AmaNgqina AngamaKristu Olongamo LukaThixo
“Nivakalise isidima salowo wanibizayo ukuba niphume ebumnyameni, ningene ekukhanyeni kwakhe okungummangaliso.”—1 PETROS 2:9.
1. Bubuphi ubungqina obunempumelelo obanikelwayo ngoYehova kumaxesha angaphambi kobuKristu?
KUMAXESHA angaphambi kobuKristu, ungcelele lwamangqina ngenkalipho lwanikela ubungqina bokuba uYehova kuphela koThixo oyinyaniso. (Hebhere 11:4–12:1) Omelele elukholweni lwawo, athobela imithetho kaYehova engoyiki aza ala ukulalanisa kwimibandela yonqulo. Anikela ubungqina obunamandla kulongamo lukaYehova lwendalo iphela.—INdumiso 18:21-23; 47:1, 2.
2. (a) Ngubani elona Ngqina likaYehova libalaseleyo? (b) Ngoobani abathabatha indawo yohlanga lwakwaSirayeli njengengqina likaYehova? Sazi njani?
2 Owokugqibela noyena umkhulu kumangqina angaphambi kobuKristu nguYohane uMbhaptizi. (Mateyu 11:11) Wayenelungelo lokuvakalisa ukuza kwaLowo uNyuliweyo, yaye wachaza uYesu njengoMesiya othenjisiweyo. (Yohane 1:29-34) UYesu lelona Ngqina likaYehova libalaseleyo, “ingqina elithembekileyo, eliyinyaniso.” (ISityhilelo 3:14) Ngenxa yokuba uSirayeli wokwenyama engazange amamkele uYesu, uYehova wamlahla waza wamisela uhlanga olutsha, uSirayeli kaThixo wokomoya, ukuba abe lingqina lakhe. (Isaya 42:8-12; Yohane 1:11, 12; Galati 6:16) UPetros wacaphula isiprofeto esingoSirayeli waza wabonisa ukuba sisebenza ‘kuSirayeli kaThixo,’ ibandla lamaKristu, xa wathi: “Nisisizukulwana esinyuliweyo, isibingeleli esibukumkani, uhlanga olungcwele, abantu abayinqobo, ukuze nivakalise isidima salowo wanibizayo ukuba niphume ebumnyameni, ningene ekukhanyeni kwakhe okungummangaliso.”—1 Petros 2:9; Eksodus 19:5, 6; Isaya 43:21; 60:2.
3. Yiyiphi imbopheleleko eyintloko yoSirayeli kaThixo ‘neyesihlwele esikhulu’?
3 Amazwi kaPetros abonisa ukuba imbopheleleko eyintloko yoSirayeli kaThixo kukunikela ubungqina ekuhleni ngozuko lukaYehova. Kulo mhla wethu olu hlanga lokomoya luye lwathelelwa ‘sisihlwele esikhulu’ samangqina naso esizukisa uThixo ekuhleni. Sidanduluka ngezwi elikhulu ukuze beve bonke sisithi: “Usindiso kuye uThixo wethu, lowo uhleli phezu kwetrone, nakuyo iMvana!” (ISityhilelo 7:9, 10; Isaya 60:8-10) USirayeli kaThixo namaqabane akhe banokukufeza njani ukunikela kwabo ubungqina? Ngokholo nentobelo yabo.
Amangqina Obuxoki
4. Kutheni amaYuda omhla kaYesu ayengamangqina obuxoki?
4 Ukholo nentobelo zibandakanya ukuphila ngemigaqo kaThixo. Ukubaluleka koku kubonwa koko uYesu wakuthethayo ngeenkokeli zonqulo zamaYuda zomhla wakhe. Aba ‘babehleli esihlalweni sikaMoses’ njengabafundisi boMthetho. Bade bathumela nabavangeli ukuze baguqule abangakholwayo. Sekunjalo, uYesu wathi kubo: “Nijikajika ulwandle nomhlaba ukuze nenze nokuba mnye ongena ebuYudeni; nithi, xa athe wazuzeka, nimenze abe ngumntwana wesihogo ngokuphindiweyo kunani.” Aba bantu bonqulo babengamangqina obuxoki—benekratshi, behanahanisa yaye bengenaluthando. (Mateyu 23:1-12, 15) Ngesinye isihlandlo uYesu wathi kumaYuda athile: “Ningaboyihlo uMtyholi, neenkanuko zoyihlo niyathanda ukuzenza.” Wayenokuyithetha njani into enjalo kumalungu ohlanga lukaThixo olukhethiweyo? Kwakungenxa yokuba babengawathobeli amazwi elona Ngqina likaYehova likhulu.—Yohane 8:41, 44, 47.
