Iingenelo Zokuthanda Ilizwi Likathixo
“Buthande [ubulumko], bokulondoloza. . . . Bokuzukisa, xa uthe wabuwola.”—IMIZEKELISO 4:6, 8.
1. Kubandakanya ntoni ukulithanda ngokwenene iLizwi likaThixo?
UKUFUNDA iBhayibhile kuyinto ebalulekileyo kumKristu. Noko ke, ukuyifunda nje akuthethi kuthi ubani uyalithanda iLizwi likaThixo. Kuthekani ukuba ubani uyayifunda iBhayibhile kodwa enze izinto iBhayibhile engazivumeliyo? Ngokuqinisekileyo akalithandi iLizwi likaThixo ngendlela umbhali weNdumiso 119 awayelithanda ngayo. Kaloku ukuthanda iLizwi likaThixo kwamenza waphila ngokuvisisana noko likufunayo.—INdumiso 119:97, 101, 105.
2. Ziziphi iingenelo eziziswa bubulumko obusekelwe kwiLizwi likaThixo?
2 Ukuphila ngokuvisisana neLizwi likaThixo kufuna ubani ahlale eyilungisa indlela acinga naphila ngayo. Ukwenza izinto ngolo hlobo kuluphawu lobulumko bobuthixo, obuthetha ukulusebenzisa ulwazi nokuqonda okufunyanwa eBhayibhileni. “Buthande [ubulumko], bokulondoloza. Bunonelele, bokuphakamisa; bokuzukisa, xa uthe wabuwola. Boyinika intloko yakho isangqawe esihle, bokupha isithsaba sokuhomba.” (IMizekeliso 4:6, 8, 9) Olunjani ukuba luhle ukhuthazo lokuhlakulela uthando ngeLizwi likaThixo nokukhokelwa lilo! Ngubani ongafuniyo ukulondolozwa, ukuphakanyiswa nokuzukiswa?
Ukulondolozwa Kwiingozi Ezihlala Zikho
3. Kutheni amaKristu efuna ukukhuselwa ngaphezulu kunanini na ngaphambili, yaye afuna ukukhuselwa kubani?
3 Ubani ulondolozwa njani bubulumko abufumene ngokufundisisa nangokusebenzisa iLizwi likaThixo? Phakathi kwezinye izinto, ulondolozwa kuSathana uMtyholi. UYesu wafundisa abalandeli bakhe ukuba bathandazele ukuhlangulwa kongendawo, uSathana. (Mateyu 6:13) Namhlanje, ingxamiseke ngokwenene imfuneko yokuquka eso sicelo kwimithandazo yethu. Emva kowe-1914 uSathana needemon zakhe bakhutshelwa ngaphandle kwezulu, kwaye ngenxa yoko uSathana ‘unomsindo omkhulu, esazi ukuba unesihlandlo esifutshane sexesha.’ (ISityhilelo 12:9, 10, 12) Kungokunje umele ukuba uligqabi ngumsindo njengoko engaphumeleli kwimfazwe ayilwa nabo “bagcina imiyalelo kaThixo nabanomsebenzi wokunikela ubungqina kuYesu.”—ISityhilelo 12:17.
