Xelisa UYehova Xa Uqeqesha Abantwana Bakho

“Ngaba bonke abazali ababaluleki abantwana babo?”—HEBHERE 12:7, IContemporary English Version.

1, 2. Kutheni abazali benengxaki ekukhuliseni abantwana babo namhlanje?

UHLOLISISO olwenziwa eJapan nabantu abadala kwiminyaka embalwa eyadlulayo lwabonisa ukuba malunga nesiqingatha sabo babevakalelwa kukuba luncinane kakhulu unxibelelwano olukhoyo phakathi kwabazali nabantwana babo nokuba abazali babafekethisa kakhulu abantwana babo. Kolunye uhlolisiso olwenziwa kwelo lizwe, malunga nekota yabo baphendulayo yavuma ukuba ayikwazi ukusebenzisana nabantwana. Olu tyekelo asinto ingaqhelekanga kwelaseMpuma. IThe Toronto Star yathi: “Abazali abaninzi baseKhanada bavuma ukuba abaqinisekanga ngendlela abanokwenza ngayo ukuze babe ngabazali abaphumelelayo.” Kuyo yonk’ indawo, abazali bakufumanisa kunzima ukukhulisa abantwana babo.

² Kutheni abazali benengxaki yokukhulisa abantwana babo? Isizathu esiyintloko kukuba siphila ‘kwimihla yokugqibela, kumaxesha amanqam ekunzima ukujamelana nawo.’ (2 Timoti 3:1) Ukongezelela, iBhayibhile ithi: “Intliziyo yomntu ityekele ebubini kwasebutsheni bakhe.” (Genesis 8:21) Yaye ulutsha luchanabeke ngakumbi kwiintlaselo zikaSathana, lowo ‘unjengengonyama egqumayo’ ezingela abangenamava. (1 Petros 5:8) Ngokuqinisekileyo abazali abangamaKristu abazimisele ukukhulisela abantwana babo “kwingqeqesho nasekweyiselweni kwengqondo kuYehova” bahlangabezana nemiqobo emininzi. (Efese 6:4) Abazali banokubanceda njani abantwana babo ukuba bakhule babe ngabanquli bakaYehova, abakwaziyo “ukwahlula okulungileyo nokubi”?—Hebhere 5:14.

3. Kutheni uqeqesho nokhokelo lwabazali luyimfuneko ekukhuliseni abantwana ngempumelelo?

³ UKumkani uSolomon osisilumko wathi: “Ubudenge bubotshiwe entliziyweni yenkwenkwe.” (IMizekeliso 13:1; 22:15) Ukuze kukhutshwe obo budenge ezintliziyweni zabaselula, kufuneka abazali babo babaqeqeshe ngothando. Noko ke, abaselula abasoloko belwamkela olo qeqesho. Eneneni, ngokufuthi bayasicaphukela isiluleko kungakhathaliseki ukuba siza nabani. Ngoko ke, abazali bamele bafunde ‘ukuqeqesha inkwenkwe ngokwendlela yayo.’ (IMizekeliso 22:6) Xa abantwana benamathela kolo qeqesho, lunokuthetha ubomi kubo. (IMizekeliso 4:13) Hayi indlela ekubaluleke ngayo ukuba abazali bakwazi oko kubandakanyekileyo ekuqeqesheni abantwana babo!

Uqeqesho—Oko Lukuko

4. Iyintoni intsingiselo eyintloko yegama elithi “uqeqesho” ngokwendlela elisetyenziswe ngayo eBhayibhileni?

⁴ Ngenxa yokuba besoyika ukutyholwa ngokuxhaphaza—emzimbeni, ngamazwi okanye ngokweemvakalelo—abanye abazali bayayeka ukuqeqesha abantwana babo. Asimele sibe noloyiko olunjalo. Igama elithi “uqeqesho” ngokwendlela elisetyenziswe ngayo eBhayibhileni alibhekiseli kulo naluphi na uhlobo lokuxhaphaza okanye inkohlakalo. Igama lesiGrike elithi “uqeqesho” ngokuyintloko libhekisela ekuyaleleni, ekufundiseni okanye ekulungiseni yaye, maxa wambi kwisohlwayo esiqatha kodwa sothando.

