UEnoki Wahamba NoThixo Kwihlabathi Elingamhloneliyo UThixo

UMTYHOLI uthi angenza bonke abantu bamtyeshele uThixo, yaye maxa wambi kusenokubonakala ngathi ebephumelela. Malunga neenkulungwane ezintlanu emva kokufa kuka-Abheli, akukho bani wazibonakalisa engumkhonzi othembekileyo kaYehova. Ngokwahlukileyo koko, ubungendawo nokuziphatha ngendlela engamhloneliyo uThixo kwaba yinto yomhla nezolo.

Kwakusebudeni belo xesha lokuwohloka ngokomoya awathi wavela ngalo uEnoki. Ubalo-maxesha lweBhayibhile lumisela ukuzalwa kwakhe ngowama-3404 ngaphambi kweXesha Eliqhelekileyo. Ngokwahlukileyo kubantu bexesha lakhe, uEnoki waba yindoda eyamkelekileyo kuThixo. Umpostile uPawulos wamquka phakathi kwabakhonzi bakaYehova abanokholo olungumzekelo kumaKristu. Wayengubani uEnoki? Luluphi ucelomngeni awayeza kujamelana nalo? Wahlangabezana njani nalo? Yaye inayiphi intsingiselo kuthi ingqibelelo yakhe?

Ngemihla kaEnoshi, malunga neenkulungwane ezine ngaphambi kwexesha likaEnoki, “kwaqalwa ngelo xesha ukubiza egameni likaYehova.” (Genesis 4:26) Igama likaThixo lalisetyenziswa kwasekuqaleni kwembali yoluntu. Ngoko, oko kwaqala ebudeni bokuphila kukaEnoshi ngokucacileyo yayingekokubiza egameni likaYehova ngokholo nangonqulo olunyulu. Bambi abaphengululi beBhayibhile bathi iGenesis 4:26 imele ifundeke ngolu hlobo, “kwaqala ukunyelisa” okanye “kwandula kwaqala ukunyeliswa.” Kusenokwenzeka ukuba abantu baqalisa ukusebenzisa igama likaYehova ukubhekisela kubo ziqu okanye kwabanye abantu abasondela ngabo ekunquleni uThixo. Okanye mhlawumbi basebenzisa eli gama kwizithixo.

‘UEnoki Wahamba NoThixo Oyinyaniso’

Nangona uEnoki wayengqongwe ngabantu abangamhloneliyo uThixo, “wahlala ehamba noThixo oyinyaniso,” uYehova. Akukho ngxelo ithi ookhokho bakhe—uSete, uEnoshi, uKenan, uMahalaleli noYaredi—bahamba noThixo. Abazange bakwenze oko ngomlinganiselo uEnoki awakwenza ngako, ekubonakala ukuba indlela awayephila ngayo yayahlukile kweyabo.—Genesis 5:3-27.

Ukuhamba noYehova kwakubandakanya ukuqhelana nokuba nobuhlobo obusenyongweni noThixo kuphela nje kuba uEnoki wayephila ngokuvisisana nokuthanda kukaThixo. UYehova wayekholiswa kukuzinikela kukaEnoki. Phofu ke, iSeptuagint yesiGrike ithi “UEnoki wayemkholise ngokwenene” uThixo, ngcamango leyo eveliswa nangumpostile uPawulos.—Genesis 5:22; Hebhere 11:5.

Isiseko solwalamano oluhle lukaEnoki noYehova yayilukholo lwakhe. Kusenokwenzeka ukuba wayenokholo ‘kwimbewu’ ethenjisiweyo ‘yomfazi’ kaThixo. Ukuba wayeqhelene noAdam, uEnoki wayenokufumana ulwazi ngendlela uThixo awayeqhubana ngayo nesibini sokuqala esingabantu e-Eden. Ulwazi ngoThixo awayenalo uEnoki lwamenza waluhlobo lomntu ‘olumfuna ngenyameko.’—Genesis 3:15; Hebhere 11:6, 13.

Kwimeko kaEnoki neyethu, ulwalamano oluhle noYehova lufuna okungaphezulu kunolwazi nje ngoThixo. Ukuba sibuxabisile ubuhlobo obusenyongweni nomntu othile, ngaba akuyonyaniso ukuba iingcinga nezenzo zethu ziphenjelelwa ziimbono zakhe? Siyawaphepha amazwi okanye izenzo eziza kuchitha obo buhlobo. Ukuba siceba ukwenza utshintsho ebomini bethu, ngaba asiyicingi indlela oluya kubuchaphazela ngayo obo buhlobo?

Ngokufanayo, umnqweno wokufuna ukulondoloza ubuhlobo obusenyongweni noThixo uya kuphembelela oko sikwenzayo. Undoqo kule nkalo lulwazi oluchanileyo ngoko kwamkelekileyo kuye noko akuchasileyo. Emva koko ke silawulwa lolo lwazi, sizama ukumkholisa ngeengcinga nangezenzo.

