Yibani Noyolo Nina Nifunda Incwadi YeSityhilelo
“Unoyolo lowo uwafunda ngokuvakalayo nabo bawevayo amazwi esi siprofeto, nabazigcinayo izinto ezibhaliweyo kuso.”—ISITYHILELO 1:3.
1. Umpostile uYohane wazifumana ekwiyiphi imeko xa wayebhala ISityhilelo, kwaye le mibono yayibhalelwa yiphi injongo?
“MNA Yohane . . . ndaba kwisiqithi esibizwa ngokuba yiPatmos ngenxa yokuthetha ngoThixo nokunikela ubungqina ngoYesu.” (ISityhilelo 1:9) Yayinjalo ke imeko kampostile uYohane xa wayebhala incwadi yeSityhilelo. Kurhanelwa ukuba wathunyelwa ePatmos ngexesha ekwakuphethe uMlawuli uDomitian waseRoma (81-96 C.E.), owanyanzelisa ukuba kunqulwe umlawuli waza watshutshisa amaKristu. Xa wayesePatmos, uYohane wabona ungcelele lwemibono awayibhala phantsi. Injongo yokuyibalisa kwakhe yayingekuko ukoyikisa amaKristu enkulungwane yokuqala, kodwa yayikukuwomeleza, ukuwathuthuzela nokuwakhuthaza kwizilingo awayejamelana nazo nakwezo ayeseza kujamelana nazo.—IZenzo 28:22; ISityhilelo 1:4; 2:3, 9, 10, 13.
2. Kutheni amaKristu ale mihla enomdla kwimeko uYohane namanye amaKristu awazifumana ekuyo?
2 Iimeko eyabhalwa phantsi kwazo le ncwadi yeBhayibhile zinentsingiselo kumaKristu aphila namhlanje. UYohane wayetshutshiswa kuba elingqina likaYehova noNyana Wakhe, uKristu Yesu. Yena namanye amaKristu babephila ubomi bentshontsho kuba, ngoxa babezama ukuba ngabemi abalungileyo, babengamnquli umlawuli. (Luka 4:8) Kwamanye amazwe, amaKristu okwenyaniso anamhlanje azifumana ekwimeko efanayo, apho uRhulumente elithabathela kuye ilungelo lokukhetha “unqulo olufanelekileyo.” Ngoko hayi indlela athuthuzela ngayo amazwi afumaneka kwintshayelelo yencwadi yeSityhilelo athi: “Unoyolo lowo uwafunda ngokuvakalayo nabo bawevayo amazwi esi siprofeto, nabazigcinayo izinto ezibhaliweyo kuso; kuba ixesha elimisiweyo likufuphi.” (ISityhilelo 1:3) Ewe, abo banikela ingqalelo baze bawathobele amazwi eSityhilelo abawafundayo banokufumana ulonwabo lokwenene kunye neentsikelelo ezininzi.
3. Ngubani uMthombo weSityhilelo esadluliselwa kuYohane?
3 Ngubani kanye kanye ongowona Mthombo weSityhilelo, kwaye liliphi ijelo elisetyenzisiweyo ukuze sidluliselwe? Indinyana yokuqala isixelela oku: “Isityhilelo ngoYesu Kristu, uThixo awamnika sona, ukuba abonise amakhoboka akhe izinto ezimele zenzeke kamsinya. Yaye wathumela ingelosi yakhe waza ngayo wasinikela ngemiqondiso kwikhoboka lakhe uYohane.” (ISityhilelo 1:1) Ngamafutshane, owona Mthombo weSityhilelo nguYehova uThixo, owasidlulisela kuYesu, waza uYesu wasinika ingelosi ukuba isidlulisele kuYohane. Ukanti uhlolisiso olubhekele phaya lubonisa ukuba uYesu wasebenzisa nomoya oyingcwele ukuze adlulisele izigidimi kumabandla nokuze enze uYohane abone imibono.—ISityhilelo 2:7, 11, 17, 29; 3:6, 13, 22; 4:2; 17:3; 21:10; thelekisa IZenzo 2:33.
