Ubutyebi Besisa Buzisa Uvuyo
NJENGOMVELELI onothando ongumKristu, umpostile uPawulos wayenomdla onzulu kwabo wayekholwa kunye nabo. (2 Korinte 11:28) Ngenxa yoko, phakathi kwiminyaka yama-50 yenkulungwane yokuqala yeXesha lethu Eliqhelekileyo xa wayelungiselela ukuba kuqokelelwe imali ngenxa yamaKristu awayeswele kwelakwaYuda, wasebenzisa elo thuba ukuba adlulisele isifundo esibalulekileyo ngesisa. UPawulos wabethelela ukuba ukupha uchwayitile kuxabisekile kakhulu kuYehova: “Ngamnye makenze kanye njengoko egqibile entliziyweni yakhe, kungekhona ngokukrokra okanye ngokunyanzelwa, kuba uThixo uthanda umphi ochwayitileyo.”—2 Korinte 9:7.
Ayengamahlwempu, Kodwa Enesisa
Inkoliso yamaKristu enkulungwane yokuqala yayingengobantu badumileyo ekuhlaleni. UPawulos wathi phakathi kwabo ‘babengebaninzi abanamandla.’ ‘Babezizinto ezibuthathaka zehlabathi,’ “izinto ezingabekekileyo zehlabathi.” (1 Korinte 1:26-28) Ngokomzekelo, amaKristu awayehlala eMakedoniya ‘ayenobuhlwempu obunzulu’ yaye ‘ephantsi kovavanyo.’ Sekunjalo, loo makholwa athobekileyo aseMakedoniya acela ukuba afumane ilungelo lokunikela ngemali “kubulungiseleli obumiselwe abo bangcwele”; yaye oko anikela ngako, uPawulos wangqina ukuba, ‘kwakungaphezu kwamandla awo’!—2 Korinte 8:1-4.
Sekunjalo, oku kupha kwabo ngesisa kwakungalinganiswa ngesixa ekwakunikelwe ngaso. Kunoko, eyona nto yayibalulekile yintshukumisa, ukulungela ukwabelana nabanye, notyekelo lwentliziyo. UPawulos wabonisa amaKristu aseKorinte ukuba xa umntu esenza umnikelo kubandakanyeka ingqondo nentliziyo. Wathi: “Ndiyawazi umdla eninawo endiqhayisa ngawo kwabaseMakedoni, . . . inzondelelo yenu iye yavuselela uninzi lwabo.” ‘Ayegqibile ezintliziyweni zawo’ ukuba anikele ngesisa.—2 Korinte 9:2, 7.
‘Baqhutywa Ngumoya Wabo’
Kusenokwenzeka ukuba umpostile uPawulos wayecinga ngomzekelo womnikelo wabo wesisa wangaphambili, abawenza entlango kwiinkulungwane ezili-15 ngaphambi kwexesha lakhe. Izizwe ezili-12 zakwaSirayeli zazikhululwe ebukhobokeni baseYiputa. Ngoku zazikumazantsi eNtaba yeSinayi, yaye uYehova waziyalela ukuba zakhe umnquba wokunqulela zifake nezixhobo zokunqula. Oku kwakuza kufuna ubuncwane obuninzi, yaye uhlanga lwacelwa ukuba lunikele.
Asabela njani loo maSirayeli? “Beza, wonk’ ubani owayeqhutywa yintliziyo, abo bonke bamoya wabaqhubayo, bawuzisa umnikelo kaYehova womsebenzi wentente yokuhlangana.” (Eksodus 35:21) Ngaba olu hlanga lwanikela ngesisa? Kakhulu! UMoses wanikela le ngxelo ilandelayo: “Abantu bazisa okuninzi kakhulu kunoko kufunekayo enkonzweni yomsebenzi athe uYehova wayalela ukuba wenziwe.”—Eksodus 36:5.
Yayinjani imeko yemali kumaSirayeli ngelo xesha? Ngaphambilana nje, ayengamakhoboka ngendlela elusizi, ‘ecinezelwa ngemithwalo,’ ephila ‘ubomi obukrakra,’ ‘nobenkxwaleko.’ (Eksodus 1:11, 14; 3:7; 5:10-18) Ngoko, akunakwenzeka ukuba ayenentabalala yezinto eziphathekayo. Liyinyaniso elokuba, amaSirayeli aphuma kwilizwe lobukhoboka nemihlambi yeegusha neenkomo. (Eksodus 12:32) Kodwa akunakwenzeka ukuba yayimikhulu kangako, kuba kungekudala emva kokuba eyishiyile iYiputa, akhalazela ukungabi nanyama nasonka sokutya.—Eksodus 16:3.
