Wayebabalwe NguYehova

“VUYA, wena ubabalweyo! INkosi inawe.” Onjani wona ukungaqheleki umbuliso! Isithethi sisithunywa sezulu uGabriyeli. Uthetha nebhinqa eliselula nelithobekileyo ngentliziyo—uMariya, intombi yendoda egama linguHeli. Kungonyaka wesi-3 B.C.E., yaye indawo sisixeko saseNazarete.—Luka 1:26-28.

UMariya uganelwe ukutshata noYosefu umchweli. Ngokomthetho nesiko lamaYuda, ujongwa njengomfazi wakhe amganileyo. (Mateyu 1:18) Njengaye, ukumgangatho ophantsi ngokwasentlalweni. Ngoko, kutheni isithunywa sezulu simbulisa njengalowo ubabalweyo?

Ilungelo Lakhe Elimangalisayo

UGabriyeli walek’ umsundulo esithi: “Musa ukoyika, Mariya; kuba ubabalwe nguThixo. Uyabona, uya kuthabatha esizalweni, uzale unyana, umthiye igama elinguYesu. Yena uya kuba mkhulu, abizwe ngokuba ngunyana wOsenyangweni; iNkosi uThixo iya kumnika itrone kaDavide, uyise, abe ngukumkani phezu kwendlu kaYakobi kude kube ngunaphakade, nobukumkani bakhe bungabi nasiphelo.”—Luka 1:29-33.

Emangalisiwe yaye edidekile, uMariya uyabuza: “Kuya kuthini na ukubakho oku, ndingazani nandoda nje?” UGabriyeli uphendula athi: “UMoya oyiNgcwele uya kuza phezu kwakho, athi namandla Osenyangweni akusibekele; kungoko loo nto ingcwele izalwa nguwe iya kubizwa ngokuba nguNyana kaThixo.” Ukuze sishenxise nawaphi na amathandabuzo, isithunywa sezulu sihlabela mgama sisithi: “Uyabona, uElizabhete, ozalana nawe, naye umithe unyana ebudaleni bakhe; nale yinyanga yesithandathu kuye, lowo bekuthiwa ngongazaliyo; ngokuba akukho nanye into eya kumnqabela yena uThixo.”—Luka 1:34-37.

Ngokukhawuleza uMariya uyalamkela eli lungelo lingummangaliso lenkonzo. Ngentumekelelo, kodwa ngokuthobeka, uphendula esithi: “Nanko umkhonzazana weNkosi; makwenzeke kum ngokwelizwi lakho.” Emva koko, uGabriyeli uyahamba. Ngokukhawuleza uMariya utyelela kummandla oneentaba welakwaYuda. Akufika emzini kaZekariya umbingeleli nomkakhe, uElizabhete, iimeko uzifumana kanye zinjengokuba isithunywa sezulu besizichazile. Olunjani uvuyo oluzalisa intliziyo kaMariya! Imilebe yakhe impompoza amazwi okudumisa uYehova.—Luka 1:38-55.

Uba Ngumfazi KaYosefu

Intombi enyulu iza kuzala uYesu ekumzimba womntu, kuba ukuzalwa okunjalo kwakuxelwe kwangaphambili. (Isaya 7:14; Mateyu 1:22, 23) Kodwa kutheni kufuneka umfazi oganiweyo onyulu? Ukuze afumane umntu oya kuba nguyise wokumondla onokunikela emntwaneni ilungelo elisemthethweni kwitrone kaKumkani uDavide. Bobabini uYosefu noMariya ngabesizwe sakwaYuda yaye ngabomnombo kaKumkani uDavide. Ngoko amalungelo okuba yindlalifa kukaYesu aya kuqinisekiswa ngokuphindiweyo. (Mateyu 1:2-16; Luka 3:23-33) Kungesi sizathu isithunywa sezulu sathi kamva samqinisekisa uYosefu ukuba angoyiki ukumthabathela kuye uMariya njengomfazi wakhe ongakwasemthethweni, nangona ekhulelwe.—Mateyu 1:19-25.a

Umthetho wokurhafa owiswe nguKesare Awugusto unyanzela uYosefu noMariya ukuba babhalise eBhetelehem. Ngoxa elapho, uzala unyana wakhe wamazibulo. Abalusi baze kubona usana, yaye badumisa uYise, uYehova. Ngokomthetho kaMoses emva kweentsuku ezingama-40 zokuhlanjululwa, uMariya uya etempileni eYerusalem ukuya kwenza idini lokucamagushela izono zakhe. (Levitikus 12:1-8; Luka 2:22-24) Ewe, ekubeni wakhawulelwa esonweni, ke akakho msulwa kwibala lesono, ukungafezeki kwakhe kwemvelo kufanele kuhlawulelwe ngokwenza amadini okucamagusha.—INdumiso 51:5.