4. Yiyiphi indlela esasetyenziswa nguYehova namhlanje ukuze akhokele abantu bakhe emhlabeni?
4 UYehova usamsebenzisa nangoku uNyana wakhe, “intloko yebandla,” ukuze afundise abakhonzi bakhe emhlabeni. (Efese 5:23; Isaya 54:13; Yohane 6:45) UYehova ukwasebenzisa umoya wakhe ukuze afundise abantu bakhe. (Yohane 15:26; 1 Korinte 2:10) Yaye kanye njengokuba uYesu wasebenzisa “ikhoboka lakhe uYohane” ukuze adlulisele ukutya kokomoya okunesondlo kumabandla enkulungwane yokuqala, nanamhlanje ke usebenzisa “ikhoboka elithembekileyo neliyingqondi,” eliyilwa ‘ngabazalwana’ abathanjisiweyo abasemhlabeni, ukuba linike abendlu yakhe kunye namaqabane abo ‘ukutya kokomoya ngexesha elifanelekileyo.’ (Mateyu 24:45-47; 25:40) Banoyolo abo bawugqalayo uMthombo ‘wezipho ezilungileyo’ esizifumana zikukutya kokomoya kunye nejelo olisebenzisayo.—Yakobi 1:17.
Amabandla Alathiswa NguKristu
5. (a) Afaniswa nantoni amabandla amaKristu kunye nabaveleli bawo? (b) Phezu kwako nje ukungafezeki kwabantu, yintoni eya kufak’ isandla kulonwabo lwethu?
5 Kwizahluko zokuqala zeSityhilelo, amabandla amaKristu afaniswa neziphatho zezibane. Abaveleli bawo bafaniswa neengelosi (abathunywa) kunye neenkwenkwezi. (ISityhilelo 1:20)a Ethetha ngaye siqu, uKristu waxelela uYohane ukuba abhale oku: “Ezi zizinto azitshoyo lowo ubambe iinkwenkwezi ezisixhenxe esandleni sakhe sasekunene, lowo uhamba phakathi kweziphatho zezibane zegolide ezisixhenxe.” (ISityhilelo 2:1) Izigidimi ezisixhenxe ezathunyelwa kumabandla asixhenxe aseAsia zibonisa ukuba ngenkulungwane yokuqala yeXesha Eliqhelekileyo, amabandla kunye nabadala bawo ayeneendawo awayomelele kuzo ekwanazo neenkalo asilela kuzo. Kunjalo ke nanamhlanje. Ngoko ke, siya kuba noyolo nangakumbi ukuba sihlala siyikhumbula into yokuba uKristu, iNtloko yethu, uphakathi kwamabandla. Ukwazi kakuhle oko kwenzekayo. Abaveleli bahleli “esandleni sakhe sasekunene” ngelifuziselayo, ngamany’ amazwi, baphantsi kolawulo nolwalathiso lwakhe yaye baza kuphendula kuye ngendlela abawalusa ngayo amabandla.—IZenzo 20:28; Hebhere 13:17.
6. Yintoni ebonisa ukuba asingobaveleli bodwa abamele baphendule kuKristu?
6 Noko ke, besiya kuba siziqaba intshongo emehlweni ukuba sicinga ukuba ngabaveleli bodwa abaza kuphendula kuKristu ngezenzo zabo. Kwesinye sezigidimi zakhe, uKristu wathi: “Onke amabandla abe aya kwazi ukuba ndingulowo uphengulula izintso neentliziyo, kwaye ndiza kuninika elowo ngokwezenzo zenu.” (ISityhilelo 2:23) La mazwi asisilumkiso kwaye akwalukhuthazo—asisilumkiso sokuba uKristu uyazazi iingcambu zeentshukumisa zethu, alukhuthazo kuba ayasiqinisekisa ukuba uKristu uyayazi imigudu yethu kwaye uya kusisikelela ukuba senza oko sinako.—Marko 14:6-9; Luka 21:3, 4.
