Nikela Ingqalelo Rhoqo Kwimfundiso Yakho
“Nikela ingqalelo rhoqo kuwe nakwimfundiso yakho. Hlala kwezi zinto, kuba ngokwenza oku uya kusindisa kokubini wena nabo bakuphulaphulayo.”—1 TIMOTI 4:16.
1, 2. Kutheni befuneka ngokungxamisekileyo abafundisi abanenzondelelo namhlanje?
“HAMBANI . . . nize nenze abafundi abantu beentlanga zonke, . . . nibafundisa ukuba bagcine zonke izinto endiye ndaniyalela zona.” (Mateyu 28:19, 20) Ngokuphathelele lo myalelo kaYesu Kristu, onke amaKristu amele azabalazele ukuba ngabafundisi. Kufuneka abafundisi abanenzondelelo ukuze bancede abantliziyo zinyanisekileyo bazuze ulwazi ngoThixo ngaphambi kokuba bashiywe lixesha. (Roma 13:11) Umpostile uPawulos wabongoza: “Lishumayele ilizwi, ube kulo ngokungxamisekileyo ngexesha elilungileyo, ngexesha lenkathazo.” (2 Timoti 4:2) Oku kuthetha ukufundisa ngaphakathi nangaphandle ebandleni. Enyanisweni, umyalelo wokushumayela ubandakanya okungakumbi kunokuvakalisa nje isigidimi sikaThixo. Kufuneka imfundiso echukumisayo ukuba abanomdla baza kuba ngabafundi.
2 Siphila ‘kumaxesha amanqam ekunzima ukuqhubana nawo.’ (2 Timoti 3:1) Abantu baye bathinjwa iingqondo ziintanda-bulumko zehlabathi neemfundiso zobuxoki. Abaninzi ‘basebumnyameni ngengqondo’ yaye ‘abasaziva konke konke ngokokuziphatha.’ (Efese 4:18, 19) Bambi benzakele ngokweemvakalelo. Ewe, enyanisweni abantu ‘bahlinzekile yaye balahliwe njengezimvu ezingenaye umalusi.’ (Mateyu 9:36) Noko ke, sinako ukubanceda abantliziyo zinyanisekileyo ngokusebenzisa ubugcisa bokufundisa, ukuze benze iinguqulelo eziyimfuneko.
Abafundisi Ebandleni
3. (a) Umyalelo kaYesu wokufundisa uquka ntoni? (b) Ngoobani abanembopheleleko eyintloko yokufundisa ebandleni?
3 Ngelungiselelo lesifundo seBhayibhile sasekhaya, izigidi zabantu ziyafundiswa. Noko ke, emva kokuba bebhaptiziwe, aba basebatsha bafuna uncedo olungakumbi ukuze ‘bamiliselwe baze bamiselwe kwisiseko.’ (Efese 3:17) Njengoko siphumeza umyalelo kaYesu obhalwe kuMateyu 28:19, 20, yaye sibalathisela kwintlangano kaYehova abasebatsha, bayangenelwa ngokufundiswa ebandleni. Ngokutsho kwayabase-Efese 4:11-13, amadoda aye amiselwa ukuze akhonze ‘njengabalusi nabafundisi, ngenjongo yokulungiswa ngokutsha kwabo bangcwele, ukwenzela umsebenzi wobulungiseleli, ukuze kwakhiwe umzimba kaKristu.’ Maxa wambi ubuchule babo bokufundisa buquka imfuneko ‘yokohlwaya, ukuthethisa, ukubongoza, ngako konke ukuzeka kade umsindo.’ (2 Timoti 4:2) Umsebenzi wabafundisi wawubaluleke kangangokuba, xa wayebhalela abaseKorinte, uPawulos ubala abafundisi nje emva kwabapostile nabaprofeti.—1 Korinte 12:28.
