Uyigqala Njani Impumelelo?

ESINYE isichazi-magama sichaza impumelelo ngokuthi “kukufumana ubutyebi, inkoliseko okanye udumo.” Ngaba loo nkcazelo iphelele? Ngaba ubutyebi, inkoliseko okanye udumo kuphela kwendlela onokugqala ngayo impumelelo? Ngaphambi kokuba uphendule, phawula oku: UYesu Kristu akazange azifumanele butyebi bezinto eziphathekayo ngexesha lokuphila kwakhe. Akazange azuze nkoliseko kwinkoliso yabantu; yaye wayengahlonelwa naziinkokeli zexesha lakhe. Ukanti, uYesu wayenempumelelo. Ngoba?

Ngoxa wayesemhlabeni, uYesu ‘wayesisityebi kuThixo.’ (Luka 12:21) Emva kokuvuswa kwakhe, uThixo wamvuza ngokumnika “uzuko nembeko.” UYehova wamphakamisa uNyana wakhe “waza ngobubele wamnika igama elingaphezu kwawo onke amanye amagama.” (Hebhere 2:9; Filipi 2:9) Ikhondo lobomi bukaYesu layivuyisa intliziyo kaYehova. (IMizekeliso 27:11) Ubomi bakhe basemhlabeni baphumelela ngenxa yokuba bayiphumeza injongo yabo. UYesu wenza ukuthanda kukaThixo waza wazisa imbeko egameni Lakhe. NoThixo wambeka uYesu ngokumjizeka ngobutyebi, inkoliseko nodumo olungasoze lufunyanwe siso nasiphi na isifundiswa, inkokeli yezobupolitika okanye iqhawe lezemidlalo. Eneneni, uYesu wayeyeyona ndoda iphumeleleyo kubo bonke abantu abakha baphila kulo mhlaba.

Abazali abangamaKristu bayaqonda ukuba xa abantwana babo belandela emanyathelweni kaKristu, besiba zizityebi emehlweni kaThixo njengoYesu, baya kuvuna iintsikelelo ezityebileyo ngoku baze banandiphe imivuzo engathethekiyo kwinkqubo entsha yezinto ezayo. Akukho ndlela yimbi yokulandela emanyathelweni kaKristu kumntu oselula ngaphezu kokwenza umsebenzi owawusenziwa nguYesu—ukubandakanyeka kubulungiseleli bexesha elizeleyo ukuba kunokwenzeka.

Noko ke, kwamanye amazwe kuyinto eqhelekileyo ukuba abaselula bangabungeneli ubulungiseleli bexesha elizeleyo. Xa umfana egqiba ukufunda, kulindelwe ukuba afumane umsebenzi wempangelo osisigxina, atshate aze azinze. Maxa wambi, abantu abaselula abakhulele kwiindawo ezinjalo benza impazamo yokungangeneli ubulungiseleli bexesha elizeleyo. (IMizekeliso 3:27) Ngoba? Ngenxa yengcinezelo, benza ngokuvisisana nezithethe zasekuhlaleni. Oku koko kwenzeka kuRobert.a

Xa Izithethe Zingqubana Nesazela

URobert wakhuliswa njengomnye wamaNgqina kaYehova. Xa wayekwiminyaka yeshumi elivisayo, ihambo yakhe kunye nezinxulumani awayezikhetha zazithandabuzisa. Unina waqala ukukhathazeka ngenxa yakhe. Ngoko ke, wacela omnye uvulindlela, umlungiseleli wexesha elizeleyo wamaNgqina kaYehova, ukuba amkhuthaze. URobert uchaza okwenzekayo emva koko.

“Ndawuxabisa kakhulu umdla owawubonakaliswa ngulo mzalwana unguvulindlela kum. Umzekelo wakhe omhle wandenza ndafuna ukungenela ubuvulindlela ndakugqiba ukufunda. Nantso ke into eyabangela ukuba uMama aphinde akhathazeke—kodwa ekhathazwa yenye into ke ngoku. Kaloku, ngokwesithethe sendawo esihlala kuyo kulungile xa intombazana isiba nguvulindlela yakugqiba ukufunda, kodwa inkwenkwe kufuneka iqale iqokelele imali, yandule ke icinge ngobuvulindlela.