5. Sazi njani ukuba iNgqobhoko inikele ubungqina bobuxoki ngoThixo?
5 Ngendlela efanayo, ebudeni beenkulungwane ukususela kwixesha likaYesu, amakhulu ezigidi kwiNgqobhoko aye azibanga engabafundi bakhe. Noko ke, akenzanga ukuthanda kukaThixo yaye ngenxa yoko uYesu akawazi. (Mateyu 7:21-23; 1 Korinte 13:1-3) INgqobhoko iye yathumela abavangeli, ngokungathandabuzekiyo abaninzi babo benyanisekile. Sekunjalo, bafundisa abantu ukunqula uthixo onguBathathu Emnye otshisa aboni kumlilo wesihogo, yaye inkoliso yamaguquka abo ayibonisi bungqina bungako bokuba ingamaKristu. Ngokomzekelo, ilizwe laseAfrika iRwanda beliyintsimi echume ngokwenene kubavangeli bamaRoma Katolika. Sekunjalo, amaKatolika aseRwanda athelele ngentliziyo iphela kumlo wezizwana kwelo lizwe. Iziqhamo kuloo ntsimi yabavangeli zibonisa ukuba ayifumananga ubungqina bamaKristu okwenyaniso kwiNgqobhoko.—Mateyu 7:15-20.
Ukuphila Ngemigaqo KaThixo
6. Ihambo efanelekileyo iyinxalenye ebalulekileyo yokunikela ubungqina ngaziphi iindlela?
6 Ihambo ephosakeleyo yabo bazibanga bengamaKristu ibangela ukuba igculelwe “indlela yenyaniso.” (2 Petros 2:2) UmKristu wokwenyaniso uphila ngokuvisisana nemigaqo kaThixo. Akebi, akaxoki, akaqhathi okanye ahenyuze. (Roma 2:22) Ngokuqinisekileyo akambulali ummelwane wakhe. Amadoda angamaKristu azivelela ngothando iintsapho zawo. Abafazi bakuxhasa ngentlonelo oko kuvelelwa. Abantwana bayaqeqeshwa ngabazali babo yaye ngaloo ndlela balungiselelwa ukuba ngabantu abakhulu abangamaKristu anokuthenjwa. (Efese 5:21–6:4) Liyinyaniso elokuba sonke asifezekanga yaye siyazenza iimpazamo. Kodwa umKristu wokwenyaniso uyayihlonela imilinganiselo yeBhayibhile yaye wenza umgudu onyanisekileyo wokuyisebenzisa. Abanye bayakubona oku yaye kunikela ubungqina obuhle. Maxa wambi, abo babefudula beyichasile inyaniso babona ihambo elungileyo yomKristu baza bazuzeka.—1 Petros 2:12, 15; 3:1.
7. Kubaluleke kangakanani ukuba amaKristu athandane?
7 UYesu wabonisa inkalo ebalulekileyo yehambo yamaKristu xa wathi: “Ngayo le nto baya kwazi bonke, ukuba ningabafundi bam, ukuba nithe nathandana.” (Yohane 13:35) Kweli hlabathi likaSathana kuxhaphake ‘intswela-bulungisa, okungendawo, ukubawa, ulunya; kuzele umona, ukubulala, iinkani, inkohliso, ubumenemene; abasebezi, abahlebi, abathiyekileyo kuThixo, abasileyo, abanekratshi, abaqhankqalazi, abacebi bezinto ezimbi, abangeva abazali.’ (Roma 1:29, 30) Kwimeko enjalo, intlangano yomhlaba wonke ebonakala ngothando ibiya kuba bubungqina obunamandla bokusebenza komoya kaThixo—ubungqina obuphumelelayo. AmaNgqina kaYehova ayintlangano enjalo.—1 Petros 2:17.