4. Ubuchule bokufundisa businceda njani ukuze sithobele umyalelo kaPawulos okumaHebhere 10:24, 25?
4 Liyinyaniso elokuba, asingawo onke amaKristu akhonza njengabadala, okanye abaveleli. Sekunjalo, onke akhuthazwa ukuba avuselelane “eluthandweni nasemisebenzini emihle.” (Hebhere 10:24, 25) Ukwenjenjalo ezintlanganisweni kuquka amagqabaza alungiselelwe kakuhle naphuma entliziyweni anokubakha aze abakhuthaze abanye. Abavakalisi boBukumkani abanamava nabo ‘basenokuvuselela emisebenzini emihle’ ngokudlulisela ulwazi namava abanawo kwabatsha xa besebenza nabo kubulungiseleli basentsimini. Kumaxesha anjalo nakwizihlandlo ezingacwangciswanga, kunokudluliselwa imfundiso exabisekileyo. Ngokomzekelo, amabhinqa aqolileyo abongozwa ukuba abe “ngabafundisi boko kulungileyo.”—Tito 2:3.
Ukoyiselwa Ekukholelweni
5, 6. (a) UbuKristu bokwenyaniso bahluka njani kunqulo lobuxoki? (b) Abadala babanceda njani abasebatsha ukuba benze izigqibo ngobulumko?
5 UbuKristu bokwenyaniso bahluke ngokupheleleyo kwiinkonzo zobuxoki, inkoliso yazo efuna ukulawula iindlela zokucinga zamalungu azo. Xa uYesu wayesemhlabeni, iinkokeli zonqulo zazifuna ukulawula zonke iinkalo zobomi babantu ngezithethe ezicinezelayo ezimiselwe ngabantu. (Luka 11:46) Ngokufuthi abefundisi beNgqobhoko baye benza okufanayo.
6 Noko ke, unqulo lokwenyaniso ‘luyinkonzo engcwele’ esiyinikela ‘ngokwamandla ethu engqiqo.’ (Roma 12:1) Abakhonzi bakaYehova ‘beyiselwa ekukholelweni.’ (2 Timoti 3:14) Maxa wambi, abo bakhokelayo kusenokufuneka bamisele ulwalathiso nemigaqo ethile ukuze izinto zihambe ngokutyibilikayo ebandleni. Noko ke, kunokufuna ukwenzela amanye amaKristu izigqibo, abadala bawafundisa “ukubalula kokubini okulungileyo nokubi.” (Hebhere 5:14) Ngokuyintloko abadala bakwenza oku ngokondla ibandla “ngamazwi okholo nawemfundiso entle.”—1 Timoti 4:6.
Ukunikela Ingqalelo Kwimfundiso Yakho
7, 8. (a) Abantu abangenabuchule bungako bakwazi njani ukufundisa? (b) Yintoni ebonisa ukuba kufuna umgudu kumntu ngamnye ukuze abe ngumfundisi ophumelelayo?
7 Noko ke, makhe sibuyele kuthumo lwethu lokufundisa. Ngaba kufuneka ubuchule, imfundo okanye amandla akhethekileyo ukuze sibe nesabelo kulo msebenzi? Akunjalo. Ubukhulu becala, lo msebenzi wehlabathi lonke wokufundisa wenziwa ngabantu nje abaqhelekileyo abangenabuchule bungako. (1 Korinte 1:26-29) UPawulos ucacisa esithi: “Sinabo obu buncwane [ubulungiseleli] ngezitya zomhlaba [imizimba engafezekanga], ukuze amandla angaphaya koko kuqhelekileyo abe ngakaThixo yaye ingabi ngalawo aphuma kuthi.” (2 Korinte 4:7) Impumelelo enkulu eye yabonakala emhlabeni wonke kumsebenzi wokushumayela ngoBukumkani iyimbonakaliso yamandla omoya kaYehova!
8 Noko ke, kufuneka umgudu wenkuthalo kumntu ngamnye ukuze abe ‘ngumsebénzi ongenanto anokuba neentloni ngayo, oliphatha ngokufanelekileyo ilizwi lenyaniso.’ (2 Timoti 2:15) UPawulos wabongoza uTimoti esithi: “Nikela ingqalelo rhoqo kuwe nakwimfundiso yakho. Hlala kwezi zinto, kuba ngokwenza oku uya kusindisa kokubini wena nabo bakuphulaphulayo.” (1 Timoti 4:16) Ubani uyinikela njani ingqalelo kwimfundiso yakhe ngaphakathi okanye ngaphandle kwebandla? Ngaba ukwenjenjalo kubandakanya ukuba nobuchule obuthile okanye ubugcisa bokufundisa?