“Ndafundela umsebenzi wobugcisa ndaza ndaqalisa ishishini lam. Kungekudala ndabandakanyeka ngokunzulu kweli shishini yaye ndandidlulisa nje usana kunina ngokuya kwiintlanganiso nangokushumayela. Sandikhathaza isazela sam—ndandisazi ukuba ndandinokumkhonza uYehova ngokuzele ngakumbi. Sekunjalo, yaba ngumgudu wokwenene ukuqhawula koko kwakulindelwe ngabanye kum, kodwa ndiyavuya kuba ndenjenjalo. Ngoku nditshatile, yaye mna nomfazi wam besingoovulindlela kule minyaka mibini idluleyo. Kutshanje, ndiye ndamiselwa njengesicaka solungiselelo sebandla. Ndinokutsho ngokunyanisekileyo ndithi ngoku ndanelisekile kukukhonza uYehova ngentliziyo yam iphela, kangangoko ndinako.”

Eli phephancwadi liye lakhuthaza abaselula ngokuphindaphindiweyo ukuba bafunde umsebenzi wobugcisa okanye bafumane uqeqesho olunokubanceda—ngoxa besesesikolweni ukuba kunokwenzeka. Ngoba? Ukuze babe zizityebi? Akunjalo. Esona sizathu siyintloko kukuze bakwazi ukuzixhasa kakuhle xa bebadala baze bakhonze uYehova ngokuzeleyo kangangoko banako, ngakumbi kubulungiseleli bexesha elizeleyo. Noko ke, ngokufuthi abafana namabhinqa aselula baxakeka kakhulu kukusukela umsebenzi wempangelo kangangokuba ubulungiseleli buye bubonakale bungabalulekanga kangako. Abanye abacingi kwaukucinga ngokungenela inkonzo yexesha elizeleyo. Ngoba?

URobert uyithe thsuphe kumagqabaza akhe. Emva kokuba efundele ubugcisa, uRobert waqalisa ishishini. Kungekudala, wayephila ubomi obukruqulayo nobungenanjongo. Usukelo lwakhe yayikukuba nemali eninzi. Kodwa ngaba ukho umntu ongaphakathi okanye ngaphandle kwebandla lobuKristu owakha walufikelela olo sukelo? AmaKristu afanele alwele ukukwazi ukusebenzisa imali, ayinyamekele ngenkuthalo imbopheleleko yawo yemali; kodwa akwafanele aqonde ukuba kula maxesha anomngcipheko, bambalwa abantu abaye bafikelele kwinqanaba lokuba bazigqale njengabanemali eninzi. Kungenxa yoko le nto idinga elenziwa nguYesu elikuMateyu 6:33 lithuthuzela kangaka kumaKristu.

URobert uyavuya kuba wagqiba kwelokuba alandele iminqweno yentliziyo yakhe kunokuba alandele izithethe zendawo ahlala kuyo. Namhlanje, unandipha umsebenzi wenkonzo yexesha elizeleyo. Ewe, ubulungiseleli bexesha elizeleyo ngumsebenzi obalaseleyo. URobert useluxolweni kuba ukhonza uYehova, njengokuba esitsho, ‘kangangoko enako.’

Sebenzisa Isiphiwo Sakho

Baninzi abantu abanesiphiwo phakathi kwamaNgqina kaYehova. Bambi bakrelekrele ngendlela ebalaseleyo; abanye bangamachule kwimisebenzi yezandla. Zonke ezi ziphiwo zivela kuYehova, onika “bonke abantu ubomi nempefumlo nezinto zonke.” (IZenzo 17:25) Ukuba bekungekho bomi, ezi ziphiwo ngezingenaxabiso.

Ngoko ke, kufanelekile ukuba ubomi bethu bokuzahlulela sibusebenzise enkonzweni kaYehova. Omnye umfana onesiphiwo wagqiba kwelokuba enze kanye loo nto. Wayephila kwinkulungwane yokuqala yeXesha Eliqhelekileyo. Njengelungu lentsapho edumileyo, wakhulela kwisixeko esaziwayo saseTarso yaseKilikiya. Nangona wayengumYuda ngokuzalwa, waba ngummi waseRoma ngenxa kayise. Loo nto yambangela ukuba afumane amalungelo amaninzi. Akukhula, wafunda uMthetho kwenye “yeenjingalwazi” ezazibalasele ngelo xesha—uGamaliyeli. Kwakubonakala ukuba, wayeza kufumana ‘ubutyebi, inkoliseko nodumo’ ngokukhawuleza.—IZenzo 21:39; 22:3, 27, 28.