Phofu ke, azifumana phi amaSirayeli izinto awanikela ngazo ekwakhiweni komnquba? Kwiinkosi zawo zangaphambili, amaYiputa. IBhayibhile ithi: ‘Oonyana bakaSirayeli bacela kumaYiputa impahla yesilivere nempahla yegolide neengubo zokwaleka. AmaYiputa abanika oko bakucelayo.’ Ezi zenzo zesisa zamaYiputa zaziyintsikelelo evela kuYehova, kungekhona kuFaro. Ingxelo yobuthixo ithi: “UYehova wabenza bakholeka aba bantu emehlweni amaYiputa, aza abanika oko bakucelayo.”—Eksodus 12:35, 36.
Khawucinge indlela awavakalelwa ngayo amaSirayeli. Izizukulwana zaziye zabandezeleka ngokunzulu bubukhoboka nokuswela. Ngoku zazikhululekile yaye zinobutyebi bezinto eziphathekayo. Zaziza kuvakalelwa njani kukwahlukana nenxalenye yezo zinto zazinazo? Zazisenokuvakalelwa kukuba zazizizuzele zona yaye zazinelungelo lokuzigcina. Noko ke, xa zacelwa ukuba zinikele ngemali ukuze zixhase unqulo olunyulu, zanikela—yaye azizange zibe mathidala okanye zikwenze oko ngokuvimba! Azizange zilibale ukuba nguYehova owayezenze zafumana ezo zinto ziphathekayo. Ngaloo ndlela, zanikela ngentabalala yesilivere negolide nemfuyo. ‘Iintliziyo zazo zazivuma.’ ‘Zaqhutywa ziintliziyo zazo.’ ‘Zaqhutywa ngumoya wazo.’ Ngokwenene ‘yayingumnikelo wokuzithandela kuYehova.’—Eksodus 25:1-9; 35:4-9, 20-29; 36:3-7.
Ukukulungela Ukupha
Ubungakanani bomnikelo abubonisi mlinganiselo wesisa anaso lowo unikelayo. UYesu Kristu wakha wabukela abantu ababefaka imali kwizikhongozelo zobuncwane zasetempileni. Izityebi zaphosa iingqekembe ezininzi, kodwa uYesu wachukumiseka akubona umhlolokazi osweleyo ephosa iingqekembe ezimbini ezincinane zexabiso elincinane kakhulu. Wathi: “Lo mhlolokazi, nangona elihlwempu, uphose ngaphezu kwabo bonke. . . . Ekusweleni kwakhe uphose konke abenokuphila ngako.”—Luka 21:1-4; Marko 12:41-44.
Amagqabaza kaPawulos awayesiya kwabaseKorinte ayevisisana nale ngcamango kaYesu. Ngokuphathelele ukwenziwa kweminikelo ukuze kuncedwe amanye amakholwa asweleyo, uPawulos wathi: “Ukuba umntu unolangazelelo kuqala, umnikelo wakhe wamkeleka ngakumbi ngokoko anako, kungekhona ngokoko angenako.” (2 Korinte 8:12) Ewe, iminikelo ayenziwa ngenjongo yokhuphiswano okanye yokuthelekisa. Umntu unikela ngokoko anako, yaye uYehova uyakholiswa ngumoya wokupha.
Nangona kungekho mntu unokutyebisa uYehova, lowo zizezakhe zonke izinto, ukunikela lilungelo elivulela abanquli bakhe ithuba lokubonisa uthando abanalo ngaye. (1 Kronike 29:14-17) Iminikelo eyenziwa, kungekhona ngenjongo yokuqhayisa okanye ngenxa yezinye iintshukumisa zokuzingca, kodwa ngesimo sengqondo esifanelekileyo nokuze kuhanjiselwe phambili unqulo oluyinyaniso, izisa uvuyo nentsikelelo kaThixo. (Mateyu 6:1-4) UYesu wathi: “Kunoyolo ngakumbi ukupha kunokwamkela.” (IZenzo 20:35) Sinokuluxhamla olo yolo ngokunikela ngamandla ethu enkonzweni kaYehova nangokubekela bucala inxalenye yezinto zethu eziphathekayo ukuze kuxhaswe unqulo oluyinyaniso kuze kuncedwe abafanelekayo.—1 Korinte 16:1, 2.