5. Kutheni kuyingenelo ukuqwalasela indlela uYehova aqhubana ngayo nabantu?

⁵ Ekunikeleni uqeqesho olunjalo, uYehova uThixo umisela umzekelo omhle. Ethelekisa uYehova nobawo ongumntu, umpostile uPawulos wabhala: “Ngaba bonke abazali ababaluleki abantwana babo? . . . Oobawo abangabantu bayasiqeqesha okwexeshana, yaye basiqeqesha ngendlela abayibona ilungile. Kodwa uThixo usiqeqesha ukuze silungelwe, ngenxa yokuba ufuna sibe ngcwele.” (Hebhere 12:7-10, iContemporary English Version) Ewe, uYehova uyabaqeqesha abantu bakhe ukuze babe ngcwele okanye bahlambuluke. Ngokuqinisekileyo, sinokufunda okuninzi ngendlela yokuqeqesha abantwana ngokuqwalasela indlela uYehova abaqeqesha ngayo abantu bakhe.—Duteronomi 32:4; Mateyu 7:11; Efese 5:1.

Uthando—Amandla Aphembelelayo

6. Kutheni kunokuba nzima ngabazali ukuba baxelise uthando lukaYehova?

⁶ Umpostile uYohane uthi: “UThixo uluthando.” Ngoko ke, uqeqesho lukaYehova lusoloko luqhutywa luthando. (1 Yohane 4:8; IMizekeliso 3:11, 12) Ngaba oku kuthetha ukuba abazali abanomsa wemvelo ngabantwana babo baya kukufumanisa kulula ukuxelisa uYehova kule nkalo? Akunjalo. Uthando lukaThixo luthando lomgaqo. Yaye omnye umphengululi ongumGrike uthi olo thando “alusoloko lusenza ngokuvisisana notyekelo lwemvelo.” UThixo akaqhutywa ziimvakalelo. Ngalo lonke ixesha, ucinga okulungileyo ngokuphathelele abantu bakhe.—Isaya 30:20; 48:17.

7, 8. (a) Nguwuphi umzekelo wokusebenzisa uthando lomgaqo owamiselwa nguYehova kwiinkqubano zakhe nabantu bakhe? (b) Abazali banokumxelisa njani uYehova ekuncedeni abantwana babo bavelise ubuchule bokuphila ngokuvisisana nemigaqo yeBhayibhile?

⁷ Phawula uthando olwabonakaliswa nguYehova kwiinkqubano zakhe namaSirayeli. UMoses wasebenzisa umzekelo ochukumisayo xa wayechaza uthando lukaYehova ngohlanga olutsha lwakwaSirayeli. Siyafunda: “Njengokhozi luxhokonxa indlwane yalo, lundanda phezu kwamantshontsho alo, luwolule amaphiko alo, luwathabathe, luwathwale ngamaphiko alo, uYehova wamkhokela yedwa [uYakobi].” (Duteronomi 32:9, 11, 12) Ukuze lufundise amantshontsho alo ukubhabha, ukhozi “luxhokonxa indlwane yalo,” lolule amaphiko alo ukuze luthundeze amantshontsho alo ukuba abhabhe. Xa intshontsho lentaka lide laphuma endlwaneni, ngokufuthi edla ngokuba phezu kwengxondorha ephakamileyo, unina ‘undanda’ phezu kwelo ntshontsho. Ukuba kubonakala ngathi elo ntshontsho liza kuwa, unina ungena ngaphantsi kwalo, alithwale ‘ngamaphiko akhe.’ Ngendlela efanayo, uYehova walunyamekela ngothando uhlanga olutsha lwakwaSirayeli. Aba bantu wabanika uMthetho kaMoses. (INdumiso 78:5-7) UThixo walunyamekela olu hlanga, ekulungele ukubahlangula abantu bakhe xa besengxakini.

