Ngaba Ulangazelela Ukukhonza Ngokuzele Ngakumbi?

ULAURA uthi: “Ndandimqumbele uYehova. Ndandithandaza ndithandazile ndicela ukuba asincede silungise iingxaki zethu zemali ukuze ndiqhubeke nobuvulindlela—kodwa ndatsho phantsi. Ekugqibeleni kwafuneka ndiyeke ubuvulindlela. Ndimele ndivume ukuba ndandibamonela abo babekwazi ukuqhubeka.”

Kwakhona, khawuqwalasele imeko kaMichael, isicaka solungiselelo kwibandla lamaNgqina kaYehova. Wayezabalazela ukukhonza njengomveleli. (1 Timoti 3:1) Xa ulangazelelo lwakhe lungazange luzaliseke kangangeminyaka eliqela, waqumba kangangokuba wayengasalinyekanga nelo lungelo. Uthi: “Ndandingenakuyithwala intlungu yokuphoxeka kwakhona.”

Ngaba nawe ukhe wakwimeko efanayo? Ngaba kukhe kwafuneka uncame ilungelo elingokobuthixo? Ngokomzekelo, ngaba kukhe kwafuneka uyeke ukukhonza njengovulindlela, umvakalisi woBukumkani wexesha elizeleyo? Okanye ngaba ulangazelela ukufumana amalungelo athile ebandla anikwe abanye? Usenokuba unomnqweno onzulu wokukhonza eBheteli okanye njengomvangeli wasemazweni, kodwa iimeko zakho azivumi.

Incwadi yeMizekeliso iyavuma isithi: “Ukulindela okubanjezelweyo kubulala intliziyo.” (IMizekeliso 13:12) Oku kunokuba njalo ngokukodwa xa abanye befumana loo malungelo unethemba lawo. Ngaba iLizwi likaThixo linikela ingqiqo, intuthuzelo nethemba kuye nabani na ojamelene noko kuphoxeka? Ewe, liyakwenza oko. Enyanisweni, INdumiso yama-84 ivakalisa iimvakalelo zomkhonzi kaYehova owayeneminqweno efanayo engazalisekiyo ngokuphathelele inkonzo kaYehova.

Uxabiso LomLevi

Ababhali beNdumiso yama-84 yayingoonyana bakaKora, abaLevi ababekhonza etempileni kaYehova nababeyigqala njengebalulekileyo inkonzo yabo. Omnye wabo uthi: “Hayi, ukuthandeka kweminquba yakho, Yehova wemikhosi! Umphefumlo wam ulangazelela, uyaphela kukuzilangazelela, iintendelezo zikaYehova; intliziyo yam nenyama yam imemelela kuThixo ophilileyo.”—INdumiso 84:1, 2.

Lo mLevi wayekulangazelela gqitha ukukhonza etempileni kaYehova kangangokuba kwanombono oqhelekileyo wabantu abahamba endleleni eya eYerusalem wawunomtsalane kuye. Uthi: “Bephumela entilini yemithi yeBhaka, bayenza ibe nemithombo.” (INdumiso 84:6) Ewe, indawo ngokuqhelekileyo eyayingumqwebedu yayinjengommandla onamanzi amaninzi.

Ngenxa yokuba lo mdumisi wayengumLevi ongengombingeleli, wayenokukhonza etempileni kangangeveki enye emva kweenyanga ezintandathu. (1 Kronike 24:1-19; 2 Kronike 23:8; Luka 1:5, 8, 9) Elinye ixesha lakhe wayelichitha ekhayeni lakhe kwesinye sezixeko zabaLevi. Ngoko wavuma ingoma esithi: “Intakana le ifumene ikhaya; inkonjane izifumanele indlu, apho izalela khona amathole ayo: Izibingelelo zakho, Yehova wemikhosi, Kumkani wam, Thixo wam.” (INdumiso 84:3) Hayi indlela awayenokuvuya ngayo loo mLevi ukuba wayenokufana neentaka ezazihlala ngokusisigxina etempileni!

Kwakunokuba lula ukuba lo mLevi aqumbe ekubeni wayengakwazi ukukhonza rhoqo etempileni. Noko ke, wayekholiswa yiloo nkonzo wayenokuyinikela, yaye ngokuqinisekileyo wabona ukuba ukuzinikela ngentliziyo iphela kuYehova kwakwanele. Yintoni eyanceda lo mLevi uthembekileyo ukuba ahlale anelisekile ngamalungelo akhe enkonzo?

Funda Ukwaneliseka

Lo mLevi uthi: “Imini enye ezintendelezweni zakho ilungile kunewaka; ndinyule ukuba semnyango endlwini kaThixo wam, kunokuhlala ngaphakathi kweentente zokungendawo.” (INdumiso 84:10) Waqonda ukuba ukuchitha usuku nje endlwini kaYehova kulilungelo elingenakuthelekelelwa. Ibe lo mLevi wayeneentsuku eziliqela zokukhonza etempileni. Ukwaneliseka kwakhe ngamalungelo kwamenza avume ingoma yovuyo.

