Indlela Abaveleli Abahambahambayo Abakhonza Ngayo Njengamagosa Athembekileyo
“Ngokomlinganiselo ngamnye afumene ngawo isiphiwo, sisebenziseni ekulungiseleleni omnye komnye njengamagosa amahle obubele obungasifanelanga bukaThixo obubonakaliswa ngeendlela ezahlukahlukeneyo.”—1 PETROS 4:10.
1, 2. (a) Unokulichaza njani igama elithi “igosa”? (b) Ngoobani abaqukiweyo kumagosa asetyenziswa nguThixo?
UYEHOVA usebenzisa onke amaKristu athembekileyo njengamagosa. Ngokufuthi igosa iba ngumkhonzi olawula zonke izinto zendlu. Lisenokude liphathe imicimbi yoshishino lwenkosi yalo. (Luka 16:1-3; Galati 4:1, 2) UYesu wabiza iqumrhu lakhe labathanjiswa abanyanisekileyo basemhlabeni ngokuthi ‘ligosa elithembekileyo.’ Uye wamisela ‘yonke impahla yakhe’ kweli gosa, kuquka nemisebenzi yokushumayela ngoBukumkani.—Luka 12:42-44; Mateyu 24:14, 45.
2 Umpostile uPetros wathi onke amaKristu ngamagosa obubele obungawafanelanga bukaThixo obubonakaliswe ngeendlela ezahlukahlukeneyo. MKristu ngamnye unendawo yakhe anokuphumeza kuyo ubugosa bakhe ngokuthembekileyo. (1 Petros 4:10) Abadala abamiselweyo abangamaKristu bangamagosa, yaye phakathi kwabo kukho nabaveleli abahambahambayo. (Tito 1:7) Bamele bajongwe njani aba baveleli bahambahambayo? Ziziphi iimpawu neenjongo abamele babe nazo? Yaye banokuwuphumeza njani umsebenzi wabo ngendlela esemagqabini?
Umbulelo Ngenkonzo Yabo
3. Kutheni abaveleli abahambahambayo benokubizwa ngokuthi “amagosa amahle”?
3 Sibhalela umveleli ohambahambayo nomfazi wakhe, esinye isibini esitshatileyo esingamaKristu sathi: “Sifuna ukuvakalisa umbulelo ngalo lonke ixesha nothando eniye nalubonakalisa kuthi. Njengentsapho, siye sangenelwa gqitha kulo lonke ukhuthazo namacebiso enu. Siyazi ukuba simele siqhubeke sikhula ngokomoya, kodwa ngoncedo lukaYehova nabazalwana noodade abanjengani, amanzithinzithi okukhula aye enziwa alula.” Amazwi anjengala axhaphakile kuba abaveleli abahambahambayo baba nomdla wobuqu kwabo bakunye nabo, kanye njengokuba igosa elilungileyo lizinyamekela kakuhle iintswelo zendlu. Abanye bazizithethi ezinobuchule. Abaninzi babalasele kumsebenzi wokushumayela, ngoxa abanye besaziwa ngobubele nemfesane abanayo. Ngokuhlakulela nangokusebenzisa iziphiwo ezinjalo ekulungiseleleni abanye, abaveleli abahambahambayo bayakufanelekela ukubizwa ngokuba ‘ngamagosa amahle.’
4. Nguwuphi umbuzo esiza kuwuqwalasela ngoku?
4 Umpostile uPawulos wabhala: “Oko kufunwayo kumagosa kukuba umntu afumaneke ethembekile.” (1 Korinte 4:2) Ukulungiselela amaKristu okhonza nawo kumabandla ahlukeneyo iveki neveki kulilungelo elikhethekileyo nelivuyisayo. Noko ke, kukwayimbopheleleko enzima. Ngoko ke, abaveleli abahambahambayo banokuwenza njani umsebenzi wabo wobugosa ngokuthembeka nangempumelelo?
Ukwenza Umsebenzi Wabo Wobugosa Ngempumelelo
5, 6. Kutheni ukwayama ngoYehova ngomthandazo kubalulekile nje ebomini bomveleli ohambahambayo?