⁸ Abazali abangamaKristu banokuluxelisa njani uthando lukaYehova? Okokuqala, bamele bafundise abantwana babo imigaqo nemilinganiselo efumaneka eLizwini likaThixo. (Duteronomi 6:4-9) Usukelo kukunceda abantwana bafunde ukwenza izigqibo ezivisisana nemigaqo yeBhayibhile. Ngokwenza oku, ngokungathi kunjalo abazali abanothando bandanda phezu kwabantwana babo, beqwalasela indlela abayisebenzisa ngayo imigaqo abayifundileyo. Xa abantwana besiya bekhula yaye, ngokuthe ngcembe benikwa inkululeko engakumbi, abazali abanenyameko bayakulungela “ukungena ngaphantsi” baze ‘babathwale ngamaphiko abo’ nanini na kukho ingozi. Luhlobo luni lwengozi?

9. Yiyiphi ingozi abazali abanothando abafanele bayiphaphele ngokukhethekileyo? Zekelisa.

⁹ UYehova uThixo walumkisa amaSirayeli ngemiphumo emibi yonxulumano olubi. (Numeri 25:1-18; Ezra 10:10-14) Utyekelo lokunxulumana nabantu abangafanelekanga luxhaphakile nanamhlanje. (1 Korinte 15:33) Abazali abangamaKristu bafanele baxelise uYehova kule nkalo. Intwazana eneminyaka eli-15 egama linguLisa yaba nomdla kwinkwenkwe eyayingenayo imilinganiselo yokuziphatha neyokomoya eyayisetyenziswa entsatsheni yayo. ULisa uyabalisa: “Ngoko nangoko abazali bam bakuphawula ukutshintsha kwesimo sam sengqondo baza babonakalisa inkxalabo. Maxa wambi babendiluleka yaye ngamanye amaxesha babendikhuthaza ngobubele.” Bahlala phantsi noLisa baza bamphulaphula ngenyameko, ngaloo ndlela bemnceda ukuba ahlangabezane nengxaki yakhe abayifumanisayo—umnqweno wokwamkelwa ngoontanga.a

Makuhlale Kukho Unxibelelwano

10. UYehova wamisela umzekelo omhle ngaziphi iindlela ekunxibelelaneni namaSirayeli?

¹⁰ Ukuze baphumelele ekuqeqesheni abantwana babo, abazali bamele bazabalazele ukuba kuhlale kukho unxibelelwano phakathi kwabo nabantwana babo. UYehova, nangona ekwazi kakuhle oko kusezintliziyweni zethu, uyasikhuthaza ukuba sinxibelelane naye. (1 Kronike 28:9) Emva kokuba enike amaSirayeli uMthetho, uYehova wamisela abaLevi ukuba bawafundise, yaye wathumela abaprofeti ukuba baqiqe nawo baze bawaluleke. Wabonisa nokuba wayekulungele ukuphulaphula imithandazo yawo.—2 Kronike 17:7-9; INdumiso 65:2; Isaya 1:1-3, 18-20; Yeremiya 25:4; Galati 3:22-24.

11. (a) Abazali banokuhlakulela njani ukuba kubekho unxibelelwano oluhle phakathi kwabo nabantwana babo? (b) Kutheni kubalulekile ukuba abazali baphulaphule ngenyameko xa benxibelelana nabantwana babo?

¹¹ Abazali banokumxelisa njani uYehova xa benxibelelana nabantwana babo? Okokuqala, bamele bazinike ixesha lokuba kunye nabo. Abazali bafanele bawaphephe amazwi abonakalisa ugculelo, njengokuthi, “Yiloo nto nje kuphela? Bendicinga ukuba uza kuthetha into ebalulekileyo”; “Kukungabhadli oko”; “Ubulindele ntoni wena? Ungumntwana into oyiyo.” (IMizekeliso 12:18) Ukuze bakhuthaze abantwana babo ukuba bakhululeke, abazali abalumkileyo bazabalazela ukuphulaphula ngenyameko. Abazali abangenaxesha labantwana babo xa beselula banokufumanisa ukuba nabantwana abayi kuba naxesha labo xa nabo sele bekhulile. UYehova ubesoloko ekulungele ukuphulaphula abantu bakhe. Uyabaphulaphula abo baphethukela kuye ngomthandazo.—INdumiso 91:15; Yeremiya 29:12; Luka 11:9-13.