Ewe, ukuze sihambe noThixo, simele simkholise. Oku koko wayekwenza uEnoki kangangamakhulu eminyaka. Eneneni, isenzi sesiHebhere esibonisa ukuba uEnoki ‘wahamba’ noThixo, sibhekisela ekuphinda-phindeni into ngokuqhubekayo. Enye indoda ethembekileyo ‘eyahamba noThixo’ nguNowa.—Genesis 6:9.

UEnoki wayeyindoda enentsapho, enomfazi yaye “wazala oonyana neentombi.” Omnye woonyana bakhe yayinguMethusela. (Genesis 5:21, 22) Kumele ukuba uEnoki wenza konke okusemandleni akhe ukongamela indlu yakhe ngendlela efanelekileyo. Noko ke, njengoko wayengqongwe ngabantu abangamhloneliyo uThixo, kwakungelula kuye ukukhonza uThixo. Kusenokwenzeka ukuba uLameki, uyise kaNowa, wayekuphela komntu owayethembekile kuYehova ngexesha lakhe. (Genesis 5:28, 29) Sekunjalo, ngenkalipho uEnoki waqhelisela unqulo lokwenyaniso.

Yintoni eyanceda uEnoki wahlala ethembekile kuThixo? Ngokungathandabuzekiyo, wayengazibandakanyi nabantu ababenyelisa igama likaYehova okanye amanye amaqabane angafanelekanga ukuba ngabahlobo bomntu onqula uThixo. Ukufuna uncedo lukaYehova ngomthandazo nako kusenokuba kwawomeleza umnqweno kaEnoki wokuphepha ukwenza nayiphi na into engamkholisiyo uMdali wakhe.

Isiprofeto Nxamnye Nabo Bangamhloneliyo uThixo

Ukugcina imilinganiselo ephakamileyo yokuziphatha kunzima ngokwaneleyo xa singqongwe ngabantu abangamhloneliyo uThixo. Kodwa uEnoki wavakalisa isigidimi somgwebo esingenalusini nxamnye nabangendawo. Esalathiswa ngumoya kaThixo, uEnoki waprofeta wavakalisa oku: “Khangela! UYehova weza enamashumi amawaka akhe angcwele, ukuza kuphumeza umgwebo nxamnye nabo bonke, nokuza kubafumanisa benetyala bonke abangenabuthixo ngokuphathelele zonke izenzo zabo ezingezozabuthixo abazenzayo ngendlela engeyoyabuthixo, nangokuphathelele zonke izinto ezothusayo aboni abangenabuthixo abazithetha nxamnye naye.”—Yude 14, 15.

Esi sigidimi sasiza kuba nayiphi impembelelo kooncanyelweni abangabahedeni? Kusengqiqweni ukucinga ukuba amazwi abukhali ngolo hlobo amenza akathandwa uEnoki, mhlawumbi ada amzisela ugculelo nezisongelo. Kusenokwenzeka ukuba bambi bade bafuna ukumcim’ igama. Noko ke, uEnoki akazange oyikiswe ngekati esengxoweni. Wayekwazi oko kwehlela uAbheli olilungisa, yaye njengaye, uEnoki wayezimisele ukukhonza uThixo phantsi kwazo naziphi na iimeko.

“UThixo Wamthabatha”

Kuyabonakala ukuba uEnoki wayesengozini enkulu xa ‘uThixo wamthabathayo.’ (Genesis 5:24) UYehova akazange avumele ukuba lo mprofeti wakhe angcungcutheke ezandleni zeentshaba ezivutha intiyo. Ngokutsho kompostile uPawulos, “uEnoki wafuduswa khon’ ukuze angaboni kufa.” (Hebhere 11:5) Uninzi luthi uEnoki akazange afe—luthi uThixo wamthabathela ezulwini, apho waqhubeka ephila. Kodwa ke, uYesu walikhupha latsola elokuba: “Akukho mntu unyukele ezulwini ngaphandle kwalowo wehla evela ezulwini, uNyana womntu.” UYesu waba ‘ngumanduleli’ wabo bonke abo banyukele ezulwini.—Yohane 3:13; Hebhere 6:19, 20.

Ngoko, kwenzeka ntoni kuEnoki? ‘Ukufuduswa kwakhe khon’ ukuze angaboni kufa’ kunokuthetha ukuba uThixo wamenza wanikel’ ingqalelo kumbono wesiprofeto waza wabuphelisa ubomi bakhe ngoxa wayekweso simo. Phantsi kwaloo meko, uEnoki wayengasokuze azive iintlungu zokufa. Waza ‘akafunyanwa’ kuba uYehova wawungcwaba umzimba wakhe njengoko wenjenjalo ngomzimba kaMoses.—Duteronomi 34:5, 6.

UEnoki waphila iminyaka engama-365—ixesha elifutshane kunoninzi lwabantu bomhla wakhe. Kodwa into ebalulekileyo kubathandi bakaYehova kukuba bamkhonze ngokuthembeka de baye kulala kobandayo. Siyakwazi oku kuba “ngaphambi kokufuduswa kwakhe wayenobungqina bokuba wayemkholise kakuhle uThixo.” IZibhalo azichazi ukuba uYehova wakudlulisela njani oku kuEnoki. Sekunjalo, ngaphambi kokuba uEnoki afe, waqinisekiswa ukuba umanelisile uThixo, yaye sinokuqiniseka ukuba uYehova uza kumkhumbula eluvukweni.