4. AmaKristu akhuselwa njani kwiingcinezelo nakwimigibe kaSathana?
4 Equmbe esisifu, uSathana uyaqhubeka evusa uqhushululu kwaba balungiseleli bangamaKristu yaye entyontyela intshutshiso ekhatshwa lugonyamelo okanye ebeka imiqobo phambi komsebenzi wabo. Ukwafuna ukurhwebesha abavakalisi boBukumkani ukuze bathi phithi kukuba phambili kwizinto zehlabathi, bathande ukuphila lula, bazifunele izinto eziphathekayo, baze basukele uyolo, kunokuba baxakeke ngumsebenzi wokushumayela ngoBukumkani. Yintoni enokukhusela abakhonzi abathembekileyo bakaThixo ekubeni bonganyelwe yingcinezelo kaSathana okanye babanjiswe yimigibe yakhe? Kakade ke, kubalulekile ukuthandaza, ukuba nolwalamano lobuqu olusondeleyo noYehova, kunye nokuba nokholo lokuba amadinga akhe aya kuzaliseka nokuba sekumnyam’ entla. Kodwa zizonke ezo zinto zinxibelelene nolwazi kunye nozimiselo lokuthobela izikhumbuzo ezikwiLizwi likaThixo. Ezi zikhumbuzo zifunyanwa ngokufunda iBhayibhile kunye neencwadi zokufundisisa iBhayibhile, ukuya kwiintlanganiso zamaKristu, ukuthobela isiluleko seZibhalo esisuka kwelinye ikholwa, okanye ke ukucamngca ngomthandazo ngemigaqo yeBhayibhile oyikhunjuzwa ngumoya kaThixo.—Isaya 30:21; Yohane 14:26; 1 Yohane 2:15-17.
5. Ubulumko obusekelwe kwiLizwi likaThixo busikhusela njani?
5 Abo bathanda iLizwi likaThixo bakhuselwa nangezinye iindlela. Ngokomzekelo, bayakuphepha ukuxhwaleka kunye nezifo ezibangelwa zizinto ezinjengokusebenzisa kakubi iziyobisi, ukutshaya nokuziphatha okubi ngokwesini. (1 Korinte 5:11; 2 Korinte 7:1) Abafaki sandla ekuchitheni ubuhlobo ngokuhleba okanye ngokuthetha kakubi ngabanye. (Efese 4:31) Kananjalo ababi ngamaxhoba okuthandabuza izinto ngenxa yokugocagoca iintanda-bulumko ezikhohlisayo zobulumko beli hlabathi. (1 Korinte 3:19) Ngenxa yokuthanda iLizwi likaThixo, bayakhuselwa kwizinto ezinokubahlutha ulwalamano noThixo kunye nethemba lobomi obungunaphakade. Bazigcina bexakeke kukunceda abamelwane babo ukuze babe nokholo kumadinga aseBhayibhileni, besazi ukuba ngokwenjenjalo baya ‘kusindisa kokubini bona nabo babaphulaphulayo.’—1 Timoti 4:16.
6. Bunokusikhusela njani ubulumko obusekelwe kwiLizwi likaThixo kwanaxa sisebunzimeni?
6 Kuyinyaniso ukuba, wonk’ ubani—kwanabo bathanda iLizwi likaThixo—ufikelwa “lixesha nasisihlo.” (INtshumayeli 9:11) Soze ithintelwe mntu into yokuba abanye bethu babe ngamaxhoba eentlekele zemvelo, bahlaselwe zizigulo eziyingozi, bahlelwe ziingozi okanye bafe ngesiquphe. Sekunjalo, sikhuselekile. Asikho isihelegu esinokumenzakalisa ngokusisigxina umntu olithanda ngokwenene iLizwi likaThixo. Ngenxa yoko, masingazixhalabeli ngokugqithisileyo izinto ezinokwenzeka kwixesha elizayo. Sakuba senze konke okusengqiqweni ukuze sizikhusele, kuhle ukuyekela izinto ezandleni zikaYehova size singavumeli ukuba ukunganqabiseki kobomi bale mihla kusihluthe uxolo. (Mateyu 6:33, 34; Filipi 4:6, 7) Khumbula ukuqiniseka kwethemba lovuko nelobomi obulunge ngakumbi xa uThixo ‘esenza izinto zonke zibe ntsha.’—ISityhilelo 21:5; Yohane 11:25.