5 Ukwayama ngoYehova ngomthandazo kubalulekile ukuze abaveleli abahambahambayo babe ngamagosa anempumelelo. Ngenxa yocwangciso lwabo neembopheleleko zabo ezininzi, maxa wambi banokuziva besindwa. (Thelekisa eyesi-2 kwabaseKorinte 5:4.) Ngoko kufuneka benze ngokuvisisana nengoma yomdumisi uDavide ethi: “Umthwalo wakho wulahlele kuYehova; yena wokuzimasa; akayi kuliyekela ilungisa lishukunyiswe naphakade.” (INdumiso 55:22) Amanye amazwi athuthuzelayo kaDavide ngala: “Mayibongwe iNkosi [uYehova]; ithwala imithwalo yethu imihla ngemihla.”—INdumiso 68:19.
6 UPawulos wawafumana phi amandla okunyamekela iimbopheleleko zakhe zokomoya? Wabhala: “Ezintweni zonke ndinamandla ngenxa yalowo undomelezayo.” (Filipi 4:13) Ewe, uYehova uThixo wayenguMthombo wamandla kaPawulos. Ngendlela efanayo, uPetros wacebisa: “Ukuba nabani na uyalungiselela, makalungiselele exhomekeke emandleni awanikwa nguThixo; khon’ ukuze kuzo zonke izinto uThixo azukiswe ngoYesu Kristu.” (1 Petros 4:11) Omnye umzalwana owayengumveleli ohambahambayo kangangeminyaka emininzi wabethelela imfuneko yokwayama ngoThixo, esithi: “Khangela kuYehova ngalo lonke ixesha usingatha iingxaki, uze ufune uncedo lwentlangano yakhe.”
7. Ukulungelelana kunokufak’ isandla njani kumsebenzi womveleli ohambahambayo?
7 Ulungelelwano luyimfuneko kumveleli ohambahambayo onempumelelo. Njengamanye amaKristu, uzabalazela ‘ukuqiniseka ngezinto ezibaluleke ngakumbi.’ (Filipi 1:10)a Xa abadala bebandla benombuzo ngombandela othile, kububulumko ukuba babuze umveleli wesiphaluka otyeleleyo. (IMizekeliso 11:14; 15:22) Mhlawumbi, ukujonga kwakhe izinto ngendlela elungeleleneyo nesiluleko esivela kwiZibhalo ziya kungqineka ziluncedo gqitha njengoko abadala beqhubeka besingatha loo mbandela emva kokuba emkile kwelo bandla. Ecinga ngombandela ofanayo, uPawulos wamxelela oku uTimoti: “Nezinto owaziva kum ngokuxhaswa ngamangqina amaninzi, ezi zinto zinikele kubantu abathembekileyo, abaya kuthi, ngokulandelayo, bakufanelekele ngokwaneleyo ukufundisa abanye.”—2 Timoti 2:2.
8. Kutheni ufundisiso lweBhayibhile, uphando nokucamngca zibalulekile?
8 Ufundisiso lweZibhalo, uphando nokucamngca zizinto eziyimfuneko ukuze kunikelwe isiluleko esisengqiqweni. (IMizekeliso 15:28) Omnye umveleli wesithili wathi: “Xa sinentlanganiso nabadala, asimele soyike ukuvuma ukuba asiyazi impendulo kumbuzo othile.” Ukwenza umgudu wokufumana “ingqondo kaKristu” kumbandela othile kukwenza ukwazi ukunikela isiluleko esisekelwe eBhayibhileni esiya kunceda abanye bahambisane nokuthanda kukaThixo. (1 Korinte 2:16) Maxa wambi kuye kufuneke umveleli ohambahambayo abhalele iWatch Tower Society ukuze afumane ulwalathiso. Enoba injani na imeko, ukuba nokholo kuYehova nokuthanda inyaniso kubaluleke gqitha kunokuzakhela igama nokuba zizithethi. Kunokuza ‘ngokugqithisa kwentetho okanye kobulumko,’ uPawulos waqalisa ubulungiseleli bakhe eKorinte ‘ebuthathaka ibe esoyika kwaye engcangcazela kakhulu.’ Ngaba oku kwamenza akaphumelela? Ngokungafaniyo noko, kwabanceda abaseKorinte baba nokholo, kungekhona ‘ebulumkweni babantu, kodwa kumandla kaThixo.’—1 Korinte 2:1-5.