Amangqina Angabafundi BeBhayibhile
8, 9. (a) Umdumisi womelezwa njani lufundisiso lwakhe loMthetho kaThixo nokucamngca ngawo? (b) Ukufundisisa iBhayibhile nokucamngca kuya kusomeleza ngaziphi iindlela ukuba siqhubeke sinikela ubungqina?
8 Ukuze aphumelele ekunikeleni ubungqina obuhle, umKristu umele ayazi aze ayithande imigaqo kaYehova yobulungisa yaye akuthiye egazini ukonakala kweli hlabathi. (INdumiso 97:10) Ihlabathi liyikhuthaza kanobom indlela yalo yokucinga, yaye umoya walo kusenokuba nzima ukuwuxhathisa. (Efese 2:1-3; 1 Yohane 2:15, 16) Yintoni enokusinceda sigcine isimo sengqondo esifanelekileyo? Lufundisiso lweBhayibhile oluthe rhoqo nolunentsingiselo. Umbhali weNdumiso 119 waphindaphinda izihlandlo ezininzi ebonisa indlela awuthanda ngayo uMthetho kaYehova. Wayewufunda ecamngca ngawo lonke ixesha, ‘imini yonke.’ (INdumiso 119:92, 93, 97-105) Ngenxa yoko, wayenokubhala athi: “Ndikuthiyile ukuxoka, lisikizi kum; ndiyawuthanda umyalelo wakho.” Ngaphezu koko, uthando lwakhe olunzulu lwamqhubela esenzweni. Uthi: “Ndikudumisa kasixhenxe ngemini, ngenxa yezigwebo zobulungisa bakho.”—INdumiso 119:163, 164.
9 Ngendlela efanayo, ukufundisisa kwethu iLizwi likaThixo rhoqo nokucamngca ngalo kuya kuzichukumisa iintliziyo zethu kuze kusishukumisele ekubeni ‘simdumise’—sinikele ubungqina ngoYehova—rhoqo, kude kube “kasixhenxe ngemini.” (Roma 10:10) Ngokuvisisana noku, umbhali wendumiso yokuqala uthi lowo ucamngca rhoqo ngamazwi kaYehova “unjengomthi omiliselwe phezu kwemijelo yamanzi, onika isiqhamo sawo ngexesha lawo, ogqabi lawo lingabuniyo; konke akwenzayo kophumelela.” (INdumiso 1:3) Kwakhona umpostile uPawulos wabonisa amandla eLizwi likaThixo xa wabhala wathi: “Sonke isibhalo, siphefumlelwe nguThixo nje, sikwancedela ukufundisa, ukohlwaya, ukululeka, ukuqeqesha okusebulungiseni, ukuze umntu kaThixo afaneleke, exhobele wonke umsebenzi olungileyo.”—2 Timoti 3:16, 17.
10. Yintoni ecacileyo ngabantu bakaYehova kule mihla yokugqibela?
10 Ukwanda ngokukhawuleza kwabanquli bokwenyaniso kule nkulungwane yama-20 kubonisa intsikelelo kaYehova. Ngaphandle kwamathandabuzo, njengeqela, la mangqina anamhlanje olongamo lukaThixo ahlakulele uthando ngomthetho kaYehova ezintliziyweni zawo. Njengomdumisi, ashukunyiselwa ukuba athobele umthetho Wakhe aze anikele ubungqina ngokuthembeka “imini nobusuku” ngozuko lukaYehova.—ISityhilelo 7:15.
Imisebenzi KaYehova Yamandla
11, 12. Yafeza ntoni imimangaliso eyenziwa nguYesu nabalandeli bakhe?
11 Ngenkulungwane yokuqala, umoya oyingcwele wanika amangqina angamaKristu athanjisiweyo amandla okuba enze imimangaliso, nto leyo eyanikela ubungqina obunamandla bokuba ubungqina bawo babuyinyaniso. Xa uYohane uMbhaptizi wayesentolongweni, wathuma abafundi bakhe kuYesu ukuba baye kumbuza: “Wena ungulowo uzayo na, silinde wumbi, kusini na?” UYesu akazange aphendule ngokuthi ewe okanye hayi. Kunoko, wathi: “Hambani niye kumbikela uYohane izinto enizivayo nenizibonileyo: iimfama zibuya zibone, neziqhwala ziyahamba; abaneqhenqa bayahlanjululwa, nezithulu ziyeva; abafileyo bayavuswa, namahlwempu ayazishunyayezwa iindaba ezilungileyo. Unoyolo othe akakhutyekiswa ndim.” (Mateyu 11:3-6) Le misebenzi yamandla yaba bubungqina kuYohane bokuba uYesu wayenguye ngokwenene “lowo uzayo.”—IZenzo 2:22.