Ngoxa uMariya noYosefu besetempileni, uSimon oselekhulile nomprofetikazi uAna owalupheleyo banelungelo lokubona uNyana kaThixo. UMariya akunikelwa ngqalelo ikhethekileyo kuye. (Luka 2:25-38) Kamva, izazi ziqubuda kuYesu kungekhona kuye.—Mateyu 2:1-12.

Emva kokusabela eYiputa baze bahlale apho de uHerode okhohlakeleyo afe, abazali bakaYesu bayabuya baze bahlale kwidolophana yaseNazarete. (Mateyu 2:13-23; Luka 2:39) Kulapho uYosefu noMariya bamkhulisela khona uYesu phantsi kweemeko zentsapho ehlonel’ uThixo.

UMariya Wayenabo Abanye Abantwana

Ekuhambeni kwexesha, uMariya noYosefu bafumana abantwana ababa ngabazalwana noodadeboYesu ngegazi. Xa ubulungiseleli bukaYesu bumbuyisela kwidolophana yakowabo iNazarete, abo babemazi kwasebuntwaneni bayamnakana. “Lo asinguye na unyana wengcibi yokwakha? Unina akuthiwa na nguMariya? Nabazalwana bakhe asingooYakobi, noYose, noSimon, noYuda, yini na?” (Mateyu 13:55, 56) Abemi baseNazarete babhekisa kwintsapho yokwenyama kaYosefu noMariya, kuquka oonyana neentombi zakhe ababazi njengabazalwana noodadeboYesu ngegazi.

Aba bazalwana noodade abangobaza kuYesu. Bengengabo nabafundi bakhe, okanye abazalwana noodadewabo bokomoya, kuba uYohane 2:12 uwenza ucace umahluko phakathi kwala maqela mabini ngokuthi: “Wehla [uYesu] waya eKapernahum, yena nonina, nabazalwana bakhe, nabafundi bakhe.” Kwiminyaka kamva eYerusalem, umpostile uPawulos wabona uKefas, okanye uPetros, yaye wongezelela wathi: “Andibonanga wumbi ke kubapostile, yaba nguYakobi, umzalwana weNkosi, yedwa.” (Galati 1:19) Ngaphezu koko, ingxelo yokuba uYosefu “akamazanga [uMariya], wada wazala unyana” yalatha ukuba ubawo ongumondli kaYesu waba nazo iintlobano zesini naye emva koko waza wamzalela abanye abantwana. (Mateyu 1:25) Ngokuvisisana noko, uLuka 2:7 umbiza uYesu ngokuthi ngunyana wakhe “wamazibulo.”

Umama Owoyika UThixo

Njengomama owoyika uThixo, uMariya usebenzisana noYosefu ekufundiseni abantwana bakhe okulungileyo. (IMizekeliso 22:6) Ukuba ungumfundi weZibhalo onenzondelelo kubonakala kumazwi akhe aphilileyo ngokomoya xa ebuliswa nguElizabhete. Ngelo xesha unina kaYesu uphinda amazwi eendumiso akwingoma kaHana yaye ubonisa ulwazi ngeendumiso, ngezinto ezibhaliweyo ezingokwembali neziprofeto, nangeencwadi zikaMoses. (Genesis 30:13; 1 Samuweli 2:1-10; IMizekeliso 31:28; Malaki 3:12; Luka 1:46-55) UMariya ebezigcina ezi ziganeko zingeziprofeto nezinto ezithethiweyo ukuze azikhumbule, ezilondolozile entliziyweni yakhe aze acamngce ngazo engqondweni yakhe. Ngoko ke uxhobe ngokwaneleyo ukuze abe nesabelo ekunikeleni imfundiso yobuzali kwigatyana elinguYesu.—Luka 2:19, 33.