9. Yintoni ebalulekileyo ngaphezu kobuchule bemvelo?
9 Ngokucacileyo uYesu wabonakalisa ubuchule obukhethekileyo bokufundisa kwiNtshumayelo yakhe yaseNtabeni edume kunene. Ukugqiba kwakhe ukuthetha, “izihlwele zathi khamnqa yindlela yakhe yokufundisa.” (Mateyu 7:28) Kakade ke, akukho namnye kuthi onokufundisa njengoYesu. Noko ke, akuyomfuneko ukuba side sibe ngamaciko ukuze sibe ngabafundisi abaphumelelayo. Kaloku, ngokutsho kukaYobhi 12:7, ‘kwaneenkomo neentaka zezulu’ zinokufundisa nangona zingathethi! Ngaphezu kwabo nabuphi na ubuchule bemvelo okanye ubugcisa esisenokuba nabo, okona kubalulekileyo “luhlobo . . . lwabantu” esilulo—iimpawu esinazo noqheliselo lokomoya esiye saluhlakulela olunokuxeliswa ngabafundi.—2 Petros 3:11; Luka 6:40.
Abafundi BeLizwi LikaThixo
10. UYesu wawumisela njani umzekelo omhle njengomfundi weLizwi likaThixo?
10 Umfundisi ophumelelayo weenyaniso zeZibhalo umele abe ngumfundi weLizwi likaThixo. (Roma 2:21) UYesu Kristu wamisela umzekelo obalaseleyo kule nkalo. Ebudeni bobulungiseleli bakhe, uYesu wabhekisela okanye wavakalisa iingcamango ezazihambisana malunga nesiqingatha seencwadi zeZibhalo zesiHebhere.a Ukuqhelana kwakhe neLizwi likaThixo kwabonakala ngoxa wayeneminyaka eli-12 ubudala, xa wafunyanwa “etempileni, ehleli phakathi kwabafundisi yaye ebaphulaphule kwaye ebabuza.” (Luka 2:46) Naxa wayesele ekhulile, uYesu wakwenza umkhwa ukuya kwindlu yesikhungu, apho lalifundwa khona iLizwi likaThixo.—Luka 4:16.
11. Umfundisi ufanele ahlakulele yiphi imikhwa emihle yokufundisisa?
11 Ngaba ungumfundi okhutheleyo weLizwi likaThixo? Ukumba kulo yindlela oya kwandula ngayo “ukukuqonda ukoyika uYehova, ukufumane ukumazi uThixo.” (IMizekeliso 2:4, 5) Ngoko ke yakha imikhwa emihle yokufundisisa. Zama ukufunda inxalenye yeLizwi likaThixo imihla ngemihla. (INdumiso 1:2) Kwenze umkhwa wakho ukufunda IMboniselo noVukani! ngokukhawuleza wakuzifumana. Nikela ingqalelo kwiintlanganiso zebandla. Funda ukwenza uphengululo olucokisekileyo. Ngokufunda ‘ukuzilanda zonke izinto ngokuchanileyo,’ unokukuphepha ukuzibaxa izinto nenkcazelo engachananga xa ufundisa.—Luka 1:3.
Uthando Nentlonelo Ngabo Bafundiswayo
12. UYesu wayenasiphi isimo sengqondo ngabafundi bakhe?
12 Olunye uphawu olubalulekileyo kukuba nesimo sengqondo esihle ngabo ubafundisayo. AbaFarisi babebajongela phantsi abo babephulaphula uYesu. Bathi: “Esi sihlwele singawaziyo uMthetho singabantu abaqalekisiweyo.” (Yohane 7:49) Kodwa uYesu wayenothando nentlonelo enzulu ngabafundi bakhe. Wathi: “Andisanibizi ngokuthi ningamakhoboka, ngenxa yokuba ikhoboka alikwazi oko inkosi yalo ikwenzayo. Kodwa ndinibize ngokuthi ningabahlobo, ngenxa yokuba zonke izinto endizive kuBawo ndizazisile kuni.” (Yohane 15:15) Oku kwabonisa indlela abafundi bakaYesu ababefanele bawenze ngayo umsebenzi wokufundisa.