12 Ngendlela efanayo, abanye babalandeli bakaYesu baphilisa abagulayo bade bavusa nabafileyo. (IZenzo 5:15, 16; 20:9-12) Le mimangaliso yayifana nobungqina obuvela kuThixo egameni labo. (Hebhere 2:4) Yaye imisebenzi enjalo yabonisa amandla amakhulu kaYehova. Ngokomzekelo, liyinyaniso elokuba uSathana, “umphathi weli hlabathi,” unako ukubangela ukufa. (Yohane 14:30; Hebhere 2:14) Kodwa xa uPetros wavusa umfazi othembekileyo uDorkas ekufeni, oko wayenokukwenza ngamandla kaYehova kuphela, ekubeni inguye kuphela onokubuyisela ubomi.—INdumiso 16:10; 36:9; IZenzo 2:25-27; 9:36-43.
13. (a) Imimangaliso eseBhayibhileni isabunikela njani ubungqina ngamandla kaYehova? (b) Ukuzaliseka kweziprofeto kunendima ebalulekileyo njani ekungqineni ukuba uYehova nguThixo?
13 Namhlanje, ayisenzeki imimangaliso enjalo. Injongo yayo ifezekile. (1 Korinte 13:8) Nangona kunjalo, sisenayo ingxelo engayo eBhayibhileni, eye yangqinelwa ngababukeli abaninzi. Xa namhlanje amaKristu esalathisela ingqalelo kwezi ngxelo zembali, loo misebenzi isanikela ubungqina obunempumelelo kumandla kaYehova. (1 Korinte 15:3-6) Ukongezelela, emva phayaa ngomhla kaIsaya, uYehova walatha kwisiprofeto esichanileyo njengobungqina obubalaseleyo bokuba nguye uThixo oyinyaniso. (Isaya 46:8-11) Iziprofeto zeBhayibhile ezininzi eziphefumlelwe nguThixo ziyazaliseka namhlanje—eziliqela kuzo kwibandla lamaKristu. (Isaya 60:8-10; Daniyeli 12:6-12; Malaki 3:17, 18; Mateyu 24:9; ISityhilelo 11:1-13) Ukongezelela ekuboniseni ukuba siphila ‘kwimihla yokugqibela,’ ukuzaliseka kwezi ziprofeto kuthethelela uYehova njengokuphela koThixo oyinyaniso.—2 Timoti 3:1.
14. Imbali yanamhlanje yamaNgqina kaYehova ibubungqina obunamandla ngaziphi iindlela bokuba uYehova uyiNkosi enguMongami?
14 Okokugqibela, uYehova usabenzela izinto ezinkulu, izinto ezimangalisayo, abantu bakhe. Ukukhanya okwandayo kwenyaniso yeBhayibhile kwalathiswa ngumoya kaYehova. (INdumiso 86:10; ISityhilelo 4:5, 6) Ulwando olubalaseleyo ekuye kwanikelwa ingxelo ngalo emhlabeni wonke bubungqina bokuba uYehova ‘uyakukhawulezisa ngexesha lako oko.’ (Isaya 60:22) Xa kuvele intshutshiso ekrakra kumazwe ngamazwe kule mihla yokugqibela, abantu bakaYehova baye bakwazi ukunyamezela ngenkalipho ngenxa yenkxaso eyomelezayo yomoya oyingcwele. (INdumiso 18:1, 2, 17, 18; 2 Korinte 1:8-10) Ewe, imbali yanamhlanje yamaNgqina kaYehova bubungqina obunamandla bokuba uYehova yiNkosi enguMongami.—Zekariya 4:6.