UYesu ofundiswe kakuhle oneminyaka eli-12 ubudala ubonisa ukuzazi kakuhle iZibhalo ngendlela ekhwankqisa amadoda afundileyo etempileni. Kuba ebekhe wahlukana nabazali bakhe ngexesha lePasika, unina uthi: “Mntwana wam, yini na ukuba usenjenje? Uyabona, uyihlo nam sibe sikufuna, sibuhlungu kakhulu.” UYesu uyaphendula: “Benindifunela ntoni na? Beningazi na ukuba ndimelwe kukuba semicimbini kaBawo?” Engenako ukuyiqonda intsingiselo yale mpendulo, uMariya uyigcina entliziyweni yakhe. Bakuba bebuyele eNazarete, uYesu ‘uhambela phambili ebulumkweni nasebukhulwini, nasekuthandweni nguThixo nangabantu.’—Luka 2:42-52.

UMariya Njengomfundi KaYesu

Hayi indlela ekufaneleka ngayo ukuba uMariya ekugqibeleni abe ngumfundi onenzondelelo kaYesu! Uthobekile yaye akanamabhongo okubalasela phezu kwaso nje isabelo esikhethekileyo asinikwe nguThixo. UMariya uyazazi iZibhalo. Ukuba ungaziphengululela, akunakumfumana echazwe njengonesithsaba, ehleli etroneni “njengokumkanikazi ongumama” yaye ethiwe jize ngobuqaqawuli bozuko lukaKristu. Kunoko, uyakufika kuthethwe kancinane ngaye, engengondaba-mlonyeni.—Mateyu 13:53-56; Yohane 2:12.

UYesu wayinqanda isaqala nayiphi na into enjengokunqulwa kukaMariya oNgcwele phakathi kwabalandeli bakhe. Ngesinye isihlandlo ngoxa wayethetha, “umfazi othile phakathi kwezihlwele wakhwaza wathi, ‘Sisikelelwe isizalo esakubambayo namabele owawanyayo!’ Waphendula wathi, ‘Yithi kanye, basikelelwe abo balivayo ilizwi likaThixo baligcine.’” (Luka 11:27, 28, The New American Bible, iguqulelwe ngamalungu eCatholic Biblical Association of America) Ekomnye umsitho womtshato, uYesu waxelela uMariya oku: “Yintoni na enam nawe, mfazi? Alikafiki ilixa lam.” (Yohane 2:4) Ezinye iinguqulelo zifundeka ngolu hlobo: “Wuyekele ezandleni zam lo mbandela.” (Weymouth) “Sukuzama ukundilawula.” (An American Translation) Ewe, uYesu wayemhlonela unina, kodwa akazange anikele kuye imbeko engaphezu kwefunekayo.

Amalungelo Kanaphakade

Anjani wona amalungelo uMariya awawanandiphayo! Wazala uYesu. Wandula ke wakhulisa waza waqeqesha loo mntwana mncinane. Ekugqibeleni, waba nokholo, wangumfundi kaKristu nodadewabo wokomoya. Ukugqibela kwethu ukuva ngoMariya kwiZibhalo, simbona ekwigumbi eliphezulu eYerusalem. Ulapho kunye nabapostile bakaYesu, abanye oonyana bakhe, nabanye abafazi abathembekileyo—bonke bengabanquli bakaYehova.—IZenzo 1:13, 14.

Ekuhambeni kwexesha, uMariya wafa waza umzimba wakhe wabuyela eluthulini. Njengabanye abalandeli abathanjisiweyo bonyana wakhe oyintanda, walala ukufa de lafika ixesha likaThixo elifanelekileyo lokuba amvuse njengesidalwa somoya sasezulwini esinobomi obungenasiphelo. (1 Korinte 15:44, 50; 2 Timoti 4:8) Olunjani uyolo afanele ukuba lo “ubabalweyo” unalo ngoku ngokuba kunye noYehova uThixo noYesu Kristu!

[Umbhalo osemazantsi]

[Umfanekiso okwiphepha 31]

UMariya wayebabalwe njengonina kaYesu