7. AmaKristu aseFiladelfi ‘aligcina njani ilizwi elingonyamezelo lukaYesu’?
7 Isigidimi sikaKristu esasisiya kwibandla elalikwisixeko saseLydia esiyiFiladelfi asiqulethanga mazwi okukhalimela, kodwa senza isithembiso esimele sibangele umdla kuthi. “Ngenxa yokuba uligcinile ilizwi elingonyamezelo lwam, kanjalo nam ndiza kukugcina ngelixa lovavanyo, eliza kuwufikela umhlaba omiweyo uphela, ukubeka uvavanyo kwabo bahleliyo emhlabeni.” (ISityhilelo 3:10) Ibinzana lesiGrike elithi “uligcinile ilizwi elingonyamezelo lwam” linokuthetha ukuthi “ukugcinile oko ndikuthethileyo ngonyamezelo lwam.” Indinyana 8 ibonisa ukuba amaKristu aseFiladelfi ayenganelanga kuthobela imiyalelo kaKristu nje kuphela kodwa ayesilandele isiluleko sakhe sokuba anyamezele ngokuthembeka.—Mateyu 10:22; Luka 21:19.
8. (a) Liliphi idinga elenziwa nguYesu kumaKristu aseFiladelfi? (b) Ngoobani namhlanje abachatshazelwa ‘lilixa lovavanyo’?
8 UYesu wongezelela esithi uya kuwagcina “ngelixa lovavanyo.” Asazi ukuba oko kwakuthetha ntoni kanye kumaKristu elo xesha. Nangona yakhe yee qabu intshutshiso emva kokufa kukaDomitian ngowama-96 C.E., yavuka phantsi ngexesha likaTrajan (98-117 C.E.), ngokuqinisekileyo isiza neemvavanyo ezingakumbi. Kodwa elona “lixa lovavanyo” libakho “kwimini yeNkosi” ebudeni ‘bexesha lokuphela,’ esiphila kulo ngoku. (ISityhilelo 1:10; Daniyeli 12:4) AmaKristu athanjiswe ngomoya atyhubela ixesha lovavanyo ebudeni beMfazwe Yehlabathi I nakamsinya emva kwayo. Kodwa ke, ‘ilixa lovavanyo’ lisaqhubeka. Lichaphazela “umhlaba omiweyo uphela,” kuquka izigidi zabo bayila isihlwele esikhulu, abanethemba lokusinda embandezelweni enkulu. (ISityhilelo 3:10; 7:9, 14) Siya kuba noyolo ukuba ‘siyakugcina oko uYesu akuthethileyo ngonyamezelo,’ okukoku: “Lowo unyamezele kwada kwasekupheleni ngulowo oya kusindiswa.”—Mateyu 24:13.
Ukuzithoba Ngovuyo Kulongamo LukaYehova
9, 10. (a) Ziziphi iindlela umbono wetrone kaYehova ofanele usichaphazele ngazo? (b) Ukufunda kwethu ISityhilelo kunokufak’ isandla njani kuyolo lwethu?
9 Umbono wetrone kaYehova nentendelezo yakhe yasezulwini ochazwe kwisahluko 4 nesesi-5 seSityhilelo ufanele usenze sibe noloyiko. Sifanele sichukunyiswe ngamazwi endumiso asuka entliziyweni athethwa zizidalwa zasezulwini ezinamandla njengoko zizithoba ngovuyo kulongamo lukaYehova olunobulungisa. (ISityhilelo 4:8-11) Amazwi ethu afanele eviwe phakathi kwabo bathi: “KuLowo uhleli etroneni nakuyo iMvana makubekho intsikelelo nembeko nozuko namandla ngonaphakade kanaphakade.”—ISityhilelo 5:13.