13. UPawulos wavakalelwa njani ngabo wayebafundisa?
13 Ngokomzekelo, uPawulos akazange abagcine bekude abo wayebafundisa. Wawaxelela oku amaKorinte: “Kuba nakuba nisenokuba nabakhapheli abangamawaka alishumi kuKristu, ngokuqinisekileyo abakho baninzi ooyihlo; kuba kuKristu Yesu ndiye ndaba nguyihlo ngeendaba ezilungileyo.” (1 Korinte 4:15) Maxa wambi, uPawulos wayede alil’ iinyembezi xa eyala abo wayebafundisa! (IZenzo 20:31) Kwakhona wabonakalisa umonde nobubele obungathethekiyo. Ngaloo ndlela wakwazi ukuxelela abaseTesalonika esithi: “Saba ngabathantamisayo phakathi kwenu, njengaxa umama oncancisayo ebaphatha ngononophelo abakhe abantwana.”—1 Tesalonika 2:7.
14. Kutheni kubaluleke kangaka ukuba nomdla wobuqu kwabo sifunda nabo iBhayibhile? Zekelisa.
14 Ngaba uyamxelisa uYesu noPawulos? Uthando olunyanisekileyo ngabo sifunda nabo lusenokuzigubungela iintsilelo esinokuba sinazo kubuchule bethu bemvelo. Ngaba abo sifunda nabo iBhayibhile bayabona ukuba sinomdla onyanisekileyo kubo njengabantu? Ngaba sizipha ixesha lokubazi? Xa elinye ibhinqa elingumKristu lalinengxaki yokunceda umfundi othile ukuba enze inkqubela ngokomoya, labuza: “Ngaba kukho into ekukhathazayo?” Eli bhinqa laqalisa ukuphalaza imbilini yalo, libalisa iinzima neenzingo elijamelene nazo. Loo ncoko yothando yabangela eli bhinqa lenza inguqulelo enkulu. Kwiimeko ezinjalo iingcamango ezingokweZibhalo namazwi athuthuzelayo kwanokhuthazo ayafuneka. (Roma 15:4) Noko ke, nasi isilumkiso: Umfundi weBhayibhile usenokwenza inkqubela ekhawulezileyo ngoxa kusafuneka oyise iindlela ezingavisisaniyo nobuKristu. Ngoko kusenokungabi bubulumko ukunxulumana ngokusondeleyo nomntu onjalo. Kufanele kubekho imida efanelekileyo yobuKristu.—1 Korinte 15:33.
15. Sinokuyibonakalisa njani intlonelo ngabo sifunda nabo iBhayibhile?
15 Intlonelo ngabo sifunda nabo iquka ukuba singazami ukulawula ubomi babo. (1 Tesalonika 4:11) Ngokomzekelo, sisenokuba sifundisisa nebhinqa elinomasihlalisane. Mhlawumbi banabantwana. Lakuba lifumene ulwazi oluchanileyo ngoThixo, eli bhinqa lisenokufuna ukulungisa izinto noYehova. (Hebhere 13:4) Ngaba lifanele litshate naloo ndoda okanye lahlukane nayo? Mhlawumbi sisenokuvakalelwa kukuba ukutshata nendoda engenamdla kangako okanye engenawo kwaphela ngezinto zokomoya kusenokuthintela inkqubela yelo bhinqa kwixesha elizayo. Kwelinye icala, sisenokucingela abantwana balo size sicinge ukuba ukutshata nayo kokona kubhetele. Enoba imeko injani na, kukungabi nantlonelo naluthando ukugxuphuleka kubomi bomntu esifunda naye size sizame ukubethelela iimbono zethu kwimibandela enjalo. Ngapha koko, nguye ofanele ajamelane nemiphumo yesigqibo asenzileyo. Ngoko ke, ngaba bekungayi kuba kuhle ukuqeqesha umfundi ukuba asebenzise ‘amandla akhe okuqonda’ aze azenzele isigqibo ngoko amele akwenze?—Hebhere 5:14.