Zingqine ‘Ungumhlaba Olungileyo’
7. Nguwuphi umzekeliso uYesu awawuxelela izihlwele ezazize kumphulaphula?
7 Ukubaluleka kokuba nembono elungileyo ngeLizwi likaThixo kwagxininiswa komnye wemizekeliso kaYesu. Xa uYesu wayevakalisa iindaba ezilungileyo ePalestina, izihlwele zahlanganisana ukuze zimphulaphule. (Luka 8:1, 4) Noko ke, abazange balithande ngokwenene bonke iLizwi likaThixo. Alithandabuzeki elokuba, baninzi abeza kumphulaphula kuba befuna ukubona imimangaliso okanye kuba bethanda indlela awayefundisa kamnandi ngayo. Kungoko uYesu waxelela ezo zihlwele lo mzekeliso: “Umhlwayeli waphuma waya kuhlwayela imbewu yakhe. Ngoko, njengoko wayehlwayela, yimbi yayo yawela ecaleni kwendlela yaza yanyathelwa, yaye iintaka zezulu zayidla zayigqiba. Yimbi enye yawela elulwalweni, yaye, emva kokuhluma, yoma ngenxa yokungabi nakufuma. Yimbi enye yawela phakathi kwameva, yaye ameva awakhula kunye nayo ayiminxisela. Yimbi enye yawela emhlabeni olungileyo, yaza, emva kokuhluma, yavelisa isiqhamo ngokuphindwe kalikhulu.”—Luka 8:5-8.
8. Iyintoni imbewu yomzekeliso kaYesu?
8 Umzekeliso kaYesu wabonisa ukuba abantu babeza kusabela ngeendlela ezahlukileyo xa kushunyayelwa iindaba ezilungileyo, kuxhomekeka kwintliziyo yalowo uphulaphuleyo. Imbewu ehlwayelwayo “lilizwi likaThixo.” (Luka 8:11) Okanye ke, njengoko enye ingxelo yalo mzekeliso isitsho, imbewu ‘lilizwi lobukumkani.’ (Mateyu 13:19) UYesu wayenokusebenzisa naliphi na ibinzana, kuba umxholo weLizwi likaThixo buBukumkani bamazulu obulawulwa nguKumkani onguYesu Kristu nobuya kusetyenziswa nguYehova ukuthethelela ulongamo lwakhe nokungcwalisa igama lakhe. (Mateyu 6:9, 10) Ngoko ke, imbewu sisigidimi seendaba ezilungileyo esikwiLizwi likaThixo, iBhayibhile. AmaNgqina kaYehova ayasibalaselisa esi sigidimi soBukumkani njengoko ehlwayela imbewu exelisa uMhlwayeli wantlandlolo, uYesu Kristu. Basabela njani abantu?
9. Ifuzisela ntoni imbewu ewela (a) ecaleni kwendlela? (b) elulwalweni? (c) phakathi kwameva?
9 UYesu wathi enye imbewu iwela ecaleni kwendlela ize inyathelwe. Oku kubhekisela kubantu abaxakeke gqitha ukuba bavumele imbewu yoBukumkani intshule ezintliziyweni zabo. Bathi bengekaluhlakuleli uthando ngeLizwi likaThixo, “uMtyholi eze aze alithabathe ilizwi ezintliziyweni zabo ukuze bangakholwa baze basindiswe.” (Luka 8:12) Enye imbewu iwela elulwalweni. Oku kubhekisela kubantu abasithandayo isigidimi seBhayibhile kodwa bangasivumeli ukuba sichukumise iintliziyo zabo. Xa kuphakama inkcaso okanye befumanisa ukuba kunzima ukusebenzisa isiluleko seBhayibhile, “bayaphambuka” kuba abanangcambu. (Luka 8:13) Kubekho ke nabo balivayo ilizwi kodwa bonganyelwe “ngamaxhala nobutyebi neziyolo zobu bomi.” Ekugqibeleni, njengezityalo ezibhijelwe ngameva, “baminxwa ngokupheleleyo.”—Luka 8:14.
10, 11. (a) Ngoobani abafanekiselwa ngumhlaba olungileyo? (b) Yintoni esimele siyenze ukuze ‘sigcine’ iLizwi likaThixo ezintliziyweni zethu?