10 Ngendlela ecacileyo, oku kuthetha ukuba sizithobe ngovuyo kukuthanda kukaYehova ezintweni zonke. Umpostile uPawulos wabhala: “Nakuphi na enikwenzayo ngelizwi okanye ngomsebenzi, yenzani yonk’ into egameni leNkosi uYesu, nimbulela uThixo uBawo ngaye.” (Kolose 3:17) Ukufunda kwethu iSityhilelo kuya kusenza sibe novuyo lokwenene ukuba siyalugqala ulongamo lukaYehova ezingqondweni zethu nakumazantsi eentliziyo zethu yaye sicinga ngokuthanda kwakhe kuzo zonke iinkalo zobomi bethu.
11, 12. (a) Inkqubo yasemhlabeni kaSathana iza kugungqiswa ize itshatyalaliswe njani? (b) Ngokutsho kweSityhilelo isahluko 7, ngoobani ‘abaya kukwazi ukuma’ ngelo xesha?
11 Ukuzithoba ngovuyo kulongamo lukaYehova kusisiseko solonwabo lomntu ngamnye nolwabo bonke abantu. Kungekudala kuza kwenzeka inyikima enkulu yokomfuziselo eza kugungqisa iziseko zenkqubo yehlabathi likaSathana ize iyitshabalalise. Abayi kuba nandawo yakubalekela abo bangavumiyo ukuzithoba kurhulumente kaKristu woBukumkani basezulwini, omela ulongamo olufanelekileyo lukaThixo. Isiprofeto sithi: “Ookumkani bomhlaba nabo bakuluhlu oluphezulu nabaphathi-mikhosi nezityebi nabo bomeleleyo nawo onke amakhoboka nabo bonke abantu abakhululekileyo bazifihla emiqolombeni nakulwalwa lweentaba. Yaye bathi gqolo besithi kwiintaba nakulwalwa: ‘Welani phezu kwethu nize nisifihle ebusweni baLowo uhleli etroneni nakuyo ingqumbo yeMvana, ngenxa yokuba ifikile imini enkulu yengqumbo yabo, yaye ngubani na okwaziyo ukuma?’ ”—ISityhilelo 6:12, 15-17.
12 Ngokuphathelele loo mbuzo, kwisahluko esilandelayo, umpostile uYohane uchaza abo bayila isihlwele esikhulu, baphuma embandezelweni enkulu, ‘njengabemi phambi kwetrone naphambi kweMvana.’ (ISityhilelo 7:9, 14, 15) Ukuma kwabo phambi kwetrone kaThixo kubonisa ukuba bayayigqala loo trone yaye bazithoba ngokupheleleyo kulongamo lukaYehova. Ngenxa yoko bema njengabafanelekayo.
13. (a) Yintoni enqulwa yinkoliso yabemi bomhlaba, kwaye lufuzisela ntoni uphawu olukumabunzi okanye kwizandla zayo? (b) Ngoko kutheni luya kuba yimfuneko unyamezelo?
13 Kwelinye icala, isahluko 13 sichaza abanye abemi bomhlaba njengabanqula inkqubo yezobupolitika kaSathana, efuziselwa lirhamncwa lasendle. Bafumana uphawu “kwibunzi” labo okanye “kwisandla” sabo, nto leyo ebonisa ukuba bayixhasa ngengqondo nangamandla abo loo nkqubo. (ISityhilelo 13:1-8, 16, 17) Emva koko, isahluko 14 songezelela sisithi: “Ukuba nabani na unqula irhamncwa nomfanekiso walo, aze amkele uphawu ebunzini lakhe okanye esandleni sakhe, kanjalo uya kusela kwiwayini yomsindo kaThixo egalelwa ingaphithikezwanga kwindebe yengqumbo yakhe . . . Apha kulapho kuthetha unyamezelo kwabo bangcwele, abo bagcina imiyalelo kaThixo nokholo kuYesu.” (ISityhilelo 14:9, 10, 12) Njengoko ixesha lihamba, uza kubuzwa ngakumbi umbuzo othi: Wena uxhasa bani? Ngaba uxhasa uYehova nolongamo lwakhe okanye uxhasa inkqubo yezobupolitika engahloneli Thixo efuziselwa lirhamncwa lasendle? Baya kuba noyolo abo baluphephayo uphawu lwerhamncwa nabanyamezela ngokuthembeka njengoko bezithoba kulongamo lukaYehova.
