Ukuphiliswa Ngokungummangaliso Koluntu Kusondele
“ASIZANGE siyibone into enjengale.” Atsho njalo amangqina azibonela ngawawo amehlo uYesu ephilisa ngokungummangaliso indoda eyayife amalungu omzimba. (Marko 2:12) Kwakhona uYesu waphilisa abo babeziimfama, izimumu, neziqhwala, yaye abalandeli bakhe benza okufanayo. Wayewafumene phi amandla okwenza oko uYesu? Ukholo lwaba naliphi igalelo? Yintoni esiyiphawulayo ngala mava okuphilisa enkulungwane yokuqala xa sikuthelekisa nokwanamhlanje?—Mateyu 15:30, 31.
“Ukholo Lwakho Lukwenze Waphila”
Abo baphilisa ngokholo namhlanje bayathanda ukucaphula amazwi kaYesu awawathetha kwibhinqa elithile elalinethombo legazi kangangeminyaka eli-12 elalize kucela ukuphiliswa nguye: “Ukholo lwakho lukwenze waphila.” (Luka 8:43-48) Ngaba la mazwi kaYesu abonisa ukuba ukuphila kwalo kwakuxhomekeke kukholo lwalo? Ngaba lowo yayingumzekelo “wokuphilisa ngokholo” njengokuba kusenziwa namhlanje?
Xa sifunda ingxelo yeBhayibhile ngononophelo, siyabona ukuba kwizihlandlo ezininzi uYesu nabafundi bakhe babengafuni ukuba umguli abe nokholo kuqala ngaphambi kokuphiliswa. Ibhinqa ekuthethwe ngalo ngasentla leza yaye, lingazange litsho nelimdaka kuYesu, lachukumisa isinxibo sakhe ngasemva yaye ‘ngephanyazo ithombo lalo legazi layeka.’ Ngesinye isihlandlo, uYesu waphilisa indoda eyayiphakathi kwabo babeze kumbamba. Wade waphilisa nendoda eyayingamazi nokumazi uYesu.—Luka 22:50, 51; Yohane 5:5-9, 13; 9:24-34.
Ngoko, ukholo lwaba nayiphi indima? Xa uYesu nabafundi bakhe babekwisixeko saseTire naseSidon, kweza umfazi othile waseFenike waza wadanduluka esithi: “Yiba nenceba kum, Nkosi, Nyana kaDavide. Intombi yam iphethwe kakubi yidemon.” Yiba nomfanekiso-ngqondweni wonxunguphalo awayenalo xa wathi: “Nkosi, ndincede!” Enosizi uYesu waphendula: “Owu mfazi, ukholo lwakho lukhulu; makwenzeke kuwe njengoko unqwena.” Yaye intombi yakhe yaphiliswa “ukususela ngelo lixa kuse phambili.” (Mateyu 15:21-28) Ngokucacileyo, ukholo lwalubandakanyekile, kodwa ukholo lukabani? Phawula ukuba yayilukholo lukamama, hayi elomntwana owayegula, olwanconywa nguYesu. Yaye ukholo entwenini? Ngokuthi kuYesu “Nkosi, Nyana kaDavide,” lo mfazi wayevuma ekuhleni ukuba uYesu wayenguMesiya othenjisiweyo. Wayengambizi ngolo hlobo nje ngenxa yokuba enokholo kuThixo okanye enokholo kumandla omphilisi. Xa uYesu wathi, “Ukholo lwakho lukwenze waphila,” wayethetha ukuba ukuba babengenalo ukholo kuye njengoMesiya, abo babebandezelekile babengenakuza kuye ukuze baphiliswe.
Ngokusuka kule mizekelo ingokweZibhalo, sinokubona ukuba ukuphilisa kukaYesu kwakwahluke gqitha koko ngokuqhelekileyo kubonwayo okanye kuthiwa kuyenziwa namhlanje. Izihlwele zazingenahlombe ligqithiseleyo—zingxola, zicula, zisenza isijwili, zisifa isiqaqa, njalo njalo—yaye noYesu wayengabonakali ngokungathi ushiywe ziingqondo. Ukongezelela, uYesu akazange oyisakale ukuphilisa abagulayo ngenxa yokuswela ukholo okanye ngenxa yokungabi namnikelo waneleyo.
Ukuphilisa Ngamandla KaThixo
UYesu nabafundi bakhe babephilisa njani? IBhayibhile iphendula ngelithi “amandla kaYehova ayelapho ukuze yena aphilise.” (Luka 5:17) Emva koko kuphiliswa, incwadi kaLuka 9:43 ithi, “baqalisa bonke ukuthi khamnqa ngamandla obungangamsha kaThixo.” Ngokufanelekileyo, uYesu akazange azise ingqalelo kuye siqu njengomphilisi. Ngesinye isihlandlo, wathi kwindoda awayeyikhulule ikhathazwa ziidemon: “Yiya ekhaya kwizalamane zakho, uzixelele zonke izinto uYehova akwenzele zona nenceba aye wanayo kuwe.”—Marko 5:19.
