Imibuzo Evela Kubafundi

Kangangeminyaka ethile iingxelo bezibonisa ukuba inani labo bathabathayo kwimifuziselo yeSikhumbuzo liye landa kancinane. Ngaba oku kubonisa ukuba kukho abaninzi abatsha abaye bathanjiswa ngomoya oyingcwele?

Kukho izizathu ezininzi zokukholelwa ukuba inani lamaKristu athanjisiweyo ali-144 000 beliphelele kumashumi eminyaka adluleyo.

KwiZenzo 2:1-4, sifunda ngabokuqala kwelo qela lincinane: “Ke kaloku ngoxa umhla womthendeleko wePentekoste wawuqhubeka babekunye bonke kwindawo enye, yaye ngequbuliso kwabakho ingxolo evela ezulwini enjengaleyo kanye yempepho ebhudla ngamandla, yaza yazalisa indlu iphela ababehleli kuyo. Yaye kwabonakala kubo iilwimi ezingathi zezomlilo kwaye zabeka, lwaza lwaolo lwahlala kuye ngamnye wabo, ibe bonke bazaliswa ngumoya oyingcwele baza baqala ukuthetha ngeelwimi ezahlukileyo, kanye njengoko umoya wawubanika ukuba bathethe amazwi.”

Emva koko, uYehova wakhetha abanye, waza wabathambisa ngomoya wakhe oyingcwele. Kongezelelwa amawaka kwasebudeni beminyaka yokuqala yobuKristu. Ebudeni beSikhumbuzo namhlanje, ngokufuthi isithethi siye salathisele ingqalelo kumazwi ompostile uPawulos akumaRoma 8:15-17, abonisa ukuba abathanjiswa ‘bafumene umoya wokwenziwa oonyana.’ UPawulos wongezelela esithi umoya oyingcwele abawufumeneyo ‘ungqinelana nomoya wabo ukuba bangabantwana bakaThixo, iindlalifa ezimanyene noKristu.’ Abo ngokwenene bathanjiswe ngomoya baqinisekile ngokuthanjiswa kwabo. Asingomnqweno nje okanye ukuba nembono engekho ngqiqweni ngeziqu zabo.

Siyaqonda ukuba olu bizo lwasezulwini beluqhubeka kangangeenkulungwane, nangona ebudeni bethuba ekuthiwa ngamaXesha Obumnyama, lisenokuba lalilincinane kakhulu inani labathanjiswa.a Ngokumiselwa ngokutsha kobuKristu bokwenyaniso ngasekupheleni kwenkulungwane edlulileyo, kwabizwa abangakumbi baza banyulwa. Kodwa kubonakala ngathi phakathi kwiminyaka yee-1930, ngokusisiseko inani le-144 000 laphelela. Ngaloo ndlela, kwaqalisa ukuvela iqela lamaKristu anyanisekileyo anethemba lokuphila emhlabeni. UYesu wawabiza ngokuba ‘zezinye izimvu,’ ezimanyana nabathanjiswa ukuze zinqule kunye njengomhlambi omnye.—Yohane 10:14-16.

Kumashumi eminyaka adluleyo izibakala bezibonisa ukuba ubizo lwabathanjiswa lufeziwe kwanokuba uYehova ebesisikelela “isihlwele esikhulu” esandayo, esinethemba lokusinda ‘kwimbandezelo enkulu.’ (ISityhilelo 7:9, 14) Ngokomzekelo, kwiSikhumbuzo sowe-1935, ekwakukho ama-63 146 kuso, inani labo bathabathayo kwimifuziselo bengqina ukuba bangabathanjiswa lalingama-52 465. Kwiminyaka engama-30 kamva, okanye ngowe-1965, ababezile babesisi-1 933 089, ngoxa abathabathayo esidlweni babenciphile bali-11 550. Kwiminyaka engama-30 kamva, ngowe-1995 ababezile bafikelela kwizi-13 147 201, kodwa ngama-8 645 kuphela awathabathayo kwisonka newayini. (1 Korinte 11:23-26) Kucacile ukuba ngokuhamba kweminyaka, inani labo bathi bayintsalela liye lancipha kakhulu—ngowe-1935 babengama-52 400; ngowe-1965 babengama-11 500; ngowe-1995 babengama-8 600. Noko ke, abo banethemba lokuphila emhlabeni baye basikelelwa, yaye inani labo liye landa kakhulu.

Eyona ngxelo yakutshanje yeyonyaka we-1995, yaye ibonisa ukuba kongezeleleke abangama-28 kwabo babethabathile esidlweni kunyaka owandulelayo nangona isilinganiso sabo bathabathayo esidlweni besingaphantsi kwababezile. Eneneni, isibakala sokuba iqaqobana elithile liye lakhetha ukuthabatha kwimifuziselo asifanele sisenze sixhalabe. Kwiminyaka edluleyo bambi, kuquka abasandul’ ukubhaptizwa, baqalisa ukuthabatha esidlweni. Kwiimeko ezininzi, emva kwethuba elithile bavuma ukuba benjenjalo ngempazamo. Bambi baye bavuma ukuba babethabatha esidlweni ngenxa yokuxinezeleka komzimba okanye kwengqondo. Kodwa babuya baqonda ukuba babengabizelwanga ubomi basezuwliwni. Bacela uThixo ukuba abenzele inceba. Yaye bayaqhubeka bemkhonza njengamaKristu athembekileyo nanyanisekileyo, benethemba lokuphila ngonaphakade emhlabeni.

Akuyomfuneko ukuba sixhalabe ukuba umntu uqalisa ukuthabatha kwimifuziselo okanye uyayeka ukwenjenjalo. Ayifuni thina into yokuba umntu uthanjiswe ngomoya oyingcwele ngokwenene kusini na yaye ubizelwe ubomi basezulwini okanye akunjalo. Khumbula isiqinisekiso esomeleleyo sikaYesu: “Ndingumalusi omhle, kwaye ndiyazazi izimvu zam.” Ngendlela efanayo, uYehova uyabazi abo abakhethileyo njengoonyana bokomoya. Sinezizathu ezininzi zokukholelwa ukuba inani labathanjiswa liya kuqhubeka lincipha njengoko ubomi babo basemhlabeni bufikelela esiphelweni ngenxa yokwaluphala nezinye izihlo. Sekunjalo, kanye njengokuba abo bathanjiswe ngokwenene bezingqina bethembekile kude kube sekufeni, bekhangele phambili kwisithsaba sobomi, ezinye izimvu, eziye zayihlamba imiwunduzo yazo egazini leMvana, zinokukhangela phambili ekusindeni kwimbandezelo enkulu esemnyango.—2 Timoti 4:6-8; ISityhilelo 2:10.

[Umbhalo osemazantsi]