14, 15. Siphi isigidimi esiphazamisa inkcazelo enikelwa siSityhilelo ngeArmagedon, ibe sinayiphi intsingiselo kuthi?
14 Abalawuli “bomhlaba omiweyo uphela” bazinqikele olunenkume, baza kugagana noYehova kwimbambano yolongamo. Olo sukuzwano luza kuba yiArmagedon, “imfazwe yemini enkulu kaThixo uSomandla.” (ISityhilelo 16:14, 16) Kuthi kusanikelwa inkcazelo engokuhlanganiswa kwabalawuli behlabathi kwimfazwe enxamnye noYehova, kubekho amazwi abangel’ umdla aphumayo emxholweni. NguYesu ngokwakhe ophazamisa lo mbono esithi: “Khangela! Ndiza njengesela. Unoyolo lowo uhlala evukile aze azigcine izambatho zakhe zangaphandle, ukuze angahambi ze baze abantu bakhangele ekuhlazekeni kwakhe.” (ISityhilelo 16:15) Oku kusenokuba kwakubhekisela kubaLevi ababengabalindi etempileni ababesithi bakufunyanwa belele emsebenzini wabo wokulinda bakhululwe izambatho zabo baze bahanjiswe ze behlaziswa esidlangalaleni.
15 Isigidimi esidluliselwayo sicacile: Ukuba sifuna ukusinda eArmagedon, simele sihlale siphaphile ngokomoya size sigcine izambatho zokomfuziselo ezisifanisa njengamaNgqina kaYehova uThixo athembekileyo. Siya kuba noyolo ukuba asicubhuki ngokomoya yaye sityhalela phambili ngaphandle kokuyekelela, sisiba nesabelo ngenzondelelo ekusasazeni ‘iindaba ezilungileyo ezingunaphakade’ zoBukumkani bukaThixo obumiselweyo.—ISityhilelo 14:6.
‘Unoyolo Nabani Na Owagcinayo La Mazwi’
16. Kutheni izahluko zokuqukumbela zeSityhilelo zingunobangela woyolo?
16 Abafundi abonoyolo bencwadi yeSityhilelo banokuba nemincili njengoko befunda izahluko eziqukumbelayo ezichaza ithemba lethu elizukileyo—izulu elitsha nomhlaba omtsha, ngamany’ amazwi, uBukumkani basezulwini obunobulungisa obulawula ibutho labantu elitsha elihlanjululweyo, nto leyo ephumela ekudunyisweni ‘kukaYehova uThixo uSomandla.’ (ISityhilelo 21:22) Njengoko olo ngcelele lwemibono emangalisayo lufika esiphelweni, umthunywa oyingelosi wathi kuYohane: “La mazwi athembekile yaye ayinyaniso; ewe, uYehova uThixo wamazwi aphefumlelweyo abaprofeti wathumela ingelosi yakhe ukuba ibonise amakhoboka akhe izinto ezimele zenzeke kamsinya. Kwaye, khangela! ndiyeza ngokukhawuleza. Unoyolo nabani na owagcinayo amazwi esiprofeto salo msongo.”—ISityhilelo 22:6, 7.
17. (a) Sisiphi isiqinisekiso esinikelwa kwiSityhilelo 22:6? (b) Yintoni esifanele siyiphaphele?