Ezinye Iimpawu Ezibalulekileyo
9. Kutheni uvelwano lufuneka kubadala abahambahambayo?
9 Ukuba novelwano kunceda abaveleli abahambahambayo babe nemiphumo emihle. UPetros wabongoza onke amaKristu ukuba ‘abonakalise imvakalelo yobudlelane,’ okanye abe ‘nolwazelelo.’ (1 Petros 3:8, umbhalo osemazantsi weNW) Omnye umveleli wesiphaluka uvakalelwa kukuba kukho imfuneko ‘yokuba nomdla kumntu wonke ebandleni nokunikel’ ingqalelo yokwenene.’ Enesimo sengqondo esifanayo, uPawulos wabhala: “Yibani nemihlali kunye nabantu abanemihlali; lilani kunye nabantu abalilayo.” (Roma 12:15) Isimo sengqondo esinjalo sishukumisela abaveleli abahambahambayo ekubeni benze umgudu onyanisekileyo wokuqonda iingxaki neemeko zabakhonza kunye nabo. Banokwandula ke banikele isiluleko esakhayo esingokweZibhalo esinokuba nemiphumo emihle ngokwenene ukuba siyasetyenziswa. Umveleli wesiphaluka othile obalaseleyo ekubonakaliseni uvelwano wafumana le leta ivela kwibandla elikufutshane neTurin, eItali: “Ukuba ufuna ukubangela umdla, yiba nomdla; ukuba ufuna ukuyolisa, yiba liyolisa; ukuba ufuna ukuthandwa, thandeka; ukuba ufuna ukuncedwa, kulungele ukunceda. Ezi zizinto esiye sazifunda kuwe!”
10. Baye bathini abaveleli besiphaluka nabesithili ngokuthobeka, ibe nguwuphi umzekelo owamiselwa nguYesu kulo mba?
10 Ukuthobeka nokungeneka ngokulula kuyabanceda abaveleli abahambahambayo benze umsebenzi oyingenelo. Omnye umveleli wesiphaluka wathi: “Kubaluleke gqitha ukuhlala unesimo sengqondo sokuthobeka.” Walumkisa abaveleli abahambahambayo abasebatsha esithi: “Ningazivumeli ukuba niphenjelelwe ngokungafanelekanga ngabazalwana abazizityebi ngenxa yoko basenokunenzela kona, yaye ningafanele niphelelisele ubuhlobo benu kwabo kuphela, kodwa ngalo lonke ixesha nifanele nizabalazele ukuqhubana nabanye ngaphandle kokukhetha ubuso.” (2 Kronike 19:6, 7) Yaye umveleli ohambahambayo othobeke ngokwenene akayi kuzigqala njengobaluleke gqitha njengommeli woMbutho. Umveleli othile wesithili wagqabaza ngokufanelekileyo esithi: “Yiba ngothobekileyo yaye ukulungele ukuphulaphula abazalwana. Yiba ngongenekayo ngalo lonke ixesha.” Njengoyena mntu ubalaseleyo owakha waphila, uYesu Kristu wayesenokubenza bangakhululeki abantu, kodwa wayethobekile yaye kulula ukuthetha naye kangangokuba nabantwana babeziva bekhululekile xa ekho. (Mateyu 18:5; Marko 10:13-16) Abaveleli abahambahambayo bafuna ukuba abantwana, abakwishumi elivisayo, abantu abakhulu—eneneni wonk’ ubani ebandleni—bazive bekhululekile ukuthetha nabo.
11. Xa kuyimfuneko, kunokuba nawuphi umphumo ukucela uxolo?
11 Kakade ke, “sonke siyakhubeka izihlandlo ezininzi,” yaye akakho umveleli ohambahambayo ongazenziyo iimpazamo. (Yakobi 3:2) Xa ephazamile, ukucela uxolo ngokunyanisekileyo kumisela umzekelo wokuthobeka kwabanye abadala. Ngokutsho kweMizekeliso 22:4, “umvuzo wolulamo kukoyika [ngentlonelo] uThixo, bubutyebi, nozuko, nobomi.” Yaye ngaba akuyomfuneko ngabo bonke abakhonzi bakaThixo ukuba ‘bahambe noThixo wabo ngokuthozamileyo’? (Mika 6:8) Xa wayebuzwa ukuba liliphi icebiso anokulinika umdala ohambahambayo omtsha, omnye umveleli wesiphaluka wagqabaza esithi: “Yiba nentlonelo enzulu ngabo bonke abazalwana, uze ubajonge njengababhetele kunawe. Uya kufunda lukhulu kubazalwana. Hlala uthobekile. Yiba nguloo mntu unguye. Musa ukuzenza umntu ongenguye.”—Filipi 2:3.