Iindaba Ezilungileyo Zimele Zishunyayelwe
15. Bubuphi ubungqina obandisiweyo obabuza kunikelwa libandla lamaKristu?
15 UYehova wamisela uSirayeli njengengqina lakhe ezintlangeni. (Isaya 43:10) Noko ke, ngamaSirayeli ambalwa kuphela awathunywa nguThixo ukuba aye kushumayela kubantu abangemaSirayeli, yaye ngokuqhelekileyo oku kwakusenziwa ukuze kuvakaliswe imigwebo kaYehova. (Yeremiya 1:5; Yona 1:1, 2) Sekunjalo, iziprofeto ezikwiZibhalo zesiHebhere zibonisa ukuba ngenye imini uYehova wayeya kuguqulela ingqalelo yakhe kwiintlanga ngendlela ephawulekayo, yaye oku ukwenze esebenzisa uSirayeli wokomoya kaThixo. (Isaya 2:2-4; 62:2) Ngaphambi kokunyukela ezulwini, uYesu wayalela abalandeli bakhe: “Hambani ngoko niye kuzenza abafundi zonke iintlanga.” (Mateyu 28:19) Ngoxa uYesu wayegxininisa “kwizimvu ezilahlekileyo zendlu kaSirayeli,” abalandeli bakhe bathunywa kuzo “zonke iintlanga,” ukusa “nasekupheleni komhlaba.” (Mateyu 15:24; IZenzo 1:8) Ubungqina bamaKristu babumele buviwe luluntu lonke.
16. Ibandla lamaKristu lenkulungwane yokuqala laphumeza luphi uthumo, yaye ukusa kuwuphi umkhamo?
16 UPawulos wabonisa ukuba wayekuqonda kakuhle oku. Ngonyaka wama-61 C.E., wakwazi ukuvakalisa ukuba iindaba ezilungileyo “zixakatha isiqhamo yaye ziyanda kulo lonke ihlabathi.” (NW) Iindaba ezilungileyo zazingapheleliselwanga kuhlanga okanye kwihlelo elinye kuphela, njengelo lalibandakanyeke ‘ekunquleni izithunywa zezulu.’ Kunoko ‘zashunyayelwa ngokukhululekileyo kwindalo yonke ephantsi kwezulu.’ (Kolose 1:6, 23; 2:13, 14, 16-18) Ngaloo ndlela, uSirayeli kaThixo ngenkulungwane yokuqala waluzalisekisa uthumo lwakhe lokuba ‘avakalise isidima salowo wambizayo ukuba aphume ebumnyameni, angene ekukhanyeni kwakhe okungummangaliso.’
17. UMateyu 24:14 uqhubeka ezaliseka njani ngomkhamo omkhulu?
17 Sekunjalo, loo msebenzi wokushumayela wenkulungwane yokuqala wawungumfanekiselo nje kuphela woko kwakuya kufezwa ngemihla yokugqibela. Ekhangele phambili ngokukhethekileyo kwixesha lethu, uYesu wathi: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” (Mateyu 24:14; Marko 13:10) Ngaba esi siprofeto sizalisekile? Ngokwenene, sizalisekile. Ukususela kwisiqalo esincinane ngowe-1919, ukushunyayelwa kweendaba ezilungileyo ngoku kuye kwanabela kumazwe angaphezu kwama-230. Ubungqina buyeviwa kuMntla ozaliswe ngumkhenkce nakumazwe afudumeleyo akweleenjiko. Amazwekazi amakhulu ayagutyungelwa, yaye nakwiziqithi ezikwanti kuyafikwa ukuze abemi bazo bafumane ubungqina. Kwanalapho kukho iziphithiphithi ezikhulu, njengemfazwe eseBosnia naseHerzegovina, iindaba ezilungileyo ziyaqhubeka zishunyayelwa. Njengakwinkulungwane yokuqala, ubungqina buxakatha isiqhamo “kulo lonke ihlabathi.” Iindaba ezilungileyo zivakaliswa ngokukhululekileyo “kwindalo yonke ephantsi kwezulu.” Ngawuphi umphumo? Okokuqala, abaseleyo boSirayeli kaThixo baye bahlanganiswa ‘bephuma kuzo zonke izizwe, neelwimi, nabantu, neentlanga.’ Okwesibini, kwaqaliswa ukuhlanganiswa kwezigidi ‘zesihlwele esikhulu’ esiphuma “kuzo zonke iintlanga nezizwe, nabantu, neelwimi.” (ISityhilelo 5:9; 7:9) UMateyu 24:14 uyaqhubeka ezaliseka ngomkhamo omkhulu.
