Unokubakhusela Njani Abantwana Bakho?

EMVA kokufunda kangangeminyaka kwisikolo sasekuhlaleni, uWernera waqalisa izifundo ezithe vetshe nabanye abantwana abangama-3000 eSão Paulo, eBrazil. Wayeqala ukubona abantwana afunda nabo bethengisa yaye besebenzisa iziyobisi. Ngenxa yokuba wayenomzimba omncinane, wakhawuleza walilifa lokuchukelwa ngabanye abafundi nokuvuyelelwa ngabafundi abadala kuye ngendlela ebuhlungu.

Udade boWerner uEva naye wayeneengxaki. Ekubeni wayezimisele, wafunda ngamandla kangangokuba wadinwa waza waphazamiseka engqondweni. Njengabanye abafikisayo, uWerner noEva babefuna ukukhuselwa emzimbeni nangokweemvakalelo. Bafuna ukuncedwa njani abantwana bakho? Unokubalungiselela njani ubomi bobuntu obukhulu? Ngeliphandle, ubafunela ikamva elinjani abantwana bakho?

Akumele Uphelele Nje Ekubondleni

Khawucinge nje ngocelomngeni abajamelana nalo abazali ekukhuseleni abantwana babo namhlanje. Ngenxa yokuwohloka kobomi bentsapho nokwanda kobuhlwempu, kumazwe amaninzi inani labantwana abahlala ezitratweni liyanda. Isizathu sokuba abantwana baphangele kungenxa yokuba abakhuselwa ekuxhatshazweni. Kwakhona ukusebenzisa iziyobisi kuyabenzakalisa abaselula abaninzi. Ngokomzekelo, xa othile oselula waseBrazil wakhotyokiswa ziziyobisi, akuzange kuphinde kubekho xolo ekhayeni lakhe. Phezu kwayo nje intlungu abajamelana nayo abazali bakhe, yayingekho imali yokuhlawula iindleko zokuncedwa kwakhe, yaye abathengisi beziyobisi abangenanceba babesiya ekhayeni lakhe befuna ukuhlawulwa.

Noko ke, phezu kwazo nje iingcinezelo zobomi, abazali abaninzi bayaqhubeka bebanika abantwana babo kungekuphela nje ukutya, impahla nekhusi kodwa kwakhona bayabakhusela kugonyamelo, ekusebenziseni kakubi iziyobisi nakwezinye iingxaki. Lo ngumzamo omkhulu, kodwa ngaba wanele? Kuthekani ngokubakhusela ekwenzakaleni ngokomoya nangokweemvakalelo? Uninzi lufumanisa ukuba ukuba ngumzali ophumelelayo kuquka ukoyisa ucelomngeni olubandakanya indlela abantwana ababakhetha ngayo abahlobo nokuzihlaziya. Sekunjalo, abazali banokukuphepha njani ukubakhusela ngokugqith’ emgceni okanye ukuba ngoovula zibhuqe? Sicela ukhe uqwalasele iimpendulo ezifumaneka kwinqaku elilandelayo.

[Imibhalo esemazantsi]