12. Kutheni kubalulekile nje ukuba nenzondelelo kubulungiseleli bamaKristu?
12 Inzondelelo kubulungiseleli bamaKristu yenza oko kuthethwa ngumveleli ohambahambayo kuvakale. Enyanisweni, xa yena nomkakhe bemisela umzekelo wenzondelelo kumsebenzi wokuhambisa ivangeli, abadala, abafazi babo kunye nalo lonke ibandla bayakhuthazwa ukuba babonakalise inzondelelo kubulungiseleli babo. Omnye umveleli wesiphaluka wabongoza esithi: “Yiba nenzondelelo kubulungiseleli.” Wahlabela mgama esithi: “Ndiye ndafumanisa ukuba ngokuqhelekileyo, okukhona ibandla lisiba nenzondelelo kubulungiseleli, okukhona zisiba mbalwa iingxaki eliba nazo.” Omnye umveleli wesiphaluka wagqabaza: “Ndicinga ukuba ukuba abadala basebenza entsimini nabazalwana noodade baze babancede banandiphe ubulungiseleli, oku kuya kubenza babe noxolo lwengqondo nolona lwaneliseko lukhulu ekukhonzeni uYehova.” Umpostile uPawulos ‘waqweba inkalipho yokuthetha iindaba ezilungileyo zikaThixo kwabaseTesalonika ngokuzabalaza okukhulu.’ Akumangalisi ngoko ukuba babe neenkumbulo ezintle ngotyelelo nangomsebenzi wakhe wokushumayela baze balangazelele ukumbona kwakhona!—1 Tesalonika 2:1, 2; 3:6.
13. Yintoni umveleli ohambahambayo ayizisa engqalelweni yakhe xa esebenza nomnye umKristu kwinkonzo yasentsimini?
13 Xa esebenza namaKristu akhonza nawo kubulungiseleli basentsimini, umveleli ohambahambayo unikela ingqalelo kwiimeko zabo nokusikelwa kwabo umda. Nangona amacebiso akhe esenokuba luncedo, uyazi ukuba abanye banokoyika xa beshumayela nomdala onamava. Noko ke, kwiimeko ezithile ukhuthazo lunokuba luncedo ngaphezu kwesiluleko. Xa epheleka abavakalisi okanye oovulindlela kwisifundo seBhayibhile, basenokukhetha ukuba asiqhube. Oku kusenokubenza baqhelane neendlela ezithile zokuphucula iindlela zabo zokufundisa.
14. Kutheni kunokuthiwa abaveleli abahambahambayo abanenzondelelo bavuselela inzondelelo kwabanye?
14 Abaveleli abahambahambayo abanenzondelelo bavuselela inzondelelo nakwabanye. Omnye umveleli wesiphaluka waseUganda wahamba ngeenyawo phakathi kwehlathi elishinyeneyo kangangeyure epheleka umzalwana othile kwisifundo seBhayibhile esasingenzi nkqubela ingako. Ebudeni bolo hambo imvula yana kanobom kangangokuba bafika bemanzi. Xa amalungu amathandathu aloo ntsapho afumanisa ukuba undwendwe lwawo lwalungumveleli ohambahambayo, achukumiseka gqitha. Ayesazi ukuba abefundisi becawa yawo babengenakuze babonakalise umdla ngolo hlobo kumhlambi. KwiCawa elandelayo, aya ezintlanganisweni okwesihlandlo sokuqala aza avakalisa umnqweno wokuba ngamaNgqina kaYehova.
15. Ngawaphi amava amahle awaba nawo omnye umveleli wesiphaluka onenzondelelo waseMexico?
15 Kwilizwana laseMexico iOaxaca, omnye umveleli wesiphaluka wenza umgudu ekwakungalindelekanga ukuba awenze. Wenza ilungiselelo lokuhlala kwisisele sentolongo ubusuku obune ukuze atyelele iqela lamabanjwa asixhenxe awayeqalisa ukuba ngabavakalisi boBukumkani. Kangangeentsuku eziliqela wayepheleka la mabanjwa njengoko ayenikela ubungqina kwisisele ngesisele yaye eqhuba izifundo zeBhayibhile. Ngenxa yomdla owabonakaliswayo, ezinye zezi zifundo zaqhutywa de kwasebusuku. Lo mveleli wesiphaluka unenzondelelo ubhala oku: “Ekupheleni kolo tyelelo, mna nala mabanjwa savuya gqitha ngenxa yokhuthazo esalufumanayo.”