18. Ziziphi ezinye zezinto ezifezwa kukushunyayelwa kweendaba ezilungileyo emhlabeni wonke?
18 Ukushunyayelwa emhlabeni wonke kweendaba ezilungileyo kuluncedo ekungqineni ukuba ubukho bukaYesu njengokumkani sele buqalile. (Mateyu 24:3) Ngaphezu koko, kuyindlela ephambili okuvunwa ngayo “ukudla komhlaba,” njengoko kusalathisela abantu kwithemba lokwenyaniso elikuphela kwalo kuluntu, uBukumkani bukaYehova. (ISityhilelo 14:15, 16) Ekubeni ingamaKristu okwenyaniso kuphela anesabelo ekushunyayelweni kweendaba ezilungileyo, lo msebenzi ubalulekileyo uluncedo ekwahluleni amaKristu okwenyaniso kwawobuxoki. (Malaki 3:18) Ngale ndlela, oku kuphumela ekusindisweni kwabo bashumayelayo nabo basabelayo. (1 Timoti 4:16) Okona kubalulekileyo kukuba ukushunyayelwa kweendaba ezilungileyo kudumisa yaye kuzisa imbeko kuYehova uThixo, lowo wayalela ukuba kwenziwe, obaxhasayo abo bakwenzayo, nowenza kuxakathe isiqhamo.—2 Korinte 4:7.
19. Luluphi uzimiselo onke amaKristu akhuthazwa ukuba abe nalo njengokuba engena kunyaka omtsha wenkonzo?
19 Akumangalisi ke ngoko ukuba umpostile uPawulos washukunyiselwa ukuba athi: “Yeha ke mna, ukuba ndisuka ndingazishumayeli iindaba ezilungileyo!” (1 Korinte 9:16) Namhlanje amaKristu avakalelwa ngendlela efanayo. Kulilungelo elizukileyo nembopheleleko enkulu ukuba “ngabasebenzi kunye noThixo,” sikhanyisa ukukhanya kwenyaniso kweli hlabathi lisebumnyameni. (1 Korinte 3:9, NW; Isaya 60:2, 3) Umsebenzi owaqalisa kancinane ngowe-1919 ngoku ufikelele kumanqanaba amangalisayo. AmaKristu aphantse abe zizigidi ezihlanu anikela ubungqina ngolongamo lukaThixo njengoko echithela iiyure ezingaphezu kwewaka lezigidi nyaka ngamnye ekusasazeni isigidimi sosindiso kwabanye. Olunjani uvuyo okululo ukuba nenxaxheba kulo msebenzi wokungcwalisa igama likaYehova! Njengoko singena kunyaka wenkonzo we-1996, masizimisele ukuba singethi mandla. Kunoko, siya kuwathobela ngaphezulu kunanini na ngaphambili amazwi kaPawulos kuTimoti: “Lishumayele ilizwi, yenjenjalo ngokungxamisekileyo.” (2 Timoti 4:2, NW) Njengokuba sisenjenjalo, sithandaza ngeentliziyo zethu ziphela ukuba uYehova aqhubeke eyisikelela imigudu yethu.
Uyakhumbula Na?
◻ Ngoobani abathabatha indawo kaSirayeli ‘njengengqina’ likaYehova ezintlangeni?
◻ Ihambo yamaKristu inegalelo njani ekunikeleni ubungqina?
◻ Kutheni ufundisiso lweBhayibhile nokucamngca ngayo kubalulekile kwiNgqina elingumKristu?
◻ Imbali yanamhlanje yamaNgqina kaYehova ibubungqina bokuba uYehova unguThixo oyinyaniso njani?
◻ Ukushunyayelwa kweendaba ezilungileyo kufeza ntoni?
[Imifanekiso ekwiphepha 15]
Kunokuba zithintelwe, ngoku iindaba ezilungileyo zivakaliswa “kwindalo yonke ephantsi kwezulu”