12. Ziziphi iimpawu abamele babe nazo abazali ezinokwenza kube lula ukuba abantwana babo baye kubo?

¹² Phawula kwakhona indlela ezinye iinkalo zobuntu bukaThixo ezenze kwaba lula ngayo ngabantu bakhe ukuba basondele kuye ngokukhululekileyo. Ngokomzekelo, uKumkani uDavide kaSirayeli wamandulo wona ngokunzulu xa wakrexeza noBhatshebha. Ekubeni wayengumntu ongafezekanga, uDavide wenza ezinye izono ezinzulu ebomini bakhe. Ukanti, akazange asilele ukusondela kuYehova acele ukuxolelwa nokohlwaywa. Ngokungathandabuzekiyo, ububele nenceba kaThixo zabangela ukuba kube lula ngoDavide ukuya kuYehova. (INdumiso 103:8) Ngokubonakalisa iimpawu zobuthixo njengemfesane nenceba, abazali banokunceda ukuba kuhlale kukho unxibelelwano kwanaxa abantwana babo bonile.—INdumiso 103:13; Malaki 3:17.

Bonakalisa Ingqiqo

13. Kuquka ntoni ukubonakalisa ingqiqo?

¹³ Xa bephulaphule oko kuthethwa ngabantwana babo, abazali bamele babonakalise ingqiqo yaye babe ‘nobulumko obuvela phezulu.’ (Yakobi 3:17) Umpostile uPawulos wabhala: “Ukuba nengqiqo kwenu makwazeke ebantwini bonke.” (Filipi 4:5) Kuthetha ntoni ukuba nengqiqo? Enye ingcaciso yegama lesiGrike eliguqulelwe ngokuthi “ingqiqo” ithi “asikokugxininisa koko kubhalwe emthethweni.” Ngoxa bebambelele kwimilinganiselo engqongqo yokuziphatha neyokomoya, abazali banokuyibonakalisa njani ingqiqo?

14. UYehova wabonakalisa ingqiqo njani kwiinkqubano zakhe noLote?

¹⁴ UYehova umisela umzekelo obalaseleyo ekubonakaliseni ingqiqo. (INdumiso 10:17) Xa wabongoza uLote nentsapho yakhe ukuba baphume kwisixeko esonakeleyo saseSodom, uLote ‘waqhubeka ezilazila.’ Kamva, xa ingelosi kaYehova yathi makabalekele kummandla osezintabeni, uLote wathi: “Andinakukwazi ukubalekela kummandla weentaba . . . Khawuncede, kaloku, esi sixeko [saseTsoware] sikufuphi ukuba ndingabalekela kuso kwaye siyinto encinane. Ndiyacela, bendingenako na ukubalekela kuso—asiyonto incinane na?” Wasabela njani uYehova koku? Wathi: “Yabona, ndinolwazelelelo ngawe ukusa nakweli nqanaba, ngokungasibhukuqi isixeko eso uthethe ngaso.” (Genesis 19:16-21, 30) UYehova wayekulungele ukumvumela uLote kwisicelo sakhe. Ewe, abazali bafanele banamathele kwimilinganiselo ebekwe nguYehova uThixo eLizwini lakhe, iBhayibhile. Sekunjalo, basenako ukwenza ngokuvumelana neminqweno yabantwana babo ukuba ayiphazamisani nemigaqo yeBhayibhile.

15, 16. Sisiphi isifundo esinokufundwa ngabazali kumzekeliso ofumaneka kuIsaya 28:24, 25?

¹⁵ Ukubonakalisa ingqiqo kuquka ukulungisa iintliziyo zabantwana ukuze bakulungele ukwamkela isiluleko. Esebenzisa umzekeliso, uIsaya wafanisa uYehova nomlimi, yaye wathi: “Umlimi ulima imini yonke na ukuze ahlwayele imbewu, akhulule aze aerhe umhlaba wakhe? Akathi na, xa egudise umphezulu wawo, ngoko achithachithe ikumin emnyama aze afefe ngekumin, yaye akayibeki na ingqolowa, amazimba, nerhasi endaweni emiselweyo, nehabile njengomda wakhe na?”—Isaya 28:24, 25.