17 Abafundi abonwabileyo beSityhilelo baya kukhumbula ukuba akho amazwi afana nala ekuqaleni ‘komsongo.’ (ISityhilelo 1:1, 3) La mazwi ayasiqinisekisa ukuba zonke “izinto” eziprofetwe kule ncwadi yokugqibela yeBhayibhile ziza ‘kwenzeka kamsinya.’ Sele singene mpela kwixesha lokuphela kangangokuba iziganeko ezinento yokwenza nalo ezaxelwa kwangaphambili kwiSityhilelo ngokuqinisekileyo zimele zenzeke esinye emva kwesinye. Ngoko nakuphi na ukuzinza okubonakala ngathi kukho kwinkqubo kaSathana akufanele kusenze sozele. Umfundi ophaphileyo uya kukhumbula izilumkiso ezinikelwa zizigidimi ezathunyelwa kumabandla asixhenxe aseAsia kwaye uya kuphepha imigibe yokuthanda izinto eziphathekayo, unqulo-zithixo, ukuziphatha okubi, ukuba dikidiki namahlelo abawexuki.
18, 19. (a) Kutheni kusafuneka uYesu eze, yaye liliphi ithemba elivakaliswa nguYohane nathi esinalo? (b) UYehova ‘useza’ ngayiphi injongo?
18 Kwincwadi yeSityhilelo, uYesu uphindaphinda amazwi athi: “Ndiyeza ngokukhawuleza.” (ISityhilelo 2:16; 3:11; 22:7, 20a) Kusafuneka eze kugweba iBhabhiloni Enkulu, inkqubo yezobupolitika kaSathana, nabo bonke abantu abangavumiyo ukuzithoba kulongamo lukaYehova, ngoku olumelwa buBukumkani bukaMesiya. Sithelela umpostile uYohane ngamazwi ethu, xa edanduluka esithi: “Amen! Yiza, Nkosi Yesu.”—ISityhilelo 22:20b.
19 UYehova uthi: “Khangela! Ndiyeza ngokukhawuleza, yaye umvuzo endiwunikelayo ukum, ukuze ndinike ngamnye njengoko unjalo umsebenzi wakhe.” (ISityhilelo 22:12) Ngoxa silindele umvuzo ozukileyo wobomi obungenasiphelo njengenxalenye ‘yezulu elitsha’ okanye ‘umhlaba omtsha,’ ngamana singathelela ngenzondelelo ekumemeni bonke abantliziyo zinyanisekileyo sisithi: “ ‘Yiza!’ Ibe nabani na onxaniweyo makeze; nabani na onqwenelayo makathabathe amanzi obomi ngesisa.” (ISityhilelo 22:17) Ngamana nabo bangaba ngabafundi abanoyolo bencwadi ephefumlelweyo nenempembelelo yeSityhilelo!
[Imibhalo esemazantsi]
a Bona incwadi ethi ISityhilelo—Incopho Yaso Ezukileyo Isondele!, iphepha 28-9, 136 (umbhalo osemazantsi).
Iingongoma Zempinda
◻ Liliphi ijelo elasetyenziswa nguYehova ukuze adlulisele ISityhilelo, yaye yintoni esinokuyifunda kuloo nto?
◻ Kutheni sifanele sikuvuyele ukufunda izigidimi ezathunyelwa kumabandla asixhenxe aseAsia?
◻ Sinokuhlala njani sikhuselekile ebudeni ‘belixa lovavanyo’?
◻ Luluphi uyolo esiya kuba nalo ukuba siyawathobela amazwi omsongo oqulethe ISityhilelo?
[Umfanekiso okwiphepha 15]
Banoyolo abo bawugqalayo uMthombo wesigidimi esichulumancisayo
[Umfanekiso okwiphepha 18]
Unoyolo lowo uhlala evukile