Yayingubani lo mfana? YayinguSawule igama lakhe. Kodwa uSawule waba ngumKristu waza ekugqibeleni waba ngumpostile uPawulos. Walubekela ecaleni usukelo lwakhe lwangaphambili yaye ubomi bakhe bonke wabunikela kwinkonzo kaYehova njengomKristu. UPawulos waziwa, kungekhona njengegqwetha elidumileyo, kodwa njengomshumayeli weendaba ezilungileyo onenzondelelo. Emva kokuchitha iminyaka ephantse ibe ngama-30 njengomvangeli wasemazweni, uPawulos wabhalela abahlobo abaseFilipi incwadi. Kule ncwadi wayethetha ngezinto awaziphumezayo ngaphambi kokuba abe ngumKristu waza wathi: “Ngenxa [kaYesu Kristu] ndiye ndalahlekelwa zizinto zonke yaye ndizigqala njengenkunkuma eninzi, ukuze ndimzuze uKristu.” (Filipi 3:8) Nakanye, uPawulos akazange azisole ngendlela awabusebenzisa ngayo ubomi bakhe!

Kuthekani ngoqeqesho uPawulos awalufumana kuGamaliyeli? Ngaba lwaba luncedo kuye? Ewe! Izihlandlo eziliqela waba negalelo “ekuthetheleleni iindaba ezilungileyo ngokusemthethweni.” Kodwa umsebenzi owawuphambili kuPawulos yayikukuba ngumshumayeli weendaba ezilungileyo—nto leyo wayengenakuyifundiswa kwisikolo awayekuso ngaphambili.—Filipi 1:7; IZenzo 26:24, 25.

Ngokufanayo namhlanje, abanye baye bakwazi ukusebenzisa iziphiwo abanazo kwanemfundo yabo ukuhambisela phambili izilangazelelo zoBukumkani. Ngokomzekelo, uAmy unesidanga saseyunivesithi kwezorhwebo nesinye kwezomthetho. Wayenomsebenzi oncumisayo njengegqwetha, kodwa ngoku ukhonza njengomlungiseleli ongahlawulwayo kwenye yeeofisi zamasebe zeWatch Tower Society. Xa echaza ubomi bakhe ngoku uAmy uthi: “Ndikholelwa ukuba ndenze olona khetho lulungileyo ebomini bam. . . . Andinqweneli kutshintshisana noogxa bam endandikunye nabo eyunivesithi. Ndinebhongo ngekhondo endilikhethileyo. Ndinento yonke endiyisweleyo nendiyifunayo—ubomi bokwaneliseka nolonwabo, umsebenzi onenjongo nowanelisayo.”

UAmy wakhetha umsebenzi owamzisela uxolo lwengqondo, ulwaneliseko nentsikelelo kaYehova. Ngokuqinisekileyo abazali abangamaKristu bafuna oko kanye ngabantwana babo!

Impumelelo Kubulungiseleli BamaKristu

Kakade ke, kubalulekile ukuba nembono efanelekileyo ngempumelelo kubulungiseleli bobuKristu. Kuyinto eqhelekileyo ukuziva uphumelele xa uye wachitha ixesha elithile kubulungiseleli basentsimini, wahambisa uncwadi lweBhayibhile okanye waba nengxubusho yeBhayibhile eyakhayo nabaninimzi. Kodwa xa singafane sifumane bantu baphulaphulayo, sinokungena esilingweni sokugqiba kwelokuba sidlala ngexesha lethu. Noko ke, khumbula ukuba enye indlela echazwa ngayo impumelelo ‘kukuzuza inkoliseko.’ Yinkoliseko kabani esinqwenela ukuyizuza? Ngokuqinisekileyo yekaYehova. Sinokuyifumana enoba abantu bayasiphulaphula isigidimi sethu okanye akunjalo. UYesu wafundisa abafundi bakhe isifundo esibalulekileyo kule nkalo.