Ekubeni uYesu nabapostile babephilisa ngamandla kaThixo, kulula ukubona isizathu sokuba lwalungasoloko lufuneka ukholo kwabo babephiliswa ukuze baphile. Noko ke, ukholo olomeleleyo kumphilisi lwalufuneka. Ngenxa yoko, xa abalandeli bakaYesu babengakwazi ukugxotha idemon eyayinamandla, uYesu wabaxelela isizathu soko esithi: “Kungenxa yokholo lwenu oluncinane.”—Mateyu 17:20.
Injongo Yokuphilisa Ngokungummangaliso
Nangona uYesu waphilisa kakhulu ebudeni bobulungiseleli bakhe basemhlabeni, usukelo lwakhe oluyintloko ‘lwalungebobulungiseleli bokuphilisa.’ Ukuphilisa kwakhe ngokungummangaliso—awayengazange afune mali okanye acele iminikelo ebantwini ngako—kwakuyinto eza mva kusukelo lwakhe oluyintloko, olo ‘lokushumayela iindaba ezilungileyo zobukumkani.’ (Mateyu 9:35) Ingxelo ibonisa ukuba ngesinye isihlandlo “wazamkela ngobubele waza waqalisa ukuthetha kuzo ngobukumkani bukaThixo, ibe wabaphilisa abo babefuna unyango.” (Luka 9:11) Kwiincwadi zeVangeli, uYesu ngokufuthi wayebizwa ngokuthi “Mfundisi” kodwa akuzange kuthiwe “Mphilisi.”
Ngoko, kwakutheni ukuze uYesu aphilise ngemimangaliso? Ngokuyintloko kwakungenxa yokuze azazise njengoMesiya othenjisiweyo. Xa uYohane uMbhaptizi wayefakwe entolongweni ngokungekho mthethweni, wayefuna ukuqinisekiswa ukuba wakufeza konke awayekuthunywe nguThixo ukuba akwenze. Wathumela abafundi bakhe kuYesu waza wabuza: “UnguLowo Uzayo na, okanye simele silindele omnye owahlukileyo na?” Phawula oko uYesu wakuxelela abafundi bakaYohane: “Hambani indlela yenu nize nixele kuYohane oko nikuvayo noko nikubonayo: Iimfama ziyabona kwakhona, neziqhwala ziyahamba-hamba, abaneqhenqa bayahlanjululwa nezithulu ziyeva, nabafileyo bayavuswa, nabangamahlwempu kuvakaliswa iindaba ezilungileyo kubo.”—Mateyu 11:2-5.
Ewe, isibakala sokuba uYesu engazange aphilise nje kuphela kodwa wenza neminye imimangaliso ebhalwe kwiincwadi zeVangeli zimgxininisa ‘njengaLowo Uzayo,’ uMesiya othenjisiweyo. Kwakungekho mfuneko yokuba umntu ‘alindele owahlukileyo.’
Ukuphilisa Ngemimangaliso Namhlanje?
Ngoko ke, ngaba sifanele silindele ukuba uThixo abonakalise amandla akhe ngokuphilisa? Akunjalo. Ngemisebenzi engummangaliso awayenzayo ngamandla kaThixo, uYesu ngokungathandabuzekiyo wayegxininisa ukuba wayenguMesiya owayethenjiswe nguThixo ukuba uza kuza. Imisebenzi kaYesu yamandla ibhalwe eBhayibhileni ukuze bonke bayifunde. Akukho sizathu sokuba uThixo abonise amandla akhe ngokuphindaphinda izenzo ezinjalo kwisizukulwana ngasinye sabantu.
Okubangel’ umdla kukuba, ukuphilisa neminye imimangaliso yayikhokelela kuphela ukusa kumlinganiselo othile. Kwanamanye amangqina okuzibonela emimangaliso kaYesu akazange akholelwe ukuba wayexhaswa nguYise wasezulwini. “Nangona wayenze imiqondiso emininzi kangaka phambi kwabo, babengakholwa kuye.” (Yohane 12:37) Kungoko, emva kokuxubusha ngezipho ezahlukahlukeneyo zemimangaliso—ukuprofeta, ukuthetha ngeelwimi, ukuphilisa, njalo njalo—uThixo awayezinike amalungu awahlukahlukeneyo ebandla lamaKristu lenkulungwane yokuqala, umpostile uPawulos waphefumlelwa ukuba abhale oku: “Enoba kukho iziphiwo zokuprofeta, ziya kubhangiswa; enoba kukho iilwimi, ziya kuyeka; enoba kukho ulwazi, luya kubhangiswa. Kuba sinolwazi oluyinxenye yaye siprofeta ngokuyinxenye; kodwa xa oko kupheleleyo kufika, oko kuyinxenye kuya kubhangiswa.”—1 Korinte 12:28-31; 13:8-10.