Kuthekani ngathi? Ngaba siyazibala iintsikelelo zethu, okanye ngaba siye sithand’ ukukulibala oko sele sikuzuzile enkonzweni kaYehova? Ngenxa yokuzinikela kwabo kuye, uYehova uye wathwalisa abantu bakhe amalungelo neembopheleleko ezininzi. La malungelo aquka iimbopheleleko ezinzima zobuveleli, ukwalusa, ukufundisa neenkalo ezahlukahlukeneyo zenkonzo yexesha elizeleyo. Kodwa akwaquka nezinye izinto ezixabisekileyo ezinento yokwenza nokunqula uYehova.

Ngokomzekelo, khawucinge ngobulungiseleli bamaKristu. Umpostile uPawulos ufanisa ilungelo lethu lokushumayela iindaba ezilungileyo nokufumana kwethu ‘ubuncwane ngezitya zomhlaba.’ (2 Korinte 4:7) Ngaba inkonzo enjengale uyijonga njengobuncwane obunexabiso elingathethekiyo? UYesu Kristu, owahlahl’ indlela kumsebenzi wokushumayela ngoBukumkani, wayijonga ngolo hlobo, emisela umzekelo. (Mateyu 4:17) UPawulos wathi: “Ekubeni sinobu bulungiseleli . . . , singayeki.”—2 Korinte 4:1.

Iintlanganiso zamaKristu nazo zililungiselelo elingcwele elingafanele lijongelwe phantsi. Kwiintlanganiso zethu, sifumana imiyalelo ebalulekileyo yaye sinandipha ulwalamano esilufunayo. Kwakhona ezintlanganisweni sinokuluvuma ekuhleni ukholo nethemba lethu ngokugqabaza rhoqo nangokuba nesabelo kucwangciso ngezinye iindlela. (Hebhere 10:23-25) Ngokwenene iintlanganiso zethu zililungiselelo elimele lixatyiswe!

UMichael, okhankanywe ekuqaleni, wazixabisa ngokunzulu ezi ntsikelelo. Kodwa ukuphoxeka kwakhe ngenxa yokungakwazi ukukhonza njengomdala kwamenza akazixabisa okwexeshana. Ngokuphinda anikele ingqalelo kuzo, wakwazi ukuzinza kwakhona waza ngomonde walindela kuYehova.

Kunokuziva singanelisekanga ngenxa yokungafumani ilungelo elithile, senza kakuhle xa siphinda sihlole iindlela uYehova asisikelela ngazo, njengoko wenzayo umdumisi.a Ukuba asiziboni, kufuneka sikhangele kwakhona, sicele uYehova ukuba avule amehlo ethu ukuze sibone amalungelo ethu neendlela asisikelela nasisebenzisa ngazo ukuze kudunyiswe yena.—IMizekeliso 10:22.

Kwakhona kubalulekile ukuqonda ukuba amalungelo akhethekileyo, anjengesikhundla sobuveleli, afuna iimfaneleko ezikhethekileyo. (1 Timoti 3:1-7; Tito 1:5-9) Ngoko kufuneka sizihlole, sikhangele naziphi na iinkalo ekufuneka siphucule kuzo size senze umgudu onyanisekileyo wokuphucula.—1 Timoti 4:12-15.

Musa Ukutyhafa

Ukuba asilifumani ilungelo elithile lenkonzo, asifanele sigqibe kwelokuba uYehova ubathanda ngakumbi abo balifumanayo okanye thina usibandeza okulungileyo. Ngokuqinisekileyo, asifanele sithi ngenxa yomona sicinge ukuba abanye baye ngokungafanelekanga bafumana amalungelo ngenxa yokuba bethandwa kunokuba bamiselwe ngokobuthixo. Ukuba neengcamango ezinjalo kunokukhokelela kumona, ukukhuphisana de kusenze sinikezele ngokupheleleyo.—1 Korinte 3:3; Yakobi 3:14-16.

ULaura, okhankanywe ekuqaleni, akazange anikezele. Ekugqibeleni wazilawula iimvakalelo zakhe zokuqumba nokuba nomona. ULaura wathandaza ngokuphindaphindiweyo kuThixo ecela uncedo ukuze oyise isimo sengqondo esingathandekiyo awayenaso ngenxa yokungakwazi ukuba nguvulindlela. Kwakhona wafuna uncedo kumadoda afanelekayo ebandleni waza waziva eqinisekisiwe ngothando lukaThixo. Wathi: “UYehova wandenza ndanoxolo lwengqondo. Ngoxa mna nomyeni wam singenakuba ngoovulindlela ngoku, siyalixabisa ixesha esasingoovulindlela ngalo ibe ayasomeleza amava esawafumanayo. Kwakhona sinceda unyana wethu osele ekhulile kubuvulindlela bakhe.” Ekubeni anelisekile, ngoku uLaura uyakwazi ukuba “nemihlali kunye nabantu abanemihlali” kwinkonzo yabo yobuvulindlela.—Roma 12:15.