¹⁶ UYehova ‘uyalima ukuze ahlwayele imbewu’ aze ‘akhulule yaye aerhe umhlaba wakhe.’ Ngaloo ndlela ulungisa iintliziyo zabantu bakhe ngaphambi kokuba abaqeqeshe. Xa beluleka abantwana babo, abazali ‘banokuyilima’ njani intliziyo yomntwana wabo? Omnye ubawo waxelisa uYehova xa wayeluleka inkwenkwana yakhe eneminyaka emine ubudala. Xa unyana wakhe wabetha inkwenkwana engummelwane, lo bawo waqala waphulaphula ngomonde unyana wakhe xa ezithethelela. Emva koko, ngokungathi kunjalo, ‘elima’ intliziyo yonyana wakhe, lo bawo wabalisa ibali elithetha ngenkwenkwana eyayithwele ubunzima ngenxa yenye eyayithanda ukuyihlasela. Emva kokuva eli bali, le nkwenkwana yathi lo wayethanda ukuhlasela omnye wayefanele ohlwaywe. Oko ‘kulima’ kwalungisa intliziyo yalo nyana kwaza kwamenza wabona ukuba ukubetha inkwenkwana engummelwane yayikukuyihlasela yaye kwakuphosakele.—2 Samuweli 12:1-14.

17. Sisiphi isifundo esinokufundwa ngabazali ngokuphathelele ukululeka abantwana babo esifumaneka kuIsaya 28:26-29?

¹⁷ UIsaya wahlabela mgama wafanisa isohlwayo sikaYehova nenye inkalo yokulima—ukubhula. Umlimi usebenzisa izixhobo zokubhula ezingafaniyo, kuxhomekeka ekuqineni kweenkozo. Kusetyenziswa intonga xa kubhulwa ikumin emnyama nethambileyo yaye kusetyenziswa umsimelelo xa kubhulwa ikumin, kodwa kusetyenziswa isileyi okanye ivili lenqwelo xa kubhulwa iinkozo eziqinileyo. Sekunjalo, iinkozo eziqinileyo akazibhuli zide zityumke. Ngokufanayo, xa uYehova efuna ukususa nantoni na engathandekiyo ebantwini bakhe, iindlela azisebenzisayo ziyahluka, kuxhomekeka kwiintswelo neemeko ezikhoyo ngelo xesha. Akabi ngqwabalala okanye akhohlakale. (Isaya 28:26-29) Bambi abantwana bayeva ngokubona nje iliso lomzali, kungabikho nto yimbi yenziwayo emva koko. Abanye bafuna ukusoloko bekhunjuzwa, ukanti abanye basenokufuna kuthethwe nabo ngokungqongqo. Abazali abasebenzisa ingqiqo baya kululeka abantwana ngokuvisisana neentswelo zomntwana ngamnye.

Yenza Iingxubusho Zentsapho Zinandipheke

18. Abazali banokwenza njani ukuba kubekho ixesha lokuqhuba isifundo seBhayibhile sentsapho rhoqo?

¹⁸ Phakathi kwezona ndlela zibalaseleyo zokufundisa abantwana bakho sisifundo seBhayibhile sentsapho esiqhutywa rhoqo nengxubusho yeZibhalo yemihla ngemihla. Isifundo sentsapho siba yingenelo kakhulu xa siqhutywa rhoqo. Ukuba akukho xesha limisiweyo lokusiqhuba okanye siqhutywa nje xa kuvela ithuba, kusenokwenzeka ukuba siqhutywe manqaphanqapha. Ngoko abazali bamele ‘bazongele ixesha’ lokuqhuba isifundo. (Efese 5:15-17) Ukukhetha ixesha elisisigxina nelinokulungela bonke entsatsheni kunokuba lucelomngeni. Enye intloko-ntsapho yafumanisa ukuba njengoko abantwana babesiya bekhula, ucwangciso lwabo olwahlukahlukeneyo lwalubangela ukuba kube nzima ukuba intsapho ibe ndawonye yonke. Ukanti, intsapho yayisiba ndawonye ngalo lonke ixesha ngeengokuhlwa zokuya kwiintlanganiso zebandla. Ngoko ke, lo bawo walungiselela ukuba isifundo siqhutywe ngenye yezo ngokuhlwa. Eli cebo laphumelela. Bobathathu abo bantwana bangabakhonzi bakaYehova ababhaptiziweyo ngoku.