Ukulungela Ukupha Namhlanje
Namhlanje, amaNgqina kaYehova aba nemincili xa ebona inkqubela ekushunyayelweni ‘kwezi ndaba zilungileyo zobukumkani’ emhlabeni wonke. (Mateyu 24:14) Ebudeni beminyaka elishumi yokugqibela yenkulungwane yama-20, abantu abangaphezu kwama-3 000 000 baye babhaptizwa ukuze bafuzisele uzahlulelo lwabo kuYehova uThixo, yaye kwasekwa amabandla amatsha amalunga nama-30 000. Ewe, kumabandla amaNgqina kaYehova akhoyo namhlanje elinye kwamathathu lisekwe ebudeni beminyaka elishumi edluleyo! Inkoliso yolu lwando ngumphumo wokuzibhokoxa kwamadoda namabhinqa angamaKristu anikela ngexesha namandla awo ukuze atyelele abamelwane bawo abaxelele ngeenjongo zikaYehova. Inxalenye yolu lwando ngumphumo womsebenzi wabavangeli basemazweni, abashiya amakhaya abo baze baye kumazwe akude baye kunceda kumsebenzi wokushumayela ngoBukumkani. Olu lwando luye lwabangela ukuba kwenziwe iziphaluka ezitsha, nto leyo eye yenza ukuba kufuneke abaveleli beziphaluka abatsha. Ukongezelela, kuye kwafuneka iiBhayibhile ezingakumbi eziza kusetyenziswa ekushumayeleni nakufundisiso lobuqu. Kuye kwafuneka uncwadi olushicilelweyo olungakumbi. Yaye kumazwe amaninzi, kuye kwafuneka ukuba kwandiswe izakhiwo zamasebe okanye kufunwe ezinye ezikhudlwana. Olu lwando kuye kwahlangatyezwana nalo ngoncedo lweminikelo yokuzithandela evela kubantu bakaYehova.
Imfuneko YeeHolo ZoBukumkani
Eyona nto iphambili eye yabonakala iyimfuneko kakhulu ngenxa yolwando lwamaNgqina kaYehova ziiHolo zoBukumkani. Uhlolisiso olwenziwe ekuqaleni kowama-2000 ludize ukuba kufuneka iiHolo zoBukumkani ezingaphezu kwe-11 000 kwiindawo ezinabantu abahlelelekileyo, apho imali inqongopheleyo. Khawucinge ngeAngola. Nangona bekusiliwa imfazwe yamakhaya, nyaka ngamnye elo lizwe lifumana ulwando lwabavakalisi boBukumkani abamalunga ne-10 ekhulwini. Noko ke, inkoliso kumabandla angama-675 akweli lizwe likhulu laseAfrika ihlanganisana phandle. Kukho iiHolo zoBukumkani ezingama-22 kuphela kwelo lizwe, yaye kwezi, zili-12 kuphela ezinophahla.
Imeko yalapho ifana neyeDemocratic Republic of Congo. Nangona kukho amabandla amalunga nama-300 kwisixeko saseKinshasa esilikomkhulu lalapho, kukho iiHolo zoBukumkani ezilishumi kuphela. Kulo lonke eli lizwe, kufuneka iiHolo zoBukumkani ezili-1 500 ngokukhawuleza. Ngenxa yolwando olukhawulezileyo kumazwe akwiMpuma Yurophu, iRashiya neUkraine zibika ukuba kukho iimfuneko yamakhulu eeHolo zoBukumkani apho. IBrazil ibalaselisa ulwando olukhawulezileyo kuMzantsi noMbindi Merika, apho kukho amaNgqina angaphezu kwesiqingatha sesigidi nemfuneko enkulu yeeHolo zoBukumkani ezingakumbi.
Ukuze kuhlangatyezwane noko kufunekayo kumazwe anjengala, amaNgqina kaYehova asebenzisa inkqubo ekhawulezayo yokwakha iiHolo zoBukumkani. Le nkqubo ixhaswa ngemali yeminikelo yesisa eyenziwa bubuzalwana bomhlaba wonke, ukuze nawona mabandla ahlwempuzekileyo akwazi ukuba nendawo efanelekileyo yokunqulela.
Njengakwixesha likaSirayeli wamandulo, kunokuphunyezwa okuninzi kuba amaKristu anyanisekileyo ‘ebeka uYehova ngezinto zawo zexabiso.’ (IMizekeliso 3:9, 10) IQumrhu Elilawulayo lamaNgqina kaYehova lithanda ukusebenzisa eli thuba ukuze livakalise umbulelo ongazenzisiyo kubo bonke abaye baqhutywa ziintliziyo zabo ukuba babe nesabelo ekupheni ngokuzithandela. Yaye sinokuba nentembelo yokuba umoya kaYehova uya kuqhubeka ushukumisa iintliziyo zabantu bakhe ukuba baxhase iimfuno zomsebenzi woBukumkani oqhubeka usanda.
Njengoko ulwando lomhlaba wonke luqhubeka, ngamana singahlala sikhangela amathuba okunikela ngamandla, ngexesha nangobuncwane bethu ngokuchwayita nangokuvumayo. Yaye ngamana singafumana uvuyo lokwenyaniso olubangelwa nguloo moya wokupha.
[Ibhokisi ekwiphepha 29]
“YISEBENZISENI KAKUHLE!”
