko olunzulu. UYakobi wathi: “Kukho mntu na phakathi kwenu uva ububi? Makathandaze.”—Yakobi 5:10, 13.

Ngokunyanisekileyo cela uThixo emthandazweni ukuba akongezelele umonde yaye akuncede ulawule umoya wakho phantsi kwezilingo. Guqukela kuYehova ngokuphindaphindiweyo, yaye uya kukunceda uziqonde iimeko okanye imikhwa yabanye enokuba lucelomngeni kubuntu bakho obuzolileyo. Ukuthandaza kwangaphambi kweemeko ezinokukulinga ngokwenene kunokukunceda ukuba uhlale uzolile.

Imbono Elungileyo Ngawe Nangabanye

Ukuze uhlale uzolile ngokwasengqondweni, umele ube nembono elungileyo ngesiqu sakho nangabanye. Oku kunokwenzeka ngofundisiso lweBhayibhile, kuba ibonisa ukuba wonke umntu ukuzuz’ ilifa ukungafezeki ngoko ke wenza iimpazamo. Ngaphezu koko, ulwazi lweBhayibhile luya kukunceda ukhule eluthandweni. Olu phawu luyimfuneko ukuze ubonakalise umonde kwabanye.—Yohane 13:34, 35; Roma 5:12; Filipi 1:9.

Uthando kunye nomnqweno wokuxolela lunokukwenza uzole xa ucaphukile. Ukuba ubani unemikhwa ekucaphukisayo, uthando luya kukukhumbuza ukuba yimikhwa ongayithandiyo, kungekhona umntu. Cinga ukuba zingaphi izihlandlo obuthi ubuthathaka bakho buvavanye umonde kaThixo buze bukhubekise nabanye.

Kwakhona imbono elungileyo ngesiqu sakho iya kukunceda ukuba ulinde ngomonde. Ngokomzekelo, ngaba ubuzabalazela amalungelo angakumbi enkonzweni kaYehova, waza akwawafumana? Ngaba uziva uphelelwa ngumonde ngokukhawuleza kangangokuba uziva ungenakulinda ngaphezu koku? Ukuba oko kunjalo, ngoko khumbula ukuba izenzo ezininzi zokungabi namonde zizalwa likratshi. USolomon wathi: “Ulungile umoya ozeka kade umsindo [onomonde, NW], kunomoya ozidlayo.” (INtshumayeli 7:8) Ewe, ikratshi lisisithintelo esiyintloko ekuhlakuleleni umonde. Aliyonyaniso na elokuba, umntu othobekileyo ukufumanisa kulula ngakumbi ukulinda ngokuzolileyo? Ngoko ke, hlakulela ukuthobeka, yaye uya kukulungela ngakumbi ukwamkela ukuhamba kade kwezinto unoxolo lwengqondo.—IMizekeliso 15:33.

Ukuba Nomonde Kunomvuzo Otyebileyo

Ngokuyintloko uAbraham waziwa ngokholo lwakhe. (Roma 4:11) Sekunjalo, umonde walwenza ukholo lwakhe lomelela ngakumbi. Waba yintoni umvuzo wakhe wokulindela kuYehova?

UAbraham wathenjwa ngakumbi nguYehova. Ngale ndlela igama lika-Abraham laba likhulu yaye inzala yakhe yaba luhlanga olunamandla. Zonke iintlanga zomhlaba zinokuzisikelela ngembewu yakhe. UAbraham wakhonza njengesithethi sikaThixo kwananjengohlobo oluthile loMdali. Ngaba wawunokubakho umvuzo ongakumbi womonde nokholo luka-Abraham?

“INkosi inemfesane enkulu, inenceba” kumaKristu azinyamezela ngomonde izilingo. (Yakobi 5:10, 11) Abanjalo bavuyiswa kukuba nesazela esicocekileyo ngenxa yokwenza ukuthanda kwakhe. Ngoko, kwimeko yakho, ukuba ulindela kuYehova uze ngomonde unyamezele izilingo, unyamezelo lwakho luya kukhokelela ekwamkelweni nakwintsikelelo kaYehova.

Umonde uyabanceda abantu bakaThixo kuzo zonke iinkalo zobomi. Abakhonzi ababini bakaYehova, uChristian noAgnes, bakufumanisa oku xa bagqiba ekubeni baganane. Ngenxa yokuhlonela abazali bakaChristian ababefuna ukumazi uAgnes, bathabatha ixesha ngaphambi kokuba baganane. Esi senzo saba nawuphi umphumo?

“Kuphela kukamva esathi sayiqonda indlela abazali bam ababewuxabisa ngayo umonde wethu,” ucacisa esitsho uChristian. “Ukulinda kwethu ngomonde akuzange kulutshabalalise ulwalamano phakathi kwam nomfazi wam. Kodwa kwaba sisiseko esihle kulwalamano lwethu nabazali bam.” Ewe, ukuba nomonde kunomvuzo otyebileyo.

Kwakhona umonde ubangela kubekho uxolo. Intsapho nabahlobo baya kuyixabisa into yokuba ungenzi ngxabano ngempazamo nganye abayenzayo. Ukuzola nokuqonda kwakho xa abanye besenza iimpazamo kuya kuthintela ukwenzeka kwezinto ezibangela iintloni. Iqhalo lamaTshayina lithi: “Ukubonakalisa umonde kwisenzo esicaphukisayo kuya kukusindisa kwikhulu leminyaka lembandezelo.”

Umonde uphucula ubuntu bakho, ngokungathi kunjalo ukunceda ukuba ugcine nezinye zeempawu zakho ezintle kumgangatho ophezulu. Womeleza ukholo lwakho, ube noxolo olungapheliyo, kunye nothando olungenakugungqiswa. Ukuhlala unomonde kuya kukunceda ukuba ube novuyo ngoxa uqhelisela ububele, ukulunga, kunye nobulali. Ukubonakalisa umonde kukhulisa amandla ayimfuneko ekuhlakuleleni ukuzeka kade umsindo nokuzeyisa.

Ngoko ke, kulindele ngomonde ukuzaliseka kwamadinga kaYehova, yaye uya kuqinisekiswa ngekamva eliqaqambileyo. Ngokufanayo noAbraham, ngamana ‘ngokholo nangokunyamezela, ungawadla ilifa amadinga.’—Hebhere 6:12.

[Umfanekiso okwiphepha 23]

Ulwalamano olusondeleyo noYehova luya kukunceda ubonakalise umonde, njengoko uAbraham wenzayo