Xelisa Ukholo LukaEnoki

Ngokufanelekileyo sinokuxelisa ukholo lwabantu abazinikele kuThixo. (Hebhere 13:7) Ngokholo uEnoki wakhonza njengomprofeti wokuqala kaThixo owayethembekile. Ihlabathi lomhla kaEnoki lalifana nelomhla wethu—linogonyamelo, ukunyeliswa kwegama likaThixo nabantu abangamhloneliyo uThixo. Sekunjalo, uEnoki wayohlukile. Wayenokholo lokwenene yaye engumzekelo wokuzinikela kuThixo. Ewe, uYehova wamnika isigidimi somgwebo esiqatha awayemele asivakalise, kodwa kwangaxeshanye wamomeleza ukuze asivakalise. Ngenkalipho uEnoki walufeza uthumo lwakhe, yaye uThixo wamlondoloza kwinkcaso yeentshaba zakhe.

Ukuba sinokholo njengoEnoki, uYehova uya kusomeleza ukuze sivakalise isigidimi sakhe kule mihla yokugqibela. Uya kusinceda simelane nenkcaso ngenkalipho, yaye ukuzinikela kwethu kuThixo kuya kusenza sahluke kwabo bangamhloneliyo uThixo. Ukholo luya kusenza sihambe noThixo size siziphathe ngendlela evuyisa intliziyo yakhe. (IMizekeliso 27:11) Ngokholo, uEnoki olilungisa wakwazi ukuhamba noYehova kwihlabathi elinabantu abangamhloneliyo uThixo, nathi sinako.

[Ibhokisi ekwiphepha 30]

Ngaba IBhayibhile Iyacaphula Kwincwadi kaEnoki?

Incwadi kaEnoki yincwadi engaphefumlelwanga yaye iqulethe ingxelo ebhalwe ngabantu. Kuxokwa kuthiwe yabhalwa nguEnoki. Mhlawumbi le ncwadi yaveliswa malunga nenkulungwane yokuqala neyesibini ngaphambi kweXesha Eliqhelekileyo, yaye yingqokelela yamabali abaxiweyo obuxoki nangekhoyo kwimbali yamaYuda, ekubonakala ukuba yingcaciso engakumbi yeendinyana ezimbalwa zeGenesis ezithetha ngoEnoki. Oku nje kukodwa kwanele ukuba abathandi beLizwi likaThixo eliphefumlelweyo bayithabathe njengebubuxoki.

EBhayibhileni, yincwadi kaYude kuphela equlethe amazwi esiprofeto kaEnoki athi: “Khangela! UYehova weza enamashumi amawaka akhe angcwele, ukuza kuphumeza umgwebo nxamnye nabo bonke, nokuza kubafumanisa benetyala bonke abangenabuthixo ngokuphathelele zonke izenzo zabo ezingezozabuthixo abazenzayo ngendlela engeyoyabuthixo, nangokuphathelele zonke izinto ezothusayo aboni abangenabuthixo abazithetha nxamnye naye.” (Yude 14, 15) Uninzi lwabaphengululi luphikisa ngelithi isiprofeto sikaEnoki esinxamnye nabantu abangamhloneliyo uThixo bexesha lakhe sicatshulwe ngokusuka ngqo kwiNcwadi kaEnoki. Ngaba kunokwenzeka ukuba uYude wasebenzisa le ncwadi engaphefumlelwanga nengenakuthenjwa njengomthombo wakhe?

IZibhalo aziyityhili indlela uYude azi ngayo ngesiprofeto sikaEnoki. Kusenokwenzeka ukuba wacaphula nje umthombo oqhelekileyo, imbali ethembekileyo ayifumana kumthombo wamandulo. Ngokucacileyo uPawulos wenza okufanayo xa wathi uYanes noYambresi ngabenzi bomlingo ababechasene noMoses abangachazwanga ababesenza umlingo kwinkundla kaFaro. Ukuba umbhali weNcwadi kaEnoki wayekwazi ukufikelela kumthombo wamandulo ololo hlobo, kutheni simele sikhanyele ukuba naye uYude wayekwazi ukufikelela kuloo mthombo?a—Eksodus 7:11, 22; 2 Timoti 3:8.

Indlela uYude awayifumana ngayo le nkcazelo ingesigidimi sikaEnoki kubantu abangamhloneliyo uThixo ngumbandela nje omncinane. Ukuthembeka kwayo kungqinelwa sisibakala sokuba uYude wabhala esalathiswa ngumoya kaThixo. (2 Timoti 3:16) Umoya oyingcwele kaThixo wamalathisa ukuba angathethi nantoni na engeyonyaniso.

[Umbhalo osemazantsi]

[Umfanekiso okwiphepha 31]

Ngenkalipho uEnoki wavakalisa isigidimi sikaYehova