Benza Ukuthanda KukaYehova
UPetros Ushumayela NgePentekoste
KWAKUYINTSASA ezolileyo yentlakohlaza ngonyaka wama-33 C.E. Kwakuyimincili yodwa! Isihlwele esasiphithizela samaYuda namaguquka sasinyakazela kwizitrato zaseYerusalem. Sasivela kwiindawo ezinjenge-Elam, iMesopotamiya, iKapadokiya, iYiputa neRoma. Hayi indlela ekwakuchulumancisa ngayo ukusibona sinxibe iimpahla zamazwe aso nokusiva sithetha iilwimi zaso ezahlukahlukeneyo! Bambi babehambe umgama omalunga neekhilomitha ezingamawaka amabini ukuze babekho kweso siganeko sikhethekileyo. Kwakusenzeka ntoni? Yayingumhla wePentekoste—umthendeleko wolonwabo wamaYuda owawubakho ekupheleni kwexesha lokuvuna irhasi.—Levitikus 23:15-21.
Umsi wawunyuka usuka kumadini awayesesibingelelweni setempile, yaye abaLevi babecula iiHallel (INdumiso 113 ukusa kweye-118). Ngaphambi nje kwentsimbi ye–9:00 kusasa, kwenzeka into eyothusayo. Kwabakho “ingxolo evela ezulwini enjengaleyo kanye yempepho ebhudla ngamandla.” Yazalisa indlu ababehlanganisene kuyo abafundi bakaYesu Kristu abamalunga ne-120. Ingxelo yeZibhalo ithi: “Kwabonakala kubo iilwimi ezingathi zezomlilo kwaye zabèka, lwaza lwaolo lwahlala kuye ngamnye wabo, ibe bonke bazaliswa ngumoya oyingcwele baza baqala ukuthetha ngeelwimi ezahlukileyo, kanye njengoko umoya wawubanika ukuba bathethe amazwi.”—IZenzo 2:1-4.
Ngamnye Uva Ulwimi Lwakowabo
Kamsinya emva koko, abafundi abaninzi baphuma bengumsinga kuloo ndlu. Okumangalisayo kukuba babethetha iilwimi ezahlukahlukeneyo zabantu ababekweso sihlwele! Khawuthelekelele indlela ekwakumangalisa ngayo xa undwendwe olusuka ePersi nomntu waseYiputa besiva ulwimi lwabo luthethwa ngabantu baseGalili. Oku kumele ukuba kwasimangalisa eso sihlwele. Sabuza sisithi: “Ifuna ukuba yintoni na le nto?” Bambi baqalisa ukuhlekisa ngabo bafundi, besithi: “Bazele yiwayini enencasa.”—IZenzo 2:12, 13.
Emva koko umpostile uPetros waphakama waza wathetha nezihlwele. Wacacisa ukuba esi sipho singummangaliso sokuthetha ngeelwimi sasizalisekisa idinga likaThixo awalenza ngomprofeti uYoweli: “Ndiya kuthululela inxalenye yomoya wam phezu kwalo lonke uhlobo lwenyama.” (IZenzo 2:14-21; Yoweli 2:28-32) Ewe, uThixo wayesandul’ ukuthulula umoya wakhe oyingcwele kubafundi bakaYesu. Oku kwakububungqina obucacileyo bokuba uYesu wayevusiwe kwabafileyo yaye ngoku wayesezulwini ngasekunene kukaThixo. UPetros wathi: “Ngoko ke yonke indlu kaSirayeli mayazi ngokuqinisekileyo ukuba uThixo umenze kokubini iNkosi noKristu, lo Yesu nambethelelayo nina.”—IZenzo 2:22-36.
Basabela njani abaphulaphuli? Le ngxelo ithi: “Kwathi xhokro entliziyweni, yaye bathi kuPetros nabanye abapostile: ‘Madoda, bazalwana, sifanele senze ntoni na?’” UPetros waphendula: “Guqukani, yaye ngamnye wenu makabhaptizwe.” Abantu abamalunga nama-3 000 benza kanye loo nto! Emva koko, “baqhubeka bezinikela emfundisweni yabapostile.”—IZenzo 2:37-42.
Ngokuthabatha ukhokelo kwesi sihlandlo sibalaseleyo, uPetros wasebenzisa esokuqala ‘kwizitshixo zobukumkani bamazulu’ uYesu awayethembise ukumnika zona. (Mateyu 16:19) Ezi zitshixo zavula amalungelo akhethekileyo kumaqela ahlukahlukeneyo abantu. Esi sitshixo sokuqala senza amaYuda akwazi ukuba ngamaKristu athanjiswe ngomoya. Kamva, isitshixo sesibini nesesithathu savula ithuba elifanayo kumaSamariya nakwabeeNtlanga ngokulandelanayo.—IZenzo 8:14-17; 10:44-48.
Oko Sikufundayo
Nangona njengeqela esi sihlwele samaYuda namaguquka sasinetyala lokubulala uNyana kaThixo, uPetros wathetha naso ngentlonelo, esibiza ngokuthi “bazalwana.” (IZenzo 2:29) Usukelo lwakhe yayikukusenza siguquke, kungekhona ukusigweba. Ngoko ke, wathetha kakuhle naso. Wabeka izibakala waza waxhasa iingongoma zakhe ngokucaphula iZibhalo.
Abo bashumayela iindaba ezilungileyo namhlanje benza kakuhle ngokulandela umzekelo kaPetros. Bafanele bazame ukuzibeka kwimeko efanayo ukuze bathimbe ingqalelo yabaphulaphuli babo baze baqiqe nabo ngobuchule besebenzisa iZibhalo. Xa inyaniso yeBhayibhile ichazwa ngendlela eyakhayo, abantu abantliziyo zilungileyo baya kusabela.—IZenzo 13:48.
Inzondelelo nenkalipho kaPetros ngomhla wePentekoste yahluke ngokupheleleyo ekukhanyeleni kwakhe uYesu malunga neeveki ezisixhenxe ngaphambili. Ngeso sihlandlo uPetros wathwaxwa kukoyika abantu. (Mateyu 26:69-75) Kodwa uYesu wamthandazela uPetros. (Luka 22:31, 32) Alithandabuzeki elokuba ukubonakala kukaYesu kuPetros emva kokuba evusiwe kwamomeleza lo mpostile. (1 Korinte 15:5) Ngenxa yoko, ukholo lukaPetros aluzange lufiphale. Ngexeshana elingephi, wayeshumayela ngenkalipho. Ngoko ke, washumayela kungekhona ngePentekoste kuphela kodwa ubomi bakhe bonke.
Kuthekani ukuba siye sona ngandlel’ ithile, mhlawumbi njengoPetros? Simele sibonakalise inguquko, sithandazele ukuxolelwa, size sithabathe amanyathelo okufumana uncedo lokomoya. (Yakobi 5:14-16) Ngoko sinokuqhubeka siqinisekile ukuba inkonzo yethu engcwele yamkelekile kuBawo wethu wasezulwini onenceba, uYehova.—Eksodus 34:6.