10 Ekugqibeleni, kukho imbewu ewela kumhlaba olungileyo. Aba ngabantu abamkela isigidimi “ngentliziyo entle nelungileyo.” Kungokwemvelo ukuba ngamnye wethu afune ukuba kweli qela labantu. Noko ke, ekugqibeleni iba nguThixo owaziyo. (IMizekeliso 17:3; 1 Korinte 4:4, 5) ILizwi lakhe lithi ukuba ‘nentliziyo entle nelungileyo’ kwethu sikubonisa ngezinto esizenza ngoku de siye kufa okanye de uThixo aphelise le nkqubo ingendawo yezinto. Ukuba ekuqaleni siye sasabela kakuhle kwisigidimi soBukumkani, intle loo nto. Noko ke, abo banentliziyo entle nelungileyo bayalamkela iLizwi likaThixo baze “baligcine baze bathwale isiqhamo ngonyamezelo.”—Luka 8:15.
11 Ekuphela kwendlela esinokuligcina ngayo iLizwi likaThixo ezintliziyweni zethu kukulilesa nokulifundisisa sisodwa kwanaxa sikunye namanye amakholwa. Oku kuquka ukuzondla ngokupheleleyo ngokutya kokomoya okulungiselelwe lijelo elimiselwe ukuze linyamekele izilangazelelo zokomoya zabalandeli bokwenene bakaYesu. (Mateyu 24:45-47) Kungaloo ndlela abathi abo baligcinayo iLizwi likaThixo ezintliziyweni zabo baqhutywe luthando ukuba “bathwale isiqhamo ngonyamezelo.”
12. Sisiphi isiqhamo esimele sisithwale ngonyamezelo?
12 Sinjani isiqhamo esithwalwa ngulo mhlaba ulungileyo? Kwezendalo, iimbewu ziyantshula zize zibe zizityalo ezithwala kwaimbewu efanayo, nayo enokusasazwa ize ithwale esinye isiqhamo. Ngendlela efanayo, imbewu yelizwi iyakhula kwabo banentliziyo entle nelungileyo, ibenze baqhubele phambili kwizinto zokomoya, de nabo bahlwayele imbewu kwabanye. (Mateyu 28:19, 20) Kwaye umsebenzi wabo wokutyala ufuna unyamezelo. UYesu wayibonisa imbaluleka yokunyamezela ekuhlwayeleni xa wathi: “Lowo unyamezele kwada kwasekupheleni ngulowo oya kusindiswa. Kwaye ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.”—Mateyu 24:13, 14.
“Nithwala Isiqhamo Kuwo Wonke Umsebenzi Olungileyo”
13. Nguwuphi umthandazo owenziwa nguPawulos owanxibelelanisa isiqhamo nokwazi iLizwi likaThixo?
13 Nompostile uPawulos wathetha ngemfuneko yokuthwala isiqhamo, ibe wanxibelelanisa ukuthwala isiqhamo neLizwi likaThixo. Wathandazela ukuba amanye amakholwa ‘azaliswe ngolwazi oluchanileyo lokuthanda kukaThixo kubulumko bonke nokuqiqa kokomoya, ukuze ahambe ngokumfaneleyo uYehova aze amkholise ngokuzeleyo njengoko eqhubeka ethwala isiqhamo kuwo wonke umsebenzi olungileyo.’—Kolose 1:9, 10; Filipi 1:9-11.
14-16. Ngokuvisisana nomthandazo kaPawulos, sisiphi isiqhamo esiveliswa ngabo bathanda iLizwi likaThixo?
14 Ngaloo ndlela uPawulos ubonisa ukuba ukufumana ulwazi ngeBhayibhile akukuphela kosukelo olumele lubekwe. Kunoko, ukuthanda iLizwi likaThixo kusishukumisela ekubeni ‘sihambe ngokumfaneleyo uYehova’ ngokuqhubeka ‘sithwala isiqhamo kuwo wonke umsebenzi olungileyo.’ Nguwuphi loo msebenzi ulungileyo? Ukushumayela iindaba ezilungileyo zoBukumkani kusisabelo esibalaseleyo kumaKristu ale mihla yokugqibela. (Marko 13:10) Ukongezelela koko, abo balithandayo iLizwi likaThixo benza konke okusemandleni ukuze baqhubeke bewuxhasa ngemali lo msebenzi. Bayalivuyela eli lungelo, besazi ukuba “uThixo uthanda umphi ochwayitileyo.” (2 Korinte 9:7) Iminikelo yabo ihlawula iindleko zomsebenzi owenziwa kwizakhiwo zaseBheteli ezingaphezu kwekhulu apho walathiswa khona umsebenzi wokushumayela ngoBukumkani nalapho ziveliswa khona iiBhayibhile kunye noncwadi olusekelwe eBhayibhileni. Iminikelo yabo ikwanceda nasekuhlawuleni iindleko zeendibano ezinkulu zamaKristu nasekuxhaseni abaveleli abahambahambayo, abavangeli basemazweni kunye nabanye abahambisi bevangeli bexesha elizeleyo.