19. Abazali banokumxelisa njani uYehova xa beqhuba isifundo sentsapho?

¹⁹ Noko ke, ukuwukha nje phezulu umbandela weZibhalo ebudeni besifundo, akwanele. UYehova wafundisa amaSirayeli abuyiselweyo esebenzisa ababingeleli, ‘ababecacisa uMthetho yaye bechaza intsingiselo yawo,’ ‘besenza kuqondwe oko kwakufundwa.’ (Nehemiya 8:8) Omnye ubawo owaphumelelayo ukunceda bonke abantwana bakhe abasixhenxe ukuba bathande uYehova, wayedla ngokuzivalela egumbini lakhe ngaphambi kokuba kuqaliswe isifundo sentsapho ukuze alungiselele umbandela ababeza kuwufunda ngokweentswelo zomntwana ngamnye. Isifundo wayesenza sinandipheke ebantwaneni bakhe. Omnye woonyana bakhe abasele bekhulile uthi: “Isifundo sasinandipheka. Xa sidlala ibhola emva kwendlu size sibizelwe isifundo sentsapho, ngoko nangoko sasibeka ibhola sibaleke siye esifundweni. Yayiba yenye yezona ngokuhlwa zinandiphekayo evekini.”

20. Yiyiphi enye ingxaki efanele iqwalaselwe enokuvela xa sikhulisa abantwana?

²⁰ Umdumisi wavakalisa oku: “Khangela! Oonyana balilifa elivela kuYehova; isiqhamo sesisu singumvuzo.” (INdumiso 127:3) Ukuqeqesha abantwana bethu kufuna ixesha nomgudu, kodwa xa kusenziwa ngendlela efanelekileyo kunokuthetha ubomi obungunaphakade ebantwaneni bethu. Onjani wona ukuba mhle umvuzo! Ngoko ke, ngamana singaxelisa uYehova xa siqeqesha abantwana bethu. Noko ke, ngoxa abazali bephathiswe imbopheleleko ‘yokukhulisela abantwana kwingqeqesho nasekweyiselweni kwengqondo kuYehova,’ akukho siqinisekiso sokuba baya kuphumelela. (Efese 6:4) Kwanaxa kusenziwa ngeyona nyameko ibalaseleyo, umntwana unokuba ngumvukeli aze ayeke ukukhonza uYehova. Yintoni enokwenziwa kwimeko enjalo? Oko kuya kuxutyushwa kwinqaku elilandelayo.

[Umbhalo osemazantsi]

Unokuphendula Uthini?

• Abazali banokuluxelisa njani uthando lukaYehova oluchazwe kwiDuteronomi 32:11, 12?

• Ufunde ntoni kwindlela uYehova awayenxibelelana ngayo namaSirayeli?

• Ukuphulaphula kukaYehova isicelo sikaLote kusifundisa ntoni?

• Sisiphi isifundo esiphathelele ukululekwa kwabantwana oye wasifunda kuIsaya 28:24-29?

[Umfanekiso okwiphepha 8, 9]

UMoses wafanisa indlela uYehova aqeqesha ngayo abantu bakhe nendlela ukhozi oluwanyamekela ngayo amantshontsho alo

[Imifanekiso ekwiphepha 10]

Abazali kufuneka bazinike ixesha lokuba kunye nabantwana babo

[Umfanekiso okwiphepha 12]

“Yayiba yenye yezona ngokuhlwa zinandiphekayo evekini”