Zibekele Usukelo Olufikelelekayo

Ukwaneliseka kwethu ngamalungelo enkonzo esinawo ngoku akuthethi kuthi masiyeke ukuzibekela usukelo olungakumbi olungokobuthixo. Xa wayexubusha ngokuvuselwa ezulwini, uPawulos wathetha ‘ngokolulela phambili kwizinto ezingaphambili.’ Kwakhona wathi: “Ngokwenqanaba esiye senza inkqubela ukusa kulo, masiqhubeke sihamba ngokulungeleleneyo kulo mzila mnye.” (Filipi 3:13-16) Usukelo olungokobuthixo lunokusinceda solulele phambili. Noko ke, ucelomngeni kukulugcina lulolokwenene.

Usukelo lokwenene lusengqiqweni yaye luyafikeleleka. (Filipi 4:5) Oku akuthethi kuthi usukelo olufuna ukuzibhokoxa kangangeminyaka emininzi alukho ngqiqweni. Usukelo oluthabatha ixesha elide ngolo hlobo lunokufikelelwa ngokuthe ngcembe ngokuzibekela amanqanaba osukelo ofuna ukulufikelela. La manqanaba anokusebenza njengemiqondiso yenkqubela yokomoya. Ukufikelela inqanaba ngalinye ngempumelelo kunokubangela imvakalelo yokwaneliseka kunokuphoxeka.

Imbono Entle

Noko ke, kubalulekile ukuqonda ukuba ngenxa yeemeko nokusikelwa kwethu umda, amanye amalungelo sisenokungawafumani. Ukuzibekela wona njengosukelo kuphela kunokukhokelela kudano nasekuphoxekeni. Usukelo olunjalo lufanele lubekelwe ecaleni, ubuncinane okwangoku. Ukwenza oku akuyi kuba nzima ukuba sithandazela ukwaneliseka okungokobuthixo yaye senza ukuthanda kukaYehova kube yeyona nto siyixhalabele kakhulu. Xa sizabalazela ukufumana amalungelo, luzuko lukaYehova—kungekhona ukunconywa ngezinto esiziphumezileyo—olubalulekileyo. (INdumiso 16:5, 6; Mateyu 6:33) Ngokufanelekileyo iBhayibhile isixelela oku: “Qengqela kuYehova izenzo zakho, zizimaseke iingcinga zakho.”—IMizekeliso 16:3.

Ngokuhlolisisa INdumiso yama-84, sinokubona ukuba lo mdumisi wabonakalisa isimo sengqondo esinjalo kumalungelo enkonzo, ibe uYehova wamsikelela ngokutyebileyo. Ngaphezu koko, le ndumiso iyaqhubeka iyingenelo kubantu bakaYehova ukuza kuthi ga kulo mhla.

Ngokwayama ngoYehova ngomthandazo, unokulungelelanisa ulangazelelo lwakho ngamalungelo angakumbi wanelisekile ngalawo unawo ngoku. Ungaze uvumele umnqweno wokwenza okungakumbi ukuhluthe uxabiso ngoko unako ngoku novuyo lokukhonza uYehova ngonaphakade. Kholosa ngoYehova, kuba ukwenjenjalo kubangela ulonwabo, njengoko ebonisa amazwi omLevi athi: “Yehova wemikhosi, hayi, uyolo lomntu okholose ngawe!”—INdumiso 84:12.

[Imibhalo esemazantsi]

[Ibhokisi ekwiphepha 11]

Usukelo Esinokuzibekela Lona

Ukufunda iBhayibhile imihla ngemihla.—Yoshuwa 1:8; Mateyu 4:4

Ukuphucula amandla ethu okuqonda ngoqeqesho lweZibhalo.—Hebhere 5:14

Ukwakha ulwalamano olusondele ngakumbi noThixo.—INdumiso 73:28

Ukuhlakulela ngasinye kwiziqhamo zomoya.—Galati 5:22, 23

Ukuphucula imithandazo yethu.—Filipi 4:6, 7

Ukuba nobuchule obungakumbi ekushumayeleni nasekufundiseni.—1 Timoti 4:15, 16

Ukufunda nokucamngca ngenkupho nganye yephephancwadi IMboniselo noVukani!—INdumiso 49:3

[Pictures On Page 9]

Xa uzibekela usukelo lobuqu, beka ukwenza ukuthanda kukaThixo tanci