“Ndineminyaka elishumi ubudala. Ndithumela le mali ukuze nithenge iphepha okanye nantoni na yokwenza iincwadi.”—Cindy.
“Ndiyavuyiswa kukuthumela le mali ukuze nisenzele iincwadi ezingakumbi. Ndiye ndaqokelela le mali xa bendincedisa utata. Ngoko ke yisebenziseni kakuhle!”—Pam, oneminyaka esixhenxe.
“Ndiye ndabuhlungu kakhulu ngenxa yenkanyamba. Ndinethemba lokuba nisindile. Nazi [ii-$2, U.S.] [R14] yaye le yiyo yonke imali ebisebhankini yam.”—Allison, oneminyaka emine.
“NdinguRudy igama lam, yaye ndineminyaka eli-11 ubudala. Umninawa wam uRalph uneminyaka emithandathu. Udade wethu uJudith uneminyaka emibini enesiqingatha. Besiqokelela le mali kwimali yomxhesho wethu kangangeenyanga ezintathu ukuze sincede abazalwana bethu [abakummandla othwaxwe yimfazwe]. Siye sakwazi ukuqokelela ezi dola zingama-20 [R138] sizithumelayo ngoku.”
“Ndibuhlungu kakhulu ngenxa yabazalwana [abafikelwe yinkanyamba]. Ndiye ndafumana iidola ezili-17 [R117] xa bendisebenza notata. Le mali andiyithumeli ngenjongo yokwenza nto ithile ikhethekileyo, niya kubona nina ukuba nenza ntoni ngayo.”—Maclean, oneminyaka esibhozo.
[Ibhokisi ekwiphepha 31]
Iindlela Abanye Abakhetha Ukunikela Ngazo
IMINIKELO EYA KUMSEBENZI OWENZIWA EHLABATHINI LONKE
Abaninzi babeka bucala okanye benze uqingqo-mali lwemali abaza kuyifaka kwiibhokisi zeminikelo ezibhalwe “Iminikelo Eya Kumsebenzi WoMbutho Owenziwa Ehlabathini Lonke—Mateyu 24:14.” Nyanga nganye amabandla athumela ezi zixa zemali kwikomkhulu lehlabathi eliseBrooklyn, eNew York, okanye kwiofisi yesebe esekuhlaleni.
Iminikelo yokuzithandela yemali isenokuthunyelwa ngokungqalileyo kwiAccounting Office, Watch Tower Bible and Tract Society of Pennsylvania, Private Bag X2067, Krugersdorp, 1740, South Africa, okanye kwiofisi yoMbutho enyamekela ilizwe lakho. Kusenokunikelwa ngezinto ezenziwe ngamatye anqabileyo okanye ngezinye izinto ezixabisekileyo. Le minikelo ifanele iphelekwe yileta emfutshane echaza ukuba le yiminikelo.
ILUNGISELELO LOMNIKELO WOXHOMEKEKO
Imali isenokunikelwa kwiWatch Tower Society phantsi kwelungiselelo elikhethekileyo lokuba, xa lowo unikelayo efuna ukuyisebenzisa, loo mnikelo ubuyiselwe kuye. Ukuze ufumane inkcazelo engakumbi, nceda unxibelelane neAccounting Office ekwisebe lasekuhlaleni kule dilesi ibhalwe ngasentla.
UKUNIKELA OKUCETYIWEYO
Ukongezelela kwiminikelo yemali neminikelo yemali yoxhomekeko, zikho ezinye iindlela zokunikela kwinkonzo yoBukumkani ehlabathini lonke. Ezi ziquka:
I-Inshorensi: IThe Watch Tower Society isenokubhaliswa njengeya kufumana imali kwi-inshorensi yobomi okanye kwilungiselelo lemali yomhlala-phantsi.
Imali Eselugcinweni Neebond: Imali eselugcinweni neebond zinokunikelwa kwiWatch Tower Society njengezipho okanye phantsi kwelungiselelo lokuba ingeniso iqhubeke ihlawulwa kulowo wenze umnikelo.
Isiza Nezindlu Ezikuso: Isiza nezindlu ezinokuthengiswa zinokunikelwa kwiWatch Tower Society njengomnikelo okanye ngokuzigcina elungelweni lalowo unikele ngazo, aqhubeke ehlala kuso ebudeni bokuphila kwakhe. Ubani ufanele aqhagamshelane noMbutho ngaphambi kokwenza isivumelwano sokunikela ngomhlaba kuMbutho.
Iminqophiso Yamafa: Izinto okanye imali isenokushiyelwa iWatch Tower Society ngokwenziwa komnqophiso welifa osemthethweni.
ACCOUNTING OFFICE
Watch Tower Bible and Tract Society of Pennsylvania
Private Bag X2067, Krugersdorp, 1740
Inombolo Yemfonomfono: (011) 761 1000