15 Eminye imisebenzi elungileyo iquka ukwakha nokunyamekela izazulu zonqulo lokwenyaniso. Ukuthanda iLizwi likaThixo kushukumisela abanquli bakhe ukuba baqiniseke ukuba iiHolo zeNdibano neeHolo zoBukumkani azityeshelwa. (Thelekisa uNehemiya 10:39.) Ekubeni kubhalwa igama likaThixo kwezo zakhiwo, kubalulekile ukuba umphakathi nomphandle wazo ugcinwe ucocekile yaye unomtsalane nokuba ihambo yabo banqulela kuzo ingazisi ugculelo. (2 Korinte 6:3) Amanye amaKristu ayakwazi ukwenza okungakumbi. Ukuthanda iLizwi likaThixo kuwashukumisela ukuba ahambe imigama emide aye kwakha iindawo ezintsha zokunqulela kwimimandla yehlabathi ekukho imfuneko kuyo ngenxa yobuhlwempu okanye ukunqongophala kwamagcisa okwakha.—2 Korinte 8:14.
16 ‘Ukuthwala isiqhamo kuwo wonke umsebenzi olungileyo’ kukwabandakanya ukunyamekela iimbopheleleko zentsapho nokuba nenkxalabo ngamanye amaKristu. Ukuthanda iLizwi likaThixo kusishukumisela ekubeni sisabele msinya kwiintswelo zabo “bahlobene nathi elukholweni” yaye ‘siqhelisela uzinikelo lobuthixo kweyethu indlu.’ (Galati 6:10; 1 Timoti 5:4, 8) Kulo mba, kungumsebenzi omhle ukutyelela abagulayo nokuthuthuzela abalusizi. Kwaye onjani ukuba mhle umsebenzi owenziwa ngabadala bebandla kunye neeKomiti Zokunxibelelana Nezibhedlele ekuncedeni abo bajamelana neengxaki zonyango ezilucelomngeni! (IZenzo 15:29) Kukwakho neentlekele eziya zisiba ninzi—ezinye zezemvelo yaye ezinye zibangelwa bubuyatha babantu. Ngoncedo lomoya kaThixo, amaNgqina kaYehova aye azenzela igama elihle kwiindawo ezininzi zomhlaba ngokunikela uncedo olukhawulezileyo kwabo bakholwa kunye nawo nakwamanye amaxhoba eentlekele neengozi. Zonke ezi ziziqhamo ezilungileyo ezibonakaliswa ngabo bathanda iLizwi likaThixo.
Iingenelo Ezizukileyo Zexesha Elizayo
17, 18. (a) Yintoni ephunyezwa kukutyala imbewu yoBukumkani? (b) Ziziphi iziganeko ezibalaseleyo eziza kubonwa kungekudala ngabo bathanda iLizwi likaThixo?
17 Ukutyalwa kwembewu yoBukumkani kusaqhubeka kusizisa iingenelo ezinkulu kuluntu. Kwiminyaka yakutshanje, nyaka ngamnye bebengaphezu kwama-300 000 abantu abaye bavumela isigidimi seBhayibhile ukuba sintshule ezintliziyweni zabo ukusa kwinqanaba lokuba bahlulele ubomi babo kuYehova baze bafuzisele oko ngokubhaptizwa emanzini. Elinjani ukuzuka ikamva elibalindeleyo!