16. Kutheni kuyingenelo kangaka ukunikela ukhuthazo kwabaveleli abahambahambayo nabafazi babo?
16 Abaveleli abahambahambayo bazama ukuba ngabalukhuthazo. Xa uPawulos watyelela amabandla aseMakedoniya, ‘wawakhuthaza ngamazwi amaninzi.’ (IZenzo 20:1, 2) Amazwi alukhuthazo anokuba luncedo gqitha ekubekeleni abaselula nabakhulileyo usukelo lokomoya. Kwelinye isebe elikhulu leWatch Tower Society, uphando olungacwangciswanga olwenziwayo lwabonisa ukuba abaveleli besiphaluka babekhuthaze abamalunga nama-20 ekhulwini abo basebenzi bokuzithandela ukuba bangenele inkonzo yexesha elizeleyo. Ngomzekelo wakhe omhle njengomvakalisi woBukumkani wexesha elizeleyo, umfazi womveleli wesiphaluka naye uzingqina engumthombo omkhulu wokhuthazo.
17. Uvakalelwa njani omnye umveleli wesiphaluka osele ekhulile ngelungelo lakhe lokunikela uncedo kwabanye?
17 Abakhulileyo nemiphefumlo edandathekileyo bakufuna ngokukhethekileyo ukukhuthazwa. Omnye umveleli wesiphaluka osele ekhulile ubhala oku: “Inkalo yomsebenzi wam ebangela uvuyo olungathethekiyo entliziyweni yam lilungelo lokunikela uncedo kwabapholileyo nababuthathaka emhlambini kaThixo. Amazwi akweyabaseRoma 1:11, 12 aye anentsingiselo ekhethekileyo kum, ekubeni ndifumana ukhuthazo namandla amakhulu ngoxa ‘ndinikela isiphiwo esithile sokomoya kubo ukuze benziwe baqine.’”
Umvuzo Womsebenzi Wabo Ovuyisayo
18. Abaveleli abahambahambayo banaziphi iinjongo ezingokweZibhalo?
18 Abaveleli abahambahambayo basoloko becinga ngezona zilangazelelo zintle zabo bakholwa kunye nabo. Bafuna ukomeleza amabandla baze bawakhe ngokomoya. (IZenzo 15:41) Omnye umveleli ohambahambayo uyazibhokoxa “ukuze anikele ukhuthazo, ahlaziye yaye akhuthaze umnqweno wokuzalisekisa ubulungiseleli nokuqhubeka enyanisweni.” (3 Yohane 3) Omnye uzabalazela ukomeleza abanye akhonza nabo elukholweni. (Kolose 2:6, 7) Khumbula ukuba umveleli ohambahambayo ‘lidlelane lokwenene edyokhweni,’ akayonkosi phezu kokholo lwabanye. (Filipi 4:3; 2 Korinte 1:24) Utyelelo lwakhe lusisihlandlo sokhuthazo nesomsebenzi owongezelelekileyo, kunye nethuba lequmrhu labadala lokuhlola inkqubela eye yenziwa nokucinga ngosukelo lwexesha elizayo. Ngoko akuthethayo nangomzekelo awumiselayo, abavakalisi bebandla, oovulindlela, izicaka zolungiselelo nabadala banokulindela ukwakhiwa nokuvuselelwa ukuze benze umsebenzi ophambi kwabo. (Thelekisa eyoku-1 kwabaseTesalonika 5:11.) Ngoko ke, zixhaseni ngentliziyo epheleleyo izihlandlo zotyelelo lomveleli wesiphaluka, nize niyisebenzise ngokupheleleyo inkonzo enikelwa ngumveleli wesithili.
19, 20. Abaveleli abahambahambayo nabafazi babo baye bavuzwa njani ngenxa yokukhonza kwabo ngokuthembeka?