16. Abadala banokulubonakalisa njani uthando nentlonelo ngomhlambi kaThixo?
16 Kubaluleke ngokukhethekileyo ukuba abadala bebandla bawuphathe ngothando nentlonelo umhlambi. Xa wayebhalela uFilemon, uPawulos wathi: “Nakuba ngokunxibelelene noKristu ndinenkululeko enkulu yokuthetha ndikuyalele ukuba wenze oko kufanelekileyo, kunoko ndiyakubongoza ngesizinzi sothando.” (Filemon 8, 9) Maxa wambi, kusenokwenzeka izinto ezicaphukisayo ebandleni. Kusenokufuneka ukuba izinto zisingathwe ngokungqongqo. UPawulos wabongoza uTito ukuba ‘aqhubeke ebohlwaya ngokuqatha [abenza isiphoso], ukuze baphile elukholweni.’ (Tito 1:13) Sekunjalo, abaveleli bafanele benze umgudu ukuze bangaze bathethe rhabaxa nebandla. UPawulos wabhala: “Ikhoboka leNkosi akufuneki lilwe, kodwa kufuneka lithantamise kubo bonke, likufanelekele ukufundisa, lihlale lizibambile phantsi kobubi.”—2 Timoti 2:24; INdumiso 141:3.
17. Yiyiphi impazamo eyenziwa nguMoses, yaye yintoni abadala abanokuyifunda kuyo?
17 Abaveleli bafanele basoloko bezikhumbuza ukuba basebenzisana ‘nomhlambi kaThixo.’ (1 Petros 5:2) UMoses, nangona wayethobekile, walahlekelwa okwexeshana lolu phawu. AmaSirayeli “awuphikisa umoya wakhe, waphololoza ke ngomlomo wakhe.” (INdumiso 106:33) UThixo ayizange imkholise kwaphela le mpatho-mbi yomhlambi Wakhe, nangona wawonile. (Numeri 20:2-12) Xa bejamelene nocelomngeni olufanayo namhlanje, abadala bafanele bazabalazele ukufundisa nokuyala ngengqiqo nobubele. Abazalwana bethu basabela kakuhle xa bephathwa ngolwazelelelo nanjengabantu abafuna uncedo, kungekhona ooncanyelweni. Abadala bafanele bahlale benesimo sengqondo esihle uPawulos awayenaso xa wathi: “Sinentembelo eNkosini ngokubhekisele kuni, ukuba niyazenza kwaye niya kuqhubeka nizenza izinto esiziyalelayo.”—2 Tesalonika 3:4.
Ukusabela Kwiintswelo Zabo
18, 19. (a) Sifanele sisabele njani kwiintswelo zabafundi beBhayibhile abangenabuchule bungako? (b) Sinokubanceda njani abafundi abaneengxaki kwimibandela ethile?
18 Umfundisi ophumelelayo ukulungele ukuhlengahlengisa ukuze azivisisanise neemeko zabo afunda nabo. (Thelekisa uYohane 16:12.) Kumzekeliso kaYesu weetalente, inkosi yanikela ngamalungelo “[kwikhobokaOk for X] ngalinye ngokwamandla alo.” (Mateyu 25:15) Sinokulandela ikhondo elifanayo xa siqhuba izifundo zeBhayibhile. Ngokuqhelekileyo, kuyinto enqwenelekayo ukuyifunda yonke impapasho yeBhayibhile ngexesha elifutshane ngokusengqiqweni. Noko ke, kufanele kuvunywe ukuba asingabo bonke abakwazi kakuhle ukufunda okanye abakwaziyo ukuzamkela msinya iingcamango ezintsha. Ngoko ke, kufuneka ukuqonda njengaxa umele udlulele kwenye ingongoma kweso sifundo ukuba umntu esifunda naye akakwazi kufunda ngokukhawuleza. Okona kubaluleke ngaphezu kokugubungela umbandela ngexesha elithile kukunceda abafundi bakuqonde oko bakufundayo.—Mateyu 13:51.