18 Kungekudala, abo bathanda iLizwi likaThixo bayazi ukuba uYehova uThixo uya kusukuma aze azukise igama lakhe. “IBhabhiloni Enkulu,” ubukhosi behlabathi bonqulo lobuxoki, iza kutshatyalaliswa. (ISityhilelo 18:2, 8) Emva koko, abo bangavumiyo ukuphila ngokuvisisana neLizwi likaThixo baya kubulawa nguKumkani, uYesu Kristu. (INdumiso 2:9-11; Daniyeli 2:44) Emva koko, uBukumkani bukaThixo buza kuza nesiqabu esisisigxina kulwaphulo-mthetho, imfazwe nezinye iintlekele. Akusayi kuphinda kubekho mfuneko yakuthuthuzela abantu ngenxa yentlungu, ukugula nokufa.—ISityhilelo 21:3, 4.
19, 20. Liliphi ikamva elizukileyo eligcinelwe abo balithanda ngokwenene iLizwi likaThixo?
19 Onjani ukuzuka umsebenzi olungileyo oya kuphunyezwa ngoko ngabo bathanda iLizwi likaThixo! Abasinde kwiArmagedon baya kuqala ngomsebenzi ovuyisayo wokuguqula umhlaba ube yiparadesi. Baya kuba nelungelo elichulumancisayo lokulungiselela ukwanelisa iintswelo zabantu abafileyo sithethanje abaphumle emangcwabeni nabagcinwe kwinkumbulo kaThixo benethemba lovuko lwabafileyo. (Yohane 5:28, 29) Ngelo xesha, abemi bomhlaba baya kufumana ulwalathiso olugqibeleleyo olusuka kwiNkosi enguMongami, uYehova, esebenzisa uNyana wakhe ophakanyisiweyo, uYesu Kristu. ‘Kuya kuvulwa imisongo’ etyhila imiyalelo kaYehova yendlela yokuphila kwihlabathi elitsha.—ISityhilelo 20:12.
20 Ngexesha elifanelekileyo likaYehova, lonke iqumrhu lamaKristu athanjisiweyo athembekileyo liya kunyuselwa kumvuzo walo wasezulwini ‘njengeendlalifa ezimanyene noKristu.’ (Roma 8:17) Ebudeni boLawulo Lweminyaka Eliwaka lukaKristu, bonke abantu abasemhlabeni abathanda iLizwi likaThixo baya kwenziwa bafezeke engqondweni nasemzimbeni. Emva kokuba beye bazingqina bethembekile kuvavanyo lokugqibela, baya kuvuzwa ngobomi obungunaphakade yaye baya kufumana ‘inkululeko ezukileyo yabantwana bakaThixo.’ (Roma 8:21; ISityhilelo 20:1-3, 7-10) Hayi indlela ekuya kuba mnandi ngayo ngoko! Kuyinyaniso ukuba, enoba uYehova usinike ithemba lokuphila ezulwini okanye emhlabeni, ukuqhubeka silithanda iLizwi lakhe kunye nokuzimisela ukuphila ngokuvisisana nobulumko bobuthixo kuya kusilondoloza ngoku. Yaye kwixesha elizayo ‘kuya kusilondoloza kuba siliwola.’—IMizekeliso 4:6, 8.
Ngaba Unokuchaza?
◻ Kunokusikhusela njani ukuthanda iLizwi likaThixo?
◻ Yintoni imbewu yomzekeliso kaYesu, yaye ihlwayelwa njani?
◻ Sinokuzingqina njani ‘singumhlaba olungileyo’?
◻ Ziziphi iingenelo ezinokulindelwa ngabo bathanda iLizwi likaThixo?
[Umfanekiso okwiphepha 16]
Imbewu yomzekeliso kaYesu ifanekisela isigidimi seendaba ezilungileyo esikwiLizwi likaThixo
[Inkcazelo]
Garo Nalbandian
[Umfanekiso okwiphepha 17]
AmaNgqina kaYehova axelisa uMhlwayeli Obalaseleyo
[Imifanekiso ekwiphepha 18]
Abasinde eArmagedon baya kunandipha iziqhamo zomhlaba