19 Abaveleli abahambahambayo nabafazi babo bavuzwa ngokutyebileyo ngenxa yokukhonza kwabo ngokuthembeka, ibe banokuqiniseka ukuba uYehova uya kubasikelela ngenxa yezinto ezilungileyo abazenzayo. (IMizekeliso 19:17; Efese 6:8) UGeorg noMagdalena basisibini esikhulileyo esiye sakhonza kangangeminyaka emininzi kumsebenzi wokuhambahamba. Kwindibano eyayiseLuxembourg, uMagdalena wadibana nomntu othile awayenikele ubungqina kuye kwiminyaka engama-20 eyadlulayo. Umdla weli bhinqa lingumYuda enyanisweni wavuselelwa luncwadi lweBhayibhile olwashiywa nguMagdalena kulo, ibe ethubeni labhaptizwa. UGeorg wadibana nodade wokomoya owakhumbula utyelelo lwakhe kwikhaya lakhe kwiminyaka emalunga nama-40 eyadlulayo. Intshumayelo yakhe eyanikelwa ngehlombe yeendaba ezilungileyo ekugqibeleni yabangela ukuba yena nomyeni wakhe bayamkele inyaniso. Alithandabuzeki elokuba uGeorg noMagdalena babenemincili.
20 Ubulungiseleli obabuneziqhamo bukaPawulos e-Efese bamzisela uvuyo yaye busenokuba bamshukumisela ekubeni acaphule amazwi kaYesu athi: “Kukho uyolo olungakumbi ekupheni kunokuba lukho ekwamkeleni.” (IZenzo 20:35) Ekubeni umsebenzi wokuhambahamba ubandakanya ukupha ngokuqhubekayo, abo bawenzayo bafumana ulonwabo, ngokukodwa xa bebona imiphumo emihle yokubulaleka kwabo. Omnye umveleli wesiphaluka owanceda umdala owayedimazekile waxelelwa oku kwileta awayeyibhalelwe: “Uye waba ‘luncedo olomeleza’ gqitha ebomini bam bokomoya—ngaphezu kokuba usazi. . . . Akunakuze uluqonde ngokupheleleyo uncedo oye waba lulo kuAsafu wale mihla, ‘onyawo zakhe ziphantse ukumka.’”—Kolose 4:11; INdumiso 73:2.
21. Kutheni unokuthi eyoku-1 kwabaseKorinte 15:58 ibhekisela kwimisebenzi yabaveleli abahambahambayo?
21 UmKristu othile osele ekhulile owayekumsebenzi wokuhambahamba kangangeminyaka uthanda ukucinga ngeyoku-1 kwabaseKorinte 15:58, apho uPawulos wabongoza esithi: “Qinani, ningabi nakushenxiswa, nisoloko ninokuninzi kokwenza emsebenzini weNkosi, nisazi ukuba ukubulaleka kwenu akulolize ngokunxibelelene neNkosi.” Ngokuqinisekileyo abaveleli abahambahambayo banokuninzi abamele bakwenze emsebenzini weNkosi. Ibe hayi indlela esinombulelo ngayo ekubeni bekhonza ngovuyo njengamagosa athembekileyo obubele obungasifanelanga bukaYehova!
[Umbhalo osemazantsi]
a Bona inqaku elithi “Ngaba Unokuvuya Unokuninzi Omele Ukwenze?” kwiMboniselo kaMeyi 15, 1991, iphepha 28-31.
Ubuya Kuphendula Njani?
◻ Kutheni abaveleli abahambahambayo benokugqalwa “njengamagosa amahle”?
◻ Ziziphi ezinye zeenkalo ezinceda abaveleli besiphaluka nabesithili benze umsebenzi olunge ngakumbi?
◻ Kutheni intobeko nenzondelelo zibaluleke kangaka kwabo benza umsebenzi wokuhambahamba?
◻ Ziziphi iinjongo ezintle abanazo abaveleli abahambahambayo?
[Umfanekiso okwiphepha 16]
Abaveleli abahambahambayo bazabalazela ukukhuthaza abo bakhonza kunye nabo
[Imifanekiso ekwiphepha 17]
Abaselula nabakhulileyo banokungenelwa ngokufanayo ngokunxulumana nabaveleli abahambahambayo nabafazi babo
[Umfanekiso okwiphepha 18]
Ubulungiseleli obunenzondelelo bomveleli ohambahambayo bukhuthaza inzondelelo kwabanye