Uya kukhumbula ukuba uYesu wathuma abashumayeli boBukumkani abangama-70 ‘kwizixeko neendawo zonke ezo yena ngokwakhe awayeza kuya kuzo.’ (Luka 10:1) Babeza kushumayela kwiidolophu needolophana bengahambi noYesu. Yayiza kuba sisihlandlo sokuqala besenza loo msebenzi. Ngenxa yoko, uYesu wabanika imiyalelo eneenkcukacha ngaphambi kokuba abathume. Xa bedibana ‘nomhlobo woxolo,’ babeza kumshumayeza ngokucokisekileyo ngoBukumkani. Noko ke, xa bechaswa, babeza kuqhubeka nohambo lwabo, bangazikhathazi. UYesu wachaza ukuba abo babengavumi ukubaphulaphula babechasa uYehova ngokwakhe.—Luka 10:4-7, 16.

Bathi bakusigqiba isabelo sabo sokushumayela, abangama-70 bezisa ingxelo kuYesu “benovuyo, besithi: ‘Nkosi, kwaneedemon zisithobele egameni lakho.’” (Luka 10:17) Kumele ukuba yayibangel’ imincili into yokuba loo madoda angafezekanga akhuphe izidalwa zomoya ezinamandla! Noko ke, uYesu wabalumkisa aba bafundi bakhe banenzondelelo esithi: “Musani ukuba nemihlali ngenxa yoku, kuba oomoya benithobela, kodwa yibani nemihlali ngenxa yokuba amagama enu ebhaliwe emazulwini.” (Luka 10:20) Kusenokwenzeka ukuba aba bangama-70 babengayi kusoloko benawo amandla okukhupha iidemon, okanye babengayi kusoloko befumana intsabelo entle kubulungiseleli. Kodwa ukuba babeye bahlala bethembekile, babeya kusoloko benenkoliseko kaYehova.

Ngaba Unoxabiso Ngabakhonzi Bexesha Elizeleyo?

Omnye umfana wakha waxelela umdala ongumKristu oku: “Xa ndigqiba ukufunda kumabanga aphakamileyo, ndiya kuzama ukufuna umsebenzi. Ukuba ke andiwufumani umsebenzi, ndiya kwandula ke ndicinge ngokungenela uhlobo oluthile lwenkonzo yexesha elizeleyo.” Noko ke, inkoliso yabo baye bangenela ubulungiseleli bobuvulindlela ayinambono injalo. Ukuze babe ngoovulindlela, abanye baye bancama amathuba okusukela imisebenzi encumisayo. Abanye abakhange bavume ukuxhakamfula amathuba emfundo abangela imincili. Njengompostile uPawulos, baye bazincama, kodwa njengoPawulos, uRobert noAmy, abazisoli ngokhetho abalwenzileyo. Bayalixabisa ilungelo abanalo lokusebenzisa iziphiwo abanazo ekudumiseni uYehova, ofanelwe kuko konke abanokumnika kona.

Ngenxa yezizathu ezahlukahlukeneyo, amaNgqina kaYehova amaninzi awanakukwazi ukuba ngoovulindlela. Mhlawumbi kukho iimbopheleleko zeZibhalo abamele bazinyamekele. Sekunjalo, ukuba bakhonza uThixo ‘ngentliziyo, ngomphefumlo nangengqondo’ yabo iphela, uYehova uyakholiswa ngabo. (Mateyu 22:37) Nangona bengakwazi bona ukuba ngoovulindlela, bayaqonda ukuba abo bangoovulindlela bakhethe umsebenzi omhle.

Umpostile uPawulos wabhala esithi: “Musani ukumilisa okwale nkqubo yezinto.” (Roma 12:2) Ngokuvisisana nesiluleko sikaPawulos, asimele sivumele imilinganiselo yale nkqubo ngokuphathelele izithethe okanye umsebenzi wokuziphilisa isenze sicinge ngokuvisisana nayo. Enoba unako ukuba nguvulindlela okanye akunjalo, inkonzo kaYehova mayibe yeyona nto iphambili ebomini bakho. Uya kuphumelela logama nje unenkoliseko kaYehova.

[Umbhalo osemazantsi]

[Umfanekiso okwiphepha 19]

Ungabambiseki kubomi obukruqulayo nobungenanjongo