Kakade ke, ukuba nokholo kuThixo kuyimfuneko ukuze kulungelwe thina. Noko ke, ukusekela ukholo lukabani kwizithembiso zobuxoki zokuphilisa kunokukhokelela ekudimazekeni. Ngaphezu koko, ngokuphathelele ixesha lesiphelo, uYesu wanikela esi silumkiso: “Kuya kuvela ooKristu bobuxoki nabaprofeti bobuxoki yaye baya kunika imiqondiso emikhulu nezimanga ukuze balahlekise, ukuba kunokwenzeka, kwanabo banyuliweyo.” (Mateyu 24:24) Ukongozelela ekunyangeni kwabantu abangenalwazi, needemon ziya kubonakalisa amandla azo. Ngenxa yoko, umingi-mingi lweziganeko ezingenakucaciswa alumele lusimangalise, yaye ngokuqinisekileyo ezi ayizozinto ezinokubangela ukuba nokholo lokwenene kuThixo.
Ekubeni kungekho mntu namhlanje ophilisa njengokuba uYesu wenzayo, ngaba siseshweni? Akunjalo konke konke. Eneneni, abo babephiliswe nguYesu ekugqibeleni babeya kugula kwakhona. Bonke bakhula babadala baza bafa. Iingenelo zokuphiliswa abazifumanayo yayizezokwexeshana. Sekunjalo, ukuphilisa kukaYesu ngemimangaliso kuye kwanentsingiselo engakumbi kuba ngumfuziselo weentsikelelo zexesha elizayo.
Kungoko, emva kokuhlolisisa iLizwi likaThixo, iBhayibhile, uAlexandre noBenedita, ekuthethwe ngabo ekuqaleni, bengasakholelwa kukuphilisa kwanamhlanje ngokholo nokuphiliswa ngemimoya. Kwangaxeshanye, beyisekile kukuba ukuphilisa ngemimangaliso akuyonto yexesha elidluleyo. Kutheni kunjalo nje? Njengezigidi ehlabathini lonke, bakhangele phambili kwiintsikelelo zokuphiliswa phantsi koBukumkani bukaThixo.—Mateyu 6:10.
Ukugula Nokufa Akusekho
Njengokuba sesibonile ngaphambilana, injongo ephambili kubulungiseleli bukaYesu yayingekokuphilisa abagulayo nokwenza imimangaliso. Kunoko, wawenza undoqo umsebenzi wokushumayela iindaba ezilungileyo zoBukumkani bukaThixo. (Mateyu 9:35; Luka 4:43; 8:1) Ngobo Bukumkani uThixo uya kuphilisa uluntu ngokungummangaliso aze aphelise wonke umonakalo obangelwe sisono nokungafezeki kwintsapho engabantu. Oku uya kukufeza njani yaye nini?
Ekhangela phambili kwiinkulungwane ezizayo, uKristu uYesu wanikela kumpostile wakhe uYohane lo mbono: “Ngoku lufikile usindiso namandla nobukumkani boThixo wethu negunya likaKristu wakhe, ngenxa yokuba uye waphoswa phantsi ummangaleli wabazalwana bethu, obamangalela imini nobusuku phambi koThixo wethu!” (ISityhilelo 12:10) Bonke ubungqina bubonisa ukuba ukususela ngowe-1914 umchasi kaThixo omkhulu, uSathana, uye walahlelwa phantsi kummandla womhlaba, yaye ngoku uBukumkani bulawula ngokoqobo! UYesu uye wamiselwa njengoKumkani woBukumkani obungoMesiya yaye ngoku sele ekulungele ukwenza iinguqulelo ezinkulu emhlabeni.
Kungekudala, urhulumente wasezulwini kaYesu uya kulawula ibutho elitsha labantu abanobulungisa, eneneni ‘umhlaba omtsha.’ (2 Petros 3:13) Ngelo xesha iimeko ziya kuba njani? Naku okunye okubangel’ umdla: “Ndabona izulu elitsha nomhlaba omtsha; kuba izulu langaphambili nomhlaba wangaphambili wadlula . . . Kwaye [uThixo] uya kuzisula zonke iinyembezi emehlweni alo, yaye ukufa akusayi kubakho, kungayi kubakho nakukhedama nasikhalo nantlungu kwakhona. Izinto zangaphambili zidlule.”—ISityhilelo 21:1, 4.
Ngaba unawo umfanekiso-ngqondweni wendlela ubomi obuya kuba yiyo xa ukuphiliswa koluntu ngokungummangaliso kuya kuzaliseka? “Akayi kuthi ummi wakhona, Ndiyafa; abantu abahleliyo khona babuxolelwe ubugwenxa babo.” Ewe, uThixo uya kuphumeza oko kungenakwenziwa ngabaphilisa ngokholo. ‘Uya kuginya ukufa kuphele.’ Ngokwenene, “izisule iNkosi uYehova iinyembezi ebusweni bonke.”—Isaya 25:8; 33:24.
[Umfanekiso okwiphepha 7]
Phantsi koBukumkani bukaThixo uluntu luya kuphiliswa ngokungummangaliso