19 Oku kuyafana nakubafundi beBhayibhile abaneengxaki kwimibandela ethile, njengoBathathu Emnye okanye iiholide zonqulo. Nangona ngokuqhelekileyo kungeyomfuneko ukuquka umbandela ophandiweyo osekelwe eBhayibhileni kwizifundo zethu, ngamathuba athile sinokwenjenjalo ukuba oku ngokucacileyo kuya kuba yinzuzo. Kufuneka sisebenzise ukuqonda ukuze singabambezeli inkqubela yomfundi ngokungeyomfuneko.
Yiba Nehlombe!
20. UPawulos wawumisela njani umzekelo ngokubonakalisa ihlombe nolweyiseko ngemfundiso yakhe?
20 UPawulos uthi: “Emoyeni ke vuthani.” (Roma 12:11) Ewe, enoba siqhuba isifundo seBhayibhile sasekhaya okanye sinesabelo kwintlanganiso yebandla, sifanele sikwenze oko ngenkuthalo nangehlombe. UPawulos wabaxelela oku abaseTesalonika: “Iindaba ezilungileyo esizishumayelayo azibanga kuni ngentetho yodwa kodwa kwanangamandla nomoya oyingcwele nolweyiseko olunamandla.” (1 Tesalonika 1:5) Ngaloo ndlela uPawulos namaqabane akhe badlulisela “kungekuphela nje iindaba ezilungileyo zikaThixo, kodwa kwanemiphefumlo [yabo].”—1 Tesalonika 2:8.
21. Sinokulibonakalisa njani ihlombe ngezabelo esinazo zokufundisa?
21 Ihlombe lokwenene libangelwa kukweyiseka ngokupheleleyo ukuba abo sifunda nabo iBhayibhile bafanele bayive into esiza kuyithetha. Masingaze sisithabathe lula nasiphi na isabelo sokufundisa. Umbhali uEzra ngokuqinisekileyo wanikela ingqalelo kwimfundiso yakhe kule nkalo. “Intliziyo yakhe wayeyibhekise ekuwufuneni umyalelo kaYehova, awenze, afundise ummiselo nesiko kwaSirayeli.” (Ezra 7:10) Sifanele senze okufanayo ngokulungiselela ngokucokisekileyo size sicamngce ngokubaluleka kwaloo mbandela. Masithandaze kuYehova ukuze asizalise ngokholo nolweyiseko. (Luka 17:5) Ihlombe esinalo linokunceda abafundi beBhayibhile bayithande ngokwenene inyaniso. Kambe ke, ukunikela ingqalelo kwimfundiso yethu kusenokubandakanya nokusebenzisa iindlela ezithile zokufundisa. Inqaku lethu elilandelayo liza kuxubusha ngezithile zazo.
[Imibhalo esemazantsi]
a Bona i-Insight on the Scriptures, Umqulu 2, iphepha 1071, epapashwe yiWatchtower Bible and Tract Society of New York, Inc.
Usakhumbula Na?
◻ Kutheni kufuneka abafundisi abangamaKristu abanobuchule namhlanje?
◻ Yiyiphi imikhwa emihle yokufundisisa esifanele siyihlakulele?
◻ Kutheni uthando nentlonelo ngabo sibafundisayo zibaluleke kangaka?
◻ Sinokusabela njani kwiintswelo zabo sifunda nabo iBhayibhile?
◻ Kutheni kubalulekile nje ukweyisela nokuba nehlombe xa sifundisa abanye?
[Umfanekiso okwiphepha 10]
Abafundisi abaphumelelayo bakwangabafundi beLizwi likaThixo
[Umfanekiso okwiphepha 13]
Yiba nomdla wobuqu kwabo ufunda nabo iBhayibhile